Te u Mate!
Lamona Losi, Tenesī, USA
Lolotonga ʻeku hoko ko ha neesi ʻi he tafaʻaki fakaakeake ki he kau tafá, ne u maʻu ha telefoni ʻi ha ʻaho ʻe taha fekauʻaki mo e taha mahaki ko Pila naʻe toki fai pē ha tafa ki ai. Naʻe tonu ke ʻave ia ki he tafaʻaki tuʻunga fakatuʻutāmakí ka naʻe ʻomi ia kiate au he naʻe fonu e tafaʻaki ia ko iá.
Naʻe aʻu mai e taha mahakí mo hono fāmilí. Naʻá ku fiefia ke sio ʻokú ne fakatokangaʻi meʻa, ʻiloʻi e feituʻu ʻokú ne ʻi aí mo e meʻa ʻoku hokó, pea ʻoku sai pē.
Hili e siviʻi e tā hono mafú pea fakataukeiʻi ia mo hono fāmilí ki he lokí, ne u lue atu leva ki he holó ke hiki ha meʻa ʻi heʻene sātí. ʻI he ʻamanaki pē ke u tohí, ne u ongoʻi ha leʻo ʻoku pehē mai, “Toe foki ki hono lokí.” Ne tuku ʻeku tohí kau sio kimui. Naʻe ʻikai ke ʻi ai ha taha ia. Ne u pehē mahalo ko e anga pē ia ʻeku fakakaukaú, ka naʻe fakafokifā ʻeku toe fanongo tuʻo ua ki aí—ka naʻe toe leʻo lahi ange ia he taimí ni.
Ne u lele ki he loki ʻo Pilá ʻo ʻiloʻi ʻoku pupula hono kiá, pea faingataʻa ke mānava. Ne u fakakaukau kuo lavea e halanga totó, pea ne u lomiʻi hono kiá ʻaki hoku nima toʻomataʻú kae fakaʻaongaʻi hoku nima hemá ke tā ki he toketā naʻá ne fai e tafá. Naʻe talamai ʻe he toketā tafá te ne fekauʻi mai ha timi he vave tahá ke ʻoange ʻa Pila. Naʻá ne pehē mai, “Pea ʻoua ʻe toʻo ho nimá!”
ʻI he hokohoko atu ʻeku lomí, ne u fakatokangaʻi ha tohi angamaheni ʻa e Siasí he tafaʻaki mohenga ʻo Pilá. Ne u ʻeke ange, “Ko ha mēmipa koe ʻo e Siasí?”
Naʻá ne feinga ke kamo mo ne talamai ko ha tokotaha ngāue ouau ia he Temipale ʻAtalanitā Siōsiá. Naʻá ne kuikui ke taʻofi hono loʻimatá mo pehē mai, “Te u mate!”
Naʻá ku talaange he ʻikai ke mate, mo fakahaaʻi fakapapauʻi ange, “Te u mali he Temipale ʻAtalanitaá he māhina katuʻú, pea kuo pau ke ke ʻi ai.” Naʻe aʻu mai e timi tafá ʻo ʻave ʻa Pila.
ʻI hono teu fiefia ko ia ʻeku malí he mahina hoko, ne meimei ngalo ʻa Pila ia ʻiate au, ta ne ʻikai sai ki ai e faitoʻo ne ʻoangé. Ka ʻi hono taki atu au ʻe he metuloní ki he loki silá ʻi hoku ʻaho malí, ne u sio ki ha fofonga ne u ʻiloʻi ia: ko e uaifi ʻo Pilá ko Siōsiá. ʻI heʻeku fakahā ki ai ko e teu eni ke fai ʻeku malí, naʻá ne ʻalu leva ʻo kumi mai ʻa Pila. Ki muʻa pea kamata e ouaú, naʻe fakaava mai e matapaá pea hū mai ʻa Pila. Hili ha ngaahi uike ʻo e langa ʻulú, tokakoví, mo e tā vaivaiá, naʻe ongoʻi sai ʻa Pila he ʻaho ko iá ke ʻalu ki he temipalé, ʻo ʻikai ke ne ʻiloʻi ko hoku ʻaho malí ia.
Hili ha taʻu ʻe ua mei ai naʻe ui au mo hoku malí ko ha ongo ngāue ouau he Temipale Nesivila Tenesií. ʻI heʻema aʻu atu ki he temipalé ke vaheʻi kimauá, naʻe fakaava mai ʻe ha tangata e matapaá kiate au mo pehē mai, “Malō hoʻomo lava mai ki he Temipale Nesivilá!” Ko Pila ia.
Naʻa mau ngāue fakataha he taʻu ʻe tolu. Naʻe tala ʻe Pila ki he taha kotoa ne u fakahaofi ʻene moʻuí, ka naʻá ku ʻiloʻi ko e ʻEikí naʻá ne fakahaofi iá. Naʻá Ne akoʻi mai he meʻa naʻe hokó ʻa e mahuʻinga ke fakafanongo ki he ueʻi ʻa e Laumālié.