Ko e Hā ʻOku Hoko Mai hili ʻa e Seminelí?
ʻOku ʻikai ke ngata hoʻo ako fakalotú ʻi hoʻo ʻosi mei he seminelí. ʻOku ʻi ai ha meʻa fakaofo ʻoku kei fakatatali atu maʻau.
ʻOkú ke ako e folofolá he seminelí pea feʻiloaki maʻu pē mo e niʻihi kehe ʻoku mou toʻú. ʻOkú ke ongoʻi hono talitali lelei koé, pea lava ke ke ongoʻi e Laumālié. Ko ia ʻi hoʻo fakakakato e seminelí, ko e ngata nai ia ʻo e ngaahi aʻusia ko iá? ʻIkai ʻaupito.
Ko e sitepu hokó ʻa e polokalama ʻinisititiuti ʻa e Siasí, pea te ke saiʻia ai. ʻOku tatau ai pē pe te ke ʻalu ki he kolisí pe ʻikai, te ke lava ke hokohoko atu hoʻo ako kau ki he ongoongoleleí, teuteu ke ngāue fakafaifekaú mo e mali temipalé, pea vahevahe e ngaahi aʻusiá mo e niʻihi kehe ʻoku mou toʻú.
Ko e niʻihi ʻeni ʻo e ngaahi tali ki he ngaahi fehuʻi angamaheni kau ki he ʻinisititiutí. Te ke lava ke toe maʻu ha meʻa lahi ange ʻi he institute.lds.org.
Ko e hā ʻa e ʻinisititiuti?
ʻOku kau he ʻinisititiutí ha ngaahi kalasi ako ki he ongoongoleleí, kau ai e ngaahi kalasi ki he folofolá, ngaahi akonaki ʻa e kau palōfitá, mo e teuteu ki ha ngāue fakafaifekau pe mali temipale. ʻOku ʻi ai ha ngaahi ʻinisititiuti ʻe niʻihi te ke lava ke fili mei ai ha ngaahi kalasi lahi.
Ko hai ʻe lava ʻo kau ki aí?
ʻOku poupouʻi mālohi atu e kakai tāutaha kei talavoú ke kau ki he ngaahi kalasi ʻinisititiutí. ʻE lava ke kau mai ha taha—mali pe tāutaha—he vahaʻa taʻu ʻo e 18 ki he 30.
Ko e fē feituʻu te u maʻu ai e ʻinisititiutí?
ʻOku ʻi ai ha ngaahi feituʻu ʻoku ʻi ai ha ngaahi fale ʻinisititiuti ʻoku ofi ki he ngaahi kolisí mo e ʻunivēsití. ʻI he ngaahi feituʻu kehé ʻoku fai e ngaahi kalasí ʻi he fale lotú pe ngaahi feituʻu kehe. Fetuʻutaki ki hoʻo pīsopé pe palesiteni fakakoló ke ʻiloʻi e polokalama ʻinisititiutí ʻi homou feituʻú, pe ʻalu ki he institute.lds.org ke ʻilo e ʻinisititiuti ofi atu kiate koé.
Ko e hā ʻoku totonu ke u kau ai ki he kalasi ʻinisititiutí?
Naʻe pehē ʻe Palesiteni Tōmasi S. Monisoni: “ʻAi ke mahuʻinga e kau mai ki he ʻinisititiutí. … Fakakaukau ki ai. ʻE maʻu ai ha kaungāmeʻa, ongoʻi ai e Laumālié, pea ʻe fakamālohia e tuí. ʻOku ou palōmesi atu ʻi hoʻo kau mai ki he ʻinisititiutí mo ako faivelenga e folofolá, ʻe tupulaki ho mālohi ke fakaʻehiʻehi ai mei he fakatauelé pea maʻu mo e fakahinohino ʻa e Laumālie Māʻoniʻoní ʻi he meʻa kotoa te ke faí” (institute.lds.org, Apr. 21, 2009).
Tā fakatātaaʻi ʻo e ʻatá ʻe he Media Services