Pōpoaki ʻa e Kau Palesitenisī ʻUluakí
Loto ʻaki hono Vahevahe Fakatāutaha ʻo e Ongoongoleleí
ʻE hanga ʻe he ʻOtuá ʻo ʻai e kakai ʻoku nau mateuteu ke tali e ongoongoleleí ke nau feʻiloaki mo ʻEne kau tamaioʻeiki kuo mateuteu ke vahevahe e ongoongoleleí. Kuo hoko ia ʻi hoʻo moʻuí. ʻE makatuʻunga e lahi ʻene hokó mei he mateuteu ho lotó mo ho ʻatamaí.
ʻOku ʻi ai haku kaungāmeʻa ʻokú ne lotu he ʻaho kotoa ke feʻiloaki mo ha taha kuo mateuteu ke ne tali e ongoongoleleí. ʻOkú ne ʻalu holo pē mo ha tatau ʻo e Tohi ʻa Molomoná. ʻI ha pō kimuʻa pea fai haʻane folaú, naʻá ne fakakaukau ke ʻoua naʻa ʻalu ia mo ha tatau ʻo e tohí kae toʻotoʻo pē ha kaati tufa. Ka ʻi heʻene teuteu ke ʻalú, ne ongo mālohi kiate ia ke: “ʻAve ha Tohi ʻa Molomona.” Naʻá ne faʻo leva ha tohi ʻi heʻene kató.
ʻI he folaú naʻá ne tangutu fakataha mo ha fefine naʻe maheni mo ia, pea naʻá ne fifili, “Ko e tokotaha nai ʻeni?” Naʻá na toe heka fakataha mai pē heʻene fokí. Naʻá ne fakakaukau, “ʻE anga fēfē haʻaku talanoa ki he ongoongoleleí?”
Ka naʻe ʻeke ange ʻe he fefiné kiate ia, “ʻOkú ke totongi vahehongofulu ki ho siasí, ʻikai ko ia?” Naʻá ne tali ange ʻio. Naʻe pehē ʻe he fefiné naʻe totonu ke ne totongi vahehongofulu ki hono siasí ka naʻe ʻikai ke ne fai ia. Naʻá ne ʻeke ange leva, “Ko e hā te ke lava ʻo fakamatalaʻi mai kau ki he Tohi ʻa Molomoná?”
Naʻá ne fakamatalaʻi ko e tohí ko ha folofola, ko ha toe fakamoʻoni ia ʻe taha ʻo Sīsū Kalaisi, pea naʻe liliu ia ʻe he Palōfita ko Siosefa Sāmitá. Ne hangē ʻokú ne mata tokangá, pea naʻá ne ala ki heʻene kató mo pehē ange, “Ne u ongoʻi mālohi ke toʻo mai e tohí ni. ʻOku ou tui naʻe fakataumuʻa ia maʻau.”
Naʻá ne kamata ke lau e tohí. ʻI heʻena māvaé, naʻá ne pehē ange, “Te ta toe talanoa lahi ange ki he meʻá ni.”
Ko e meʻa naʻe ʻikai ke ʻilo ʻe hoku kaungāmeʻá—ka naʻe ʻafioʻi ʻe he ʻOtuá—naʻe fekumi e fefiné ia ki ha siasi. Naʻe ʻafioʻi ʻe he ʻOtuá hono fakatokangaʻi ʻe he fefiné hoku kaungāmeʻá mo ʻene fifili pe ko e hā e meʻa ʻi hono siasí ʻokú ne ʻai ia ke fuʻu fiefiá. Naʻe ʻafioʻi ʻe he ʻOtuá te ne fehuʻi ʻo kau ki he Tohi ʻa Molomoná pea te ne loto fiemālie ke akoʻi ia ʻe he kau faifekaú. Naʻá ne ʻosi mateuteu. Pea naʻe pehē pē mo hoku kaungāmeʻá. ʻE lava foki ke ta mateuteu mo kitaua.
Ko hotau lotó mo e ʻatamaí ʻoku fie maʻu ke teuteuʻí. Naʻe ʻosi fanongo pea manatuʻi ʻe he fefiné e ngaahi lea kau ki he Tohi ʻa Molomoná, mo e Siasi ʻo e ʻEikí ne toe fakafoki maí, pea mo e fekau ke totongi e ngaahi vahehongofulú ki he ʻOtuá. Naʻá ne ongoʻi ʻa e kamata ke fakamoʻoniʻi mai e moʻoní ki hono lotó.
Kuo folofola e ʻEikí te Ne fakahā e moʻoní ki hotau ʻatamaí mo hotau lotó ʻi he Laumālie Māʻoniʻoní (vakai, T&F 8:2). Ko e lahi taha e kakai te mou feʻiloakí kuo nau ʻosi kamata e teuteu ko iá. Kuo nau ʻosi fanongo pe laukonga ʻo kau ki he ʻOtuá mo ʻEne folofolá. Neongo ʻe siʻisiʻi pē hono fakamoʻoniʻi ʻo e moʻoní, ka te nau ongoʻi ia kapau ʻoku fakavaivaiʻi feʻunga honau lotó.
Naʻe mateuteu e fefiné. Naʻe pehē pē foki mo hoku kaungāmeʻá, ko ha tokotaha Siasi naʻá ne ʻosi ako e Tohi ʻa Molomoná. Naʻá ne ʻosi maʻu ha fakamoʻoni ʻoku moʻoni ia, peá ne fakatokangaʻi e fakahinohino mei he Laumālié ke ne ʻave hano tatau. Naʻe ʻosi mateuteu hono ʻatamaí mo hono lotó.
ʻOku teuteuʻi ʻe he ʻOtuá e kakaí ke tali hoʻo fakamoʻoni ki he moʻoni kuo toe fakafoki maí. ʻOkú Ne fie maʻu hoʻo tuí pea ko hoʻo ngāué ke vahevahe taʻe manavahē atu ʻa e meʻa ʻoku fuʻu mahuʻinga kiate koé mo kinautolu ʻokú ke ʻofa aí.
Teuteu ke vahevahe ʻaki hano fakafonu ho ʻatamaí ʻaki e ngaahi moʻoni ʻo e ongoongoleleí he ʻaho kotoa. Te ke ongoʻi e fakamoʻoni ʻa e Laumālié mo e ʻofa lahi ange ʻa e Fakamoʻuí kiate koe mo kinautolu te mou feʻiloakí, ʻi hoʻo tauhi e ngaahi fekaú mo hono fakaʻapaʻapaʻi hoʻo ngaahi fuakavá.
Kapau te ke fai ho fatongiá, ʻe fakautuutu hoʻo maʻu ha aʻusia lelei ke feʻiloaki mo ha kakai kuo nau mateuteu ke fanongo ki hoʻo fakamoʻoni ki he moʻoni—ʻoku ʻoatu mei ho lotó ki honau lotó.
Ko e Faiako mei he Pōpoaki ko ʻEní
Fakakaukau ke lau e pōpoakí ki he fāmilí pea aleaʻi e palakalafi hoko ki he palakalafi fakaʻosí, ʻa ia ʻoku fakamatala ai ʻa Palesiteni ʻAealingi ki he ngaahi founga ki hono fakamālohia e fakamoʻoni ʻa ha tahá. Aleaʻi mo e fāmilí e mahuʻinga ʻo hono fai ha fakamoʻoní ʻi he taimi ʻoku vahevahe atu ai e ongoongoleleí. ʻE lava ke tokoni ki he fānau ʻi he fāmilí hano fakatātaaʻi e founga ʻoku fai ai e fakamoʻoní ki he kaungāmeʻá.
Tā fakatātaaʻi ʻe Dan Burr
Tā fakatātaaʻi ʻo e ʻatá ʻe Christina Smith © IRI; ngaahi tā fakatātā ʻa Adam Koford