Iakopo 5–7

Vaaiga Aoao

Na faasoa mai e Iakopo le talafaatusa a Senosa o le laau olive, lea e faaalia faafaatusa ai le faataapeapeina o Isaraelu ma taumafaiga faifai pea a le Alii e faapotopoto mai fanau uma a le Tama Faalelagi ia te Ia. O le vaega mulimuli o lenei talafaatusa e faatusa i le galuega a le Alii i aso e gata ai, e aofia ai taumafaiga e faia e Ia ma Ana auauna e faapotopoto ai agaga ia te Ia mo se taimi mulimuli. I ni nai tausaga talu ona uma ona faasoa atu e Iakopo nei aoaoga, sa sau ai se tagata e igoa ia Serema i sa Nifae ma “sa galue [o ia] ma le filiga ina ia mafai ona ia taitai ese loto o tagata” (Iakopo 7:3). O nei lesona e mafai ona fesoasoani i tagata aoga e taulima ai luitau i lo latou faatuatua ma saunia ai e galulue i le tovine o le Alii.

Saunia e Aoao Atu

O nei faamatalaga e tuuina atu ai i faiaoga ni manatu o mea atonu e manaomia ona muai saunia mo lesona taitasi.

Iakopo 5:1–53

Faamoemoega o le lesona: O lenei lesona e mafai ona fesoasoani i tagata aoga ia lagona le alofa o Iesu Keriso mo i latou ma mo tagata uma.

Sauniuniga a le tagata aoga: Mafaufau e tuu atu i tagata aoga le ata ua faaautuina “O Le Talafaatusa o Laau Olive (Iakopo 5)” o loo maua i le vaega o “Manatu ma Talaaga o Faamatalaga”. Valaaulia tagata aoga e faaaoga le ata e fesoasoani ai ia i latou e suesue le talafaatusa i le Iakopo 5 ma faamasani i lana savali aoao.
Anotusi e faaali atu: O le siata o loo faamalamalama ai faailoga mai le talafaatusa
Pepa e tufa atu: O le ata ua faaautuina “O Le Talafaatusa o Laau Olive (Iakopo 5)” i le vaega o le “Manatu ma Talaaga o Faamatalaga” (Mafaufau e saunia se kopi mo tagata aoga taitasi.)
Vitio: “Maitaga Le Fuafuaina, Vaetamaga ma le ‘Meaalofa Sili’” (5:42)
Fautuaga faafaiaoga i konafesi faavitio: Mafaufau e faaaoga le vaega o le laupapa paepae e faataga ai tagata aoga e faamaumau ai a latou tali i le gaoioiga “O mea ua ou aoaoina e uiga ia Iesu Keriso mai le Iakopo 5”.

Iakopo 5:54–77; 6:1–13

Faamoemoega o le lesona: O lenei lesona ua faamoemoe e fesoasoani i tagata aoga ia lagona se manao sili atu e galulue faatasi ma le Alii e fesoasoani i fanau a le Tama Faalelagi e o mai ia te Ia.

Sauniuniga a le tagata aoga: Mafaufau e valaaulia tagata aoga e fai le gaoioiga suesue i lalo o le ulutala “Iakopo 5:61–75: Ua valaaulia au e le Alii e galulue faatasi ma Ia i Lona tovine” i le otootoga o suesuega “8–14 Aperila. Iakopo 5–7: ‘Ua Galue Faatasi le Alii ma i Tatou,’” i le Sau, Mulimuli Mai ia te Au—Mo Tagata Taitoatasi ma Aiga: Tusi a Mamona 2024.
Vitio: “Faamoemoe o Isaraelu” (1:01:34; matamata mai le faailotaimi 31:24 i le 33:42); “Pese o le Autu a le Autalavou 2021: ‘O Se Galuega Sili’” (4:06)

Iakopo 7

Faamoemoega o le lesona: O lenei lesona e mafai ona fesoasoani i tagata aoga e saunia ai e faatoilalo luitau i lo latou faatuatua ia Iesu Keriso ma Lana talalelei.

Sauniuniga a le tagata aoga: Valaaulia tagata aoga e o mai saunia i le vasega e faasoa mai se faataitaiga o se tasi o tutumau i lo latou faatuatua ina ua luitauina i latou e isi.
Vitio: “Ua Faafitia e Serema Keriso” (7:16); “Manatuaga Musuia Faaleagaga” (16:43; matamata mai le faailotaimi 13:40 i le 14:46)
Fautuaga faafaiaoga i konafesi faavitio: O le tala faatino e mafai ona saunia ai tagata aoga e tali atu i tulaga e luitauina ai lo latou faatuatua. Mafaufau e filifili se luitau se tasi pe lua e ono fetaiai ma tagata aoga i la outou eria. Mo se faataitaiga, afai e taatele na faamatalaga i la outou eria, e mafai ona e filifili le “O tagata o le Ekalesia ‘Mamona’ e le o ni Kerisiano,” po o le “E le mafai ona moni le Tusi a Mamona aua o le Tusi Paia ua na o le pau lea o le tusi o tusitusiga paia o le a i ai pea.” E mafai ona e tuuina tagata aoga i ni vaega toalaiti i potu eseese e faatino ai le tali atu ma le faamaoni i nei luitau.

Iloilo Lou Aoaoina 3

Faamoemoega o le lesona: O lenei lesona ua faamoemoe e fesoasoani i tagata aoga ia iloa pe na faapefea ona latou tuputupu ae pe suia i le taimi o a latou suesuega o le 2 Nifae 26–Iakopo 7.

Sauniuniga a le tagata aoga: Mafaufau e valaaulia tagata aoga e tomanatu pe na faapefea ona latou tuputupu ae faaleagaga e ala i lo latou suesueina o le Tusi a Mamona i vaiaso e fa ua tuanai. E mafai ona e valaaulia i latou e faailoa mai aoaoga patino sa latou faaaogaina po o fuaiupu sa faapitoa ona anoa ia i latou.
Fautuaga faafaiaoga i konafesi faavitio: E mafai e tagata aoga ona filifili e fai gaoioiga A po o gaoioiga E. Tuu i latou o e filifili le gaoioiga A i se tasi potu ma i latou o e filifili le gaoioiga E i se isi potu. A uma ona galulue faatasi vaega taitasi i a latou gaoioiga, e mafai ona latou filifili se sui e faasoa mai a latou faamalamalamaga i le vasega atoa.

Atamai i Aoaoga Faavae Iloiloga 5

Faamoemoega o le lesona: O lenei lesona e mafai ona fesoasoani i tagata aoga e tauloto mau faasino ma fasifuaitau autu o mau mo fuaitau o le atamai i aoaoga faavae i le Tusi a Mamona.

Sauniuniga a le tagata aoga: Valaaulia tagata aoga e o mai saunia e faasoa mai ni auala latou te manatua ai Iesu Keriso i aso taitasi.
Anotusi e faaali atu: O le siata o fuaitau o le atamai i aoaoga faavae ma o latou fasifuaitau autu o mau
Anomea: Pepa ma seleulu mo tagata aoga e faaaoga e saunia ai a latou fasipepa o upu
Fautuaga faafaiaoga i konafesi faavitio: O le gaoioiga tauloto i lenei lesona atonu e faigata i se vasega o se konafesi faavitio. Mafaufau e valaaulia tagata aoga e fai se gaoioiga talitutusa i luga o le polokalama o le Atamai i Aoaoga Faavae.