Taimi Fepōtalanoaʻakí
“Te u fakaʻapaʻapa ki heʻeku ongo mātuʻá pea fai hoku fatongia ki hono fakamālohia hoku fāmilí” (Ko Hoku Ngaahi Tuʻunga ʻUlungāanga ʻi he Ongoongoleleí).
Naʻe ui atu e faʻeé, sai, mou omi kotoa ki heni. Ko hotau taimi fepōtalanoaʻakí ʻeni.”
Naʻe nofo ʻa Siosi he ʻahó kotoa mo e ʻamanaki atu ki he taimi fepōtalanoaʻakí. Naʻe fakataha maʻu pē ʻa Siosi mo hono ongo tuongaʻane kei iiki ko Peni mo Uesí he efiafi kotoa pē ʻi he loki talanoá mo e Fineʻeikí mo e Tangataʻeikí ke talanoa kau ki he meʻa ʻoku hoko ki heʻenau moʻuí.
Naʻe ʻosi talaange ʻe he Tangataʻeikí he pooni te ne tokoniʻi ʻa Siosi ke ako ʻene lea ki he fanongonongo he pongipongí. Ko hono lau ko ia e fanongonongó he pongipongí ko ha faingamālie makehe ia ʻi he ʻapiako ʻo Siosí. ʻE tā ʻe Siosi ʻapongipongi ha kiʻi konga e foʻi hiva ʻoku manako aí he meʻa fakaleʻolahi ʻa e ʻapiakó pea fakaʻaongaʻi e maiká ke tala atu ai e ngaahi ʻekitivitií mo e meʻatokoni ki he hoʻataá.
Naʻe lele ʻa Siosi ki he loki talanoá, ʻo fiefia ke ako ʻene leá.
Naʻe talaange ʻe he Tangataʻeikí ʻi he taimi naʻe tangutu ofi atu ai ʻa Siosi kiate ia he seá, “Ko ʻetau tokotaha fakamafola lea ongoongoá ʻeni! Ko e hā hoʻo ongoʻi ki ʻapongipongí?”
Naʻe pehē ange ʻe Siosi, “ʻOku ou fiefia ka ʻoku ou kiʻi manavasiʻi. ʻOku ou manavasiʻí naʻá ku fai ha meʻa ʻo hala ʻo fanongo ki ai e ʻapiakó kotoa.”
Naʻe talaange ʻe he Tangataʻeikí, “Ko e ʻuhinga ia te ta ako aí. Lau angé hoʻo leá pea te u fakafanongo atu ki he ngaahi konga ʻe lava ke toe fakaleleiʻí.”
Naʻe tali ange ʻe Siosi, “Mālō, Tangataʻeiki.”
Naʻá na toutou ako tuʻo lahi mo e Tangataʻeikí e leá pea ʻikai fakatokangaʻi ʻe Siosi e taimí. Naʻe tuʻu hake leva ʻa Siosi ke toe lau fakaʻosi ʻene leá ki hono fāmilí. Naʻe fiefia e Fineʻeikí mo e Tangataʻeikí. Naʻe tā nima mai ʻa Peni pea malimali ʻa Uesi mo pasipasi.
Naʻe ʻalu ʻa Siosi ʻo mohe fiefia mo ʻiloʻi fakapapau te ne lava.
Naʻe lele lelei e meʻa kotoa pē he ʻaho hokó. Neongo pē naʻe ilifia ʻa Siosi, ka naʻe malimali pē heʻene fanongo ki hono tā mai ʻene foʻi hivá he meʻa fakaleʻolahi ʻa e akó. Naʻá ne fiefia he naʻá ne ʻosi ako mo e Tangataʻeikí ʻene leá, pea naʻá ne lau māmālie ia mo mahino pea ʻikai ha fehālaaki.
Naʻe talaange ʻe Mīsisi Peleiki ko e tokoni pule akó, “Naʻe fakaʻofoʻofa ʻaupito hoʻo leá.”
ʻI he tuku ʻa e akó, naʻe tuʻu laine atu ʻa Siosi ki he pasí. Ne tafoki mai ha tamasiʻi ʻoku lahi ange ai ʻo ʻeke ange, “Ko koe naʻá ke lau e fanongonongó he ʻaho ní?”
Naʻe mamali pē ʻa Siosi ʻo pehē ange, “ʻIo.”
Naʻe fehuʻi mai ʻe he tamasiʻí, “Ko e hā naʻá ke fili ai e foʻi hiva ko iá? Ko ha foʻi hiva taʻeoli ia. Naʻá ke fakangalivaleʻi e fanongonongó he pongipongí ni.” Peá ne ui ʻaki ia ha hingoa kovi peá ne kakata mo hono kaungāmeʻá.
Naʻe tangutu tokotaha pē ʻa Siosi he sea ʻi muʻa he pasí. Naʻá ne ongoʻi tokakovi.
ʻI he aʻu ʻa Siosi ki ʻapí naʻe vaʻinga mai e Fineʻeikí mo Uesi.
Naʻe pehē atu ʻe Siosi, “Fineʻeiki, ʻoku ou ʻiloʻi pē ʻoku teʻeki ai ke hoko e taimi fepōtalanoaʻakí, ka ʻoku ou fakaʻamu ʻe lava ke ta talanoa he taimí ni.”
Naʻe tali mai ʻe he Fineʻeikí, “ʻIo, Siosi. Ko e hā e meʻa naʻe hokó? Naʻe hala hoʻo lau e fanongonongó he pongipongí?”
Naʻe talaange ʻe Siosi, “ʻIkai. Naʻe lelei e meʻa kotoa. Naʻá ku fakakaukau pē ʻoku pehē, ka naʻe toki talamai ʻe ha tamasiʻi ne u fili ha foʻi hiva taʻeoli. Pea naʻá ne toe ui ʻaki au ha hingoa kovi.”
Naʻe tātāaʻi ʻe he Fineʻeikí e faliki hono tafaʻakí. Naʻe lue atu ʻa Siosi ʻo tangutu ki lalo. Naʻe fāʻofua atu ki ai e Fineʻeikí. Naʻe talanoa leva ʻa Siosi mo e Fineʻeikí ki he meʻa kotoa naʻe hoko he ʻaho ko iá, kau ai e lea lelei ʻa Mīsisi Peleikí.
Naʻe talaange ʻe he Fineʻeikí, “ʻOku ou fakameʻapangoʻia pē ʻi he angakovi atu ʻa e tamasiʻi ko iá mo hono kaungāmeʻá kiate koé. Ka ʻoku mahino mai ko e kakai kehe hangē ko Mīsisi Peleiki ʻokú ke fakaʻapaʻapaʻí naʻa nau saiʻia ʻi hoʻo lau e fanongonongó. ʻOkú ma laukau ʻaki koe mo e Tangataʻeikí. Naʻá ke fai ha ngāue lahi, pea naʻe lelei ʻa e meʻa kotoa!”
Naʻe toe fāʻofua ʻa Siosi ki he Fineʻeikí. Naʻe pehē ange ʻe Siosi, “Mālō, Fineʻeiki. ʻOku ou ongoʻi lelei ange.” Naʻe fiefia ʻa Siosi ke ʻi ai ha taimi talanoa ʻi ha faʻahinga taimi pē.
Tā fakatātaaʻi ʻe Jared Beckstrand