Lotu ʻo e Fakalakalaka Fakatāutahá
Ne akonekina au heʻeku ongomātuʻá ke lotu ʻi he kotoa ʻeku moʻuí, ka ʻi heʻeku tupu haké, ne toki fai pē ʻeku lotu fakatāutahá he poʻulí. Ne u fakakaukau ʻoku feʻunga pē ia—ʻo aʻu ki heʻeku toki hū ki he Kau Finemuí.
ʻI he taimi ne ʻomi ai kiate au e kiʻi tohi tufa Fakalakalaka Fakatāutahá, ne u lau kotoa e ngaahi taumuʻá. Ne ʻi ai ha taumuʻa ʻe taha naʻa ne maʻu ʻeku tokangá: ne pehē ʻe ha aʻusia mahuʻinga he tuí ʻoku totonu ke u lotu he pongipongí mo e efiafí. Ne u ʻeke pē kiate au, “Ko e hā ka fai ai ia he pongipongí? ʻE fuʻu faingataʻa ia kiate au.”
Ne ʻalu pē taimí mo e ʻikai ke u fakahoko e taumuʻa ko iá. Ka naʻá ku loto ke fai ia, neongo naʻe faingataʻa, ka naʻá ku falala ki he ʻEikí.
Ne hangē ʻoku tatau pē meʻa kotoa he kamatá. Ka naʻe ʻi ai ha meʻa ʻi loto ʻiate au ne kamata ke liliu. Ne hangē ne u ongoʻi fakapapauʻi ange e meʻa kotoa ne u faí. Ne ʻikai toe hoko ʻeku faʻa kē mo hoku fāmilí. ʻI heʻeku ʻā pongipongia ke ʻalu ki he lotú, ne ʻikai ke u toe ongoʻi helaʻia. Ka naʻá ku maʻu ha holi lahi ke ʻalu.
Ne ʻi ai ha ʻaho ne u fakakaukau ai he ʻikai te u maʻu ha taimi feʻunga ke fai ai e meʻa kotoa ʻoku fie maʻu ke u faí. ʻI heʻeku ʻā hake he ʻaho ko iá, ne fai haʻaku lotu—ʻe ʻi ai ha meʻa ʻe liliu—neongo ne ʻikai ke u fuʻu falala ki ai. Ne u ofo he meʻa naʻe hokó: ne u lava ke fakahoko kotoa e meʻa ne fie maʻu ke u faí! Ne u ongoʻi mā ʻi he ʻikai ke u falala kakato ki he ʻEikí ka naʻá ku fuʻu fiefia ʻi Heʻene tali ʻeku lotú.
ʻOku ou lotu ʻeni he pongipongi mo e efiafi kotoa pē, pea kuo liliu ʻaupito ʻeku moʻuí.
ʻOku ou ʻilo ʻoku fanongo maʻu pē e Tamai Hēvaní kiate kitautolu mo tali ʻetau lotú. ʻOku fie maʻu pē ke tau tui kiate Ia. He ʻikai te Ne teitei liʻaki kitautolu. ʻOkú Ne ʻI ai. ʻOku fie maʻu ke tau ʻalu kiate Ia. ʻOku ou ʻilo ʻoku moʻoni e talaʻofa ko ia ke “tukituki, pea ʻe toʻo ia kiate kimoutolu.” (Mātiu 7:7). Ko e meʻa pē ke tau faí ko e tūʻulutui ʻo lotu mo falala ki Heʻene taimí, kae ʻikai ko ʻetau taimí. ʻOku ou houngaʻia kiate Ia ʻi he polokalama Fakalakalaka Fakatāutahá mo e meʻafoaki fakaofo ʻo e lotú.