Ko e Lea ‘i he ‘Aho ní
Ko hono akoʻi ‘e ʻEletā Kulisitofasoni mo ‘Eletā Seniseni ‘a e Kāingalotu ‘i ‘Asenitiná
ʻI he ‘aho Tokonaki, 12 ‘o Nōvema 2011, Ne lea ai ‘a ‘Eletā D. Toti Kulisitofasoni ‘o e Kōlomu ‘o e Kau ‘Aposetolo ‘e Toko Hongofulu Mā Uá mo ‘Eletā Sei E. Seniseni ‘o e Kau Palesitenisī ‘o e Kau Fitungofulú ki he toʻu tupu, kakai lalahi kei talavou, kau taki lakanga fakataulaʻeiki, kau faifekau, pea mo e kāingalotu ‘i Salata ‘i ‘Asenitina.
Naʻe ‘i ai foki mo ‘Eletā Melevini B. ‘Ānolo, Palesiteni ‘o e ‘Elia Fakatonga ‘o ‘Amelika Tongá; hono uaifí, Tivona; pea mo ‘Eletā Lūpeni Sipitale, ko e Fitungofulu Fakaʻēlia. Naʻe ‘i ai foki mo e uaifi ‘o ‘Eletā Kulisitofasoní, ʻa Kefi, pea mo e uaifi ‘o ‘Eletā Senisení, ko Lona.
Ne meimei aʻu ki ha toʻutupu mo ha ngaahi mātuʻa ‘e toko 1,300 ne nau fakatefua ‘i he faeasaití ‘o fakatou lea ai ‘a ‘Eletā Kulisitofasoni pea mo ‘Eletā Seniseni. Ne ‘i ai foki mo ha kāingalotu kehe ‘e toko 10,000 ne nau mamata ki he fakamafolá mei he ngaahi senitā fakasiteiki kehekehe ʻe 70 ‘i loto ‘Asenitina.
Ne pehē ‘e ‘Eletā Seniseni, ‘a ia ne hoko kimuʻa ko ha Palesiteni Fakaʻēlia he Fakatonga ‘o ‘Amelika Tongá, “Kapau he ‘ikai ke mou toe manatuʻi ha meʻa te u lea ‘aki, ‘oku ou loto ke mou manatuʻi pē ha kupuʻi lea mei he palōfitá, Palesiteni Tōmasi S. Monisoni, ‘a ia ‘oku ou fakamoʻoniʻi ko e palōfita moʻoni ia ‘a e ‘Otuá. Ko e kupuʻi leá ‘eni: “ʻOku makatuʻunga mei he ngaahi filí ‘a e ikuʻangá.”
Ne pehē ‘e ‘Eletā Seniseni, ʻoku tau maʻu e tauʻatāina ke filí—‘a e malava mo e faingamālie ke fai ha ngaahi filí, pea ‘i he ngaahi fili ko iá ‘oku tau fili ai hotau ikuʻangá.
Naʻá ne fai ai ha talanoa ki hano kaungāmeʻa ne fili ia ‘i ha pō ‘e taha ke inu ʻolokaholo pea fakaʻuli ‘o tupu ai ha fakatuʻutāmaki ne mate ai ha toko ua. Naʻá ne fakafehoanaki leva ia mo e talanoa ki heʻene fili mo hono uaifí ke toloi ‘ena malí kae ngāue fakafaifekau ‘i heʻene kei talavoú.
Naʻá ne pehē, “ʻI heʻeku [foki maí] ne ma mali ‘i he temipalé. Ne ma fai ha ngaahi fuakava, ‘a ia ‘okú ma fakafoʻou he uike kotoa pē he lolotonga ‘o ‘ema moʻuí. Ne ma fai ha fili ‘o makatuʻunga mei ai homa ikuʻangá.”
Ne hoko leva ‘a Sisitā Kulisitofasoni, ‘o vahevahe ‘ene fakamoʻoni fekauʻaki mo e ngaahi tāpuaki ‘o e tauhi ‘o e ngaahi fuakavá, pea toki fakaʻosi leva ‘e ‘Eletā Kulisitofasoni ‘a e fakatahá.
Naʻe pehē ‘e ‘Eletā Kulisitofasoni, “Ko e meʻa pē ‘okú ke fie maʻu moʻoní ko e ‘ofá pea mo e tuí. Ko e tuí te ne tokoniʻi kitautolu ‘i heʻetau nofo malí, fāmilí, ngāué, [pea moe] ngāue maʻuʻanga moʻuí.”
Naʻá ne fakamamafaʻi ‘oku ‘omi ‘e he ngaahi fekaú ‘a e fakahinohino ki heʻetau moʻuí pea mo tokoniʻi kitautolu ke tau maʻu ‘a e meʻa ‘oku mahuʻinga moʻoní.
Hili ia pea toki naʻinaʻi leva ki he toʻu tupú pea mo ‘enau mātuʻá ke nau fai ha tukupā ke muimui ‘i he faleʻi ‘oku ‘i he kiʻi tohi tufa Ki Hono Fakamālohia ‘o e Toʻu Tupú.
Naʻá ne pehē, “ʻE hanga ‘e he meʻá ni ‘o fakaivia lahi moʻoni hoʻomou fānaú, ‘o aʻu ai pē ki heʻenau nofo toko tahá—he te nau ‘ilo ‘oku tauhi ‘e heʻenau mātuʻá ‘a e ngaahi tefitoʻi mo‘oni tatau.”
Naʻe fakaʻosi ‘e ‘Eletā Kulisitofasoni ‘aki haʻane fakahā ‘ene ‘ofa ki he kāingalotu ‘i ‘Asenitiná, ‘a ia ne ngāue fakafaifekau ai ‘i he meimei taʻu ‘e nimangofulu kuo hilí.
Lolotonga ‘enau ‘i Salatá, ne fakataha ai ‘a ‘Eletā Kulisitofasoni mo ‘Eletā Seniseni mo e kau faifekau he feituʻú pea mo e kau tāutaha lalahi kei talavoú, ‘o fakahoko ange ‘a e ‘ofa ‘a e Kau Takí.
Ne fakatou lea ‘a ‘Eletā Kulisitofasoni pea mo ‘Eletā Seniseni ki he kau faifekau mei he Misiona ‘Asenitina Lesisitenisiá he konga kimuʻa ‘o Nōvema 2011.
Taá ne ‘ai ‘e James Dalrymple