Iakopo 1

Faatauanau Isi e O Mai Ia Keriso

A o lei maliu Nifae, sa ia tuuina atu i lona uso laitiiti o Iakopo le tiutetauave e tausia papatusi ma faamaumau i luga o i latou le mea sa “sili ona pele” (Iakopo 1:2). O le savali a Iakopo na faasino atu ai isi ia Iesu Keriso, ma fesoasoani ia i latou e aloese mai taunuuga o le le talitonu ma le agasala. O lenei lesona e mafai ona fesoasoani ia te oe e iloa ai auala e fesoasoani ai i isi ia o mai ia Iesu Keriso.

O le fesoasoani i tagata aoga ia avea ma tagata auai mataalia. Mo le toatele o tagata aoga, o le faia o taumafaiga e aoao ai mai tusitusiga paia e foliga e le masani ai ma e ono faigata. Peitai, e mafai e tagata aoga ona tuputupu a’e i o latou tomai ma faasolosolo malie ai lava ona tauaveina le tele o tiutetauave mo lo latou aoaoina. Vaavaai mo avanoa e fesoasoani ai i tagata aoga e tauave se matafaioi mataalia i le vasega ma viia a latou taumafaiga ma le alualu i luma.

Sauniuniga a le tagata aoga: Valaaulia tagata aoga e mafaufau i taimi na mafai ai ona latou talanoa atu i isi e uiga ia Iesu Keriso. Uunaia i latou e tatalo mo se avanoa ma ia maua le lototele e galulue ai i lena taimi.

Gaoioiga e Ono Mafai Ona Aoao Ai

Talanoa i se uo

O fesili ma vitio nei e mafai ona fesoasoani i tagata aoga e talanoaina pe faape’i le talanoa atu i isi e uiga ia Iesu Keriso. Afai na talosagaina tagata aoga e fai le sauniuniga a le tagata aoga, valaaulia i latou e faasoa mai ni taimi atonu latou te talanoa ai i isi e uiga ia Iesu Keriso. Atonu e le manaomia le faaali atu o le vitio pe afai e tele ni mea e talanoaina e tagata aoga e uiga i o latou lava lagona ma aafiaga.

• E faapefea e le talanoa atu i isi e uiga ia Iesu Keriso ona oo mai ai lagona taufaamatau? O le a se mea e ono fesoasoani ia i tatou e faatoilalo ai lo tatou fefefe?

• O ai se tasi e te iloa o se faataitaiga lelei o le faasoaina atu o le talalelei a Iesu Keriso i isi?

O se alii talavou e igoa ia Junior o se faataitaiga sili o le faasoaina atu o le talalelei. Sa na o ia le alii talavou sa auai i le lotu i se paranesi laitiiti i Florida, ISA. Sa tonu ia te ia e talanoa i se tasi o ana uo e uiga i le talalelei a Iesu Keriso ma valaaulia o ia i le lotu. Atonu e te manao e matamata le vitio “Valaauliaina Isi e O Mai ia Keriso: Faasoaina Atu o le Talalelei” (4:30), o loo maua i le ChurchofJesusChrist.org, ma vaavaai mo se mea se tasi pe lua e mafai ona e aoao mai ia Junior ma isi i lana paranesi.

O le faataitaiga a isi e mafai ona tatou maua ai mafuaaga ma manatu i le auala e valaaulia ai isi e o mai ia Keriso. A o suesue ai i le asō, mafaufau pe aisea atonu e te manao ai e fesoasoani i isi ia o mai i le Faaola ma po o a auala masani ma faalenatura e mafai ona e faia ai lenei mea.

Faatauanauina o isi e o mai ia Keriso

A o lei maliu Nifae (tagai Iakopo 1:12), sa ia tuuina atu i lona uso o Iakopo le tiutetauave e tusitusi i luga o papatusi laiti na poloaiina o ia e le Alii e fai. O papatusi laiti e taulai atu i mea faaleagaga ma o isi papatusi sa tuuto atu i le talafaasolopito o tagata (Iakopo 1:1–3).

Faitau le Iakopo 1:4–6, ma vaavaai mo mea na fai atu ai Nifae ia Iakopo e faaaofia i luga o papatusi ma aoao atu i tagata.

• O a nisi o mea na iloa e Nifae ma Iakopo? Na faapefea ona latou aoao nei mea?

Fesoasoani i tagata aoga ia iloa le molimau a Iakopo ia Iesu Keriso ma le auala na faaosofia ai o ia e faatino.

Faitau le Iakopo 1:7–8, ma vaavaai mo mea na faia e Iakopo ona o lona malamalama. E mafai ona e faailogaina fasifuaitau i au tusitusiga paia e faaalia ai le mea na faaosofia ai Iakopo e faatino ia mea. O faamalamalamaga nei e mafai ona faamanino ai le uunaiga a Iakopo.

“Manatunatu i lona maliu”:Atonu na valaaulia e Iakopo sa Nifae e mafaufau e uiga i le maliu o Iesu Keriso mo i latou ma togiola mo a latou agasala.

“Mafatia i lona satauro”:O lenei fasifuaitau e faasino i se tautinoga e faafitia ai i tatou lava mai tuinanau faalelalolagi ma ia tausia poloaiga a le Alii (tagai Faaliliuga a Iosefa Samita, Mataio 16:26 [i le Mataio 16:24, vaefaamatalagau]; Luka 9:23; 2 Nifae 9:18). O le isi foi uiga e faapea e mafai ona tatou faaali atu lo tatou naunautaiga e tumau ma ositaulaga a o tatou mulimuli i le Faaola.

• O a mafuaaga na tusia e Iakopo e mafai ona faaosofia ai oe? O a isi mafuaaga e mafai ona e mafaufau i ai mo le valaauliaina o isi e o mai ia Keriso?

Mafaufau e fesili i tagata aoga po o a fasifuaitau i fuaiupu latou te manaomia le fesoasoani ia malamalama ai. Valaaulia tagata aoga e fesoasoani le tasi i le isi.

E mafai ona e tuuina atu faamalamalamaga o loo maua i le vaega o “Manatu ma Talaaga o Faamatalaga” pe a manaomia.

• O le a se mea e mafai ona tatou aoao mai i le faataitaiga a Iakopo i nei fuaiupu?

O se upumoni e tasi e mafai ona tatou aoao mai le faataitaiga a Iakopo e faapea, o le iloaina o Iesu Keriso ma Lona malo e mafai ona faaosofia ai i tatou e galulue ma le filiga e fesoasoani i isi ia o mai ia te Ia.

Atonu e aoga mo tagata aoga le faalogo atu i nisi o a latou tupulaga o faasoa mai a latou tali i le uunaiga lenei.

Mafaufau loloto i mea ua e iloa e uiga ia Iesu Keriso ma mafaufau po o a upumoni o le a e manao ia iloa e isi e uiga ia te Ia.

E mafai e tagata aoga ona fai mea nei o se gaoioiga faalevaega, i tulaga faatupu manatu lea e mafai ai ona latou fesoasoani i se tasi e sau ia Keriso.

Faaalu sina taimi e mafaufau ai e uiga i mea e mafai ona e faia e galue ai ma le filiga e faatauanau isi e o mai ia Keriso. Tusi i lalo tulaga e te ono maua ai avanoa e fai ai lenei mea. I tafatafa o tulaga taitasi, tusi i lalo pe mafai faapefea ona e fesoasoani i isi i lena tulaga ia iloa ma alofa ia Iesu Keriso. E mafai ona e faaaogaina faataitaiga nei ma faaopoopo i ai so o se isi lava faataitaiga:

1. I le aiga

2. Faatasi ma se uo

3. I luga o ala o faasalalauga faaagafesootai

4. I lou valaauga pe e ala i auaunaga

Atonu e aoga i tagata aoga se talanoaga a le vasega i le auala e mafai ai e valaauga o ia i latou pe mafai foi ona talosagaina e faataunuu, e mafai ona fesoasoani latou te aumaia ai isi ia Keriso. E mafai ona latou fai atu ni fesili e uiga i le auaunaga pe faasoa atu fautuaga e uiga i le auauna atu i le Ekalesia a le Alii.

Mafaufau e faasoa atu se aafiaga na e maua i le fesoasoani atu i se tasi e sau ia Keriso.

E mafai foi ona e faaali atu se faataitaiga o le vitio. Filifili mai se tasi o vitio nei po o isi o loo avanoa mo oe.

“Faasalalauga o le 2021: Mataupu Faavae o le Alofa, Faasoa Atu, Valaaulia” (54:06) mai le faailotaimi 0:00 i le 1:35

“Tala a Tagata o le Ekalesia: Autalavou ma Talavou Matutua” (5:08)

“Auauna Atu e pei ona Faia e le Faaola” (6:08)

A o e mafaufau i auala e fesoasoani ai i isi e o mai ia Iesu Keriso, e mafai ona e maua le lototele mai folafolaga ma fautuaga i tusitusiga paia.

Faitau le Mataupu Faavae ma Feagaiga 15:6; 18:15–16 e iloa ai le mea na folafola mai e le Alii ia i latou o e fesoasoani i isi e o mai ia te Ia.

Faitau le Alema 31:34–35 e aoao ai mai le faataitaiga a Alema i le manao e fesoasoani e taitai sa Soramā ia Keriso.

• O anafea na mafai ai ona e fesoasoani i isi tagata e aoao e uiga ia Iesu Keriso?

• O ai se tagata e te manao e valaaulia e sau ia Keriso? O le a se mea e mafai ona e faia e valaaulia ai i latou? E faapefea ona e faalagolago i le Faaola e fesoasoani ia te oe?

Manatu ma Talaaga o Faamatalaga

Iakopo 1:7–8. O a uiga o upu a Iakopo?

O le malamalama i faaupuga nei na faaaoga e Iakopo e mafai ona fesoasoani.

“Ulu atu i le malologa [o le Atua]”:Seiloga lava tatou te mulimuli ia Iesu Keriso ona mafai lea ona tatou olioli i le filemu ma le saolotoga mai le popole.

“Faa’ono’ono i aso o le faaosoosoga”:Ina ua mavae lo latou laveaiina mai Aikupito, sa faatiga Isaraelu anamua i le Atua. O lona uiga, sa latou fouvale faasaga ia te Ia, sē i le vao mo le 40 tausaga, ma aveesea ai faamanuiaga silisili, e aofia ai le i ai i le afioaga o le Atua (tagai Numera 14:2–3, 22–23; Eperu 3:8–9; Mataupu Faavae ma Feagaiga 84:23–25).

“Tauave tauemuga a le lalolagi”:Na iloa e Iakopo e le faigofie le avea ma se soo o Iesu Keriso. Ua valaaulia i tatou e mulimuli i le Faaola e ui lava i mea faafeagai e masani ona oo mai ai.

E mafai faapefea ona ou auauna atu i isi ma taitai atu i latou ia Keriso?

Sa faamatala mai e Peresitene Bonnie H. Cordon, Peresitene Aoao o Tamaitai Talavou:

A o tatou tauivi e mulimuli i le faataitaiga a le Faaola,e tatau ona tatou muamua iloa ma faitauina Ana mamoe. … Ae peitai, o le faitauina, e le o faatatau i fuainumera; e faatatau i le faamautinoaina ua lagona e tagata taitoatasi le alofa o le Faaola e ala i se tasi o loo auauna atu mo Ia. I lena auala, e mafai ai e tagata uma ona iloaina ua silafia i latou e se Tama o i le Lagi agaalofa. …

… Ao outou sailia le taitaiga a le Alii i le auala e faailoa atu ai Lona alofa ma vaai i manaoga o i latou e te auauna atu i ai, o le a matala o outou mata. (Bonnie H. Cordon, “Avea ma se Leoleo Mamoe,” Liahona, Nov. 2018, 75–76)

E mafai faapefea e le Alii ona faamanuia a’u a o ou fesoasoani i isi ia o mai ia te Ia?

Sa aoao mai Peresitene Henry B. Eyring o le Au Peresitene Sili:

O lou mana o le a faateleina e le Alii i le tele o taimi. E na o le pau le mea o loo ia talosaga mai ai o Ia o lou tuuina atu lea o au taumafaiga silisili ma lou loto atoa. Ia faia ma le fiafia ma le tatalo o le faatuatua. O le a auina mai e le Tama ma Lona Alo Pele ia le Agaga Paia e avea ma au soa e taialaina oe. O le a faalauteleina au taumafaiga i olaga o tagata o loo e auauna atu i ai. (Henry B. Eyring, “Tulai i Lou Valaauga,” Liahona, Nov. 2002, 78)

E mafai faapefea ona ou faalauteleina lo’u valaauga?

Na aoao mai Peresitene Henry B. Eyring o le Au Peresitene Sili ia mea e manaomia e faalautele ai o tatou valaauga:

O le a faalagolago i lo tatou filiga i le taumafai ia iloa le finagalo o le Alii ma a tatou taumafaiga ia lagona Lona siufofoga ina ia mafai ona sili atu lo tatou iloa o mea e finagalo i ai o Ia mo le tagata o loo tatou auauna atu i ai mo Ia. O lena faalautelega o le a oo mai i ni laa laiti. Atonu e telegese mai, ae o le a oo mai lava. (Henry B. Eyring, “Faamanuiaina i Lona Suafa,” Liahona, Me 2021, 70)

Gaoioiga Faaopoopo e Aoao Ai

Iakopo 1:17. O la’u feau mai le Alii

Atonu e aoga i tagata aoga se talanoaga e uiga i le mauaina o se feau mai le Alii. Fesoasoani i tagata aoga ia malamalama tatou te maua se feau mai le Alii pe a tatou taliaina se valaauga e auauna atu i Lana Ekalesia pe faataunuu se tofiga faaleauaunaga. E mafai foi ona tatou tatalo mo le taitaiga mai lo tatou Tama Faalelagi ma mulimuli i uunaiga tatou te maua mai le Agaga Paia. Mafaufau e faaaoga lenei saunoaga mai ia Peresitene Thomas S. Monson (1927–2018): “Pe a tatou i ai i le feau a le Alii, ua ia i tatou agavaa mo le fesoasoani a le Alii. Ia manatua o lē e valaauina e le Alii, e faaagavaaina e le Alii” (“Duty Calls,” Ensign, Me 1996, 44).

Iakopo 1:18–19. E tuuina mai e le Alii ia i tatou avanoa e auauna atu ai i isi

Mafaufau e faasoa atu faapea “o le avea ma se soo faamaoni ina ia fesoasoani ai i isi ia avea ma soo faamaoni o le faamoemoega lea i tua atu o valaauga uma i le Ekalesia” (Tusitaulima Aoao: Auauna Atu i Le Ekalesia a Iesu Keriso o le Au Paia o Aso e Gata Ai, 4.1, ChurchofJesusChrist.org). Faitau faatasi o se vasega le Iakopo 1:18–19. Fesoasoani i tagata aoga ia iloa na matua faatauaina e Iakopo ma lona uso o Iosefa o la tiutetauave ona sa valaauina i laua e le Alii. E mafai ona e faaaogaina faamatalaga o loo i le vaega o “Manatu ma Talaaga o Faamatalaga” e uunaia ai tagata aoga e auauna atu i le Alii i Lana Ekalesia.

Iakopo 1:19. “Sa matou faalauteleina lo matou tofi”

Ina ia fesoasoani i tagata aoga ia malamalama i le uiga o le faalauteleina o se valaauga, aumai se tioata e faalapopoa ai le vaaiga o mea i le vasega ma talanoaina le uiga o le faalauteleina o se mea. Ona fesoasoani lea i tagata aoga e talanoaina po o le a le uiga o le faalauteleina o se valaauga. Mataupu Faavae ma Feagaiga 24:9; 84:33 po o saunoaga mai taitai o le Ekalesia e mafai ona fesoasoani.