Ngaahi Ongoongo Fakatemipalé

Fakatapui ne Fakahoko ki he Temipale Ketisalatenanikō Kuatemalá

Ne fakatapui ‘a e Temipale Ketisalatenanikō Kuatemalá ‘i he ‘aho Sāpate, 11 ‘o Tīsema 2011, ‘i ha fakatahaʻanga ‘e tolu ‘o fakahoko ‘e Palesiteni Tieta F. ‘Ukitofa, ko e Tokoni Ua ‘i he Kau Palesitenisī ‘Uluakí. Naʻe fakamafola ‘a e ngaahi fakatahaʻanga fakatapuí ki he kāingalotu ‘o e Siasí ‘i he vāhenga fakatemipalé.

Ne pehē ‘e Palesiteni ‘Ukitofa ‘i he kātoanga faiva fakafonuá, “Ko ha temipale fakaʻofoʻofa moʻoni ‘eni, ‘oku faiva ai ‘a e toʻu tupú mei he ngaahi faiʻangalotu he ‘ēliá, hiva, fakafaivaʻi e hisitōlia fakalotofonuá mo e anga fakafonuá. ʻOku malama hangē ha siuelí, pea ko ha siueli ia ki he ‘ēlia ko ‘eni ‘o e fonuá.”

Ko e Temipale Ketisalatenanikō Kuatemalá ko e temipale ‘aki ia hono 136 ‘o e Siasí he funga ‘o e māmaní pea ko e nima ‘aki ia ‘i ‘Amelika Lotoloto. ‘E tokoni e temipalé ki ha meimei Kāingalotu nai ‘e toko 60,000.

Fakatapui ‘e he Siasí ‘a e Kelekele ki he Temipale hono Fitu ‘i Palāsilá

ʻI he ‘aho 15 ‘o Nōvema 2011, ne tokangaʻi ai ‘e ‘Eletā Tēvita A. Petinā ‘o e Kōlomu ‘o e Kau ‘Aposetolo ‘e Toko Hongofulu Mā Uá e ouau tanupou ki he Temipale Fotalesa Palāsilá, ko e temipale ‘aki ia hono fitu ‘o e Siasí ‘i Palāsilá.

Naʻe pehē ‘e ‘Eletā Petinā, “ʻE hoko ‘a e temipalé ni ko ha maʻuʻanga ‘amanaki lelei, maama, mo ha tui ki he ‘Otuá kiate kinautolu ‘e ō mai ‘o ‘aʻeva heni pea ‘i he feituʻú ni. ‘E lelei ange maʻu pē mo kehe ‘a e koló ni koeʻuhí ko e temipale ‘e langa hení.”

ʻE langa ‘a e temipalé ‘i ‘Avenita Sanitosi Tumoni ‘i Fotalesa, Siala, Palāsila. Ne fakahā ‘e Palesiteni Tōmasi S. Monisoni hono langa ‘o e Temipale Fotalesa Palāsilá he lolotonga ‘o e konifelenisi lahi ‘o ‘Okatopa 2009.

Ko e Temipale Ketisalatenanikō Kuatemalá, ne fakatapui he ‘aho 11 ‘o Tīsema 2011 ‘e Palesiteni Tieta F. ‘Ukitofa, ko e temipale ‘aki ia hono 136 ‘o e Siasí.

CREDIT: