2 Nifae 26–30

Vaaiga Aoao

Na folafola mai e Iesu Keriso o le a faia le galuega ofoofogia o le toefuataiina o Lana talalelei, e aofia ai le Tusi a Mamona, i le lalolagi i aso e gata ai. Na faailoa mai e Nifae nisi o manatu sese ma auala o le a faaaoga e Satani e taumafai ai e liliu ese tagata mai ia Iesu Keriso. Sa ia faamalamalama mai o le malamalama mai le Tama Faalelagi e masani ona oo mai i lea mea itiiti ma lea mea itiiti a o tatou naunau e faaauau pea ona maua mea ua Ia aoao mai ia i tatou. Na valoia foi e Nifae e faapea i aso e gata ai, e toatele tagata o le a teena le Tusi a Mamona ona ua uma ona latou maua le Tusi Paia.

Saunia e Aoao Atu

O nei faamatalaga e tuuina atu ai i faiaoga ni manatu o mea atonu e manaomia ona muai saunia mo lesona taitasi.

2 Nifae 27

Faamoemoega o le lesona: O lenei lesona e mafai ona fesoasoani i tagata aoga ia lagona le talisapaia sili atu o le Alii mo le toefuataiina mai o le Tusi a Mamona i le lalolagi.

Sauniuniga a le tagata aoga: Valaaulia tagata aoga e o mai saunia e faasoa mai e uiga i se tagata sa faia se mea ofoofogia mo i latou po o se tasi latou te iloa. Mo se faataitaiga, atonu na laveaiina i latou e se tasi mai se tulaga matautia pe tuu atu ia i latou se meaalofa limafoai.
Vitio: “Solving Life’s Problems with the Book of Mormon” (1:00); “O Le Tusi a Mamona: Faamata e Faape’i Lou Olaga e aunoa ma Ia?” (15:01; matamata mai le faailotaimi 5:38 i le 11:26)
Fautuaga faafaiaoga faavitio: Mafaufau e vaevae tagata aoga i ni potu ma tuu atu ia i latou e faatumu faatasi ma a latou vaega le siata o loo i le lesona.

2 Nifae 28:1–26

Faamoemoega o le lesona: O lenei lesona ua faamoemoe e fesoasoani i tagata aoga ia iloa auala faatogafiti a Satani ma saili le fesoasoani a le Faaola e faatoilalo ai ia togafiti.

Sauniuniga a le tagata aoga: Mafaufau e valaaulia tagata aoga e matamata a le o le “Korokotaila Faaleagaga” (8:19) po o le “Mataala i le Tatalo e Le Aunoa” (15:59) mai le faailotaimi 1:27 i le 5:00, ma vaavaai pe mafai faapefea e le malamalama i manu fe’ai faalafua ona aoao atu upumoni taua e uiga i togafiti a Satani. O loo maua vitio uma e lua i le ChurchofJesusChrist.org.
Fautuaga faafaiaoga faavitio: I le taimi o le vaega o le lesona lea e saili ai e tagata aoga ni mau po o ni aoaoga mai taitai o le Ekalesia e mafai ona fesoasoani ia i latou e faatoilalo ai Satani, mafaufau e valaaulia i latou e faaaoga le vaega o talanoaga e tuu ai i luga mea latou te mauaina. Filifili ni nai mau faasino po o faamatalaga e faitau faatasi o se vasega.

2 Nifae 28:27–32

Faamoemoega o le lesona: O lenei lesona e mafai ona fesoasoani i tagata aoga e faaloloto ai lo latou malamalama i le ala e mafai ai e le Tama Faalelagi ona faaali mai Lona finagalo ia i tatou.

Sauniuniga a le tagata aoga: Valaaulia tagata aoga e faitau le 2 Nifae 28:30 ma o mai saunia i le vasega e faasoa mai se faataitaiga o le auala e aoao mai ai i tatou e le Atua i lana talalelei i lea mea itiiti ma lea mea itiiti.
Mea faitino: O se meaai telē e faasoa atu ma se tagata aoga
Vitio: “O Mamanu o le Malamalama: O le Agaga o Faaaliga” (3:04)

Atamai i Aoaoga Faavae: 2 Nifae 28:30

Faamoemoega o le lesona: O lenei lesona e mafai ona fesoasoani i tagata aoga e tauloto ai le mau faasino ma le fasifuaitau autu o le mau mo le 2 Nifae 28:30, faamatala le aoaoga faavae ua aoao mai i lenei fuaitau, ma faaaoga mataupu faavae o le mauaina o le malamalama faaleagaga i tulaga masani [o le olaga].

Sauniuniga a le tagata aoga: Mafaufau e valaaulia tagata aoga e tauloto le mau faasino ma le fuaitau autu o le mau “2 Nifae 28:30: O le a ‘tuu atu [e le Atua] i le fanauga a tagata lea fuaitau i luga o lea fuaitau, ma lea mataupu i luga o lea mataupu.’”
Anotusi e faaali atu: O tulaga faataitai ma fesili o talanoaga i le vaega o le “Faataitai le faaaogaina”
Fautuaga faafaiaoga faavitio: A uma ona fai atu i tagata aoga e faamatala mai po o le a le uiga o le “lea fuaitau i luga o lea fuaitau”, mafaufau e uunaia i latou e faaaoga a latou meapueata e faaalia ai se mea sa tatau ona latou aoao pe faia i lea fuaitau i luga o lea fuaitau, pe i lea mea itiiti ma lea mea itiiti.

2 Nifae 29

Faamoemoega o le lesona: O lenei lesona ua faamoemoe e fesoasoani i tagata aoga ia naunau atili e talia le afioga a le Alii i o latou olaga.

Sauniuniga a le tagata aoga: Valaaulia tagata aoga e mafaufau e uiga i mea o loo latou faia e talia gofie ai fesootaiga mai le Atua.
Pepa e tufa atu: O le pepa o fesili e tuuina atu i tagata aoga pe faaali atu ina ia mafai ai ona latou faamaeaina i a latou api faamaumau mo suesuega
Mea faitino: O se ipuinu e leai se mea o i ai
Vitio: “O Se Tala o le Tusi a Mamona” (5:15)
Fautuaga faafaiaoga faavitio: A uma ona fesili atu “O le a le malamalama ma faamanuiaga e te manatu e finagalo le Atua tatou te maua e ala i le Tusi a Mamona?” e mafai ona e faasino atu tagata aoga i le savali o le konafesi aoao ia Oketopa 2017 a Peresitene Russell M. Nelson, “O Le Tusi a Mamona: Faamata e Faape’i Lou Olaga e aunoa ma Ia?” (Ensign po o le Liahona, Nov. 2017, 60–63). Mafaufau e ki le vitio o lana savali mai le faailotaimi 5:35 i le 8:44 e faalogologo ai i faataitaiga o auala na tali atu ai tagata i lenei fesili.