2 Tīmote 3:16–17

Naʻe akoʻi ʻe he ʻAposetolo ko Paulá ʻa e founga hono tāpuakiʻi ʻe he folofolá ʻetau moʻuí.

16 ʻOku foaki mai ʻa e [folofola] kotoa pē ʻi he fakamānava ʻa e ʻOtuá, pea ʻoku ʻaonga ia ki he akonakí, mo e valokí, mo e fakatonutonú, mo e fakapoto ki he māʻoniʻoní:

17 Koeʻuhí ke haohaoa ʻa e tangata ʻo e ʻOtuá, pea kakato hono teuteu ki he ngaahi ngāue lelei kotoa pē.

Folofola Kotoa pē

“ʻOku tau lotu he taimi ʻoku tau fie fakataufolofola ai ki he ʻOtuá. Pea ko e taimi ʻoku tau fie maʻu ai ke Ne folofola mai kiate kitautolú, ʻoku tau fekumi ʻi he folofolá; he ʻoku fakafou mai ai ʻEne folofolá ʻi he lea ʻa ʻEne kau palōfitá. Te ne toki akonekina leva kitautolu ʻi heʻetau fakaongoongo ki he ngaahi ueʻi ʻa e Laumālie Māʻoniʻoní.

“Kapau kuo teʻeki ai ke ke fanongo ki Hono leʻó kimuí ni mai, toe foki ʻo lau ʻa e folofolá ʻaki ha mata ʻoku foʻou pea fanongo ki ai ʻaki ha telinga ʻoku foʻou. Ko hotau moʻuiʻanga fakalaumālié ia.”

ʻEletā Robert D. Hales ʻo e Kōlomu ʻo e Kau ʻAposetolo ʻe Toko Hongofulu Mā Uá, “Ngaahi Folofola Māʻoniʻoní: Ko e Mālohi ʻo e ʻOtuá ki Hotau Fakamoʻuí,” Liahona, Nōv. 2006, 26–27.

Tokāteliné

“Ko e tokāteline moʻoní, ʻi he taimi ʻoku mahino aí, ʻokú ne liliu ʻe ia ʻa e ʻulungāangá mo e tōʻonga moʻuí. ʻE vave ange hano fakaleleiʻi ʻo e ʻulungāangá ʻaki hono akoʻi ʻo e ngaahi tokāteline o e ongoongoleleí, ʻi hano fai ha ako ki he ʻulungāangá ke fakaleleiʻi ʻaki ia.”

Palesiteni Boyd K. Packer, Palesiteni ʻo e Kōlomu ʻo e Kau ʻAposetolo ʻe Toko Hongofulu Mā Uá, “ʻOua ʻe Manavahē,” Liahona, Mē 2004, 79.

Akonaki

Akonaki—valokiʻi, tauteaʻi, tafuluʻi, pe fakatonutonu, kae fai maʻu pē ʻi ha angaʻofa.

Fakatonutonu

Ko e foʻilea faka-Kalisi totonu ʻoku fakaʻaongaʻi ʻe he Tohi Tapú ʻoku ʻuhinga ia ki “ko hono toe ʻai ke tuʻu hangatonu.” Ko ia ʻoku tokoni e folofolá ke ke tuʻu maʻu he totonú pea ʻalu ʻi he hala hangatonu mo lausiʻí (vakai, 2 Nīfai 9:41).

Fakakakato

Fakakakato—fakanāunauʻi, foaki atu.

Ngaahi Ngāue Leleí

Ko e hā ha faʻahinga ngāue lelei ʻoku tokoni atu e folofolá ke ke teuteu ke fai? Ko e niʻihi ʻeni ʻo e ngaahi meʻa ʻoku fuʻu mahinó. Te ke lava ʻo fakakaukau ki ha meʻa lahi ange? Hiki ia ʻi hoʻo tohinoá.

Ngāue fakafaifekau taimi kakató
Fakahoko e ngaahi uiuiʻi faka-Siasí (hangē ko e kau palesitenisī fakakōlomú mo fakakalasí)
Akoʻi ʻo e ongoongoleleí
Ko hono fai ʻo e fakamoʻoní
Vahevahe atu e ongoongoleleí
Ko hono tali e ngaahi fehuʻi ʻa e kaungāmeʻá ʻo kau ki he Siasí