Iakopo 2:1–21

“Aua Le Tuua Lenei Faamaualuga … E Faaumatia ai o Outou Agaga”

Na iloa e le perofeta o Iakopo e ala i faaaliga mai le Atua o loo tauivi tagata sa Nifae ma ni agasala eseese. Sa ia tuuina atu se lauga i le malumalu e talanoaina ai nei agasala, e aofia ai le agasala o le faamaualuga. Tatou te tauivi uma lava ma le faamaualuga i nisi taimi. O lenei lesona e mafai ona fesoasoani ia te oe ia avea atili e faapei o Iesu Keriso e ala i le iloaina ma le teenaina o le agasala o le faamaualuga.

Fai atu fesili e valaaulia ai le mauaina. Fai atu fesili e fesoasoani ai i tagata aoao ia iloa e i latou lava ia upumoni o le talalelei. O fesili e mafai ona faaauai ai tagata aoga i le faagasologa o le malamalama i tusitusiga paia ma e mafai ona fesoasoani ia i latou e faailoa ma malamalama ai i upumoni taua o le talalelei.

Sauniuniga a le tagata aoga: Valaaulia tagata aoga e o mai saunia e faasoa mai ni faataitaiga o auala latou te vaai ai i le faamaualuga o faaalia i le lalolagi i aso nei.

Gaoioiga e Ono Mafai Ona Aoao Ai

Faamaualuga

Faaali atu tulaga faataitai nei ma valaaulia tagata aoga e vaavaai mo faamaoniga o le faamaualuga.

• Ua faamoemoe Koji e faia e se tasi o le au se mea sese i le taimi o se taaloga ina ia mafai ai ona tele atu lona taimi e taalo ai.

• Ua faateleina e Silivia mea na te ausia ina ia foliga lelei atu ai pe sili atu ona taua i isi.

• E taofia e Jens le lotofaafetai ma e le faailoa atu le lelei e faia e isi tagata.

• Ua tauemu Emi i isi ma ula ia i latou i tua o lo latou papatua.

• O le a se faamaoniga o le faamaualuga na e mauaina?

Sa aoao mai Peresitene Ezra Taft Benson (1899–1994):

O le faamaualuga o se agasala e faigofie ona iloa atu i isi ae seasea ona tatou iloaina ia i tatou lava. (Aoaoga a Peresitene o le Ekalesia: Ezra Taft Benson [2014], 235)

Mafaufau nei i le Faaola. E ui i le tele o tomai ma mea na Ia ausia, ae sa agamalu ma lotomaualalo o Ia i taimi uma (tagai Mataio 11:29). A o e suesue, mafaufau i auala e ono faaalia ai le faamaualuga i lou olaga. O lenei lesona e mafai ona fesoasoani ia te oe e avea atili ai e faapei o Iesu Keriso e ala i le teenaina o le agasala o le faamaualuga.

“Aua le tuua lenei faamaualuga … e faaumatia ai o outou agaga”

Sa fesoasoani le Alii i le perofeta o Iakopo ia iloa manatu o tagata ma poloaiina o ia e alu i le malumalu ma molimau atu e faasaga i a latou agasala, e aofia ai le agasala o le faamaualuga (tagai Iakopo 2:1–13).

Mafaufau e faamaea le gaoioiga lenei o se vasega i luga o le laupapa faapea foi ma le valaauliaina o tagata aoga e faamaeaina i a latou api talaaga mo suesuega.

I lau api talaaga mo suesuega, tusi se laina agai i lalo i le ogatotonu o le itulau. I le pito i luga o le itu agavale o le itulau, tusi ai “Faaaliga o le faamaualuga.” I le pito i luga o le itu taumatau, tusi ai “O auala e mafai ai ona tatou faapei o le Faaola ma tetee atu ai i le faamaualuga.”

Valaaulia tagata aoga e o mai i luga ma lisi faaaliga o le faamaualuga latou te maua i fuaiupu nei i le itu agavale o le laupapa.

Faitau le Iakopo 2:12–16, ma vaavaai mo faaaliga o le faamaualuga. Faaopoopo i latou i le itu agavale o lau tusiga i le api talaaga. E mafai foi ona e matamata i le “Ua Aoao Atu Iakopo e uiga i le Faamaualuga,” o loo maua i le ChurchofJesusChrist.org, mai le faailotaimi 0:23 i le 4:39.

Atonu e te manao e tusi le upumoni lenei ua faamatamatatetele i luga o le laupapa ma faaaoga fesili nei e fesoasoani ai i tagata aoga e faamatala mai pe mafai faapefea e le faamaualuga ona faatosinaina i tatou i aso nei.

O se upumoni e tasi e mafai ona tatou aoao mai lenei fuaitau e faapea o le faamaualuga e faaumatia ai o tatou agaga (Iakopo 2:16).

• O le a sou manatu e mafai faapefea e le faamaualuga ona faaumatia o tatou agaga?

• O le a sou manatu e faapefea ona talafeagai pea le lapataiga a Iakopo i aso nei?

Sa faasoa mai e Elder Dieter F. Uchtdorf, a o i ai i le Au Peresitene Sili, ma Peresitene Ezra Taft Benson (1899–1994) ni auala faaopoopo e mafai ona faaalia ai le faamaualuga i o tatou olaga. Faaopoopo ni malamalamaaga mai a latou saunoaga i le itu agavale o lau tusiga i le api talaaga.

Faaali atu faamatalaga nei ma valaaulia tagata aoga e faasoa mai ni malamalamaaga mai faamatalaga ma faaopoopo i le itu agavale o le laupapa.

O le fili tele lava o le alofa mama o le faamaualuga. O le faamaualuga o se tasi lea o mafuaaga aupito tele ua tauivi ai faaipoipoga ma aiga. O le faamaualuga o le māitaitagofie, leai se alofa, ma le lotoleaga. E faateleina e le faamaualuga lona lava ia malosi ma le amanaia ai le amio mama o isi. O le faamaualuga o le manatu faapito ma le faaitagofie. E mafaufau le faamaualuga i manatu leaga ae leai lava se mea o iai ma faalafi ona lava ia vaivaiga i tua atu o ‘alofaga poto. O le faamaualuga e faalumaluma, femouomouai, ita, ma le le onosai. O le mea moni, afai o le alofa mama o le alofa le pona o Keriso, o le faamaualuga la o le uiga lea e faamatala ai Satani. (Dieter F. Uchtdorf, “I Le Viia ai o i Latou o E Laveai,” Liahona, Me 2016, 80)

O le toatele o i tatou e mafaufau o le faamaualuga o se agasala a i latou e maualuluga atu, e pei o tagata maumea ma atamamai, o loo vaai maualalo mai ia i tatou uma. (Tagai i le 2 Ni. 9:42.) Peitai, o loo i ai se gasegase taatele ia i tatou—ma o le faamaualuga lena mai le pito i lalo i le vaai atu i luga. E tele auala e faaalia ai, e pei o le saili masei, faitatala, faatuāupua, muimui, ola fiatele, matau’a, manaonao fua, leai se lotofaafetai ma se faamalo e ono siitia ai se isi, ma le lē loto faamagalo ma le lotoleaga. (Aoaoga a Peresitene o le Ekalesia: Ezra Taft Benson [2014], 235)

Valaaulia tagata aoga e tomanatu i a latou sauniuniga mo le vasega a o latou tali atu i fesili nei.

• O a ni auala faaopoopo e te vaaia ai le faaalia o le faamaualuga i lo tatou lalolagi i aso nei?

• E faapefea ona faafeagai le faamaualuga ma uiga o Iesu Keriso?

Faaali atu le uunaiga lenei ma valaaulia tagata aoga e mafaufau faamaoni i ni auala e ono faaalia ai le faamaualuga i o latou olaga.

Taofi ma mafaufau loloto i ou lava manatu ma faatinoga. O a ni auala e te tauivi ai i nisi taimi ma le agasala o le faamaualuga? O faapefea e uiga faaalia o le faamaualuga ona aafia ai au sootaga ma le fiafia? O le a se mea e te manao e sui? Aisea?

Faatoilaloina o le faamaualuga

Na aoao mai e Iakopo le ala e mafai ai ona tatou maua se faamoemoe ia Keriso ma tetee atu i le agasala o le faamaualuga.

A o suesue e tagata aoga mea nei, valaaulia i latou e o mai i luga ma tusi mea latou te maua i le itu taumatau o le laupapa.

Faitau le Iakopo 2:17–21, ma vaavaai mo auala e mafai ona e aloese ai mai le agasala o le faamaualuga. Faaopoopo i latou i le itu taumatau o lau tusiga i lau api talaaga. E mafai foi ona e matamata i le “Ua Aoao Atu Iakopo e uiga i le Faamaualuga,” o loo maua i le ChurchofJesusChrist.org, mai le faailotaimi 4:40 i le 5:44.

Mafaufau e valaaulia ni tagata aoga e talanoaina fesili nei i ni paga pe i ni vaega toalaiti.

• E mafai faapefea e le mulimuli i le fautuaga a Iakopo ona fesoasoani ia i tatou e tetee atu i le faamaualuga ma maua ai se faamoemoe ia Keriso?

• O ai e te iloa o se faataitaiga lelei o le teenaina o le faamaualuga i auala o loo faamatalaina i nei fuaiupu? O a mea latou te faia?

• O a uiga faaKeriso e mafai ona tatou taulai atu i ai ma atiina a’e lea o le a fesoasoani ia i tatou e aloese ai mai le faamaualuga? Aisea pe faapefea foi ona fesoasoani na uiga?

Faaali atu le valaaulia lenei.

Tomanatu i lou lava manao ia iloa ma tetee atu i le agasala o le faamaualuga i lou olaga. Mafaufau i ni tulaga patino po o ni sootaga lea e te faaalia ai le faamaualuga. Taumafai ia iloa pe faapefea e le faamaualuga ona aafia ou sootaga. Saili le fesoasoani a le Tama Faalelagi e ala i le Agaga Paia ia avea atili ai e faapei o le Faaola e ala i le teenaina o le faamaualuga a o e faia mea nei:

1. Filifili se faailoaina se tasi o le faamaualuga mai le itu agavale o lau tusiga i le api talaaga e te lagona le musuia e taulai atu i ai i le faatoilaloina i le taimi nei.

2. Mai le itu taumatau o lau tusiga i le api talaaga, filifili se auala se tasi e mafai ona e tetee atu ai i lena faailoaina o le faamaualuga. Mafaufau i uiga faaKeriso ma tusi i lalo ni faatinoga patino e mafai ona e faia.

Mafaufau e faasoa atu se molimau i le tomai o le Faaola e fesoasoani ai ia i tatou e faatoilalo le faamaualuga ma avea atili e faapei o Ia.

Manatu ma Talaaga o Faamatalaga

O a nisi o auala e faaalia ai le faamaualuga?

Na tuuina mai e Elder Quentin L. Cook o le Korama a Aposetolo e Toasefululua faataitaiga nei:

Sa aoao mai Peresitene Ezra Taft Benson (1899–1994):

I upu a C. S. Lewis: “O le faamaualuga na te le maua se fiafia mai le mauaina o se mea, ae na o le mauaina o mea e tele atu nai lo le isi tagata. … O le faatusatusaga lea e fai ai oe ma tagata faamaualuga: o le fiafia i le iloa ai ua sili atu oe i lo isi uma tagata. O le taimi lava e alu ese ai le agaga lea o le fia tautava, o le taimi foi lena e alu ese ai ma le faamaualuga.” (Ua Na’o le Faakerisiano, Niu Ioka: Macmillan, 1952, itu. 109–10.) …

O ē faamaualuluga e sili atu ona fefefe i faamasinoga a tagata nai lo o le faamasinoga a le Atua. (Tagai Mataupu Faavae & Feagaiga 3:6–7; Mataupu Faavae & Feagaiga 30:1–2; Mataupu Faavae & Feagaiga 60:2.) “O le a se manatu o tagata ia te a’u?” e sili atu ona mamafa nai lo le “O le a le finagalo o le Atua ia te a’u?” (Aoaoga a Peresitene o le Ekalesia: Ezra Taft Benson [2014], 233)

Matamata i le “O Le Faamaualuga ma le Perisitua,” o loo maua i le ChurchofJesusChrist.org, mai le faailotaimi 2:52 i le 4:27 e vaai ai ia Elder Dieter F. Uchtdorf, a o i ai i le Au Peresitene Sili, o faamalamalama mai le mea e le o le faamaualuga.

Sa faamatala mai e Peresitene Dieter F. Uchtdorf, a o i ai i le Au Peresitene Sili:

O le faamaualuga o se kanesa matautia. O se agasala lea e taitai atu ai i le tele o isi vaivaiga uma faaletagata. O le mea moni, e mafai ona faapea o isi agasala uma o se aūga, o se faaalia lea o le faamaualuga. (Dieter F. Uchtdorf, “O Le Faamaualuga ma le Perisitua,” Liahona, Nov. 2010, 56)

E faapefea ona ou teenaina le agasala o le faamaualuga?

Na faamatala mai e Elder Gary E. Stevenson o le Korama a Aposetolo e Toasefululua e faapea:

O le faamaualuga o le faafeagai lea o le lotomaualalo, ma o se “naunautaiga lea e gauai atu i le finagalo o le Alii” [tagai Talai Lau Talalelei: O Se Taiala mo le Galuega Faafaifeautalai (2004), 120–21]. … Ae peitai, o le faamaualuga e mafai ona taomia ai i le uiga faaKeriso o le lotomaualalo. (Gary E. Stevenson, “Gasetoto Faaleagaga,” Liahona, Nov. 2017, 47)

Na tuuina mai e Peresitene Dieter F. Uchtdorf, a o avea ma sui o le Au Peresitene Sili lenei apoapoaiga. Matamata i le “O Le Faamaualuga ma le Perisitua,” o loo maua i le ChurchofJesusChrist.org, mai le faailotaimi 13:26 i le 15:05.

Atonu foi e te manao e matamata i le “Elder ma Sister Bednar—Faamaualuga” (3:10), lea e mafai ona maua i le ChurchofJesusChrist.org, ina ia matamata ai i le saunoaga a Elder David A. Bednar o le Korama a Aposetolo e Toasefululua ma Sister Bednar o loo faamatala mai ai auala e faatoilalo ai le faamaualuga.

Gaoioiga Faaopoopo e Aoao Ai

Iakopo 2:17–19. O le faamoemoega o ‘oa

Valaaulia tagata aoga e talanoaina pe faapefea ona vaai le lalolagi i le faamoemoega o ‘oa. Faitau le Iakopo 2:17–19, 1 Timoteo 6:6–11, ma le Mataupu Faavae ma Feagaiga 38:39. Talanoaina faamoemoega a le Alii mo ‘oa ma le auala e mafai ai ona tatou faatoilaloina ai manatu sese o le lalolagi. E mafai foi ona outou talanoaina faataitaiga o tagata o e vaai i ‘oa e pei ona silasila i ai le Alii ma pe mafai faapefea e le mulimuli i nei aoaoga ona fesoasoani ia i tatou ia avea atili e faapei o le Faaola.

Iakopo 2:21. “Ma ua tutusa le pele o le tasi tagata i lana silafaga e pei o le isi”

Mafaufau e talanoaina pe mafai faapefea e le taumafai e vaai atu i isi e pei ona silasila i ai le Atua ona fesoasoani ia i tatou e faatoilalo ai e faamaualuga. Talanoa pe faapefea ona ese aiga o tagata aoga, nuu, aoga, ma isi mea faapena pe afai e vaavaai tagata uma i isi i lenei auala.

Mafaufau itiiti e uiga ia te oe lava

A uma ona suesue e tagata aoga le Iakopo 2:11–21, valaaulia i latou e mafaufau i le taua o le uiga faaKeriso o le lotomaualalo ma le manatu itiiti ia i latou lava. Mafaufau e faasoa atu le saunoaga lenei mai ia Elder Dieter F. Uchtdorf, o le sa avea o se sui o le Au Peresitene Sili:

“O nisi e manatu o le lotomaualalo o lona uiga o le lagona o le tausalaina o i tatou lava. O le lotomaualalo e le faapea ua faatalitonuina i tatou lava tatou te lē aogā, leai se uiga, pe itiiti foi so tatou taua. E le faapea foi e faafitia ai pe taofia ai taleni ua tuuina mai ia i tatou e le Atua. Tatou te le mafaufau i le lotomaualalo e ala i lo tatou manatu faatauvaa ia i tatou lava; tatou te mafaufau i le lotomaualalo e ala i lo tatou lē manatu mo na o i tatou lava. E oo mai lea i lo tatou galulue ma se uiga o loo auauna atu i le Atua ma o tatou uso a tagata” (“O Le Faamaualuga ma le Perisitua,” Liahona, Nov. 2010, 58).

Ona valaaulia lea o tagata aoga e faasoa mai ni faataitaiga mai le soifuaga o le Faaola e faagaeetia ai i latou i taimi na Ia faaalia ai sa mafaufau o Ia e uiga i isi e sili atu nai lo Ia lava. Fai atu i tagata aoga e fatu se fuafuaga pe faapefea ona latou mulimuli i le faataitaiga a le Faaola i lenei auala i aso taitasi.