Fakataukei Fakatokāteline: 2 Nīfai 32:3

“Keinanga ʻi he Ngaahi Folofola ʻa Kalaisí; he Vakai, ʻe Fakahā Kiate Kimoutolu ʻe he Ngaahi Folofola ʻa Kalaisí ʻa e Ngaahi Meʻa Kotoa Pē ʻOku Totonu Ke Mou Faí”

Naʻá ke ako ʻi ha lēsoni kimuʻa, “2 Nīfai 32:1–7,” ʻa e mahuʻinga ʻo e keinanga ʻi he ngaahi folofola ʻa Kalaisí. ʻE lava ke tokoni atu ʻa e lēsoni ko ʻení ke ke ako maʻuloto e potufolofola fakataukei fakatokāteline mo e kupuʻi lea folofola mahuʻinga ki he 2 Nīfai 32:3, fakamatalaʻi ʻa e tokāteliné, pea fakaʻaongaʻi e ngaahi tefitoʻi moʻoni ki hono maʻu ʻo e ʻilo fakalaumālié ʻi ha tūkunga moʻoni ʻo e moʻuí.

Mālohi ʻo fakafou ʻi he ako folofolá. ʻE tokoniʻi koe ʻe he ako folofola ʻoku mahuʻingamālie mo fakatāutahá ke ke tupulaki ʻi hoʻo mahino ki he ongoongolelei ʻa e Fakamoʻuí mo ʻEne Fakaleleí, kae pehē foki ki hoʻo faiako mo fakamoʻoni ʻi ha mālohi ʻoku lahi angé. ʻE tāpuekina mo ueʻi fakalaumālie e kau akó ʻe hoʻo fakamoʻoni fakataautaha ki he founga ʻoku faitāpuekina ai ʻe he folofolá hoʻo moʻuí.

Teuteu ʻa e tokotaha akó: Mahalo naʻe maʻu ʻe he kau akó ha faingamālie ke akoako ʻa e “keinanga ʻi he ngaahi folofola ʻa Kalaisí” ʻi he fakaʻosinga ʻo e lēsoni kimuʻá. Fakaafeʻi kinautolu ke hokohoko atu ʻenau akoakó ʻi heʻenau ako folofola fakatāutahá pea haʻu mateuteu ki he kalasí ke vahevahe ʻenau aʻusiá.

Ngaahi ʻEkitivitī Ako ʻOku Ala Fakahokó

ʻOku fokotuʻutuʻu e lēsoni fakataukei fakatokāteline ko ʻení ke akoʻi hili ʻa e lēsoni “2 Nīfai 32:1–7,” ʻa ia ko e lēsoni puipuituʻa ia ki he potufolofola fakataukei fakatokāteline 2 Nīfai 32:3. Kapau ʻoku fiemaʻu ke hiki e lēsoni fakataukei fakatokāteline ko ʻení ki ha uike kehe, fakapapauʻi ke akoʻi foki mo e lēsoni puipuituʻa fekauʻakí lolotonga e uike ko iá.

Fakamatalaʻi mo ako maʻuloto

Fakaʻaongaʻi ha faʻahinga founga lelei pē ke tokoniʻi e kau akó ke ako maʻuloto e potufolofolá mo e kupuʻi lea mahuʻinga ʻo e 2 Nīfai 32:3 pea mo fakamatalaʻi e ngaahi moʻoni ʻoku maʻu ʻi he potufolofola ko ʻení.

Ko e ngaahi ʻekitivitī ko ʻení ko ha ngaahi fokotuʻu ia ki he founga ʻe lava ke fakahoko ai ʻení.

Fakakaukauloto kuo kole atu ke ke fai ha kiʻi fakataha lotu nounou ʻi he seminelí fekauʻaki mo hono mahuʻinga ʻo hono ako ʻo e folofolá. Lau ʻa e 2 Nīfai 32:3 pea fakamanatu ʻa e tefitoʻi moʻoni ʻi he taimi ʻoku tau keinanga ai ʻi he folofola ʻa Sīsū Kalaisí, te nau talamai ʻa e ngaahi meʻa kotoa ʻoku totonu ke tau faí.

• Te ke fakaʻaongaʻi fēfē ʻa e meʻa naʻá ke ako ʻi he lēsoni kimuʻá, mo hoʻo aʻusia fakatāutahá, ke fakamatalaʻi ʻa e ʻuhinga ʻo e “keinanga ʻi he ngaahi folofola ʻa Kalaisí”? (2 Nīfai 32:3).

• Ko e hā ha liliu ʻe lava ke fakahoko ʻe he keinanga ʻi he ngaahi folofola ʻa Kalaisí ʻi he moʻui ʻa e toʻu tupú?

ʻE lava ke hoko ʻeni ko ha taimi lelei ke fakaafeʻi e kau akó ke fakakau ʻenau ngaahi aʻusiá ʻi heʻenau vahevahe ʻenau ngaahi fakakaukau mei he ʻekitivitī teuteú.

Fakakaukau ke ʻoange ha ngaahi naunau ke tokoni ki he kau akó ke fakakakato ʻa e ʻekitivitī ko ʻení. ʻE lava ke fakaafeʻi kinautolu ke nau fai ʻeni ʻi heʻenau tohinoa akó. Te ke lava ʻo liliu e ʻekitivitī ko ʻení ke lava e kau akó ʻo tā ha fakatātā ʻokú ne fakamatalaʻi lelei ange honau anga fakafonuá.

Ke tokoni atu ke ako maʻuloto mo fakaʻaongaʻi e potufolofola ko ʻení, tā ha tēpile kuo fokotuʻutuʻu ʻi ha laʻipepa. ʻE lava ke tatau mo e fakatātā ʻi laló. Te ke lava foki ʻo tā ha ʻū fakatātā ʻo ha meʻakai pe ngaahi potufolofola ʻi he peletí. Hiki e kupuʻi lea folofola “2 Nīfai 32:3Keinanga ʻi he ngaahi folofola ʻa Kalaisí; he vakai, ʻe fakahā kiate kimoutolu ʻe he ngaahi folofola ʻa Kalaisí ʻa e ngaahi meʻa kotoa pē ʻoku totonu ke mou faí” ʻi ha feituʻu ʻi hoʻo laʻipepá. Toutou lau e kupuʻi lea ko ʻení kae ʻoua kuó ke maʻuloto ia. Fakakaukau ke fakapipiki hoʻo fakatātaá ʻi ha feituʻu ʻi homou ʻapí pe ʻi he ʻaisí ʻa ia te ke lava ai ʻo toe vakai ki ai ʻi he taimi kotoa pē ʻokú ke kai aí.

Hili ha taimi feʻunga, fakaafeʻi e kau akó ke vahevahe ʻenau ʻū fakatātaá ʻi ha fanga kiʻi kulupu iiki pe mo e kalasí.

Akoako hono fakaʻaongaʻí

Vahevahe ʻa e kalasí ki ha ngaahi kulupu tautau toko tolu, pea fili ʻe he tokotaha ako takitaha ha tefitoʻi moʻoni kehekehe ʻo hono maʻu ʻo e ʻilo fakalaumālié (vakai, Fakamatala ki he ʻElito ʻo e Fakataukei Fakatokāteliné [2022], “Ko Hono Maʻu ʻo e ʻIlo Fakalaumālié,” palakalafi 5–12). Kole ki he kau akó ke toe vakaiʻi nounou ʻa e tefitoʻi moʻoní pea fakamatalaʻi ia ki heʻenau kulupú.

Hili iá pea vahevahe leva e tūkunga ko ʻení. Pe kapau ʻe mahuʻingamālie ange ki hoʻo kau akó, fakakaukau ke kole ange ke nau hiki ha lisi ʻo e ngaahi ʻuhinga ʻe faingataʻaʻia ai ha taha ʻi hono ako ʻenau folofolá. ʻE lava leva ke fakaafeʻi e kau akó ke fili ha faingataʻa mei he lisí pea ngāue ke ikunaʻi ia ʻaki hono fakaʻaongaʻi e ngaahi tefitoʻi moʻoni ki hono maʻu ʻo e ʻilo fakalaumālié.

• Te ke fakamatalaʻi nounou fēfē ʻa e tefitoʻi moʻoni naʻá ke filí ki ha taha ʻoku ʻikai ke ne maheni mo ia?

Fakakaukauloto, hili ha lēsoni semineli fekauʻaki mo hono mahuʻinga ʻo e ako fakaʻaho ʻo e folofolá, ʻoku pehē atu ho kaungāmeʻá, “ʻOku ou ʻilo ko ha meʻa lelei hono ako ʻo e folofolá, ka ʻi he ngaahi meʻa kotoa ʻoku hoko ʻi heʻeku moʻuí he taimi ní, ʻoku ʻikai pē haʻaku taimi ʻoʻoku, tautautefito ki he ʻaho kotoa peé.”

ʻE lelei ke fehuʻi ki he kau akó pe te nau lava ʻo fakafekauʻaki ki he tūkunga ko ʻení pea mo hono ʻuhingá.

Sivisiviʻi e ngaahi fakakaukaú mo e ngaahi fehuʻí ʻaki ha fakakaukau ʻoku taʻengatá

• Ko e hā te ke fiemaʻu ke ʻilo ʻe hoʻo kaungāmeʻá fekauʻaki mo Sīsū Kalaisi pe ko e palani ʻo e fakamoʻuí ʻe ala tokoni ke ne fie feinga ai ke keinanga ʻi Heʻene folofolá he ʻaho kotoa peé?

• ʻE liliu fēfē nai kitautolu ʻe he keinanga maʻu pē ʻi he ngaahi folofola ʻa Kalaisí ʻi he fakalau ʻa e taimí, naʻa mo e taʻengatá?

Fekumi ke maʻu ha mahino lahi ange ʻo fakafou ʻi he ngaahi maʻuʻanga tokoni kuo fokotuʻu fakalangí

Fakakaukauloto ʻoku pehē atu ho kaungāmeʻá hili hono aleaʻi ha fakakaukau ʻoku taʻengatá, “Mālō. ʻOku kiʻi tokoni ia. Kae mahalo ʻe kei faingataʻa pē ke u maʻu ha taimi ʻi he ʻaho kotoa pē ke ako ʻeku folofolá.”

• ʻOkú ke pehē ʻe tokoni fēfē ʻa e 2 Nīfai 32:3 ki ho kaungāmeʻá?

• Ko e hā ha ngaahi potufolofola pe fakamatala mei he kau palōfitá ʻe ala tokoni ki ho kaungāmeʻá?

Fakakaukau ke ʻoange ha taimi ki he kau akó ke nau kumi ai ha ngaahi potufolofola mo ha ngaahi fakamatala.

ʻE lava ke kau ʻi he ngaahi sīpingá ʻa e Tokāteline mo e Ngaahi Fuakava 26:1 pea pehē ki he fakamatala ko ʻeni meia ʻEletā Lisiate G. Sikoti (1928–2015) ʻo e Kōlomu ʻo e Kau ʻAposetolo ʻe Toko Hongofulu Mā Uá:

ʻOua te ke moʻulaloa ki he loi ʻa Sētané tokua ʻoku ʻikai ke ʻi ai haʻo taimi ke ako e folofolá. Fili ke tuku ha taimi ke ako ai kinautolu. ʻOku mahuʻinga ange ʻa e keinanga ʻi he folofola ʻo e ʻOtuá he ʻaho kotoa peé ʻi he mohé, akó, ngāué, polokalama televīsoné, vaʻinga vitioó pe mītia fakasōsialé. Mahalo ʻoku fiemaʻu ke ke ʻilo reorganize e meʻa ʻoku mahuʻinga kiate koé, ke ke tuku ha taimi ke ako e folofola ʻa e ʻOtuá. Kapau ʻoku pehē, fai ia! (Lisiate G. Sikoti, “Fakamuʻomuʻa Hoʻo Ngāueʻi e Tuí,” Liahona, Nōvema 2014, 93)

• ʻE tokoni fēfē nai ʻa e ngaahi akonaki ko ʻení?

Ngāue ʻi he tuí

ʻOange ha taimi feʻunga ke fakalaulauloto ai e kau akó ki he fokotuʻu mo e ongo fehuʻi ko ʻení: Hili ha taimi feʻunga, fakaafeʻi ha kau ako tokosiʻi ke vahevahe ʻenau talí mo e kalasí. Te ke lava foki ʻo vahevahe mo e kalasí hoʻo fakamoʻoni fakataautaha ki he ako folofolá.

Fakakaukauloto ʻoku fakafeangai lelei ho kaungāmeʻá ki he meʻa kuó ke vahevahé, ka ʻokú ke ʻiloʻi he ʻikai ke nau ikunaʻi moʻoni ʻenau hohaʻá kae ʻoua kuo nau ngāue ʻi he tui, ʻo falala ki he ʻEikí.

Tuku ha taimi ke ke fakakaukau ai ki ha ngaahi aʻusia fakataautaha kuó ke maʻu ʻi he folofola ʻa Kalaisí pea mo e meʻa ʻokú ke ʻilo fekauʻaki mo e Fakamoʻuí te ne ala fakaʻaiʻai ho kaungāmeʻá ke keinanga fakaʻaho ʻi Heʻene folofolá.

• Ko e hā ha ngaahi aʻusia pe fakamoʻoni te ke lava ʻo vahevahe ʻe ala tokoni ki ho kaungāmeʻá ke ngāue ʻi he tuí?

• Ko e hā kuó ke ako ʻokú ke ongoʻi ʻe lava ʻo tokoni atu ke fakaleleiʻi hoʻo ako folofola fakatāutahá?

Toe vakaiʻi ʻo e fakataukei fakatokāteliné

ʻI he lolotonga ʻo e lēsoni ka hokó, fakaʻaongaʻi ha ngaahi miniti siʻi ke toe vakaiʻi e potufolofolá mo e kupuʻi lea mahuʻinga ʻi he 2 Nīfai 32:3. Ko e founga ʻe taha ke fai ai ʻení ko hono fakaʻaliʻali ʻa e potufolofola mo e kupuʻi lea mahuʻinga ko ʻeni mei he folofolá kuo fakamoveteveteʻí pea fakaafeʻi e kau akó ke fokotuʻutuʻu fakalelei ia:

ʻe he ngaahi folofola ʻoku totonu 32: he vakai, ʻa Kalaisí ngaahi folofola Keinanga ʻa e 2 ʻa Kalaisí; ʻi he ʻe fakahā kiate kimoutolu Nīfai 3 ke mou faí. ngaahi meʻa kotoa pē

Ko ha fili ʻe taha ko hano hiki e ngaahi foʻi lea takitaha ko ʻení ʻi ha kiʻi laʻipepa pea ʻoange ha laʻipepa ʻe taha pe lahi ange ki he tokotaha ako takitaha. Fakaafeʻi e kau akó ke ngāue fakataha ke fokotuʻutuʻu lelei ia.

Tali: 2 Nīfai 32:3 Keinanga ʻi he ngaahi folofola ʻa Kalaisí; he vakai, ʻe fakahā kiate kimoutolu ʻe he ngaahi folofola ʻa Kalaisí ʻa e ngaahi meʻa kotoa pē ʻoku totonu ke mou faí.