Ko fē e taimi ʻoku ʻikai totonu ai ke vahevahe e ngaahi aʻusia fakalaumālié?

Ko ha founga fakaofo hono langa hake e tui mo e fakamoʻoni ʻa e niʻihi kehé ʻi hono vahevahe ʻetau ngaahi aʻusia fakalaumālié mo kinautolu ʻoku nau loto ke fanongo ki aí. Hangē ko ʻení, kapau ʻoku ueʻi koe ke ke fakamatalaʻi e tali ki haʻo lotu, ʻe lahi ange ai e tui ʻa e niʻihi kehé ʻe lava ke tali foki mo ʻenau lotú. ʻOku ʻikai fakapotopoto ke ke vahevahe haʻo aʻusia fakalaumālie ʻoku ngali kehe pe fakatāutaha ʻoku fuʻu loloto, tukukehe kapau ʻe toki ueʻi koe ʻe he Laumālié ke fai pehē.

Naʻe pehē ʻe Palesiteni Poiti K. Peeka, ko e Palesiteni ʻo e Kōlomu ʻo e Kau ʻAposetolo ʻe Toko Hongofulu Mā Uá:

“Kuó u ako ʻoku ʻikai ke hoko mai maʻu pē kiate kitautolu ʻa e ngaahi aʻusia fakalaumālie mālohi mo makehé. Ka ʻo ka hoko, ʻoku fakataumuʻa pē ia ke fakamaamaʻi, fakahinohino, pe fakatonutonu kitautolu. …

“ʻOku ou tui foki ʻoku ʻikai fakapotopoto ke hokohoko atu hono talanoaʻi e ngaahi aʻusia ʻoku ngali kehé. ʻOku totonu ke maluʻi lelei kinautolu pea toki vahevahe pē ʻi hano ueʻi koe ʻe he Laumālié ke ke fakaʻaongaʻi ia ke tāpuekina ai ha niʻihi kehe. …

“ʻOku ou tui ʻoku totonu ke tau tauhi e ngaahi meʻá ni pea fakalaulauloto ki ai ʻi hotau lotó.”¹