Iakopo 1–4

Vaaiga Aoao

A o lei maliu Nifae, sa ia tuuina atu i lona uso laitiiti o Iakopo le tiutetauave e tausia papatusi ma faamaumau i luga o i latou le mea sa “sili ona pele” (Iakopo 1:2). O le savali a Iakopo na faasino atu ai isi ia Iesu Keriso, ma fesoasoani ai ia i latou e ‘alo ese mai taunuuga o le le talitonu ma le agasala. Sa ia iloa e ala i faaaliga mai le Atua o loo tauivi tagata sa Nifae ma ni agasala eseese. Sa ia lauga atu i se lauga lea na ia talanoa atu ai i le agasala o le faamaualuga ma aoao atu ai e uiga i le tulafono o le legavia. O ana aoaoga e mafai ona fesoasoani ia i tatou e faatoilalo ai le agasala i o tatou lava olaga ma o mai ai i le Faaola.

Saunia e Aoao Atu

O nei faamatalaga e tuuina atu ai i faiaoga ni manatu o mea atonu e manaomia ona muai saunia mo lesona taitasi.

Atamai i Aoaoga Faavae: 2 Nifae 32:8–9

Faamoemoega o le lesona: O lenei lesona o le a fesoasoani i tagata aoga e tauloto lenei mau faasino o aoaoga faavae ma fasifuaitau autu o mau mo le 2 Nifae 32:8–9, faamatala le aoaoga faavae, ma faaaoga mataupu faavae o le mauaina o le malamalama faaleagaga i tulaga masani faalesoifuaga.

Sauniuniga a le tagata aoga: Mafaufau e valaaulia tagata aoga e faailoa mai se taimi i o latou olaga po o le olaga o se tasi latou te iloa ina ua fesoasoani le tatalo faamaoni ia i latou e latalata atili atu ai i le Tama Faalelagi ma Iesu Keriso.
Fautuaga faafaiaoga i konafesi faavitio: Mafaufau e valaaulia tagata aoga e tali fesili e faaaoga ai le vaega o talanoaga. O lenei mea o le a mafai ai e tagata aoga ona saunia a latou tali a o lei auina atu, ma o le a uunaia ai foi tagata aoga o e e le masani ona ofoina atu ni tali e tuuina atu ai o latou manatu.

Iakopo 1

Faamoemoega o le lesona: O lenei lesona e mafai ona fesoasoani i tagata aoga e iloa ai auala e fesoasoani ai i isi ia o mai ia Iesu Keriso.

Sauniuniga a le tagata aoga: Valaaulia tagata aoga e mafaufau i taimi na mafai ai ona latou talanoa atu i isi e uiga ia Iesu Keriso. Uunaia i latou e tatalo mo se avanoa ma ia maua le lototele e galulue ai i lena taimi.
Vitio: “Valaauliaina o Tagata Uma e O Mai ia Keriso: Faasoaina Atu o le Talalelei” (4:30); “Faasalalauga i le Lalolagi Atoa i le Faasoaina Atu o le Talalelei” (54:06; matamata mai le faailotaimi 0:00 i le 1:35); “Tala a Tagata o le Ekalesia: Autalavou ma Talavou Matutua” (5:08); “Auauna Atu e pei ona Faia e le Faaola” (6:08)
Fautuaga faafaiaoga i konafesi faavitio: Mafaufau e vaevae tagata aoga i ni potu e talanoaina ai ni auala e fesoasoani ai i isi ia o mai ia Keriso i ni tulaga eseese.

Iakopo 2:1–21

Faamoemoega o le lesona: O lenei lesona e mafai ona fesoasoani i tagata aoga ia avea atili e faapei o Iesu Keriso e ala i le iloaina ma le teenaina o le agasala o le faamaualuga.

Sauniuniga a le tagata aoga: Valaaulia tagata aoga e o mai saunia e faasoa mai ni faataitaiga o auala latou te vaai ai i le faamaualuga o faaalia i le lalolagi i aso nei.
Anotusi e faaali atu: O tulaga faataitai i le amataga o le lesona, o upusii mai ia Peresitene Ezra Taft Benson ma Elder Dieter F. Uchtdorf, ma le valaaulia faaiu.
Fautuaga faafaiaoga i konafesi faavitio: E mafai ona e vaevaeina tagata aoga i ni potu e suesue ai le Iakopo 2:17–21 ma talanoaina fesili e faatatau i ai. Mafaufau e auina atu savali i potu uma e vaevae i ai e faamanatu atu ai ia i latou ia fesili.

Iakopo 2:22–35

Faamoemoega o le lesona: O lenei lesona e mafai ona fesoasoani i tagata aoga e fiafia ai i le ola mamā e pei ona faia e le Alii.

Sauniuniga a le tagata aoga: E mafai ona e valaaulia tagata aoga e fesili i o latou matua po o se taitai o le Ekalesia e uiga i faamanuiaga e oo mai i le usiusitai i le tulafono o le legavia. Atonu foi e te manao e faafesootai matua e faailoa atu ia i latou o le a aoao tagata aoga e uiga i le tulafono o le legavia ina ia mafai ai e matua ona faaauau le talanoaga i le fale pe afai latou te mananao ai.
Anotusi e faaali atu: Ata o loo faatusatusaina tulaga faatonuina a le Alii i tulaga faatonuina a le lalolagi
Vitio: “Tutu Malolosi i Nofoaga Paia” (16:07; matamata mai le faailotaimi 3:22 i le 4:50); “Ua Aoao Atu Iakopo e uiga i le Legaviā” (4:53; matamata mai le faailotaimi 0:20 i le 1:51); “Ua Ou Filifili ia Mamā” (4:19)
Anomea mo tagata aoga: O se kopi o le Mo Le Malosi o le Autalavou (tamaitusi, 2011) mo tagata aoga taitasi

Iakopo 4

Faamoemoega o le lesona: O lenei lesona e mafai ona fesoasoani i tagata aoga e faamalosia lo latou faatuatua ia Iesu Keriso e ala i le faailoaina, faamaumauina, ma le mafaufau loloto i mataupu faavae ma upumoni na aoao mai e Iakopo.

Sauniuniga a le tagata aoga: Mafaufau e valaaulia tagata aoga e faitau le Iakopo 4:7–14 ma saunia e faasoa mai se mataupu faavae po o se upumoni latou te maua latou te lagona e faapitoa ona manaomia i le lalolagi i aso nei.
Anomea mo tagata aoga: O se mea e ese mai se peni po o se penitala e mafai ona faaaoga e tagata aoga e osiosi ai pe togitogi ai se parakalafa i se fasi pepa alumini po o se pepa
Anotusi e faaali atu: O fuaiupu ua faailoga i togi i le faaiuga o le lesona lea e fesoasoani i tagata aoga e mafaufau loloto ai i le upumoni na latou faailoaina
Fautuaga faafaiaoga i konafesi faavitio: Mafaufau e valaaulia ni nai tagata aoga e faaaoga le vaega o talanoaga e faasoa atu ai le mataupu faavae po o le upumoni na latou maua i le Iakopo 4:7–14. Ona mafai lea e isi tagata aoga ona faasoa mai ni fesili mo le vasega e mafaufau loloto ai e uiga i le mataupu faavae po o le upumoni.