ʻOku Mau Lea ʻia Kalaisi
ʻAloʻofa Fakaofó
ʻOku ou fakafalala he ʻaho kotoa ki he ʻaloʻofa ʻa Sīsū Kalaisí.
Naʻe talamai ʻe heʻeku faiako lēsoni fakalotu ʻi he ʻUnivēsiti Pilikihami ʻIongí, “ʻOku ʻikai ke tau faʻa lea ʻo kau ki he ʻaloʻofá ʻi heʻetau ngaahi houalotu he Siasí, ka ʻi heʻetau hoko ko e kāingalotu ʻo e Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní, ʻoku tau tui ki he ʻaloʻofá.”
Ko hono moʻoní, naʻe ʻikai ke u manatuʻi ʻe au ha lēsoni ʻi he Kau Finemuí pe Lautohi Faka-Sāpaté ʻo kau ʻi he ʻaloʻofá, ka naʻe foki ʻeku manatú ki heʻemau kuaea he ako māʻolungá mo ʻemau hivaʻi e “ʻAloʻofa Fakaofó [Amazing Grace].”
ʻAloʻofa fakaofó! (he ongo fakaʻofoʻofa moʻoni!)
Fakahaofi ai ha taha loto-mamahi hangē ko aú!
Ne u hē, ka kuo toe ʻilo au;
Ne u kui, ka kuó u ʻā.1
Naʻe fakamatalaʻi heʻeku faiakó, “Ko e ʻaloʻofá ko e mālohi ia ʻo e ʻOtuá mei he Fakalelei ʻa Sīsū Kalaisí. ʻOku ou vahevahe ʻa e ʻaloʻofá ki he mālohi ʻe fā: toetuʻú, huhuʻí, fakamoʻuí, mo e fakamālohiá.” Naʻá ne hoko atu ʻo fakamatalaʻi e mālohi takitaha, ka naʻe toe foki pē ʻeku fakakaukaú ki he ngaahi meʻa ne u manatu ki aí.
Naʻe ʻalu foki e kuaea tatau pē he ako māʻolungá ki Kalefōnia, ʻi he USA, ke feʻauhi ʻi ha kātoanga hiva. Ne u puke ʻoku teʻeki ke fai e ʻalú, pea naʻe mahino he ʻikai ke u lava ʻo hiva he kuaeá ʻi he kātoanga hivá he naʻe fā hoku leʻó—pea kapau te u hiva, he ʻikai ke sai ʻeku hivá pea naʻe toe mamahi foki hoku mongá. Ne u kole ha tāpuaki lakanga fakataulaʻeiki mei heʻeku tamaí pea ʻi he ʻaho hono hokó ne u lotu ke sai hoku leʻó.
Mahalo pē naʻe teʻeki ai ke mahino kakato kiate au ʻi heʻeku hivaʻi ʻa e “ʻAloʻofa Fakaofó” ʻaki ha leʻo kuo sai ʻi he kātoangá, naʻá ku hiva ʻaki e mālohi pē ko ia naʻá ne fakamoʻui au he ʻaho kimuʻá. Naʻe tāpuekina au he ʻaho ko iá ʻe he Fakalelei ʻa e Fakamoʻuí; ko ʻEne ʻaloʻofá ʻa e tupuʻanga hoku fakamoʻuí.
“Pea te ne hāʻele atu, ʻo kātakiʻi ʻa e ngaahi mamahi mo e ngaahi faingataʻá pea mo e ngaahi ʻahiʻahi kehekehe kotoa pē; pea ʻe fai ʻeni koeʻuhí ke lava ʻo fakamoʻoniʻi ʻa e folofolá ʻa ia ʻoku pehē te ne toʻo kiate ia ʻa e ngaahi mamahi mo e ngaahi mahaki ʻoku moʻua ai hono kakaí” (ʻAlamā 7:11).
Hili e ako māʻolungá, ne lōmekina au ʻe he ngaahi kalasi he kolisí ʻi he ʻuluaki taʻú ʻo hangē ko e tokolahi ʻo e fānau akó pea mo e ngaahi faingataʻa ʻo e nofo mavahe mei ʻapí pea toe nofo foki mo ha kaungāloki ʻe toko nima kehe.
Ko e taimi ʻeni ne u ako ai ke mahino ʻa e mālohi ʻo e ʻaloʻofa ʻa Kalaisí ke fakamālohia mo tokoní. Ne fakamoleki pē hoku ngaahi ʻahó he ngāué mo e akó, ka naʻá ku fakafalala ki he lotu fakaʻahó ʻa ia ne u kole ai ki he Tamai Hēvaní ke malava ʻo fakakakato e ngaahi ngāue naʻe fie maʻú. ʻI he hokohoko atu e taʻu fakaakó, ne u ʻiloʻi ʻi he fiefia ne ʻikai ngata ʻi he lava ke u ngāue leleí ka he ʻikai te u faingataʻaʻia ʻi heʻeku maʻu e mālohi fakamālohia mo e tokoni ʻa e Fakalelei ʻa Kalaisí.
“ʻOku ou faʻa fai ʻa e meʻa kotoa pē ʻia Kalaisi ʻokú ne fakamālohiʻi aú” (Filipai 4:13).
Neongo ʻoku teʻeki ai ke u aʻusia e ongo konga kehe ʻo ʻEne ʻaloʻofá—ʻa e toetuʻú pea mo e huhuʻi kakató—ka ʻoku ou kei fakafalala pē he ʻaho takitaha ki he Fakalelei ʻa Sīsū Kalaisí. Naʻe fakamoʻui mo fakamālohia au ʻe he ʻaloʻofá, ko e mālohi ʻo e ʻOtuá mei he Fakalelei ʻa Sīsū Kalaisí. ʻI heʻeku feinga ke talangofua ki he ngaahi fekau ʻa e ʻOtuá mo muimui ki Hono finangaló, ʻoku ou maʻu ai e tokoni fakalangi ʻoku fuʻu māʻolunga ʻaupito ia he meʻa te u malavá.
“ʻOku ʻi he ʻaloʻofá ʻa homau fakamoʻuí, ʻo ka hili ʻemau fai ʻa e meʻa kotoa pē ʻe ala faí” (2 Nīfai 25:23).
Tā fakatātaaʻi ʻo e ʻatá ʻe Ash Ram