Ko e Ngāue ʻa e Fakataha Alēlea Faka-Uōtí
ʻOku fakaʻaongaʻi ʻe he Kāingalotú e ngaahi fakataha alēlea fakauōtí mo fakakoló ke faitāpuekina ai e moʻui ʻa kinautolu ʻoku faingataʻaʻiá.
ʻI he longoaʻa ʻo e ngaahi meʻa fakaleʻolahí ʻi he pō 22 ʻo Mē 2011, naʻe tō mai ha ʻahiohio lahi moʻoni he loto kolo ʻo Sopilini ʻi Mīsuli, ʻi he USA ʻo fakaʻauha ha ngaahi ʻapi mo ha ngaahi moʻui. Naʻe fuʻu lahi moʻoni hono maumauʻi ʻe he ʻahiohió e Uooti Sopilini ʻUluakí, ka naʻe ngāue leva ʻa Pīsope Kulisi Hofimeni mo e fakataha alēlea fakauōtí he taimi pē ko iá ke fakapapauʻi ʻoku malu e kau mēmipa ʻo e uōtí.
Naʻá ne pehē, “Naʻe ʻi ai ha palani ki he meʻa ʻe faí he naʻa mau ʻosi talanoa ki he ngaahi teuteu ko ʻení ʻi he fakataha alēlea fakauōtí kimuʻa pea hoko maí. Naʻa mau toe fakafalala foki ki he Laumālié ke ʻiloʻi e meʻa ke faí. Naʻe mate e ʻū telefoni toʻotoʻó. Naʻa mau lotu pea fakafanongo ki he talí, pea naʻe maʻu e talí—he ʻoku maʻu maʻu pē ʻa e talí. Ko e meʻa fakafiefia kiate au ko e pīsopé ke fanongo ki he pehē mai ʻa e kāingalotú, ‘Ko e meʻa ʻeni kuó u faí,’ ʻo ʻikai ʻeke mai, ‘Ko e hā e meʻa ʻokú ke loto ke u faí?’”
ʻOku fakahaaʻi ʻe he meʻa ʻi Sopiliní ʻa e mālohi ʻo ha fakataha alēlea fakauooti ʻoku fāitahá. Naʻe tohi ʻe ʻEletā M. Lāsolo Palāti ʻo e Kōlomu ʻo e Kau ʻAposetolo ʻe Toko Hongofulu Mā Uá, “Ko e taha e fakataha mahuʻinga taha ʻi he Siasí ʻa e fakataha alēlea fakauōtí, koeʻuhí he ʻoku lava e kau taki fakakōlomu ʻo e lakanga fakataulaʻeikí mo e houalotú ʻo fealeaʻaki mo palani mo e kau pīsopelikí. … ʻI he kotoa e ngaahi fakataha alēlea mo e ngaahi kōmiti ʻi he Siasí, ʻoku ou tui ko e fakataha alēlea fakauōtí ʻoku ʻaonga taha ke ne tokoniʻi e fānau ʻetau Tamaí.”1
Fakatahaʻi ʻe he ʻOfa mo e Tui
ʻOku maʻu ʻe he kau mēmipa ʻi Pueto Felenisisikou ti ʻOlelaná, ko ha kolo mamaʻo ʻi he vaotā ʻo ʻEkuatoá ha haʻi ʻo e ʻofá mo ha tui mālohi. ʻOku fakahaaʻi ʻe he fakataha alēlea fakakolo fakamāhiná e lahi ʻenau tokangá. ʻOku nau ʻuluaki nofotaha ʻenau tokangá he niʻihi fakafoʻituituí mo e ngaahi fāmilí, pea toki hoko ki he founga ʻe tokoni ai e ngaahi polokalamá. ʻOku hoko mai leva ʻa e ueʻi fakalaumālié.
ʻOku fie maʻu ʻe ha kau mēmipa tokolahi ha tokoni ke maʻu ha ngāue. ʻOku ʻiloʻi ʻe he fakataha alēlea fakakoló ʻoku lava ke fakaleleiʻi fakalotofonua maʻu pē e ngaahi meʻa ʻoku faingataʻaʻia ai e kau mēmipá. ʻI he aleaʻi ʻe he fakataha alēleá ʻa e fie maʻu ʻa ha faʻē ʻokú ne tauhi tokotaha pē ʻene fānaú ʻa ia ʻoku ʻi ai ʻene kiʻi taʻahine ʻoku mahamahaki, naʻe ʻilo ʻe he palesiteni Fineʻofá ki ha ngāue ʻe lava ke ngāue ai e faʻeé mo kei ofi pē ki heʻene taʻahiné.
ʻOku toe fakaʻaongaʻi foki ʻe he fakataha alēlea fakakoló e ngaahi maʻuʻanga tokoni ʻa e Siasí, hangē ko e ngaahi nāunau ako ngāue ʻa e Ngaahi Kautaha ʻa e Siasí ʻoku Tokoni ki he Kumi Ngāué (LDS Employment Services).2 Naʻa nau fokotuʻu ha kalasi naʻe akoʻi ʻe ha mēmipa ʻo e koló, ʻa ia ne tokoniʻi ai ha mēmipa ʻe taha ʻo e koló ke maʻu ha ngāue lelei ange.
ʻOku fakamatala ʻa Lamilo Leiesi, ko e tokoni ʻuluaki ʻi he kau palesitenisī fakakoló kau ki he fakataha alēlea fakakoló ʻo pehē: “ʻOku mau hoko ko ha meʻangāue ʻi he toʻukupu ʻo e ʻEikí. Te Ne fakahoko ʻEne ngaahi taumuʻá ʻo fakafou mai heʻemau ngāué.”
Ko Ha Hala ki he Temipalé
Naʻe toki mahino kia Melisa Fisi ko e palesiteni Palaimeli ʻi Livapulu ʻi Niu ʻIoke, ʻi he USA ʻa e mālohi ʻo e fakataha alēlea fakauōtí heʻene ʻalu ki aí. ʻI heʻene ala ki heʻene kató ke toʻo hake ha kiʻi pepá, naʻá ne maʻu ai ha fakatātā ʻo ha fānau Palaimeli ʻe toko 28 ʻi he sitepu ʻo e Temipale Palemaila Niu ʻIoké. Naʻe huhu kotoa kinautolu ʻe ha hone. Naʻe hanga ʻe he fakatātaá ʻo toʻo ʻene tokangá mei he fakatahá ʻi ha lau momeniti, pea nofo ʻene fakakaukaú he ʻaho naʻe ʻalu ai e Palaimeli ʻa e uōtí ki Palemaila ke fiefia he ongo toputapu ʻo e kelekele ʻo e temipalé. Ko e meʻapango ia, he ko e taimi naʻe folahi ai ʻe he fānaú honau sipí, naʻe ʻikai ke nau ʻilo ne nau fakahohaʻasi ha fuʻu taunga hone.
Hili hono faitoʻo e taha kotoa pē, naʻe fakaafeʻi ʻe he kau takí e fānaú ke nau ʻalu ʻo ala ki he temipalé. Naʻe ʻikai loto e fānaú ki ai he naʻa nau ilifia na ʻoku toe ʻi ai ha fanga hone ai. Ko ia naʻe tuʻu laine leva e mātuʻá mo e kau takí ʻo faʻu ha foʻi hala ki he temipalé. Naʻe maʻu ai ʻe he fānaú ha loto-toʻa ke laka atu kimuʻa.
Naʻe fakakaukau ʻa Melisa he taimi naʻe toe foki mai ai ʻene tokangá ki he fakataha alēlea fakauōtí, “Ko ha meʻa fakaʻofoʻofa kapau ʻe ʻātakaiʻi e taha kotoa ʻe ha kaungāmeʻa mo ha kau taki angaʻofa ʻi heʻenau fakalakalaka ke ʻalu ki he temipalé.”
Naʻe motuhi ʻene fakakaukaú ʻi heʻene fanongo ki he fakamatala ʻa e palesiteni Fineʻofá ki ha fefine ʻoku faingataʻaʻia: “Naʻe ʻikai ke ne haʻu ʻo lotu he Sāpaté. Te u fakapapauʻi ʻe tala ʻe heʻene ongo faiako ʻaʻahí ki ai ʻa e ʻalu hono hoko ki he temipalé.”
Naʻe tānaki mai ki ai e palesiteni e kōlomu ʻo e kaumātuʻá, “ʻOku lahi ha ngaahi meʻa ʻoku nau faingataʻaʻia ai. Te u talanoa mo ʻene ongo faiako fakaʻapí ke ʻilo pe ko e hā ha meʻa te tau fai.”
Naʻe pehē ange ʻe he palesiteni ʻo e Kau Finemuí, “ʻE lava ke tokoni e kau finemuí he toʻotamá.”
ʻI he sio atu ʻa Melisa ki he fofonga ʻo e kau mēmipa ʻi he fakataha alēlea fakauōtí, naʻá ne fakatokangaʻi e ʻofa moʻoní mo e tokangá. Naʻá ne malimali fiefia. Naʻá ne fakakaukau, “Kuo teuteu ʻe he ʻEikí ha ngaahi founga ki hono maluʻi mo ʻofeina ʻEne fānaú. ʻA ia ko e fakataha alēlea fakauōtí!”
ʻOku hokohoko atu hono ʻiloʻi ʻe he kau taki ʻo e Siasí ʻi he māmaní ʻa e ngaahi tāpuaki ʻo e fakataha alēlea fakauōtí mo fakakoló, ʻo hangē pē ko e meʻa ko ia ʻoku hoko ʻi Sopilini, Pueto Felenisisikou ti ʻOlelana, mo Livapulú. ʻI heʻenau fai iá, te nau maʻu ai ha mālohi lahi mei he ngaahi fakataha alēlea ko ʻení ke tokoni ki he ʻEikí ke tāpuekina ʻEne fānaú pea fakahoko ʻEne ngāué.
Toʻohemá: tā fakatātaaʻi ʻo e ʻatá ʻe Craig Dimond
Toʻohemá: tā fakatātaaʻi ʻo e ʻatá ʻe Joshua J. Perkey