Hilifaki ʻo e Nimá

Ko e hilifaki ‘o e nimá ko e founga ia naʻe fakahā mai ʻe he ʻEikí ki hono fakahoko ʻo e ngaahi ouau lahi ʻo e lakanga fakataulaʻeikí, ʻo hangē ko e hilifakinimá, fakanofó, vaheʻi ʻo e kāingalotú ki he ngaahi uiuiʻí, faingāue ki he mahakí, mo hono foaki ʻo e ngaahi tāpuaki lakanga fakataulaʻeiki kehé. ʻOku hilifaki ʻe kinautolu ʻoku maʻu ʻa e mafai lakanga fakataulaʻeiki totonú honau nimá ʻi he ʻulu ʻo e tokotaha ʻokú ne maʻu ʻa e ouaú. ‘I hono fakahoko iá, ʻoku nau hoko ai ko e ngaahi meʻangāue ʻoku faitāpuekina ai ʻe he ʻOtuá ʻa ʻEne fānaú.

Kuo fakaʻaongaʻi maʻu pē ʻe he kau maʻu lakanga fakataulaʻeikí ʻa e founga ʻo e hilifaki ʻo e nimá. Naʻe fakanofo ʻe ʻĀtama hono ngaahi hako tangata naʻe moʻui angatonú ʻaki ʻa e hilifaki ʻo e nimá. ʻI he taimi naʻe fakahā ai ʻe Sēkope ʻa e ngaahi tāpuakí kia ʻIfalemi mo Manasé, naʻá ne hilifaki hono ongo nimá ʻi hona ʻulú. Naʻe hanga ʻe ʻAlamā ʻo “fakanofo ha kau taulaʻeiki mo ha kaumātuʻa, ʻi heʻene hilifaki hono nimá ʻo fakatatau ki he founga ʻa e ʻOtuá.” Naʻe foaki ʻe he ongo ʻAposetolo ko Pita mo Sioné ʻa e meʻafoaki ʻo e Laumālie Māʻoniʻoní ʻaki hono hilifaki ʻo e nimá. ʻI he kuonga fakakosipeli ko ʻení, naʻe foaki ʻe Sione Papitaiso ʻa e Lakanga Taulaʻeiki Faka-ʻĒloné kia Siosefa Sāmita mo ʻŌliva Kautele ʻaki hono hilifaki ʻo e nimá.