Ki Hono Fakamālohia ʻo e Toʻu Tupú
Tauʻatāina ke Filí mo e ʻEkeʻi Meiate Kita ʻa e Meʻa ʻOkú Te Fai pe Taʻe Faí
ʻOku ʻi ai ha talanoa ki ha motuʻa Selokī ʻo e Kakai Tuʻufonua ʻo ʻAmeliká naʻá ne akoʻi hono mokopuna tangatá ʻo kau ki he moʻuí. Naʻá ne talaange ki he kiʻi tamasiʻí, “ʻOku lolotonga fai ha tau ʻi loto ʻiate au.”
“Ko ha tau fakalilifu, ko e tau he vahaʻa ʻo e ongo ulofi. Ko e ulofi ʻe tahá ʻoku kovi: ʻokú ne ʻita, meheka, loto-mamahi, fakaʻiseʻisa, manumanu, kākā, fakaʻofaʻia pē ʻiate ia, ongoʻi halaia, fehiʻa, ongoʻi māʻulalo, loi, hīkisia, fielahi, mo fiemahuʻinga.”
Naʻá ne hoko atu, “Ko e ulofi ʻe tahá ʻoku lelei: ʻokú ne fiefia, nonga, ʻofa, ʻamanaki lelei, angamalū, anga fakatōkilalo, angalelei, angatonu, angaʻofa, mahino, fie foaki, faitotonu, manavaʻofa mo tui. ʻOku fai pē mo e tau pehē ʻiate koe—pea pehē foki ki he taha kehe kotoa pē.”
Tā fakatātā ʻa Allen Garns
Ne fakakaukau ki ai e mokopuna tangatá ʻi ha kiʻi miniti peá ne ʻeke ki heʻene kui tangatá, “Ko fē e ulofi ʻe mālohí?”
Ne faingofua pē e tali ʻa e motuʻa Selokií, “Ko e ulofi ko ia ʻokú ke fafangá.”
Tauʻatāina ke Filí mo e Moʻui Kimuʻa he Māmaní
ʻI ha taimi fuoloa ʻaupito, ʻi heʻetau nofo kotoa ʻi he ʻao ʻo ʻetau Tamai ʻi Hēvaní, naʻe fai ai ha Fakataha Lahi. Ne ʻi he fakataha ko iá ʻetau Tamaí, ʻo finangalo ke tau maʻu e fiefia mo e nekeneka tatau mo ia ʻokú Ne fiefia aí, pea ʻomi ʻEne palani ke tau haʻu ki he māmaní, ʻo maʻu ha sino kakano mo e hui, pea aʻusia e meʻa fakamamahi mo fakafiefia ʻo e moʻui ní. Te tau lava ke fili ke tauhi ʻEne ngaahi fekaú pea hoko ʻo tatau mo Ia pe fili ke ʻoua ʻe tauhi ʻEne ngaahi fekaú pea ʻikai ke tau maʻu e fiefia mo e nekeneka naʻá Ne talaʻofa maí.
Ko e konga mahuʻinga e palani ʻa ʻetau Tamaí ko ʻetau tauʻatāina ke filí. ʻOku ui e meʻaʻofa ko ʻení ko e tauʻatāina ke filí, ko e mālohi ke fai ha filí. ʻOku hoa maʻu pē e tauʻatāina ke filí mo e ʻekea meiate kita ʻa ʻete ngaahi ngāué. ʻOku tau taliui fakafoʻituitui ki he ngaahi fili ʻoku tau faí.
ʻI he taimi ne folofola ange ai e Tamai Hēvaní pe ko hai te ne fakahoko e palaní, ne loto ʻa Lusifā ke ne huhuʻi kotoa e faʻahinga ʻo e tangatá ʻo fakatatau pē ki heʻene tuʻutuʻuní, ʻa ia ne ʻikai ke kau ai e tauʻatāina ke filí pea te ne maʻu kotoa mo e nāunaú. ʻE hanga ʻe he meʻá ni ʻo veuki e palani taʻengata ʻa e ʻOtuá ki he fiefiá.
Ne loto ʻa Sīsū Kalaisi ke Ne hoko ko e Fakamoʻuí ʻi he palani ʻa e Tamaí. Naʻá Ne fili ke talangofua ki he palani ʻa e Tamaí. ʻOku tau tui ki hotau taʻokete lahi ko Sīsū Kalaisí, ʻo ʻiloʻi ʻoku mahuʻinga Hono misioná ki heʻetau lava ʻo toe foki hake ki he puleʻanga ʻo ʻetau Tamaí.
Ko e hā e meʻa ne hoko kia Lusifaá? Naʻe folofola e Tamaí:
“Ko ia, ko e meʻa ʻi he angatuʻu ʻa Sētane kiate aú, ʻo ne feinga ke fakaʻauha ʻa e tauʻatāina ke fili ʻa e tangatá, ʻa ia ko au, ko e ʻEiki ko e ʻOtuá, kuó u foaki kiate iá, pea ko e tahá foki, ke u foaki foki kiate ia ʻa hoku mālohi ʻoʻokú; ko ia ʻi he mālohi ʻo hoku ʻAlo pē taha naʻe Fakatupú, naʻá ku pule ke kapusi hifo ia ki lalo;
“Pea naʻá ne hoko ko Sētane, ʻio, ko e tēvoló, ko e tamai ʻa e ngaahi loi kotoa pē, ke kākaaʻi mo fakakuihi ʻa e tangatá, pea ke tataki pōpula ʻa kinautolu ʻi heʻene faʻitelihá, ʻio ʻa kinautolu kotoa pē ʻe ʻikai tokanga ki hoku leʻó” (Mōsese 4:3–4).
Koeʻuhí ko e tauʻatāina ke filí ko ha tefitoʻi moʻoni taʻengata he ʻikai ke maumauʻi ia ʻe he Tamai Hēvaní, ʻo mole ai meiate Ia e vahe tolu ʻe taha ʻo ʻEne fānaú, ʻa ia ne nau fili ke muimui ʻia Sētané.
Tauʻatāina ke Filí mo e Moʻui Fakamatelié
Ko e hā leva e taumuʻa ʻo e moʻui ʻi he māmaní? Ko e tefitoʻi taumuʻa ʻe tahá ke fakamoʻoniʻi ʻoku tau faivelenga (vakai, ʻĒpalahame 3:24–25). ʻOku tau malava ke ʻilo e leleí mei he koví. ʻOku tau maʻu e mālohi ko iá mei he ʻOtuá “ke fili … kae ʻikai fakamālohiʻi ke ngāue” (2 Nīfai 2:26). Ko hono aofangatukú, te tau maʻu e puleʻanga ʻoku tau fie maʻú ʻo fakatatau ki he ngaahi fekau ʻoku tau talangofua ki aí, mo e ngaahi ouau ʻoku tau maʻú, pea mo e ngaahi fuakava ʻoku tau tauhí.
Pea hangē ko hono fakamatalaʻi ʻe he motuʻa Selokī potó, ʻoku makatuʻunga pē ʻiate ia pe ko fē e ulofi naʻá ne fafangá. Naʻá ne maʻu e tauʻatāina ke filí, pea ko ia pē tokotaha ʻe ʻekea mei ai ʻene filí. Te ne nofo pē mo e ngaahi nunuʻa ʻo ʻene ngaahi filí.
Ko e toʻu tupu kimoutolu ʻo ha hako fakaʻeiʻeiki. Ne ʻomi kimoutolu ki he māmaní ʻi he taimi ʻo e kakato e ongoongoleleí. Ne papitaiso pea hilifakinima koe ke lava ke ke maʻu e Laumālie Māʻoniʻoní kapau te ke loto ki ai ke hoko maʻu pē ko ho takaua. Naʻá ke fai ha ngaahi fuakava he papitaisó. Ki he kau talavoú, ne toe tānaki atu mo e ngaahi fuakava ne mou fai ʻi he lakanga fakataulaʻeikí.
ʻOkú ke maʻu e tauʻatāina ke fili ki he moʻui taʻengatá ʻaki hano tauhi koe ke ke maʻa mo taau ke hū ki he temipale māʻoniʻoni ʻo e ʻOtuá pea maʻu mo e ngaahi ouau te ke lava ai ʻo toe foki ki he ʻao ʻo e Tamaí. Te ke lava ʻo fili e tāpuaki ʻo e moʻui taʻengatá, ke ke moʻui mo ho fāmilí ʻo tatau mo e ʻOtuá ʻi he kotoa ʻo ʻitānití. ʻOku malava ke ke maʻu kotoa e meʻa ʻoku maʻu ʻe he Tamaí. Ko koe pē te ke fai e filí.
Fakaʻaongaʻi fakapotopoto hoʻo tauʻatāina ke fili ne foaki atu ʻe he ʻOtuá.