Ko Hoku Fuofua Fatongia ʻi he Siasí

Ne u maʻulotu mo hoku fāmilí ʻi he kolo ʻo e Siasí ʻi Felengifeeti ʻi Siamane. Ne tāpuekina kimautolu ʻaki ha kakai lelei ʻi homau kiʻi koló. Ko e taha ʻo kinautolu ʻa homau palesiteni fakakoló, ko Misa Lenisulusi. …

Ne ʻi ai ha ʻaho Sāpate ʻe taha, ne kole mai ʻa Palesiteni Lenisulusi ke ma talanoa. …

[Naʻá ne] fakaafeʻi au ki ha kiʻi lokiako—he naʻe ʻikai ke ʻi ai ha ʻōfisi ʻo e palesiteni fakakoló ʻi homau falelotú—peá ne fakahoko mai ha fatongia ke u hoko ko e palesiteni he kōlomu ʻa e kau tīkoní.

Naʻá ne pehē mai, “Ko ha fatongia mahuʻinga ʻeni,” peá ne tuku ha taimi ke fakamatalaʻi mai hono ʻuhingá. Naʻá ne fakamatalaʻi mai e meʻa ʻokú ne fie maʻu mo e ʻEikí meiate aú mo e founga ʻe lava ke u maʻu ai ha tokoní.

ʻOku ʻikai ke u manatuʻi lelei e meʻa naʻá ne lea ʻakí, ka ʻoku ou manatuʻi e meʻa ne u ongoʻí. Ne u ongoʻi ha Laumālie toputapu mo fakalangi ʻi he taimi naʻá ne lea mai ai kiate aú. Ne lava ke u ongoʻi ko e Siasi ʻeni ʻo e Fakamoʻuí. Naʻá ku ongoʻi ko e fatongia naʻá ne fakahoko maí naʻe ueʻi ia ʻe he Laumālie Māʻoniʻoní. Ne u manatuʻi ʻeku mavahe mei he kiʻi lokiako ko iá ʻoku ou maʻu ha loto falala ange ʻi ha toe taimi kimuʻa. …

… Ne u ongoʻi lāngilangiʻia, mo loto ke ngāue ki he lelei taha te u lavá ke ʻoua naʻá ku ʻai ke loto-mamahi ʻeku palesiteni fakakoló pe ko e ʻEikí.

ʻOku ou ʻilo he taimí ni naʻe mei lava pē e palesiteni fakakoló ia ʻo ui au ki he fatongiá ni pea ʻikai ke toe tokanga ia ki ai. Naʻá ne mei lava ʻo fakahā mai ko e palesiteni foʻou au e kōlomu ʻa e kau tīkoní ʻi he holó pe ʻi ha fakataha ʻa e lakanga fakataulaʻeikí.

Ka naʻá ne tuku ha taimi ke tokoniʻi au ke ʻoua naʻa ngata pē he mahino kiate au ʻa e meʻa ʻoku fai ʻi hoku fatongiá, kae mahuʻinga angé ʻa hono ʻuhingá. …

… Ko ha sīpinga ia kiate au ʻo hono fakaivia e mālohi fakatakimuʻa ʻo e lakanga fakataulaʻeikí ke ne fakaake e laumālié mo ueʻi e lotó ke ngāué.

Palesiteni Dieter F. Uchtdorf, Tokoni Ua ʻi he Kau Palesitenisī ʻUluakí, “Ko Hono ʻUhinga ʻo e Tokoni ʻi he Lakanga Fakataulaʻeikí,” Liahona, Mē 2012, 58.

Ngaahi Fehuʻi ke fakalaulauloto ki ai:

ʻOku anga fēfē hono fakamālohia koe mo kinautolu ʻokú ke ngāue ki aí ʻi hoʻo tali e ngaahi fatongia he Siasí?
Ko e hā nai te ke lava ʻo fai ke teuteuʻi ai koe ke tali ha fatongia he Siasí neongo hoʻo femoʻuekiná?

Fakakaukau ke hiki hoʻo ngaahi fakakaukaú ʻi hoʻo tohinoá pe aleaʻi ia mo ha niʻihi kehe.