Hāʻele ʻAngaua Mai ʻa Sīsū Kalaisí

ʻI he hāʻele hake ʻa Sīsū Kalaisi ki he langí ʻi he fakaʻosinga ʻo ʻEne ngāue fakamatelié, naʻe fakahā ange ʻe ha ongo ʻāngelo ki Heʻene kau ʻAposetoló “Ko e Sīsū ko ia, kuo ʻave ʻiate kimoutolu ki langí, ʻe pehē pē ʻene toe haʻu ʻo hangē ko hoʻomou mamata ʻene ʻalu hake ki loto langí” (Ngāue 1:11). Talu mei he taimi ko iá, kuo nofo ʻamanaki e kakai tuí ki he Haʻele ʻAngaua Mai ʻa Sīsū Kalaisí.

Vakai Fakalūkufuá

‘I he taimi ʻe toe hāʻele mai ai ʻa e Fakamoʻuí, te Ne hāʻele mai ʻi he mālohi mo e nāunau ke maʻu ʻa e māmaní ko Hono puleʻanga. ‘E fakaʻilongaʻi ʻe Heʻene Hāʻele ʻAngaua Maí ʻa e kamataʻanga ʻo e Nofo Tuʻí.

‘E hoko ʻa e Hāʻele ʻAngaua Maí ko ha taimi fakamanavahē mo fakamamahi ki he kau faiangahalá, ka ʻe hoko ia ko ha ʻaho ʻo e nonga ki he kau angatonú. Ne folofola e ʻEikí:

“Ko kinautolu ʻoku poto pea nau tali ʻa e moʻoní, pea kuó nau maʻu ʻa e Laumālie Māʻoniʻoní ke hoko ko honau fakahinohinó, pea kuo ʻikai kākaaʻi ʻa kinautolú—ko e moʻoni ʻoku ou pehē kiate kimoutolu, ʻe ʻikai ke tā hifo ʻa kinautolu pea laku ki he afí ka te nau kātakiʻi ʻa e ʻahó.

“Pea ʻe foaki ʻa e māmaní kiate kinautolu ke hoko ko e tofiʻa; pea te nau tupu ʻo tokolahi pea fakaʻau ʻo mālohi, pea ʻe tupu hake ʻa ʻenau fānaú taʻe ʻi ai ha angahala ki he fakamoʻuí.

“He ʻe ʻi honau lotolotongá ʻa e ʻEikí, pea ʻe ʻiate kinautolu ʻa hono nāunaú, pea te ne hoko ko honau tuʻi mo honau tokotaha foaki fono” (Tokāteline mo e Ngaahi Fuakava 45:57–59).

Kuo teʻeki ke fakahā mai ʻe he ʻEikí ʻa e taimi pau te Ne toe hāʻele mai aí: “ʻOku ʻikai ke ʻiloʻi ʻe ha tangata ʻa e houá mo e ʻahó, pea ʻoku ʻikai foki ke ʻilo ia ʻe he kau ʻāngelo ʻi he langí, pea ʻe ʻikai foki te nau ʻilo kae ʻoua ke ne haʻu” (Tokāteline mo e Ngaahi Fuakava 49:7). Ka kuó Ne fakahā ki Heʻene kau palōfitá ʻa e ngaahi meʻa ʻe hoko mo e ngaahi fakaʻilonga ʻe hoko kimuʻa ʻi Heʻene Hāʻele ʻAngaua Maí. ‘Oku kau ʻi he ngaahi meʻa ʻe hoko mo e ngaahi fakaʻilonga ne kikiteʻí ʻa e:

Hē mei he moʻoni ʻo e ongoongoleleí (vakai, Mātiu 24:9–12; 2 Tesalonika 2:1–3).

Ko e Fakafoki Mai ʻo e ongoongoleleí, kau ai ʻa e fakafoki mai ʻo e Siasi ʻo Sīsū Kalaisí (vakai, Ngāue 3:19–21; Fakahā 14:6–7; Tokāteline mo e Ngaahi Fuakava 45:28; 133:36).

Ko e fakafoki mai ʻo e ngaahi kī ʻo e lakanga fakataulaʻeikí (vakai, Malakai 4:5–6; Tokāteline mo e Ngaahi Fuakava 110:11–16).

Ko hono tuku mai ʻo e Tohi ʻa Molomoná (vakai, ʻĪsaia 29:4–18; 3 Nīfai 21:1–11).

Ko hono malangaʻi ʻo e ongoongoleleí ʻi he funga ʻo e māmaní (vakai, Mātiu 24:14).

Ko ha taimi ʻo e faiangahalá, taú, mo e moveuveú (vakai, Mātiu 24:6–7; 2 Tīmote 3:1–7; Tokāteline mo e Ngaahi Fuakava 29:17; 45:26–33; 88:91).

Ngaahi fakaʻilonga ʻi he langí pea ʻi māmani (vakai, Sioeli 2:30–31; Mātiu 24:29–30; Tokāteline mo e Ngaahi Fuakava 29:14–16; 45:39–42; 49:23; 88:87–90).

ʻOku ʻikai fie maʻu ke manavahē ʻa e kau angatonú ki he Hāʻele ʻAngaua Maí pe ko e ngaahi fakaʻilonga kimuʻa aí. ʻOku kaunga ʻa e folofola ʻa e Fakamoʻuí ki Heʻene kau ʻAposetoló kiate kinautolu kotoa pē ʻoku teuteu ki Heʻene hāʻele maí mo nofo ʻamanaki fiefia ki aí: “ʻOua ʻe puputuʻu, koeʻuhí, he ʻo ka hokosia ʻa e ngaahi meʻá ni kotoa pē, te mou lava ʻo ʻilo ai ʻe fakahoko ʻa e ngaahi talaʻofa kuo fai kiate kimoutolú” (Tokāteline mo e Ngaahi Fuakava 45:35).

Lekooti e Ngaahi Ongo ʻOkú ke Maʻú