Ngaahi Fakakaukau Maʻá e Efiafi Fakafāmili ʻi ʻApí
ʻOku ‘i he pulusinga ko ʻení ha ngaahi fakamatala mo ha ngaahi ‘ekitivitī ‘e lava ke fakaʻaongaʻi ki he efiafi fakafāmili ʻi ʻapí. Ko ha sīpinga ‘eni ‘e ua.
“Ko e Ngaahi Tāpuaki ‘o e Seminelí,” peesi 20: Tomuʻa vakaiʻi ‘a e fakamatalá kimuʻa pea fili ‘a e founga lelei taha ke fakafekauʻaki ai e pōpoakí ki ho fāmilí. Kapau ‘oku ‘i ai haʻo fānau toʻu tupu ‘i he seminelí, kamata ‘aki haʻo fehuʻi ange pe ko e hā ‘oku mahuʻinga ai ‘a e seminelí kiate kinautolú. Pea toki lau leva ‘a e konga ‘oku ui ko e “Maʻu ‘o e Ngaahi Tāpuaki Ne Talaʻofá.” Fakalotolahiʻi ‘a e fānau kei iiki angé ke nau teuteu ke kau ‘i he seminelí ‘o ka nau ka taʻu motuʻa feʻunga. Kapau ‘oku ‘ikai ke ‘i ai haʻamou fānau ‘i he taʻu seminelí, te mou ala lau ‘a e fakamatalá pea mo u aleaʻi hono mahuʻinga ‘o e seminelí ki he toʻu tupu ‘o e ‘aho ní.
“ʻOku ‘Ilo ‘e he Tokotaha Kotoa ‘a Peleki,” peesi 42: ‘E lava ke mou hivaʻi ‘a e “Faitotonú” (Ngaahi Himi, fika 145) ‘o fua hiva ‘aki ia. Lau pe fakamatalaʻi kongokonga lalahi ‘a e talanoa fekauʻaki mo Pelekí. Kole ki he kau mēmipa ‘o e fāmilí ke nau fakamatala ha meʻa ne nau aʻusia ‘o pau ai ke nau fai ha fili faingataʻa ‘i ha ngaahi meʻa pea ko e hā ha ngaahi ola pe nunuʻa ne hoko ‘i he fili ne nau faí. Fakaʻosi ‘aki hano lau e lea ‘a Palesiteni Tōmasi S. Monisoní.
Mahinongofua, Nonga, mo Fakangalongataʻa
Ko ha efiafi fakafāmili fakangalongata ia mo ‘ema ongo kiʻi tamaiki fefine kei īkí, ko ‘Eniselika, taʻu 6, mo Petanī, taʻu 4. Ne u tō tangutu pē mo hoku husepānití ‘i homa seá, ongosia mo ‘ikai ke ma ‘ilo pe te ma kamata he hā. Ko ia, ne kamata leva ‘e heʻema ongo kiʻi tamaiki fefiné ‘o vilohi e veʻeteka ‘o e vahe ngāue ki he efiafi fakafāmilí, pea vahe takitaha mai ‘ema meʻa ke faí. Ko e fatongia hoku husepānití ke tataki, hivá ko Petanī, ko au ‘a e ngaahi ‘ekitivitií, pea ko ‘Eniselika ‘e fai lēsoní.
Ne fili ‘e Petanī ‘a e “ʻOku ou Fie Sio he Temipalé” (Tohi Hiva ʻa e Fānaú, 99), pea mau hiva fakataha leva. Fai ‘e he Tangataʻeikí ‘a e fua lotú. Pea toʻo leva ‘e ‘Eniselika ‘a e Liahona fakamuimui tahá ‘o fili ‘a e fakamatala he konga maʻá e fānaú. ‘Oku kamata ako laukonga ‘i he akó, ko ia, naʻá ne lau mai leva ia kiate kimautolu. Naʻa mau ongoʻi ʻa e nongá ʻi homau ʻapí. Naʻe fakamoʻoniʻi ‘e he Laumālié ko e meʻa naʻá ne laú ‘oku moʻoni.
Ne mau vaʻinga fakataha ‘i ha fanga kiʻi vaʻinga, peá u fai leva ‘a e lotu tukú. Lolotonga ‘eku lotú, naʻe ‘ikai ke u mataʻofi ‘eku fakafetaʻi ki heʻetau Tamai Hēvaní koeʻuhí ko Hono Laumālié pea mo e ‘ofá kae ‘umaʻā hono tāpuakiʻi homau ʻapí ‘aki e ongo kiʻi laumālié ni. Naʻá ku ‘ilo mo hoku husepānití ko homa fatongiá ke tokangaʻi kinaua pea mo akoʻi ange ‘a e ongoongoleleí. Ko hono fakahoko ‘o e efiafi fakafāmilí ko e konga ia ‘o e fatongia toputapu ko ‘ení.
Silivia Pousini, Liʻiunioni