Ko e Kautau Mālohi Tahá
Tā fakatātaaʻi ʻe Scott Greer
Ne u palani ke u hoko ko ha ʻōfisa fakakautau. Ka ʻi heʻeku fakakaukau ki hoku kahaʻú, ne u manatuʻi e fehuʻi ʻeku fineʻeikí, “Ko fē e taimi ʻokú ke palani ai ke ke ʻalu ʻo ngāue fakafaifekau taimi kakató?”
Talu ʻeku kei siʻi mo ʻeku manako he ngaahi talanoa ʻa e kau taki ʻo e Siasí ne ngāue fakakautaú. Ko e tokolahi ʻo kinautolu ne nau hoko ko e kau tuʻukimuʻa he taú pea mo ha ngaahi sīpinga maʻongoʻonga ʻo e toʻá mo e anga fakatōkilaló ʻi honau ngaahi fonua tupuʻangá. Ne hanga ʻe heʻenau ngaahi aʻusiá ʻo fakaʻaiʻai au ke u kau ki he kautau hoku fonuá.
ʻI hoku taʻu 13 ne u hū ki ha ʻapiako ne ʻiloa he fefeka hono ngaahi tuʻutuʻuni fakakautaú mo hono akoʻi e kau sōtia ʻalu laló. Ne fuʻu lahi e meʻa ke faí. Ne u faʻa helaʻia ʻaupito he ʻosi ʻa e ʻahó pea faingataʻa ke ako e folofolá mo kau atu ki he seminelí.
ʻI hoku taʻu ua he ʻapiakó ne u fokotuʻu ha palani ki heʻeku moʻuí: ko e hili e ʻosi ʻeku akó ʻi hoku taʻu 18, te u hū hangatonu ai pē ki he ʻapiako ʻoku fai ai hono akoʻi e kau ʻōfisá ʻo ʻosi mei ai hili ha taʻu ʻe fā ko ha ʻōfisa he Kautau ʻa Kuatemalá. Ne hangē ʻe hoko kotoa ʻeku ngaahi fakaʻamú mo e misí.
Ne ʻi ai ha ʻaho ʻe taha ne u tala ange ai ʻeku palaní ki heʻeku fineʻeikí, peá ne ʻeke mai, “Ko fē e taimi ʻokú ke palani ai ke ke ʻalu ʻo ngāue fakafaifekau taimi kakató?” Ne talu mei he ʻaho ko iá mo e nofo maʻu pē ʻi hoku ʻatamaí ʻene fehuʻí he taimi kotoa ʻoku ou fakakaukau ai ki hoku kahaʻú.
Ne kei lahi pē e meʻa ke faí, ka naʻe kamata ke u toe tokanga ange ki heʻeku ako fakalaumālié. Ne u kamata ʻalu ki he seminelí, ngāue mo e kau faifekau taimi kakató mo kau he ngaahi ʻekitivitī ʻa e Siasí. Ne u muimui ki he faleʻi hoku taʻokete ne lolotonga ngāue fakafaifekau taimi kakató, pea kamata foki ke lau e Tohi ʻa Molomoná.
Ne fuʻu lahi ʻemau akó he ʻaho takitaha ke hoko ko ha sōtia puna fakamalu ʻeá. Ne mau mei totolo pē heʻemau foki ki homau ʻapitanga sōtiá he fuʻu tōtuʻa ʻa e akó, ka naʻá ku maʻu maʻu pē ha ivi ke lau e Tohi ʻa Molomoná. Ne hanga ʻe he lau fakaʻaho ʻo e folofolá ʻo fakamālohia hoku laumālié mo tokoniʻi au he hokohoko atu ʻeku akó.
Ne fakatahataha mai haku ngaahi kaungāmeʻa tokolahi ʻi ha efiafi ʻe taha ki hoku mohengá ʻo ʻeke mai ha ngaahi fehuʻi kau ki he Tohi ʻa Molomoná pea mo e Lea ʻo e Potó. Ko hoku faingamālie ia ke hoko ko e sōtia lelei tahá—ko ha sōtia ʻokú ne taukapoʻi e moʻoní pea ʻomi e tauʻatāiná ʻi hano fakamoʻoni pau mo moʻoni ʻo e Tohi ʻa Molomoná.
ʻI hoku taʻu 19, ne u hū ki he sōtiá—ʻa e kautau ʻa e ʻOtuá, ko e kautau mālohi tahá ia. Ne u maʻu ha faingamālie ke tuʻu fakataha mo e kau ʻeletā mo e kau sisitā fakaʻeiʻeiki ʻo Saioné ʻi he patalione ʻo e Misiona Mekisikou Puepalaá. ʻOku tau ʻai e teunga tau ʻo e ʻOtuá, ʻo tau malangaʻi e ongoongoleleí mo tauʻi e tauʻatāiná ʻaki e mālohi mo e loto-toʻa.
ʻOku tau fepaki mo e ngaahi mālohi ʻo e fakapoʻulí, ka ʻe ikuna maʻu pē e ʻOtuá. ʻOku ou loto ke hokohoko atu ʻeku hoko ko ha sōtia loto-toʻa, ʻo kau ki hotau Tuʻí. ʻOku tau maʻu ha ngaahi meʻatau mālohi: ko e Tohi ʻa Molomoná, ko e Laumālie Māʻoniʻoní, pea mo e kakato ʻo e ongoongoleleí. ʻOku tataki kitautolu ʻe he kau palōfita moʻuí ke tau ikuna. Kapau te tau ako mo teuteuʻi kitautolu ki he hāʻele mai hotau Fakamoʻui ko Sīsū Kalaisí, te Ne ʻomi maʻatautolu ha kalauni ʻo e lāngilangí ʻi he nāunau fakasilesitialé.