Fuamelié pea mo e Tohi ʻa Molomoná
Suʻeleni S. Uaila, Siōsiá, USA
ʻI he ngaahi taʻu kuohilí ne hiki homau fāmilí mei ha kolo femoʻuekina mo tokolahí ki ha kiʻi ʻapi ʻi ʻuta naʻe ofi atu ki ha kiʻi kolo ne lōngonoa. Naʻe ofi mai ki ai ha faama fuamelie kuo liʻaki, pea naʻe fakangofua kimautolu ʻe ha kaungāmeʻa ʻo e taha ʻoku haʻaná ke mau toli e lahi taha e fuamelie ʻoku mau fie maʻú.
ʻI ha ngaahi pongipongi lahi he uike takitaha ʻi he faʻahitaʻu māfana ko iá te mau fakafonu he kaá mo ha ʻū kane mo e tangai pea fakamoleki ha ngaahi taimi fakaʻofoʻofa mo fakafiefia ʻi hono tānaki e fuamelié. Ne ʻi ai ha pongipongi ʻe taha naʻe ʻikai ke fie ʻalu ʻeku tama tangata siʻisiʻi taha ko Hailamé. Naʻá ne fakapapauʻi kuo ʻosi kotoa e fuamelié heʻemau toli pea ko e meʻa fakamole taimi haʻamau toe ʻalu. Ka naʻá ne fuʻu ʻohovale he kei lahi ʻaupito ʻa e fuamelié. Naʻe lahi ha ngaahi fuhinga he ngaahi feituʻu naʻe ʻikai ke ne fakatokangaʻi, pea ko e fua lelei tahá naʻe maʻu ia he ngaahi vaʻa naʻá ne ʻosi ʻi ai kimuʻá.
ʻI he taimi ko ʻení naʻe fakatukupaaʻi ʻe he kau taki ʻo e toʻu tupú he uōtí ʻemau toʻu tupú ke lau e Tohi a Molomoná ke ʻosi kimuʻa pea toki kamata e akó ʻi ʻAokosí. Naʻe haʻu ʻemau fānaú mo e tukupaá ki ʻapi, pea naʻe fakatukupaaʻi homau fāmilí ke kau fakataha mo kinautolu.
Naʻe taimi siʻi pē e ʻosi ʻemau lau e Tohi ʻa Molomoná mo e aʻu mai ʻemau Liahona ʻo ʻAokosi 2005, mo e tukupā ʻa Palesiteni Kōtoni B. Hingikelī (1910–2008) ke lau ke ʻosi e Tohi ʻa Molomoná ki he fakaʻosinga ʻo e taʻú. Naʻe fiefia ʻa Hailame mo hono tokoua ko Siosefá—heʻena fakakaukau kuo mau ʻosi talangofua ki he palōfitá! Ka naʻe fakamanatu ange ʻe hono taʻokete ko Seti mo hono tuofefine lahi ko Pētaní naʻe kole mai ʻa Palesiteni Hingikelií ke mau toe lau, neongo ai pē pe ko e hā hono tuʻo lahi ʻemau lau ia ʻo ʻosí.
Naʻe ʻeke mai ʻe he ongo tamaiki tangatá, “Ka ko e hā hono ʻuhingá? Kuo tau ʻosi lau ia ʻo ʻosi, pea ko e hā ha meʻa ʻe toe ako mei ai ʻo makehe mei he meʻa kuo tau ʻosi laú?”
Hili ha kiʻi fakalongolongo taimi siʻi, naʻe lea hake ha taha ʻo kau ki he fuamelié. “Manatuʻi ʻetau fakakaukau kuo ʻosi kotoa e fuamelié heʻetau tolí? Ka ʻi heʻetau toe fokí, naʻe kei toe lahi pē ʻa e fuamelié—maʻu pē! Pea ʻe tatau ai pē pe ko e hā hono tuʻo lahi ʻetau ʻalú, pea kapau naʻe toki faí ni pē, ʻe ʻi ai maʻu pē ʻa e ngaahi fuhinga fuamelié ia.”
Naʻe vave ʻemau fakatokangaʻi e fehokotakí. Pea hangē ko e faama naʻe ofi maí mo e lahi hono fuamelie leleí, ko e Tohi ʻa Molomoná ko ha maʻuʻanga meʻatokoni fakalaumālie mo ha ngaahi moʻoni foʻou ke ʻiloʻi. Ko ia naʻa mau toe kamata ke lau e Tohi ʻa Molomoná.
ʻI heʻeku tali e tukupā ʻa e palōfitá, ne u lau ha ngaahi meʻa ʻi he Tohi ʻa Molomoná ne u ʻosi lau ʻi ha taimi lahi kimuʻa, ka naʻá ku sio ki ai ʻi ha tuʻunga kehe pea mahino lelei ʻenau fekauʻaki mo e ngaahi tūkunga pe pole foʻou. ʻOku ou ʻiloʻi ko e taimi kotoa pē ʻoku tau lau fakamātoato ai e Tohi ʻa Molomoná, te tau lava ke maʻu ai ha ngaahi fakakaukau foʻou pea tau toe ofi ange ki he Fakamoʻuí.