Tupuʻanga ʻo e Tohi ʻa ʻĒpalahamé

ʻE lava ke tau ʻunu ʻo ofi ange kia Sīsū Kalaisi ʻi he fekumi ki ha tali ki heʻetau ngaahi fehuʻí kapau te tau fakaʻaongaʻi ʻa e ngaahi tefitoʻi moʻoni ʻoku falalaʻangá. ʻOku mahuʻinga hono ako ʻo e ngaahi maʻuʻanga tokoni falalaʻangá ʻi he taimi ʻoku tau fekumi ai ki ha tali ki he ngaahi fehuʻi fekauʻaki mo e ongoongoleleí. Vakai ki he tefito ko e “Fekumi ki he Ngaahi Maʻuʻanga Tokoni Falalaʻangá” ke vakaiʻi ha ngaahi tokoni lahi ange ki hono tali ʻo e ngaahi fehuʻí.

Vakai Fakalūkufuá

Ko e tohi ʻa ʻĒpalahamé ko ha tohi ia ʻo e folofola naʻe ueʻi fakalaumālie kuo foaki mai ʻi he fakahā ki he Palōfita ko Siosefa Sāmitá. ʻOku muimui ia ʻi he fakamatala fakatohitapu ki he pēteliake ʻo e kuonga muʻá ʻi ha ngaahi founga ʻe niʻihi pea tānaki mai mo ha fakamatala mahuʻinga fekauʻaki mo ʻene moʻuí mo e ngaahi akonakí. ʻOku ʻi ai ha ngaahi moʻoni mahuʻinga fekauʻaki mo e natula ʻo e ʻOtuá, ko Hono vā fetuʻutaki mo kitautolu ko ʻEne fānaú, pea mo e taumuʻa ʻo e moʻui ko ʻení.

Naʻe fakahā ʻa e tohi folofola ko ʻení kia Siosefa Sāmita ʻi he kamataʻanga ʻo e 1835 ʻi ha taimi naʻá ne ako ai ha ʻū takainga tohi faka-ʻIsipite fakakuongamuʻa naʻe fakatau mai ʻe he Kāingalotú. Naʻe tokolahi ha kakai naʻa nau mamata ʻi he takainga tohí, ka ‘oku ʻikai ke ʻi ai ha fakamatala ‘o ha siotonu ki hono fakahoko ʻo e liliú. Ko e fanga kiʻi konga siʻi pē ʻo e takainga tohi kiliʻi kaho naʻe maʻu ʻe Siosefá ʻoku kei maʻu ʻi he ʻahó ni. ʻOku ʻikai ʻiloʻi ʻa e fekauʻaki ʻa e ngaahi tohi faka-ʻIsipité ʻi he takainga tohi ko iá mo e fakamatala fakafolofola ʻoku tau maʻu he ʻaho ní.

Mahalo naʻe liliu ʻe Siosefa Sāmita ʻa e tohi ʻa ʻĒpalahamé mei he ngaahi konga ʻo e pepa kiliʻi kahó ʻoku mole he taimi ní, pe naʻe hoko ʻene ako e pepa kiliʻi kahó ke fakatupunga ai ʻene maʻu ha fakahā fekauʻaki mo ʻĒpalahame. Pe ko e hā e tūkunga ʻo e meʻa ne hokó, ka naʻe ʻikai liliu ʻe Siosefa ʻa e tohí ʻaki ha ngaahi founga angamaheni. Naʻe folofola ʻa e ʻEikí fekauʻaki mo hono liliu ʻo e Tohi ʻa Molomoná ʻo pehē, “ʻOku ʻikai te ke lava ʻo tohi ʻa e meʻa ʻoku toputapú tuku kehe ʻo kapau ʻe foaki ia kiate koe meiate au.” Ko e tefitoʻi moʻoni tatau pē ʻoku fakaʻaongaʻi ki he tohi ʻa ʻĒpalahamé.

He ʻikai lava ke fakaleleiʻi e moʻoni mo e mahuʻinga ʻo e tohi ʻa ʻĒpalahamé ʻe ha tipeiti fakaako. ʻOku makatuʻunga ʻa hono tuʻunga fakafolofolá ʻi he ngaahi moʻoni taʻengata ʻokú ne akoʻí pea mo e laumālie mālohi ʻokú ne ʻomí. Te tau takitaha lava ʻo ako hono ngaahi akonakí mo lotua ha fakamoʻoni mei he Laumālie Māʻoniʻoní ko hono ngaahi pōpoakí ʻoku mei he ʻOtuá ia.

Ngaahi fakahinohino fekauʻaki mo hono ako ʻo e ongoongoleleí:

“Kau Palōfitá”
“Fakahaá”
“Moʻoní”

Ko e Tali ki Hoʻo Ngaahi Fehuʻí

Naʻe liliu fēfē ʻe Siosefa Sāmita ʻa e tohi ʻa ʻĒpalahamé?

Naʻe ʻikai ke fakamatala ʻe he Palōfita ko Siosefa Sāmitá ʻa e founga naʻá ne liliu ai e tohi ʻa ʻĒpalahamé. ʻOku tau ʻiloʻi naʻá ne ako fakalelei mo ha niʻihi kehe ʻa e ʻū takainga tohi kiliʻi kaho faka-ʻIsipite naʻe fakatau mai ʻe he Siasí, ka naʻe ʻikai mahino kiate ia ʻa e lea faka-ʻIsipite ʻo e kuonga muʻá pe maʻu ha ʻū meʻangāue ʻe lava ʻo tokoni ke ne liliu ʻa e tohí ʻaki ha ngaahi founga angamaheni. Naʻe manatuʻi ʻe he kau kaungā ngāue ʻo Siosefá naʻe fakahā mai ʻe he ʻOtuá ʻa e liliú. Pea hangē ko e fakamatala ʻa Sione Uitemaá, “Naʻe mamata ʻa Siosefa ko e Tangata Kikité ki he [ngaahi] Lekooti ko ʻení pea ʻi he fakahā meia Sīsū Kalaisí naʻe lava ai ʻo liliu ʻa e ngaahi lekooti ko ʻení.” ʻOku pehē ʻe ha ngaahi maʻuʻanga fakamatala ʻe niʻihi mahalo naʻe ngāue ʻaki ʻe Siosefa Sāmita ha foʻi maka kikite lolotonga ʻene tala-kae-tohi ʻa e fakamatala ʻi he tohi ʻa ʻĒpalahamé.

Kuo mole he taimí ni ʻa e konga lahi taha ʻo e takainga tohí naʻe ʻia Siosefá, neongo ʻoku kei maʻu pē ha ngaahi konga ʻe niʻihi. ʻOku ʻi ai ha ongo konga ʻo e Book of Breathing for Horos (Tohi ʻo e Mānava maʻa Holosí); konga ʻe fā mo e ngaahi kongokonga kehekehe ʻe niʻihi ʻo e Book of the Dead for Semminis (Tohi ʻo e Maté maʻa Sieminsí); pea mo ha konga mei he Book of the Dead for Nefer-ir-nebu (Tohi ʻo e Maté maʻa Nefā-ʻi-nepu). ʻOku fakatou tui tatau ʻa e kakai Siasi mo ʻikai kau ki he Siasí ʻoku nau ako e lea, hisitōlia mo e taufatungamotuʻa faka-ʻIsipité, ʻoku ʻikai ke tatau ʻa e ngaahi mataʻitohi ʻi he ngaahi konga ko ʻení mo e liliu naʻe fai ʻi he tohi ʻa ʻĒpalahamé.

ʻOku tui ha Kāingalotu ʻe niʻihi ko e fakamatala ko ia ʻo e tohi ʻa ʻĒpalahamé naʻe maʻu ia ʻi he takainga tohi ʻoku mole he taimi ní. ʻOku aofangatuku ʻe ha niʻihi ʻo pehē naʻe hanga ʻe hono ako ʻe Siosefa ʻa e takainga tohí ʻo ueʻi ha fakahā fekauʻaki mo e ngaahi meʻa mahuʻinga naʻe hoko mo e ngaahi akonaki ʻi he moʻui ʻa ʻĒpalahamé, ʻo hangē ko ia naʻá ne maʻu kimuʻa ha fakahā ʻo kau ki he moʻui ʻa Mōsesé lolotonga ʻene ako e Tohi Tapú. Fakatatau ki he fakakaukau ko ʻení, naʻe hoko ʻa e takainga tohí ko ha founga ia ke fakatupunga ai ʻene maʻu ha fakahā fekauʻaki mo ʻĒpalahame.

ʻOku ʻikai ha kaunga ʻa e Siasí ki ha taha ʻo e ngaahi fakakaukau ko ʻení. ʻOkú ne fakapapauʻi pē ko e liliú naʻe fakahoko ia ʻi he fakahā. Pea hangē pē ko e Tohi ‘a Molomoná, naʻe ʻomi ʻa e tohi ʻa ʻĒpalahamé ʻi he “foaki mo e māfimafi ʻo e ʻOtuá.”

Ko e hā e fekauʻaki ʻa e tohi ʻa ʻĒpalahamé pea mo e ngaahi fakamatala ʻi he lea faka-ʻIsipité?

Mei Siulai 1835 ki Nōvema 1835, naʻe faʻu ʻe Siosefa Sāmita mo ʻene kau tangata tohí ha ngaahi fakamatala fakapepa fekauʻaki mo e ngaahi mataʻitohi ʻi he takainga tohi faka-ʻIsipité. ʻOku kau heni ʻa e ngaahi meʻa ʻoku ʻiloa ko e “Fakamatala ki he ʻAlafapeti Faka-ʻIsipite” pea mo e “Kalama mo e ʻAlafapeti ʻo e Lea Faka-ʻIsipité.” ʻOku hangē ʻoku hoko ʻa e ngaahi fakamatala fakapepá ko ha konga ʻo e fekumi ʻa Siosefa mo e niʻihi kehé ke mahino kiate kinautolu ʻa e ngaahi lea mo e ngaahi fakakaukau fakakuongamuʻá koeʻuhí ke nau lava ʻo fakafehokotaki ki ha kuohili toputapu. Naʻe hiki tatau ʻe Siosefa Sāmita mo ʻene kau tangata tohí ha ngaahi mataʻitohi mei he takainga tohí mo e ngaahi maʻuʻanga fakamatala kehe ki he ʻū fakamatala fakapepa ko ʻení pea fokotuʻu mai mo ha ngaahi fakamatala lahi (naʻe ui ko e “ngaahi tuʻunga”) ki he mataʻitohi takitaha. ʻOku ʻikai ke faʻa tatau ʻa e ngaahi fakamatala ko ʻení mo e ngaahi fakaʻuhinga fakaakó.

Naʻe ʻikai ke fakamatalaʻi ʻe Siosefa Sāmita mo hono kaungā ngāué ʻa e founga ʻoku fekauʻaki ai e ngaahi fakamatala fakapepa ko ʻení mo e tohi ʻa ʻĒpalahamé. ʻOku tui ha kau mataotao ʻe niʻihi naʻa nau feinga ke ako e lea faka-ʻIsipité ʻo fakaʻaongaʻi e ngaahi konga ne ʻosi fakahā mai mei he tohi ʻa ʻĒpalahamé. ʻOku pehē ʻe ha niʻihi naʻe faʻu ʻe Siosefa mo hono kaungā-ngāué ʻa e ngaahi fakamatala fakapepa ʻo e lea faka-ʻIsipité ko ha konga ʻo e founga naʻe maʻu ai ʻe Siosefa ʻa e fakahaá—ʻaki ʻene tomuʻa “fakakaukauʻi ia ʻi [hono] ʻatamaí.” Ka ʻoku tui ha niʻihi ia ʻoku ʻikai pē ke tonu ha taha ʻo e ngaahi fakakaukau ko ʻení.

ʻOku fakaʻaongaʻi nai ʻe he tohi ʻa ʻĒpalahamé ʻa e lea fakafonua mei he Pulusinga ʻa Kingi Sēmisi ʻo e Tohi Tapú?

Naʻe ʻi ai ha ivi mālohi ʻo e Pulusinga ʻa Kingi Sēmisi (KJV) ʻo e Tohi Tapú ʻi he lea faka-Pilitāniá. Naʻe ʻiloa ʻaupito ia ki he kakai ʻi he taimi ʻo Siosefa Sāmitá. ʻOku faʻa kau ʻi he ngaahi fakahā ʻi he Tokāteline mo e Ngaahi Fuakavá ha ngaahi kupuʻi lea ʻoku maʻu ʻi he KJV. ʻOku pehē pē mo e liliu ʻo e Tohi ʻa Molomoná, tohi ʻa Mōsesé, mo e tohi ʻa ʻĒpalahamé. ʻOku fakanatula pē ʻa e ʻasi ʻa e faʻahinga fakalea ʻi he KJV pe ngaahi foʻi lea mo e kupuʻi lea mei he ngaahi maʻuʻanga fakamatala kehe naʻe ʻiloʻi ʻe Siosefa Sāmitá ʻi he ngaahi folofola ko ʻení. Naʻe folofola ʻa e ʻEikí ʻokú Ne foaki ha fakahā ki Heʻene kau tamaioʻeikí “ʻo fakatatau mo ʻenau leá, koeʻuhí ke mahino ia kiate kinautolu.” Naʻe tākiekina mālohi ʻa e tōʻonga fakalea ʻa Siosefá ʻe he anga fakafonua naʻá ne tupu hake aí kae tautautefito ki heʻene ʻilo lahi ki he KJV.

ʻOku ʻi ai ha ngaahi potufolofola mei he fakamatala ʻa ʻĒpalahame ʻoku fehulunaki mo e tohi ʻa Sēnesí. Neongo ʻoku kau ʻi he ngaahi potufolofola ko ʻení ha ngaahi kupuʻi lea mei he fakamatala angamaheni ʻo e Tohi Tapú, ka ʻoku ʻi ai foki mo ha ngaahi faikehekehe mahuʻinga te ne lava ʻo fakatupulaki ʻetau mahinó.

Ko e hā e meʻa ʻoku tau ʻilo fekauʻaki mo e fakamatala ʻa Siosefa Sāmita ki he ngaahi tatau moʻoni ʻo e tohi ʻa ʻĒpalahamé?

ʻOku kau ʻi he tohi ʻa ʻĒpalahamé ha ngaahi fakatātā ʻe tolu kuo paaki, ʻoku ʻiloa ko e ngaahi tatau moʻoni, ʻa ia ʻoku fakatefito ʻi he ngaahi ʻīmisi ʻi he takainga tohí. Naʻe fakakau ʻa e ngaahi tatau moʻoni ko ʻení ʻi he taimi naʻe fuofua pulusi ai ʻa e tohi ʻa ʻĒpalahamé ʻi he 1842. Naʻe pulusi ʻa e fakamatalaʻi ʻe Siosefa Sāmita ʻo e ngaahi ʻatá fakataha mo e ngaahi tatau moʻoní. ʻOku fakamatalaʻi ʻa e ngaahi fakatātaá ʻi he tohi ʻa ʻĒpalahamé. Hangē ko ʻení, ʻoku ʻuhinga ʻa e ʻĒpalahame 1:12 ki he “fakatātā ʻi he kamataʻanga ʻo e lekooti ko ʻení,” ʻa ia ko hono ʻuhingá ko e Tatau Moʻoni 1.

Ko e lahi taha ʻo e ngaahi fakamatala naʻe pulusi ʻe Siosefa mo e ngaahi tatau moʻoní ʻoku ʻikai tatau ia mo e ngaahi fakaʻuhinga ʻa e kau mataotao ʻo onopooni ʻi he lea mo e hisitōlia faka-ʻIsipité. Ka neongo ia, kuo fakatokangaʻi ʻe he kau mataotaó ha ngaahi meʻa ʻoku potupotutatau. Hangē ko ʻení, naʻe fakamatalaʻi ʻe Siosefa Sāmita ʻa e ngaahi fakatātā ʻe fā ʻi he fakatātā 6 ʻo e Tatau Moʻoni 2 ko e “māmani ko ʻení ʻi hono ngaahi potu ʻe faá.” Kuo fakamatalaʻi foki ʻe he kau mataotao fakaako kehé ʻa e ngaahi fakatātā tatau ʻi he ngaahi tohi fakakuongamuʻa faka-ʻIsipite kehé. ʻOku hā ʻi he tatau moʻoni 1 ha ʻotua kalokataile ʻoku kakau ʻi he meʻa naʻe ui ʻe Siosefa Sāmita “ko e ʻatā ki ʻolunga ʻi hotau ʻulú.” Kuo fakahaaʻi tatau pē ʻe he kau mataotao fakaakó ha ngaahi fakakaukau faka-ʻIsipite ʻo e langí ko ha “ʻōseni fakalangi.”

ʻOku ʻikai ke tau ʻilo pe ʻoku fekauʻaki fēfē ʻa e ngaahi tatau moʻoní mo e fakamatalá. ʻOku ʻi ai ha fakamoʻoni naʻe ʻi ai ha kau faʻu tohi Siu ʻe niʻihi ʻi he kuonga naʻe faʻu ai ʻa e takainga tohí, naʻa nau fakakau ha ʻū tā fakatātā mo e ngaahi talanoa faka-ʻIsipite ʻi heʻenau ngaahi tohi toputapú, ʻo kau ai ʻa e ngaahi tohi ʻoku fekauʻaki mo ʻĒpalahamé. ʻOku malava pē ke pehē ko e ʻū fakatātā ko ʻení naʻe toe fakaʻaongaʻi ia ʻi ha founga tatau ki ha taumuʻa kehe.

Kuo tala moʻoni nai ʻe he Siasí ʻa e meʻa ʻoku tau ʻilo fekauʻaki mo e takainga tohí mo e meʻa ʻoku hiki aí?

ʻIo. ʻI he kotoa e hisitōlia ʻo e Siasí, kuó ne vahevahe ki he kakaí ʻa ʻene ʻilo fekauʻaki mo e ngaahi tohi faka-ʻIsipite ʻoku fekauʻaki mo e tohi ʻa ʻĒpalahamé. Naʻe ʻi ai ha takainga pepa kiliʻi kaho faka-ʻIsipite ʻe ua ʻa e Siasí mo e ʻū kongokonga ʻo ha takainga hono tolu mei he 1835 ki he 1847. Lolotonga e vahaʻataimi ko iá, naʻe faʻa fakaʻaliʻali maʻu pē ʻa e takainga tohí ki he kakaí. Hili e pekia ʻa Siosefa Sāmitá, naʻe fakatau atu ʻe ʻEma Sāmita mo hono husepāniti hono uá ʻa e takainga tohí ki ha tangata ko ʻĒpeli Komasi, ʻa ia naʻá ne vahevahe kinautolu ki ha ʻū takainga kehekehe ʻe ua pea fakatau atu ia ki ha kakai kehekehe. Naʻe mole ai ha ngaahi takainga lahi. ʻI he taimi naʻe maʻu ai ʻe he Siasí ʻa e toenga ʻo e ngaahi konga ʻo e pepa kiliʻi kahó mei he Metropolitan Museum of Art ʻi Niu ʻIoke Siti ʻi he 1967, naʻe pulusi ʻe he Siasí ha fanongonongo ʻo hono fakatau maí mo e ngaahi ʻata ʻo e ngaahi kongá ʻi he Deseret News pea ʻi he makasini ʻa e Siasí ʻo e taimi ko iá, ko e Improvement Era. Naʻe fakahā ʻe he ngaahi fakamatala ko ʻení ʻa e tupuʻanga ʻo e ngaahi konga ʻo e takainga tohí mo ʻenau fekauʻaki mo e meʻa naʻe ʻiloʻi ʻi he taimi ko iá ko e Tohi ʻo e Kau Pekiá ʻi he ouau putu faka-ʻIsipité.

Talu mei he taimi ko iá, kuo fakaʻatā ʻe he kau taki ʻo e Siasí ha kau mataotao fakaako ʻe niʻihi ke nau fakaʻaongaʻi e ngaahi konga ʻo e takainga pepa kiliʻi kahó, pea naʻe pulusi ʻe he kau mataotao fakaako ʻoku nau kau ki he Siasí mo ha kau mataotao ʻoku ʻikai Siasi, ha ngaahi liliu lea mo hano ʻanalaiso ʻo e ʻū takainga tohí. Ko ha konga siʻi pē ʻo e ongo takainga pepa kiliʻi kahó mo e ngaahi konga ʻo e takainga tohi kehekehe naʻe maʻu ʻe Siosefa Sāmitá, ʻoku kei maʻú. Naʻe pulusi ʻa e Joseph Smith Papers ʻi he 2018 mo ha ngaahi ʻīmisi foʻou mo e ngaahi ʻanalaiso ʻo e ngaahi kongokonga kotoa ko ʻení.

Ko e konga ʻe fiha ʻo e ʻū pepa kiliʻi kahó ʻoku pulia he ʻaho ní?

ʻOku tui ʻa e kau mataotaó ʻoku fakafofongaʻi ʻe he takainga tohi ʻoku lolotonga maʻu he taimi ní ha konga siʻi pē ʻo e ongo takainga tohi totonú mo e ngaahi konga kehe naʻe ʻuluaki fakatau mai ʻe Siosefa Sāmita pea mo e Siasí. Kuo fakaʻaongaʻi ʻe he kau fakatotoló ha ngaahi founga kehekehe ki hono fakafuofuaʻi ʻa e lōloa totonu ʻo e ʻū takainga tohí. ʻOku nau fakafuofuaʻi ko e meʻa ʻoku tau maʻu ʻi he ʻaho ní ʻoku ʻi he vahaʻa ia ʻo e peseti ʻe 2.5 ki he peseti ʻe 30 pe 45 ʻo e pepa kiliʻi kahó naʻe maʻu ʻe Siosefá.

Ko e hā ʻoku tala ai ʻe he tohi ʻa ʻĒpalahamé naʻe hiki ia ʻe he nima ʻo ʻĒpalahamé?

ʻI he taimi naʻe fuofua pulusi ai e tohi ʻa ʻĒpalahamé ʻi he 1842, naʻe kamata ʻaki ia ha fakamatala naʻe pehē: “Ko ha liliu ʻo e ngaahi Lekooti fakakuongamuʻa ʻe niʻihi ʻa ia naʻe tō ki homau nimá, mei he ngaahi Fonualoto ʻo ʻIsipité, ʻo pehē ko e ngaahi tohi ia ʻa ʻĒpalahamé, lolotonga ʻene ʻi ʻIsipité, ʻa ia ʻoku ui ko e Tohi ʻa ʻĒpalahamé, pea naʻe tohi ia ʻe hono nima ʻoʻoná, ʻi ha pepa kiliʻi kaho.” ʻOku ʻi he tatau kimuʻa ʻo e tohi ʻa ʻĒpalahamé ha talateu ʻoku fakalea tatau. Mahalo naʻe faʻu ʻa e talateú ʻo hangē ko ʻene tuʻu he ʻaho ní ʻi he taimi naʻe pulusi ai ʻa e tohi ʻa ʻĒpalahamé ʻi he 1842. Naʻe fakakau ʻa e ngaahi talateu tatau ʻi hono pulusi ʻo ha niʻihi ʻo e ngaahi fakahā kehe ʻa Siosefa Sāmitá.

ʻOku mahino mei hono ʻanalaisó naʻe hiki ʻa e pepa kiliʻi kahó ʻi he vahaʻa ʻo e senituli hono tolu mo e ua BC, hili ha taimi fuoloa mei he moʻui ʻa ʻĒpalahamé. ʻOku ʻikai ke fakahalaki ʻe he ʻaho ko ʻení ʻa e kakano ʻo e tohi ʻa ʻĒpalahamé. Ko e konga lahi ʻo e ngaahi fakamatala fakakuongamuʻa ʻoku maʻu ʻi he ʻaho ní ko ha tatau ia ʻo ha ngaahi tatau. Ko e meʻa tatau pē, naʻe mei lava ke toutou hiki tatau tuʻo lahi ʻi ha ngaahi senituli lahi e tohi ʻa ʻĒpalahamé kae kei tala pē ko ʻĒpalahame naʻá ne tohí.

ʻOku fenāpasi nai e tohi ʻa ʻĒpalahamé mo e meʻa ʻoku tau ʻilo fekauʻaki mo e ngaahi vahefonua ʻi he kuonga muʻa ʻo Hahake Ofi Maí?

ʻOku maʻu ʻi he tohi ʻa ʻĒpalahamé ha ngaahi fakamatala fakaikiiki ʻoku ʻikai ke maʻu ʻi he Tohi Tapú ka ʻoku fenāpasi ia mo e ngaahi tohi ʻo e kuonga muʻá. Hangē ko ʻení, ʻoku ʻi ai ha ngaahi hingoa ʻo ha kakai mo ha ngaahi feituʻu ʻoku faitatau mo e ngaahi hingoa naʻe maʻu ʻi he ngaahi lekooti fakakuongamuʻá. Hangē ko ʻení, kuo fakafehokotaki ʻa e “potu tokalelei ʻo ʻOlisemí,” ʻe ha kau mataotao fakaako ʻe niʻihi ki ha kolo ʻi he tokelau-hihifo ʻo Sīliá ʻoku ui ko ʻUlisuma. ʻOku meimei faitatau ʻeni mo e ʻOlisemí ʻo fakatatau mo e ngaahi founga angamaheni ʻo e fakatotolo leá. Ko e meʻa tatau pē, kuo fokotuʻu mai ʻe ha kau mataotao ‘e ni’ihi ʻo e Siasí ko e ʻotua ʻo ʻElikená ko ha fakafofonga ia ‘o ha tuʻunga fakanounou ʻo e hingoa fakaʻotua ko e Eli Kone ʻAatisū, ʻa ia ʻoku ʻiloʻi mei ha ngaahi tohi kehekehe ʻo e fakatokelau-hihifo ʻo e kakai Semí ʻoku ʻuhinga ia ki he meʻa hangē ko e “Eli, Fakatupu ʻo e Māmaní.”

Ko e niʻihi ʻo e ngaahi tefito fakalūkufuá mo e faʻunga fakamatala ʻo e tohi ʻa ʻĒpalahamé ʻoku faitatau ia mo e ngaahi talanoa mei he ngaahi maʻuʻanga tokoni taʻe-fakatohitapu ʻo e kuonga muʻá. ʻOku kau heni ʻa e tamai ʻa ʻĒpalahame ko Telá, ko ha tokotaha tauhi ʻotua tamapuá; ko ha honge ne tō ʻi he kolo tupuʻanga ʻo ʻĒpalahamé; mo ha ʻāngelo ʻokú ne fakahaofi ʻa ʻĒpalahame mei he feilaulau tangatá ʻi he nima ʻo ha felo ʻi ʻIsipite. ʻOku toe ʻuhinga foki ʻa e ngaahi tohi fakakuongamuʻá ki hono fakahinohinoʻi ʻe ʻĒpalahame ʻa e kau ʻIsipité fekauʻaki mo e ngaahi langí. Hangē ko ʻení, naʻe tohi ʻe ʻIupolemasi, ʻa ia naʻe nofo ʻi he malumalu ʻo e lao faka-ʻIsipité ʻi he senituli hono uá BC, naʻe akoʻi ʻe ʻĒpalahame ʻa e ngaahi fetuʻú mo e saienisi kehé ki he kau taulaʻeiki ʻIsipité. ʻOku hā ʻi ha pepa kiliʻi kaho ʻo e senituli hono tolu BC ha laipeli ʻo e temipale ʻIsipité ʻa e hingoa ʻĒpalahamé mo ha fakatātā tatau mo e Fakatātā 1 ʻi he tohi ʻa ʻĒpalahamé. Naʻe ʻikai ke ʻiloʻi ʻi he taimi ʻo Siosefa Sāmita ha niʻihi ʻo e ngaahi fakaikiiki ko ʻeni fekauʻaki mo e moʻui ʻa ʻĒpalahamé.

Neongo ʻoku mālie ʻa e ngaahi sīpinga ko ʻení, ka ʻoku ʻi ai foki mo ha ngaahi sīpinga lahi ʻo e ngaahi fakaʻuhinga ʻe Siosefa Sāmita ʻa e ngaahi tatau moʻoní ʻoku ʻikai fenāpasi mo e meʻa ʻoku tau lolotonga ʻilo fekauʻaki mo e māmaní ʻi he kuonga muʻá. Neongo ʻoku lahi ha ngaahi meʻa ʻoku ʻikai mahino kiate kitautolu fekauʻaki mo e founga ʻo e liliú, ka ʻoku mahuʻinga ke manatuʻi he ʻikai lava ke fakaleleiʻi ʻa e moʻoni mo e mahuʻinga ʻo e tohi ʻa ʻĒpalahamé ʻe ha tipeiti fakaako fekauʻaki mo hono liliu ʻo e tohí. ʻE lava ke tokoniʻi koe ʻe hono lau e tohi ʻa ʻĒpalahamé, fakalaulauloto ki hono kanotohí, mo lotua hono ngaahi akonakí ke ke maʻu ha fakamoʻoni fakalaumālie ki hono mahuʻinga taʻengatá.

Te u lava fēfē ʻo maʻu ha fakamoʻoni ki he tohi ʻa ʻĒpalahamé mo e ngaahi folofola kehe naʻe fakahā kia Siosefa Sāmitá?

ʻOku lahi ha ngaahi meʻa ʻoku ʻikai ke tau ʻilo fekauʻaki mo e founga naʻe fakahā ai ʻa e tohi ʻa ʻĒpalahamé kia Siosefa Sāmitá. Ka ʻi he ngaahi meʻa lahi, ʻoku ʻikai ke fuʻu mahuʻinga ʻetau fehuʻia ʻa e foungá ka ko e fehuʻi mahuʻingá pe naʻe fakahā mai ʻe he ʻOtuá ha folofola foʻou kia Siosefa Sāmita. ʻOku fekauʻaki ʻeni mo e tuí. Ko e founga lelei taha ke maʻu ai ha fakapapau fakalaumālie ki he fehuʻi ko ʻení ko hono lau e tohi ʻa ʻĒpalahamé, fakalaulauloto ki he ngaahi moʻoni ʻokú ne fakahaá, fakaʻaongaʻi hono ngaahi akonakí, pea fekumi ki ha fakamoʻoni mei he Laumālie Māʻoniʻoní. ʻE lava ke tokoniʻi kitautolu ʻe he founga ko ʻení ke tau ofi ange ai kia Sīsū Kalaisi. Ko e sivi taupotu taha ia ʻo e mahuʻinga ʻo e tohi ʻa ʻĒpalahamé.

Ako lahi ange

Gospel Topics Essay: “Translation and Historicity of the Book of Abraham”