Ngaahi Fakakaukau Maʻá e Efiafi Fakafāmili ʻi ʻApí
ʻOku maʻu ʻi he makasini ko ʻení ha ngaahi fakamatala mo e ʻekitivitī ʻe malava ke ngāue ʻaki maʻá e efiafi fakafāmili ʻi ʻapí. Ko e niʻihi ʻeni ʻo e ngaahi sīpingá.
“Ko Hono Langaki e Tui ʻia Kalaisí,” peesi 12: ʻI he fakaʻosinga ʻo e fakamatalá, ʻoku talanoa ʻa ʻEletā Kulisitofasoni kau ki he tuí ko ha tefitoʻi moʻoni ʻo e ngāue mo e mālohi. Fakakaukau ke aleaʻi fakafāmili ʻa e ngaahi faingataʻa ʻe niʻihi ʻoku mou fehangahangai mo iá mo e ngaahi taumuʻa te mou lava ʻo fokotuʻu ke ikunaʻi kinautolú. Fili ha taumuʻa ʻe taha ke mou ngāue ki ai he uiké ni, manatuʻi ʻoku tau maʻu e mālohi ke fai e ngaahi meʻa kotoa pē ʻaki e tokoni ʻa Sīsū Kalaisí, ʻo fakatatau ki Hono finangaló mo ʻEne taimí. ʻI ha efiafi fakafāmili hoko mai, te mou ala aleaʻi ʻa e fakalakalaka homou fāmilí ʻi he taumuʻa ne mou fokotuʻú.
“Ko Hono Vahevahe e Ongoongoleleí ʻaki Haʻo Fakamatalaʻi pē Koe,” peesi 16: ʻI hoʻo vahevahe e ngaahi talanoa mei he makasiní, kole ange ki ho fāmilí ke fakakaukau ki he ngaahi kaungāmeʻá mo e kau mēmipa ʻo e fāmilí ʻa ia te ke lava ʻo vahevahe ki ai e ongoongoleleí. Aleaʻi e founga te ke hoko ai ko ha kaungāmeʻá pea fakafanongo ʻaki e ʻofá koeʻuhí ko e hoko mai pē e faingamālie ke fai ai ha fakamoʻoní, te ke mateuteu ki ai.
“Lotu ʻo e Fakalakalaka Fakatāutahá,” peesi 58: Lau e meʻa ne hoko kia ʻAmeliá ʻo kau ki he ako ke lotu he pongipongí mo e poʻulí. Fakakaukau ke lau ʻa e meʻa ʻoku akoʻi ʻe ʻAmuleki ʻi he ʻAlamā 34:17–27 ki he founga totonu ʻo e lotú. Mahlalo naʻá ke fie maʻu ke fehuʻi ki he kau mēmipa ʻo e fāmilí pe ko e hā e fakakaukau ʻoku ʻomi ʻe he ngaahi veesi ko ʻení kau ki he founga mo e taimi ʻoku totonu ke tau lotu aí. Fakaʻosi ʻaki haʻo fai ha fakamoʻoni ki he mālohi ʻo e lotú.
“Kaungāmeʻa Faifekaú,” peesi 60: Hili hoʻo lau e fakamatalá, fakakaukau ke ʻai ha lisi ʻo e ngaahi ʻekitivitī mo e ngaahi fakataha ʻa e Siasí ʻoku teu ke fakahokó ʻa ia ʻe ngali fakamānako ki he ngaahi kaungāmeʻa ʻo e kau mēmipa fakafoʻituitui ʻo e fāmilí. Mahalo naʻá ke fie maʻu ke fakafaivaʻi ha ngaahi founga ke fakaafeʻi mai ʻaki ha kaungāmeʻa ki ha taha ʻo e ngaahi ʻekitivitií. Talanoa ki hono ʻuhinga ʻo e hoko ko ha kaungāmeʻa moʻoní, tautautefito kiate kinautolu ʻoku ʻikai ke kau ki he Siasí. Fakaʻosi ʻaki hano faʻu ha palani ke fetuʻutaki ki he kaungāmeʻá pea fakahoko ha fakaafe ki ai.
Ko ha Fāmili Fiefia Kimautolu
Ko e efiafi fakafāmili ʻi ʻapi ʻoku mau manatu lelei taha ki aí ko e taimi naʻa mau fakahoko ai ia ʻi ha taimi naʻe faingataʻa. Koeʻuhí ko ha liliu he pulé, naʻe faingataʻaʻia hoku husepānití ʻi he ngāueʻangá pea naʻá ne ongoʻi loto-foʻi.
Naʻa mau fakapapauʻi ke fakahoko ʻemau efiafi fakafāmili ʻi ʻapí he uike ko iá ko hono fakalāngilangiʻi ai ia. Naʻe faitohi e mēmipa kotoa pē homau fāmilí ʻo fakamālō kiate ia, ʻo fakahaaʻi ange ʻa e ʻuhinga ʻoku mau ʻofa ai ʻiate iá mo e meʻa ʻoku mau fakaʻamua maʻaná. Pea mau ʻai leva ha tohi faʻoʻanga tā ʻo ʻai ai e ngaahi tā ʻo e fāmilí he ngaahi taimi mahuʻinga, hangē ko e ngaahi ʻaho fakamanatu, mali, sila, fāʻeleʻi, mo e ngaahi meʻa kehe pē ne hokó. Ne mau hiki ha fakamatala ʻi he tā takitaha, pea fakaʻosiʻaki ʻa e “Pea ko ia ko ha fāmili fiefia kimautolu.” ʻI he fakaʻosi ʻo e polokalama he efiafí, ne u hivaʻi mo ʻeku tama fefiné ha foʻi hiva Palaimeli ʻoku ʻi ai ʻa e kupuʻi lea tatau pē (vakai, “Ko Ha Fāmili Fiefia,” Tohi Hiva ʻa e Fānaú, 104).
Lolotonga hono fakahoko e efiafi fakafāmili ʻi ʻapí ne mau lava ʻo ongoʻi ʻa e ʻofa ʻa e Fakamoʻuí kiate kimautolú mo e ʻofa ʻoku mau maʻu ki he taha kotoa pē.
ʻOku ou houngaʻia he fekau ne ueʻi fakalaumālie ke fakahoko e efiafi fakafāmili ʻi ʻapí. ʻOku fakamālohia kimautolu ʻi heʻemau talangofua ki aí, mo hono teuteuʻi kimautolu ke hoko ko ha fāmili taʻengatá.
Keniā Tuate to Sanitosi, Palāsila