ʻOua Naʻa ʻAuha
ʻOku hanga ʻe hono fakaleleiʻi e fanga kiʻi palopalema iiki he taimi ní ʻo taʻofi e hoko ʻa ha ngaahi palopalema lalahi ʻamui.
Naʻe talu e kei siʻi ʻa ʻOnitelei mo ʻene saiʻia he vakapuná. Pea lolotonga e fakaʻamu ʻa e niʻihi tokolahi ke puna vakapuná, ʻoku ʻikai fakakaukau ʻa ʻOnitelei ia ke puna vakapuna; he ʻokú ne manako ʻi hono foʻu ʻo ha meʻá. ʻOku ako e tokotaha taʻu 16 ko ʻeni mei Lumēniá ke hoko ko ha tokotaha ʻenisinia vakapuna.
ʻOku lava ke fili e toʻu tupu ʻi Lumēniá ke ʻalu ki he ako māʻolungá ʻo teuteu ai ki he kolisí pe ʻalu ki ha ʻapiako ako ngāue. Koeʻuhí ko e saiʻia ʻa ʻOnitelei he vakapuná, naʻe faingofua pē ʻene fili ke ʻalu ki he ʻapiako ako ki he vakapuná.
ʻOku ʻikai ko hono monomono pē ʻo e ngaahi vakapuná ʻoku fai ʻe he kau ʻenisinia vakapuná. Ko e taha e meʻa mahuʻinga taha ʻoku nau faí ko hono sivi mo tokangaʻi e vakapuná ke ʻoua naʻa maumau. ʻOku nau toutou siviʻi e meʻa kotoa he vakapuná, mei he tapilí ki he meʻa ʻoku tō ʻaki ʻe he vakapuná pea mo e konga kotoa pē.
ʻOku pehē ʻe ʻOnitelei, “ʻOku faingataʻa ke ʻiloʻi e fanga kiʻi palopalema iiki te ne lava ʻo ʻai e vakapuná ke tō ʻo paá. Ka ʻoku faingofua ange hono kumi ke maʻú ʻi hano toki feingaʻi ke fakatahatahaʻi e fuʻu vakapuná kakato.”
ʻOku mahuʻinga ke fakataimitēpileʻi hono sivi maʻu pē ʻo e vakapuná pea ʻoua naʻa teitei tuku taʻefai e meʻa ko iá—ʻo tatau pē ki he vakapuná mo e kau mēmipa ʻo e Siasí—ke lava ʻo ʻiloʻi mo fakaleleiʻi e palopalemá kimuʻa pea tuʻu fakatuʻutāmaki fakamakēnika pe fakalaumālie.
Tokangaʻi Fakalaumālié
ʻOku nofo ʻa ʻOnitelei ʻi Pukalesi, ko ha kolo ʻoku meimei ke toko ua miliona hono kakaí. Neongo ia, ʻoku kei foʻou ʻa e Siasí ʻi Lumēnia, pea ʻoku tokolahi feʻunga pē ʻa e kāingalotu ʻi Pukalesí mo ha kolo ʻe ua. ʻOku nofo mamaʻo ʻa ʻOnitelei mo hono fāmilí mei he kau mēmipa kehe ʻo honau koló. ʻOku ongoʻi ʻe ʻOnitelei e ivi tākiekina ʻo e māmaní ʻi he akó pea ʻi hono kaungāmeʻá. ʻOkú ne ʻiloʻi ʻoku faingofua pē ke tō—fakalaumālie—kapau he ʻikai ke hokohoko atu ʻene tokangaʻi fakalaumālie iá.
ʻOku lava ke fuʻu femoʻuekina e moʻuí. Neongo e taimi ʻoku fakamoleki ʻe ʻOnitelei ki heʻene akó, soká, pea mo e komipiutá, ka ʻoku kei maʻu pē hono taimi ke lotu, ʻaukai, ako e folofolá, mo fakahoko hono ngaahi fatongia ko ha taulaʻeikí. ʻOkú ne toe fakapapauʻi foki ʻokú ne “ʻalu” ki he seminelí, ʻa ia ʻokú ne fakahoko ia he ʻinitanetí ko ʻene fuʻu mamaʻó.
ʻOku kau hono fai ko ia e ngaahi meʻa ko iá ʻi he tokangaʻi fakalaumālié pea ʻoku tokoni ia ke ʻilo mo fakatonutonu e ngaahi matavaivaí kimuʻa pea aʻu ki he tuʻunga fakatuʻutāmaki ko e hōloa fakalaumālié.
ʻOkú ne pehē, “ʻOku ʻi ai e ngaahi meʻa kuo pau ke fai maʻu pē—ʻo fokotuʻu ha tōʻonga moʻui. He ʻikai te ke tuku e moʻuí ke ne puleʻi koe.”
ʻAuha Fakalaumālié
Kuo ʻilo ʻe ʻOnitelei kapau he ʻikai ke tau fakahoko maʻu pē hono tokangaʻi fakalaumālie kitautolú, ʻe lava ʻe he ngaahi mālohi hangē ko e hohaʻá pe vilitaki fakatoʻumeʻá ʻo holoki ʻetau malava ke fakafepakiʻi ʻa e ʻahiʻahí. ʻI heʻene hoko iá, he ʻikai ke fuʻu fuoloa kuo tau hē mei he halá, ʻetau mapuleʻi kitautolú, pea aʻu pē ki he mole hotau mālohi fakalaumālié.
Pea hangē ko ha vakapuna ʻoku tō ko e ʻikai hano mālohí, ʻoku pehē pē mole hotau mālohi fakalaumālié mo hōloa ʻi heʻetau faiangahalá, ʻo tau toe mamaʻo ange ai mei he langí pea iku ki he ʻauha fakalaumālié.
Neongo ʻoku malava ʻe he Fakalelei ʻa e Fakamoʻuí ʻo toe fakaleleiʻi kitautolu hili ʻetau maumaú, ka ʻoku lelei ange ke falala ki Hono mālohí ke tokoniʻi kitautolu ke fakaleleiʻi e palopalemá heʻene kei siʻí—kimuʻa peá ne fakatupu ha ʻauha fakalaumālie.
Ko Hono Fakatuʻutāmaki ʻo e Hiki Fakalaká
ʻOku teʻeki ai pē ke fakakaukau ʻa ʻOnitelei ke taʻefakahoko hono tokangaʻi fakamakēnika e vakapuná. ʻOku ʻikai ha toe fili ke taʻefakahoko ia. ʻOkú ne pehē, “ʻOku ʻi ai ha ngaahi lao ki ai.” Ka ʻokú ne pehē kapau te ne taʻe fakahoko tuʻo taha pē—hono tokangaʻí— pea “mahalo pē he ʻikai ha meʻa ia ʻe hoko.”
Mahalo ko e palopalema lahi taha hono taʻefai e ngāué ko e ʻikai ke pā ʻa e vakapuná he taimi pē ko iá. ʻOkú ne pehē, “Kapau he ʻikai hoko ha meʻa kovi ʻi heʻeku taʻefai e ngāué he ʻaho ní, ʻe faingofua ange leva hano ʻahiʻahiʻi au ke taʻefai ha ngāue ʻapongipongi.”
ʻI he taimi ko ia ʻoku hokohoko ai hono taʻe tokangaʻí, ʻe fakatupu ʻe he ngaahi mālohi mo e mamafa ko ia ʻoku tuku atu ki he vakapuná—pe ko kitautolú—ha palopalema ʻo tatau pē pe ʻe vave pe tuai ʻene hokó. ʻOkú ne pehē, “Ka ʻe faifai pē pea tau ʻauha ai.”
Ko hono ʻuhinga ia naʻe foaki mai ai ʻe he ʻOtuá ʻa e ngaahi fono ki hono fakahoko maʻu pē ʻa e tokangaʻi fakalaumālié. “Mou faʻa fakataha [ʻi ʻapisiasi] ke lahi” (3 Nīfai 18:22; ko e toki tānaki atu hono fakamamafaʻí). Lotu maʻu pē (vakai, 3 Nīfai 18:19). Fekumi faivelenga ʻi he ngaahi folofolá (vakai, 3 Nīfai 23:1–5). “Tuku ke ngaohi ke fakaʻofoʻofa maʻu ai pē ʻe he angamaʻá ʻa hoʻo ngaahi fakakaukaú” (T&F 121:45; ko e toki tānaki atu hono fakamamafaʻí). ʻAʻahi maʻu pē ki he temipalé.1
ʻE hanga hono tauhi e ngaahi fono ko iá mo tokangaʻi fakalaumālie maʻu peé, ʻo pukepuke kitautolu he tuʻunga totonú.
ʻOku pehē ʻe ʻOnitelei, “Naʻe foʻu ʻa e vakapuná ke mavahe mei he kelekelé, ke mavahe mei māmani. Ko e finangalo ia ʻo e Tamai Hēvaní kiate kitautolú. ʻI hono fakahoko maʻu pē hono tokangaʻí, te tau lava ʻo aʻu hao ai ki he feituʻu ʻoku tau ʻalu ki aí—ko e foki ki he langí.”
Faitaaʻi ʻo e vakapuná ʻe he iStockphoto © Christopher Pattberg; toʻomataʻú: faitaaʻi ʻe Adam C. Olson
Faitaaʻi ʻo e kapakaú ʻe Adam C. Olson; faitaaʻi ʻo e papa fakapipikiʻanga meʻá ʻe John Luke