2 Nīfai 31–33

Vakai Fakalūkufuá

Naʻe akoʻi ʻe Nīfai naʻe mahuʻinga ʻa e muimui kia Sīsū Kalaisi ʻaki ʻa e papitaiso mo hono maʻu e Laumālie Māʻoniʻoní ki hono fakahaofi ʻi he puleʻanga ʻo e ʻOtuá. Hili hono akoʻi ʻe Nīfai hono kakaí fekauʻaki mo e muimui kia Sīsū Kalaisi ʻi he hala ʻo e fuakavá, naʻá ne ongoʻi ne nau kei taʻepauʻia pē ʻi he meʻa ke fai hili ʻa e papitaisó. Naʻá ne tali ʻaki hono fakalotolahiʻi kinautolu ke nau “keinanga ʻi he ngaahi folofola ʻa Kalaisí” pea fakapapauʻi ange kiate kinautolu ʻe tataki kinautolu ʻe he ngaahi folofola ʻa e Fakamoʻuí ke nau laka ki muʻa (2 Nīfai 32:3). Naʻá ne toe fakamanatu foki kiate kinautolu ʻa e mahuʻinga ʻo e lotú pea mo e ngaahi tāpuaki ʻoku maʻu mei he fetuʻutaki maʻu pē mo ʻetau Tamai Hēvaní.

Teuteu ke Akoʻi

ʻOku ʻoatu ʻe he fakamatala ko ʻení ki he kau faiakó ha ngaahi fakakaukau ki he meʻa ʻe ala fiemaʻu ke teuteuʻi kimuʻa ki he lēsoni takitaha.

2 Nīfai 31:1–13

Taumuʻa ʻo e lēsoní: ʻE lava ke tokoni e lēsoni ko ʻení ke mahino lelei ange ki he kau akó mo nau fakamatalaʻi e mahuʻinga ʻo e papitaisó mo e ngaahi tāpuaki ʻoku maʻu mei aí.

• Teuteu ʻa e tokotaha akó: Poupouʻi e kau akó ke fakakaukau ki he founga te nau fakamatalaʻi ai ʻa e ʻuhinga ʻe fie papitaiso ai ha taha. Ka nau fie fakahoko ʻeni, ʻe lava ke nau ʻeke ki ha mēmipa ʻe taha pe ua ʻo honau fāmilí pe kaungāmeʻá ʻa e ʻuhinga ne nau fili ai ke papitaisó.

• Vitioó: “Ko Hono Papitaiso ʻo Sīsuú” (2:54)

• Fokotuʻu ki hono akoʻi ʻi he konifelenisi vitioó: Hili hono lau ʻe he kau akó ʻa e 2 Nīfai 31:5–11, fakakaukau ke fakaʻaliʻali ha veesi ʻe taha pe lahi ange ʻokú ke fiemaʻu ke aleaʻi. Fakaafeʻi e kau akó ke fakaʻaongaʻi e kiʻi meʻangāue ki he hiki fakamatalá, kapau ʻoku maʻu, ke fakaʻilongaʻi ha ngaahi konga ʻo ha (ngaahi) veesi pē naʻe makehe kiate kinautolu pea mo vahevahe ʻa e meʻa ne nau ako mei he ngaahi foʻi lea pe kupuʻi lea ko iá.

2 Nīfai 31:14–21

Taumuʻa ʻo e lēsoní: ʻE lava ke tokoniʻi ʻe he lēsoni ko ʻení ʻa e kau akó ke fakatupulaki ʻenau holi ke vilitaki atu ki muʻa pea kātaki ki he ngataʻangá koeʻuhí ke ʻi ai ha ʻaho te nau aʻusia ai honau ikuʻanga taupotu tahá: ʻa e moʻui taʻengata mo ʻenau Tamai Hēvaní.

• Teuteu ʻa e tokotaha akó: Fakaafeʻi e kau akó ke omi mateuteu ki he kalasí ke vahevahe e founga te nau ala tokoniʻi ai ha taha ʻoku fāifeinga ke hoko atu ʻene laka ki muʻa ʻi he māʻoniʻoní ʻi heʻenau fononga ke foki ki he Tamai Hēvaní.

• Meʻa ke fakaʻaliʻalí: Ko e ongo fehuʻi ʻi he kamataʻanga ʻo e lēsoní ke tali ʻe he kau akó ʻi heʻenau tohinoá

• Ngaahi Vitioó: “ʻOku Fakamatalaʻi ʻe Nīfai ʻa e Tokāteline ʻo Kalaisí” (5:10; mamata mei he taimi 2:55 ki he 3:47); “ʻE Fai ʻe [he ʻEikí] ha Ngaahi Mana ʻIate Kimoutolu ʻApongipongí na” (19:24; mamata mei he taimi 15:12 ki he 16:20)

• Fokotuʻu ki hono akoʻi ʻi he konifelenisi vitioó: ʻI he taimi ʻoku kole ai ki he kau akó ke nau tā mo fakahingoa ʻa e hala ʻoku fakamatalaʻi ʻi he 2 Nīfai 31:17–20, fakakaukau ke fakaafeʻi kinautolu ke tā ʻi ha laʻipepa pe fakaʻaongaʻi ʻenau komipiutá pe meʻangāue fakaʻilekitulōnika toʻotoʻó. Te ke lava foki ʻo fakaafeʻi ha tokotaha ako ʻe taha ke tā fakatātā ʻo fakaʻaongaʻi ʻa e polokalama palakipoé.

2 Nīfai 32:1–7

Taumuʻa ʻo e lēsoní: ʻOku fakataumuʻa ʻa e lēsoni ko ʻení ke tokoniʻi e kau akó ke nau keinanga ʻi he folofola ʻa Sīsū Kalaisí.

• Teuteu ʻa e tokotaha akó: Fakaafeʻi e kau akó ke fakafehoanaki ʻenau ako folofola fakatāutahá ki he maʻu meʻatokoní pea poupouʻi kinautolu ke omi mateuteu ke vahevahe ʻenau ngaahi fakakaukaú lolotonga e kalasí.

• Meʻa ke fakaʻaliʻalí: Ngaahi ʻīmisi ʻo e meʻakai hangē ko ha kai maʻamaʻa, meʻatokoni, mo ha kātoanga kai

•  

• Fokotuʻu ki hono akoʻi ʻi he konifelenisi vitioó: ʻE lava ke fiefia ʻa e kau akó ʻi hono kumi ha ngaahi fakatātā pē ʻanautolu ʻokú ne fakafofongaʻi ʻa e meʻakai ʻoku nau saiʻia taha aí, ko ha konga hoʻomou fealēleaʻaki ki hono ʻuhinga ʻo e keinanga ʻi he folofola ʻa Kalaisí. Fakaafeʻi kinautolu ke fakaʻaongaʻi ʻenau komipiutá pe meʻangāue toʻotoʻó ke fekumi ki he ngaahi ʻata ʻo e meʻakai ʻoku nau fiefia ke kaí, pea kole ange ke vahevahe e ngaahi ʻatá ʻi he screen.

Fakataukei Fakatokāteliné: 2 Nīfai 32:3

Taumuʻa ʻo e lēsoní: ʻE lava ke tokoni e lēsoni ko ʻení ke ako maʻuloto ʻe he kau akó ʻa e potufolofola fakataukei fakatokāteliné mo e kupuʻi lea mahuʻinga he folofolá ki he 2 Nīfai 32:3, fakamatalaʻi ʻa e tokāteliné, pea fakaʻaongaʻi e ngaahi tefitoʻi moʻoni ki hono maʻu ʻo e ʻilo fakalaumālié ʻi ha ngaahi tūkunga moʻoni ʻo e moʻuí.

• Teuteu ʻa e tokotaha akó: Mahalo naʻe maʻu ʻe he kau akó ha faingamālie ke akoako ʻa e “keinanga ʻi he ngaahi folofola ʻa Kalaisí” ʻi he fakaʻosinga ʻo e lēsoni kimuʻá. Fakaafeʻi kinautolu ke hokohoko atu ʻenau akoakó ʻi heʻenau ako folofola fakatāutahá pea omi mateuteu ki he kalasí ke vahevahe ʻenau aʻusiá.

• Meʻa ke fakaʻaliʻalí: Ko ha fakatātā ʻo ha tepile kuo teuteuʻi

• Fokotuʻu ki hono akoʻi ʻi he konifelenisi vitioó: Fakakaukau ke vahevahe ʻa e kau akó ki ha ngaahi kulupu tautau toko tolu pea tuku kinautolu ki he ngaahi loki fealēleaʻakí (breakout rooms) ke fefakamatalaʻiʻaki ʻa e ngaahi tefitoʻi moʻoni ʻo hono maʻu ʻo e ʻilo fakalaumālié. Kapau ʻoku ʻikai mahino ki ha taha ha taha ʻo e ngaahi tefitoʻi moʻoní, fakaafeʻi e niʻihi kehe ʻi he kulupú ke tokoni kiate kinautolu.

2 Nīfai 32:8–9

Taumuʻa ʻo e lēsoní: ʻE lava ke tokoni ʻa e lēsoni ko ʻení ki he kau akó ke fakatupulaki ʻenau holi ke fetuʻutaki mo ʻenau Tamai Hēvaní ʻo fakafou ʻi he lotú.

• Teuteu ʻa e tokotaha akó: Fakakaukau ke fakaafeʻi e kau akó ke nau fakatokangaʻi ʻa e tuʻo lahi ʻo ʻenau lotú pea mo hono ʻuhingá.

•  

• Laʻipepa Tufa: “Ako Lahi Ange fekauʻaki mo e Lotú”

• Fokotuʻu ki hono akoʻi ʻi he konifelenisi vitioó: Hili hono fakakakato ʻe he kau akó ha ʻekitivitī ʻe ua ʻo e ngaahi ʻekitivitī ʻe tolu ʻi he fakaʻosinga ʻo e lēsoní, fakaafeʻi ke nau hiki ha sētesi ʻe taha ʻi he polokalama fetalanoaʻakí ʻo fakamatalaʻi fakanounou ha meʻa ʻe taha ne nau ako pe ʻuhingamālie kiate kinautolu. Fili ha fānau ako ʻe niʻihi ke vahevahe ha meʻa lahi ange fekauʻaki mo e meʻa naʻa nau tohí.