Tohi ki he ʻĒtitá
Ko ha Kāpasa Mahuʻinga
Ko e Liahoná ko ‘eku maama kamo ia ‘i he moʻui ní. ʻI heʻeku maʻu iá, he ‘ikai teu teitei hē. ‘Oku ou tui ‘e lava ‘a e taha kotoa pē ‘okú ne lau ‘a e ngaahi makasini ‘a e Siasí ‘o maʻu ‘a e meʻa tonu ko ia ‘okú ne fie maʻú. Ko e palesiteni au ‘o e Palaimelí, pea ‘oku ou fakatokangaʻi ‘oku manako ‘a e fānaú ke fanongo ki he ngaahi talanoa fekauʻaki mo e fānau tatau mo kinautolu ‘i he makasiní. ‘Oku hoko ‘a e Liahoná ko ha kāpasa mātuʻaki mahuʻinga ‘i heʻetau moʻuí; ‘okú ne tokoniʻi kitautolu ke tau hao mei he ngaahi tauhele ‘a Sētané.
Ianina ʻIvanivina Tavitenikō, ‘Iūkuleini
ʻOmi ‘e he Ngaahi Aʻusiá ‘a e Fakafiemālié
Kuo tokoniʻi lahi au ‘e he Liahoná ‘i heʻene ngaahi pōpoakí mo e ngaahi fakamatalá. ‘I he moʻui taʻe-manonga ‘oku mau ‘i aí, ‘oku ou faʻa mālōlō ‘i he lolotonga ‘o e ‘ahó ‘o lau ha fakamatala mei he makasiní ‘oku fakamatalaʻi ai ha ngaahi aʻusia ʻi he moʻuí ‘a ha kāingalotu kehe. ‘Oku tokoniʻi maʻu pē au ‘e he ngaahi fakamatala ko ‘ení ke u maʻu ha nonga fakalaumālie pea fakafoʻou ‘eku holi ke foki ki he ‘ao ‘o e ‘Otuá mo Sīsū Kalaisí, pea mo hoku fāmilí.
Siaosi Kālosi, Palāsila