“2 Nifae 28:1–26: Iloaina ma le Faatoilaloina o Togafiti a Satani,” Tusi Lesona a le Faiaoga o le Tusi a Mamona (2024)
“2 Nifae 28:1–26,” Tusi Lesona a le Faiaoga o le Tusi a Mamona
2 Nifae 28:1–26
Iloaina ma le Faatoilaloina o Togafiti a Satani
O e lagonaina le mautinoa i lou tomai e iloa ai taumafaiga a Satani e taitai ese oe mai le Faaola? Na faailoa mai e Nifae nisi o manatu sese ma auala o le a faaaoga e Satani e taumafai ai e liliu ese tagata mai le Tama Faalelagi ma Iesu Keriso i aso e gata ai. O lenei lesona ua faamoemoe e fesoasoani ia te oe e iloa ai togafiti taufaasese a Satani ma saili le fesoasoani a le Faaola e faatoilalo ai.
Uunaia tagata aoao e faalagolago ia Iesu Keriso. Faaaoga tusitusiga paia ma upu a perofeta e fesoasoani ai i tagata aoga ia malamalama o loo ia Iesu Keriso le mana e fesoasoani ai ia i latou. E mafai ona latou faatinoina le faatuatua ia te Ia e faatoilalo ai faaosoosoga, salamo mai agasala, ma tumau e ala i tofotofoga.
Sauniuniga a le tagata aoga: Mafaufau e valaaulia tagata aoga e faitau le vaega o le lauga “Mataala i le Tatalo e le Aunoa” saunia e Elder David A. Bednar o le Korama a Aposetolo e Toasefululua (Liahona, Nov. 2019, 32). Pe mafai foi ona valaaulia tagata aoga e matamata a le o le “Korokotaila Faaleagaga” (8:19) po o le “Mataala i le Tatalo e le Aunoa” mai le faailotaimi 1:27 i le 5:00, ma vaavaai pe mafai faapefea e le malamalama i manufeai faalafua ona aoao atu upumoni taua e uiga i togafiti a Satani. O loo maua vitio uma e lua i le ChurchofJesusChrist.org.
Gaoioiga e Ono Mafai Ona Aoao Ai
Faamoemoega a Satani
Mafaufau e amata le lesona i le faasoa atu o le faamatalaga lenei:
O loo tatou aafia i se taua faifaipea e faasaga i le tiapolo. Na aoao mai e Peresitene Ezra Taft Benson (1899–1994) le ala e mafai ai e le Tusi a Mamona ona fesoasoani ia i tatou i lenei taua:
O le Tusi a Mamona na te faailoa fili o Keriso. Na te faafememeai mataupu sese ma tuu i lalo finauga. (Tagai i le 2 Nifae 3:12.) E faamalosia ai soo lotomaualalalo o Keriso e tetee atu i faufauga leaga,mailei, ma mataupu a le tiapolo i o tatou aso. (Ezra Taft Benson, “The Book of Mormon Is the Word of God,” Ensign, Ian. 1988, 3)
-
O a ni auala ua e vaaia ai le faia e le Tusi a Mamona o nisi o nei mea na aoao mai e Peresitene Benson?
A o e suesue, vaavaai mo upumoni e mafai ona fesoasoani ia te oe e iloa atili ai ma faatoilalo ai togafiti taufaasese a Satani.
Aoaoga sese ma mailei a Satani
E faalagolago i manaoga ma tomai o tagata aoga, atonu e aoga le tuu atu i tagata aoga o le taimi e faitau atoa ai le 2 Nifae 28 e i latou lava a o lei talanoaina le mataupu o se vasega. E mafai e tagata aoga ona fai se lisi o mea nei a o latou suesue: O mailei ma aoaoga sese a Satani, o faataitaiga o na auala ma aoaoga sese i o tatou aso, ma aoaoga e mafai ona fesoasoani ia i tatou e faatoilalo ai taumafaiga a Satani. Ona mafai lea e tagata aoga ona faasoa mai mea na latou aoaoina mai a latou faitauga. Afai e te filifilia lenei filifiliga, mafaufau e fetuunai anomea o le lesona lenei e fesoasoani ai i tagata aoga e fai ma faaaoga mea ua latou aoaoina.
I le 2 Nifae 28, na faaauau ai e Nifae lana valoaga o aso e gata ai. Faitau le 2 Nifae 28:5–9, vaavaai mo nisi o aoaoga ma uiga faaalia na vaaia e Nifae o le a i ai i o tatou aso.
-
O le a se faamaoniga ua e vaaia o nei aoaoga ma uiga faaalia i o tatou aso?
-
O faapefea ona ta’ua aoaoga taufaasese i nei fuaiupu ma uiga faaalia o i latou o e talitonu i ai e matautia faaleagaga?
O nei fuaiupu ua faatusa i nisi o uiga faaalia ma talitonuga e afua mai i faiga taufaasese a Satani. Na faaauau e Nifae ana aoaoga e ala i le faailoaina o auala patino o le a faaaoga e Satani e taumafai ai e uu i tatou i lona mana.
Mafaufau e tusi le faamatalaga le uma lenei i luga o le laupapa: Ua saili Satani e umia i tatou i ana filifili tumau-faavavau e ala i le …
Faitau le 2 Nifae 28:19–22, vaavaai mo aoaoga e mafai ona fesoasoani ia te oe e faauma ai lenei faamatalaga:
-
E faavae i mea ua e aoaoina mai nei fuaiupu, o a nisi o auala e mafai ona e faaumaina ai le faamatalaga: Ua saili Satani e umia i tatou i ana filifili tumau-faavavau e ala i le …?
Mafaufau e valaaulia tagata aoga e tusi fasifuaitau i luga o le laupapa e mafai ona faauma ai le faamatalaga: Ua saili Satani e umia i tatou i ana filifili tumau-faavavau e ala i le … O nisi nei o aoaoga atonu na faailoa mai e tagata aoga:
-
faaoso o tagata ia feita e faasaga i mea lelei,
-
faaoleole ma faamoemoe malie ese atu tagata taitoatasi i le saogalemu faaletino, ma
-
ta’u atu i tagata e leai se seoli ma leai se tiapolo.
Atonu e fesoasoani le iloa o le fasifuaitau “faamoemoe malie ese atu i latou i le saogalemu faaletino” (fuaiupu 21) e faasino i taumafaiga a Satani ia lagona e tagata le toafimalie i o latou tulaga agasala ma e le manaomia ona latou suia.
Mafaufau e valaaulia tamaiti aoga e mafaufau atili pe faape’i pe a faaaoga e Satani nei auala faamailei taitasi i aso nei. E mafai ona e faasoa atu tulaga faataitai nei ma fesili i tagata aoga e faailoa mai po o le fea o togafiti a Satani mai fuaiupu 20–22 o loo suitulaga i tulaga faataitai taitasi.
-
Sa faia e Maria le faaiuga e kopi i lana meaaoga ina ia mafai ona ia maua se togi lelei. Sa ia lagonaina le tausalaina i le taimi muamua, ae sa ia iloaina e lei maua lava o ia ma iu ai ina kopi foi i isi meaaoga. Ua ia lagonaina nei le pei o faatinoga lē faamaoni e mafai ona fesoasoani na te maua ai mea e manao i ai i le olaga.
-
Ua maitauina e Iuta e faapea, a ia faitauina faasalalauga faaagafesootai e uiga ia Iesu Keriso po o le Ekalesia, e masani lava ina tele faamatalaga le lelei e osofaia ai le Ekalesia po o tagata e talitonu i le Faaola.
-
E i ai ni nai uo a Skye o loo taumafai e faatauanau o ia e faatauvaaina ona tulaga faatonuina. Ua latou finau mai e faapea talu ai e leai se ola pe a mavae le oti e faavalevalea ai le popole i se nofoaga e o i ai tagata e tali atu ai mo a latou agasala.
-
O a nisi faataitaiga e mafai ona e mafaufau i ai e faapupula mai ai auala faamailei a Satani o loo lisiina i fuaiupu 20–22?
Mafaufau i lou lava olaga. O e lagona e pei o soo se auala lava a Satani ua e aoaoina o loo aafia ai oe? Mafaufau e tusifaamaumau ou manatu i lau api faamaumau mo suesuega. A o faaauau pea ona e suesue, vaavaai pe mafai faapefea e le Tama Faalelagi ma Iesu Keriso ona fesoasoani ia te oe e faatoilalo faiga taufaasese a Satani i lou olaga.
Liliu atu i le Tama Faalelagi ma Iesu Keriso e faatoilalo ai Satani
E mafai ona tatou faatoilaloina Satani ma ana faiga taufaasese a o tatou faalagolago atu i le Tama Faalelagi ma Iesu Keriso. Fatu le ulutala lenei i lau api faamaumau mo suesuega: “O le ala e fesoasoani mai ai le Tama Faalelagi ma Iesu Keriso ia te au e faatoilalo Satani.”
Mafaufau e tusi le fasifuaitau lenei i luga o le laupapa. A uma ona faamaea e tagata aoga le gaoioiga suesue lenei, e mafai ona latou tusia i luga o le laupapa se tasi pe sili atu foi o mau faasino na latou mauaina. E mafai ona tou faitauina faatasi o se vasega ni nai mau fuaitau nei ma valaaulia tagata aoga e faafou a latou lava lisi e faavae i mea ua latou aoaoina mai a latou tupulaga.
Saili fuaitau o mau po o aoaoga mai taitai o le Ekalesia e mafai ona fesoasoani ia te oe i au taumafaiga e faatoilalo Satani. Faamaumau ou malamalamaaga i lau api faamaumau mo suesuega.
Mafaufau e suesue nisi o mau faasino o loo lisi atu i lalo o le “Faaosooso, Faaosoosoga” i le Taiala i Tusitusiga Paia po o le “Faaosoosoga” i le Taiala i Autu. E mafai foi ona e suesueina aoaoga a Nifae i le 2 Nifae 28:17, 26–32. O isi fuaitau o mau e aoga e aofia ai le 1 Nifae 15:24; Helamana 5:12; ma le 3 Nifae 18:15, 18.
-
E mafai faapefea e aoaoga mai taitai o le Ekalesia ma fuaitau o mau na e mauaina ona fesoasoani ia te oe e faatoilalo ai auala faamailei a Satani na e faailoaina i le amataga o le lesona?
Mafaufau loloto i ou aafiaga i suesuega i le asō. Faaalu sina taimi e fai ai se fuafuaga e fua i mea e te lagona e finagalo le Alii e te faia e puipuia lelei ai oe lava mai togafiti a Satani. Tusifaamaumau lenei fuafuaga i lau api faamaumau mo suesuega. O le a e maua se avanoa e tagai ai i lenei fuafuaga i le lesona a sau o le “Iloilo Lou Aoaoina”.