Malō e lelei! Ko Tīmote au mei Kievi ʻi ʻIukuleiní
ʻOku nofo ʻa e tamasiʻi taʻu ono ko Tīmoté ʻi Kievi ʻi ʻIukuleini, ko e kolomuʻa ia ʻo ʻIukuleiní pea ko e feituʻu ia ʻoku tuʻu ai e ʻuluaki temipale ʻi hono fonuá. ʻOku fiefia ʻa Tīmote ʻi he temipale foʻoú mo ha ngaahi meʻa lahi kehe. Naʻe tautautefito ʻene fiefiá ki he tō hono ongo ʻuluaki foʻi nifó. Naʻe taʻaki ʻe heʻene tangataʻeikí hono foʻi nifo ʻe taha ʻi he ʻapi ʻo ʻene kui fefiné pea homo pē ʻa e foʻi nifo ia ʻe tahá ʻiate ia pē.
Ne u ʻeke ki hoku kaungāmeʻa ʻe toko tolu he akó pe ʻoku nau tui ki he ʻOtuá. Naʻa nau talamai ʻio. Naʻá ku talaange ʻoku pehē pē mo au. Naʻá ku fakaafeʻi kinautolu ki he ʻoupenihausi ʻa e temipalé. Naʻa nau talamai, “Sai, te mau haʻu.”
Ne u kamata ako kalate he taʻú ni koeʻuhí he ʻoku ako kalate ʻeku tangataʻeikí mo hoku ngaahi tokouá. Ne u ako e founga ʻo e tuki lalahí, ke maluʻi au, mo hiki ha ngaahi meʻa mamafa.
ʻOku ou saiʻia mo hoku tokouá ke langa ha ʻū fale, ngaohi ha ngaahi kā, mo ha fanga kiʻi siana ʻaki ʻema meʻa vaʻinga poloká.
Ne ngāue hoku ngaahi tokouá he ʻoupenihausi ʻa e temipalé. Ne u loto ke ngāue ai, ka ʻoku ou fuʻu kei siʻi. Ne tuʻo ua haʻaku ʻi he temipalé he ʻaʻahi takai ʻa e ʻoupenihausí. Naʻá ku fuʻu saiʻia ai.
Ne akoʻi au ʻe hoku ongo taʻoketé he faʻahitaʻu māfaná ki he vaʻinga soká. Naʻá na akoʻi au ke u lele takai he malaʻé mo maluʻi e koló. Neongo ʻokú na matuʻotuʻa ange, ka ʻoku ou kei vaʻinga pē mo kinaua mo hona kaungāmeʻá.
ʻOku ou saiʻia heʻeku fanga kiʻi kaá. ʻOku ʻikai ke nau maumau mo mafahifahi koeʻuhí he naʻe ngaohi ʻaki e ukamea. Kuo fuoloa ʻeku tauhi kinautolú, pea ʻikai ke lahi ha makohikohi.
ʻOku ou saiʻia moʻoni he mohe mo ʻeku meʻa vaʻingá he poʻulí. ʻI he taimi ʻoku mohe ai hoku ngaahi tokouá, ʻoku ou kei vaʻiga pē mo ʻeku meʻa vaʻingá.
Ngaahi faitā ʻa Chad E. Phares