Ofi ki he Taimi Konifelenisi Lahí
Te ke lava ʻo teuteu ki he konifelenisi lahí ʻaki haʻo kosi e ngaahi laʻi pepa ʻi laló pea fakapipiki e ongo tulikí ke ne faʻu ha foʻi seini. Toʻo ha foʻi hoko mei he seiní he ʻaho takitaha ʻi ha uike ʻe ua kimuʻa he konifelenisí, pea fai e meʻa ʻoku hiki ʻi he laʻi pepá. ʻI he ʻalu ke nounou ange ʻa e seiní, ʻoku mahino kuo ofi ange e taimi konifelenisí!
-
Laukonga kau ki he Liahona ʻa Līhaí (vakai, 1 Nīfai 16:10, 28, 29 mo e ʻAlamā 37:38–40). ʻOku anga fēfē e hoko e ngaahi lea ʻa e kau palōfitá ʻo hangē ha Liahona maʻá e ngaahi fāmilí he ʻahó ni?
-
Kumi ha ngaahi tā ʻo e palōfitá mo e kau ʻaposetoló ʻi he Liahona ʻo Mē pe Nōvemá pe ʻi he lds.org/church/leaders pea ako ke ʻilo honau ngaahi hingoá.
-
Fakakaukau ne kole atu ke ke fai ha lea ʻi he Palaimelí kau ki he kau palōfitá. Ko e hā e meʻa te ke lea ʻakí?
-
Hivaʻi e himi “Fakamālō ki he ʻOtua” (Ngaahi Himi, fika 10).
-
Ko e hā ha kaveinga he ongoongoleleí te ke loto ke ako lahi ange ki ai lolotonga e konifelenisí? Hiki ha lisi ʻo e ngaahi foʻi lea ke fakafanongo ki aí.
-
Lotua ha tokoni ke tukutaha e tokangá mo ongoʻi e Laumālié lolotonga e konifelenisí. Te ke lava foki ke lotua mo e kau taki ʻo e Siasí ʻe leá.
-
Vahevahe mo hoʻo mātuʻá pe kau mēmipa ʻo e fāmilí e ʻuhinga ʻokú ke vēkeveke ke fai mo aʻu ki he konifelenisí.
-
Laukonga ʻo kau ki he lea ʻa e Tuʻi ko Penisimaní ki hono kakaí (vakai, Mosaia 2:1, 5, 9, 41). ʻOku anga fēfē e faitatau ʻa e fakataha ko iá mo e konifelenisi lahí?
-
Tā ha fakatātā ʻo e palōfita mei he folofolá ʻokú ke saiʻia aí.
-
ʻAi ha tohinoa te ke lava ke hiki ai ha fakamatala pe tā ha ngaahi fakatātā kau ki he ngaahi leá he lolotonga ʻa e konifelenisí. Te ke maʻu ha kiʻi tohi fakamatala ki he konifelenisí ʻe lava ke paaki atu ʻi he lds.org/general-conference/children.
-
Hivaʻi e hiva “Muimui he Palōfitá” (Tohi Hiva ʻa e Fānaú, 58–59).
-
Laukonga ʻo kau ki he kau Nīfai angatonú ʻi he 4 Nīfai 1:12–13, 16. Ko e hā ne nau fai he taimi ne nau fakataha aí?
-
Lau ʻa e talanoa “Kaungāmeʻa Fakafaifekaú” ʻi he peesi 60 ʻo e pulusinga ko ʻení.
-
Talanoa kau ki he akonaki ko ʻeni meia ʻEletā Lāsolo M. Pālati: “Kapau te ke fakafanongo ki he palōfita moʻuí pea mo e kau ʻaposetoló pea muimui ki heʻenau faleʻí, ko e moʻoni he ʻikai ke ke hē” (“Naʻa Nau Lea Kiate Kitautolu,” Liahona, Siulai 2001, 116.
Tā fakatātaaʻi ʻe Brad Teare