“2 Nifae 28:27–32: ‘O Ia o Lē Na Te Taliaina [le Atua] o le a Ou Tuu Atu Atili i Ai,’” Tusi Lesona a le Faiaoga o le Tusi a Mamona (2024)

“2 Nifae 28:27–32,” Tusi Lesona a le Faiaoga o le Tusi a Mamona

2 Nifae 28:27–32

“O Ia o Lē Na Te Taliaina [le Atua] o le a Ou Tuu Atu Atili i Ai”

O i ai ni au fesili faaleagaga e le’i taliina, pe e te moomoo i nisi taimi ia vave ona atiina ae lau molimau? Na faamalamalama mai e Nifae o le malamalama mai le Tama Faalelagi e oo mai i sina mea itiiti ma lea mea itiiti pe a tatou naunau e faaauau pea ona maua mea ua Ia aoao mai ia i tatou. O lenei lesona e mafai ona fesoasoani ia te oe e faalolotoina lou malamalama i le ala e faaali mai ai e leTama Faalelagi upumoni ia i tatou.

Aoaoina o tagata aoga ia faatatau ia tusitusiga paia. O le faatatau o tusitusiga paia o le faatusatusa lea i le olaga o le tagata lava ia. Uunaia tagata aoga e fai fesili e pei o le, “O a ni vaega ma ni tulaga i lo‘u olaga o pei o vaega ma tulaga i lenei fuaitau o tusitusiga paia?” po o le “E faapefea ona ou pei o tagata o loo tatou aoaoina i tusitusiga paia?”

Sauniuniga a le tagata aoga: Valaaulia tagata aoga e faitau le 2 Nifae 28:30 ma o mai saunia i le vasega e faasoa mai se faataitaiga o le auala e aoao mai ai i tatou e le Atua i Lana talalelei i sina mea itiiti i lea taimi.

Gaoioiga e Ono Mafai Ona Aoao Ai

E aoao i tatou e le Atua i lea laasaga ma lea laasaga

Nai lo le faaaogaina o le talafaatusa lenei e uiga i se faasitepu, e mafai ona e amataina le vasega e ala i le ofoina atu i se tagata aoga o se meaai manaia e tele naua e le mafai ona ’aia i le taimi e tasi. A ū e le tagata aoga, fesili atu ia i latou pe aisea na latou amata ai i le na o le tasi le ū nai lo le ai atoa i le taimi e tasi. Ona valaaulia lea o tagata aoga e faitau le 2 Nifae 28:26–30, ma vaavaai pe mafai faapefea e lenei lesona faatino ona fesoasoani ia i tatou e malamalama atili ai i le faagasologa o le faateleina o lo tatou malamalama faaleagaga.

Vaai faalemafaufau i le tilotilo atu i luga o se faasitepu umi e faatusa i lou malamalama faaleagaga ma lou atamai.

Afai o le pito i luga o le faasitepu e faatusa i le malamalama o le Atua, o fea e te manatu o loo i ai lou malamalama i le taimi nei?
O a ni auala e fesoasoani ai le Atua ia i tatou e faateleina lo tatou malamalama faaleagaga ma le atamai i le aluga o le taimi?
O le a le mea o le a tupu i se tasi e le faia le isi laasaga ona latou te lagona le faamalieina i le malamalama ua uma ona latou maua?

I le 2 Nifae 28, na faaauau ai e Nifae lana valoaga e uiga i aso e gata ai. Sa ia faamatalaina nisi o amioga o le a taatele i o tatou aso ma faasoa mai se mamanu e faaaoga e le Alii e fesoasoani ai ia i tatou ia maua ma malamalama i le upumoni.

Faitau le 2 Nifae 28:26–30, ma mafaufau loloto pe faapefea ona fesoasoani le talafaatusa o le faasitepu e te malamalama ai i upumoni na aoao mai e Nifae e uiga i le Alii. Atonu e fesoasoani le iloa o mataupu o poloaiga po o mataupu faavae lea e aoao ai i tatou i le ala e faatino ai.

O le2 Nifae 28:30 o se fuaitau o le atamai i aoaoga faavae. Mafaufau e faailoga fuaitau o le atamai i aoaoga faavae i se ala iloga ina ia mafai ai ona faigofie ona e mauaina. O le a e maua se avanoa i le lesona e sosoo ai e faataitai ai ona faaaoga le aoaoga faavae o loo aoaoina i lenei fuaitau i se fesili po o se tulaga.

O le a se mea ua fesoasoani lenei fuaitau ia te oe e malamalama ai e uiga i le Alii? E mafai faapefea e lenei malamalamaaga ona faamanuiaina ai lou olaga?
Aisea e te manatu ai e teena e nisi tagata le avanoa e aoao atili ai i le afioga a le Atua nai lo le mea ua latou maua?

Toe faitau le fuaiupu 30 ma mafaufau pe faapefea ona e aoteleina i au lava upu mea o loo aoao mai ai. Atonu e te manao e faamaumau lau aotelega i totonu o au tusitusiga paia i tafatafa o lenei fuaiupu.

Valaaulia tagata aoga e faasoa mai a latou aotelega.

O se mamanu mo lo tatou alualu i luma faaleagaga

O se tasi o upumoni o loo maua i lenei fuaitau o le, e faaali mai e le Atua le upumoni i lea fuaitau i luga o lea fuaitau ia i latou o e o le a mauaina.

E faapefea ona avea o se faamanuiaga le aoaoina o i tatou e le Atua i sina mea itiiti nai lo o mea uma i le taimi e tasi?
E mafai faapefea e le faagasologa o le aoaoina o sina mea itiiti ma lea mea itiiti ona fesoasoani ia i tatou ia avea atili ai e faapei o le Tama Faalelagi ma Iesu Keriso? O a ni uiga faa-Keriso e mafai e lenei faagasologa ona fesoasoani ia i tatou ia atiina a’e?

Mamanu o le malamalama

Atonu e te manao e matamata le vitio “Mamanu o le Malamalama: Agaga o Faaaliga” (3:04), o loo maua i le ChurchofJesusChrist.org. Vaavaai mo mamanu o loo faaaogaina e le Atua e faaalia ai Lona finagalo i Ana fanau.

2:3

O le a se mea na e aoaoina mai ia Elder Bednar e mafai ona aoga i lou olaga?
O le fea mamanu na faamatalaina e Elder Bednar e te manatu e sili ona fetaui ma mea na aoao mai e Nifae i le fuaiupu 30?

Nai lo le faaaogaina o lenei fautuaga mo suesuega, mafaufau e faaaoga le gaoioiga o le suesueina o tusitusiga paia o loo maua i le vaega “Gaoioiga Faaopoopo e Aoao ai”.

Faitau ia le itiiti ifo ma le lua ni fuaitau nei o mau, ma vaavaai mo mea latou te faaopoopo atu i lou malamalama o le 2 Nifae 28:30. Mafaufau e faafesootai pe fefaasinoa’i fuaiupu nei i le 2 Nifae 28:30 i au tusitusiga paia.

O le a se mea na e aoaoina mai nei fuaitau e fesoasoani e te malamalama atili ai i le 2 Nifae 28:30?
O a nisi faataitaiga o auala e mafai ai e upumoni o loo aoao mai i le 2 Nifae 28:30 ona fesoasoani ai i se tasi?
O anafea na e vaai ai i le Atua o aoao atu i sina mea itiiti ma lea mea itiiti i lou olaga po o olaga o i latou o siomia oe?

Mafaufau loloto pe na faapefea ona tuputupu ae lou malamalama ma le molimau i le talalelei i sina mea itiiti ma lea mea itiiti i le taualumagaluga o taimi. Tusi faamaumau i lau apitalaaga mo suesuega mea ua e lagona e finagalo le Tama Faalelagi e te manatua ma faia ona o mea ua e aoaoina i le asō.

Mafaufau e valaaulia ni nai volenitia e faasoa mai se vaega o mea sa latou tusia.

Manatu ma Talaaga o Faamatalaga

E faapefea ona faatatau le mataupu faavae o lea “fuaitau i luga o lea fuaitau” i lo tatou alualu i luma faaleagaga?

Sa faamatala mai e Peresitene Dieter F. Uchtdorf, a o i ai i le Au Peresitene Sili:

O faaaliga ma molimau e le masani ona o mai faatasi ma le malosiaga lofituina. Mo le toatele, o se molimau e oo mai lemu—o se vaega e tasi i le taimi. O nisi taimi e matuai faasolosolo lemu mai lava, lea e faigata ai ona manatuaina le taimi tonu na tatou iloa ai le moni o le talalelei. Ua tuuina mai e le Alii ia i tatou “le upu ma le upu, o le fuaiupu ma le fuaiupu, o sina mea itiiti iinei ma sina mea itiiti iina” [2 Nifae 28:30]. (Dieter F. Uchtdorf, “Lou Tulaga Gafatia, Lou Avanoa,” Liahona, Me 2011, 60)

E mafai faapefea ona avea o se faamanuiaga le le mauaina o tali i le taimi e tasi?

Na aoao mai Elder Richard G. Scott (1928–2015) o le Korama a Aposetolo e Toasefululua:

A o e savali atu i tuaoi o lou malamalama agai atu i le tafa o ata o le le mautinoa, o le faatinoga o le faatuatua, o le a taitaiina atu lava oe ina ia e maua ni tali semanu e te le mauaina. E tusa lava pe matuai malosi lou faatuatua, o le a le tauia vave oe e le Atua i taimi uma e tusa ai ma ou manaoga. Ae, o le a tali atu lava le Atua i le mea o i Lana fuafuaga e faavavau e aupito sili mo oe, pe afai e mapuna mai ai se aoga aupito sili. Ia tumu lou loto i le faafetai ona o nisi taimi e faataga ai e le Atua ona e tauivi mo se taimi umi a o lei oo mai lena tali. O iina e afua ai ona faateleina lou faatuatua ma faatupulaia ai ou uiga tauleleia. (Richard G. Scott, “O Le Mana e Liua Ai o le Faatuatua ma Uiga Tauleleia,” Liahona, Nov. 2010, 44)

Sa faasoa mai e Elder D. Todd Christofferson o le Korama a Aposetolo e Toasefululua le mea lenei e uiga i le taimi na le vave oo mai ai se fofo i se faafitauli taua e ui lava i ana tatalo faamaoni:

E ui ina sa ou pagatia i lena taimi, ou te faafetai i le taimi nei ona sa leai se tali vave i lo’u faafitauli. O le mea moni e faapea sa faamalosia au e liliu atu i le Atua mo le fesoasoani na toetoe lava o aso uma mo se vaitaimi faaumiumi, ua aoaoina ai a’u i le auala e tatau ona tatalo moni atu ai ma maua mai ai tali i tatalo, ma aoao ai a’u i se auala lelei ia ou faatuatua i le Atua. Sa oo ina ou iloa lo’u Faaola ma lo’u Tama Faalelagi i se auala ma se maualuga lea na semanu e le tupu pe ana o se isi auala, pe semanu foi e umi atili ai se taimi ou te [sailia ai se fofo]. … Ua ou aoaoina e faatuatua i le Alii ma lo’u loto atoa. Ua ou aoaoina e savavali faatasi ma Ia i lea aso ma lea aso. (D. Todd Christofferson, “Recognizing God’s Hand in Our Daily Blessings,” Ensign, Ian. 2012, 19)

Gaoioiga Faaopoopo e Aoao Ai

Gaoioiga mo le suesueina o tusitusiga paia

O lenei gaoioiga ua faamoemoe e fesoasoani i tagata aoga ia iloa e masani ona tatou manaomia le usiusitai i mea ua uma ona tatou mauaina ae tatou te lei mauaina nisi faatonuga.

Faailoa atu i tamaiti aoga e faapea, ina ia faamaea le gaoioiga, o le a faitau e le latou vaega ma toe lipoti atu ia te oe pe faapefea ona faaopoopo fuaitau o mau e fa i lo latou malamalama i le 2 Nifae 28:30.

Ta’u atu i vaega o le fuaitau muamua o le a latou suesueina o le Mataupu Faavae ma Feagaiga 42:61. A o lipoti atu e vaega taitasi ia te oe le ala e faaopoopo ai lena fuaitau i lo latou malamalama i le 2 Nifae 28:30, tuu atu ma le filemu i le vaega le isi mau e suesue ai. E faaauau pea lenei faagasologa seia oo ina lipoti mai e vaega uma taitasi mea na latou aoaoina mai fuaitau uma e fa.

O lea fuaitau i luga o lea fuaitau i le talafaasolopito o le Ekalesia

Atonu e fesoasoani le talanoaina o faataitaiga mai le talafaasolopito o le Ekalesia lea e faaalia ai le faaali mai e le Alii o Lana upumoni i “lea fuaitau i luga o lea fuaitau, ma lea mataupu i luga o lea mataupu, o sina mea itiiti iine ma sina mea itiiti iina” (2 Nifae 28:30). E mafai ona e faaaogaina le saunoaga lenei a Elder David A. Bednar o le Korama a Aposetolo e Toasefululua e amata ai lenei talanoaga:

Ua faatumulia le talafaasolopito o le Ekalesia ma o tatou olaga patino i faataitaiga o mamanu a le Alii mo le mauaina o faaaliga o “lea fuaitau i luga o lea fuaitau, ma lea mataupu i luga o lea mataupu.” Mo se faataitaiga, o upumoni faavae o le talalelei toefuataiina e lei auina atu uma i le Perofeta o Iosefa Samita i le taimi e tasi i le Vao Paia. O nei oa anagata na faaalia pe a talafeagai tulaga ma pe a sa’o le taimi (David A. Bednar, “(O Le Agaga o Faaaliga,” Liahona, Me 2011, 88).

Sa alualu i luma Iesu mai lea alofa tunoa i lea alofa tunoa

Valaaulia tagata aoga e faitau le Mataupu Faavae ma Feagaiga 93:11–20, ma vaavaai pe faapefea e le alualu i luma o le Faaola ona faaalia mea o loo aoao mai i le 2 Nifae 28:30. Fesoasoani i tagata aoga ia malamalama o se tasi o uiga auaumamā o le Faaola o le onosai ma ia tatou avea atili e faapei o Ia a o tatou aoao ma le onosai i lea fuaitau i luga o lea fuaitau.

Valaaulia i latou e faitau foi le Luka 2:40, ma vaavaai mo vaega e fa o le alualu i luma o le Faaola o loo ta’ua i lenei fuaiupu. Faamanatu i tagata aoga le polokalama a Tamaiti ma le Autalavou, ma uunaia i latou e faatutu ma galulue i sini o le a fesoasoani ia i latou e alualu ai i luma i lea fuaitau i luga o lea fuaitau i vaega taitasi e fa.