Naʻá Ne Maumauʻi e Ngaahi Haʻi ʻo e Maté
“ʻOku nau maʻu ʻa e moʻui taʻengatá ʻia Kalaisi, ʻa ia kuó ne maumauʻi ʻa e ngaahi haʻi ʻo e maté” (Mōsaia 15:23).
ʻI he kei iiki ʻema fānaú, ne fai ʻi ha pō ʻe taha ʻemau lau folofola fakafāmili. Naʻa mau laukonga ʻo kau ki he Fakamoʻuí pea talanoa ki he founga ne ʻikai ai ke ʻi ai Haʻane fehālaakí.
ʻI he konga kimui ʻo e pō ko iá naʻe fakamohe ai ʻe hoku uaifí ʻema tama fefine taʻu tolu ko Susí. Naʻe sio hake ʻa Susi ki heʻene faʻeé ʻo pehē ange, “ʻE Mami, naʻe ʻi ai e fehālaaki ʻa Sīsū.”
Naʻe tali atu heʻene faʻeé, “Ko e hā hoʻo ʻuhingá?”
Naʻe pehē ange ʻe Susi, “Naʻá ne maumauʻi ha meʻa.”
Ne kiʻi moʻutāfuʻua ʻene faʻeé peá ne ʻeke ange, “Ko e hā e meʻa naʻá Ne maumauʻí?”
Naʻe tali mai ʻe Susi, “Naʻe maumauʻi ʻe Sīsū e ngaahi haʻi ʻo e maté.”
Naʻe fakatokangaʻi hake ʻe hoku uaifí naʻe tuʻo lahi haʻana hivaʻi mo Susi e foʻi hiva Palaimeli ko e “ʻI he ʻAho Tōtaʻu Fakaʻofoʻofá”, pea naʻe ako ʻe Susi hono ngaahi leá [“ʻI ha pongipongi fakaʻofoʻofa he faʻahitaʻu māfaná, naʻe toetuʻu ʻa Sīsū Kalaisi ʻo mavahe mei he faʻitoka naʻe tokoto aí; kuó Ne maumauʻi e ngaahi haʻi ʻo e maté.”]1 Naʻe fakamatalaʻi ange ʻe he faʻē ʻa Susí ʻoku ʻuhinga hono maumauʻi e ngaahi haʻi ʻo e maté ki he toetuʻu ʻa Sīsū koeʻuhí ka tau toe lava ʻo moʻui hili ʻetau maté.
Naʻe hanga ʻe he talanoa ko iá ʻo ʻomi ha faingamālie lahi kiate au mo hoku uaifí ke akoʻi ʻema fānau fefine ko Lisi, Susi, mo ʻEmá kau ki he ʻuhinga moʻoni kiate kitautolu ʻo e Fakaleleí. ʻOku moʻoni ʻa Susi: naʻe maumauʻi ʻe Sīsū ʻa e ngaahi haʻi ʻo e maté. Ka naʻe ʻikai ko ha fehālaaki ia. Ka ko e meʻaʻofa mahuʻinga taha ia naʻe lava ke Ne ʻomi maʻatautolú! (Vakai, Tokāteline mo e Ngaahi Fuakava 14:7.)
Naʻe pekia e Fakamoʻuí pea toetuʻu koeʻuhí ke tau toe lava ʻo nofo mo ʻetau Tamai Hēvaní pea mo hotau fāmilí ʻo fakatatau mo ʻetau angatonú. Kapau te tau feʻunga, te tau lava ke fiefia ʻi he ngaahi tāpuaki ʻo e moʻui taʻe-faʻa-maté mo e moʻui taʻengatá ʻi ha ʻaho. ʻOku ou fakamālō ʻi hono maumauʻi ʻe Sisū ha meʻá—ʻa e ngaahi haʻi ʻo e maté!
Toʻomataʻú: tā fakatātā ʻa Dilleen Marsh