“Iakopo 5:54–77; 6:1–13: ‘Amuia Lava i Latou o e sa Galulue ma le Filiga i Lona Togaolive,’” Tusi Lesona a le Faiaoga o le Tusi a Mamona (2024)
“Iakopo 5:54–77; 6:1–13,” Tusi Lesona a le Faiaoga o le Tusi a Mamona
Iakopo 5:54–77; 6:1–13
“Amuia Lava i Latou o e sa Galulue ma le Filiga i Lona Togaolive”
E faapefea ona fesootai le talafaatusa o laau olive o loo tusia i le Iakopo 5 ia te oe? O le vaega mulimuli o lenei talafaatusa e faatusa i le galuega a le Alii i aso e gata ai, e aofia ai taumafaiga e faia e Ia ma Ana auauna e faapotopoto ai agaga ia te Ia mo se taimi mulimuli. O lenei lesona ua faamoemoe e fesoasoani ia te oe e lagona ai se naunautaiga sili atu e galulue faatasi ma le Alii e fesoasoani i fanau a le Tama Faalelagi ia o mai ia te Ia.
Fesoasoani i tagata aoga taitasi ia saofagā i le aafiaga faaleaoaoga. E manaomia tagata aoga taitasi ma e iai sona sao e fai. O nisi tagata aoga atonu e sili atu ona naunau e auai nai lo isi tagata aoga. Fai ni taumafaiga e fesoasoani ai i tagata aoga taitasi e saofagā i ni auala e anoa ma toafimalie ai mo i latou.
Sauniuniga a le tagata aoga: Mafaufau e valaaulia tagata aoga e fai le gaoioiga suesue i lalo o le ulutala “Iakopo 5:61–75: Ua valaaulia au e le Alii e galulue faatasi ma Ia i Lona tovine” i le otootoga o suesuega “Aperila 8–14. Iakopo 5–7: ‘Ua Galue Faatasi le Alii ma i Tatou’” i le Sau, Mulimuli Mai ia te Au—Mo Tagata Taitoatasi ma Aiga: Tusi a Mamona 2024.
Gaoioiga e Ono Mafai Ona Aoao Ai
O se galuega tele
Faasoa le tulaga faataitai lenei i le vasega:
Sa talosagaina talu ai nei Annika e lona epikopo e mafaufau ma le agaga tatalo i ni auala e mafai ona ia aapa atu ai ma fesoasoani i se tasi o tamaitai talavou i lana uarota e lei toe auai i le lotu. Ua lagona e Annika sina popole ma tau mafaufau, “Aisea ua fai mai ai le epikopo ia te au e fai lenei mea? Atonu o le a sili atu lona mataalia i le fesoasoani atu ia te ia nai lo au.”
-
O a nisi o mafuaaga atonu na valaaulia ai e le epikopo ia Annika e aapa atu i le tamaitai talavou nai lo le aapa atu i ai o ia lava?
A o lei faasoaina atu le faatomuaga lenei, atonu e fesoasoani le valaaulia o ni nai volenitia e aotele mai mea latou te manatua e uiga i vaega o le talafaatusa i le Iakopo 5 sa latou suesueina i le lesona talu ai.
O le asō, o le a e suesue ai i le vaega mulimuli o le talafaatusa o laau olive o loo tusia i le Iakopo 5. O lenei vaega o le talafaatusa e faatatau i aso e gata ai. O se upumoni e tasi e mafai ona tatou aoao mai lenei vaega o le talafaatusa e faapea, ua valaaulia e le Alii Ana auauna o aso e gata ai e galulue i Lona tovine e ala i le auai i le faapotopotoina o Isaraelu.
Ae e te lei amata suesue, mafaufau i ou lagona e uiga i le valaauliaina e le Alii e fesoasoani e faapotopoto tagata ia te Ia. Ua e mafaufau ea pe aisea ua Ia valaaulia ai oe e fesoasoani ia te Ia i Lana galuega o le laveaiina o agaga? A o e suesue, vaavaai mo aoaoga e mafai ona fesoasoani e te malamalama atili ai i faamoemoega o le Alii mo le valaauliaina o i tatou e auai faatasi ma Ia i le faapotopotoina o Isaraelu.
Ua valaaulia e le matai o le togaolive ia auauna e galulue faatasi ma ia
O le vaega mulimuli o le talafaatusa e amata i se talanoaga e faia i le va o le matai o le togaolive, o le ua faatusa ia Iesu Keriso, ma lana auauna, o le ua faatusa i le perofeta a le Alii.
Faitau le Iakopo 5:61–62, 70, ma vaavaai mo mea na faatonuina e le matai o le togaolive lana auauna e fai, ma pe aisea na ia fai atu ai ia te ia e fai.
-
O ai i nei fuaiupu e mafai ona faatusa ia te oe ma isi tagata o le Ekalesia?
Sa talanoaina e Peresitene Russell M. Nelson le galuega e faatino e le Alii ma Ana auauna i aso e gata ai:
Faigalotu i le Lalolagi Atoa mo le Autalavou 2018
O le a saunoa Peresitene Russell M. Nelson ma Sister Wendy Nelson i le Faigalotu i le Lalolagi Atoa mo le Autalavou i le aso 3 Iuni, 2018
Na tau atu e le Alii i le Perofeta o Iosefa Samita e faapea o le taimi nei, o lona uiga o o tatou taimi, o le itula lona sefulu ma le tasi lea ma o le toe taimi o le a valaauina ai e le Alii le aufaigaluega i Lona tovine mo le faamoemoega faanatinati o le faapotopotoina o le au filifilia mai itu e fa o le lalolagi [tagai i le Mataupu Faavae ma Feagaiga 33:3, 6]. …
Tou te mananao e fesoasoani e faapotopoto Isaraelu i nei aso tāua e gata ai? …
… Mafaufau i ai! Mai i tagata uma ua ola ai i le paneta o le lalolagi, o i tatou o tagata ua mafai ona auai i lenei faapotopotoina faaiu, maoae. Se mea ina a ofoofogia!
Sa faapolopolo e lo tatou Tama Faalelagi Ana agaga aupito sili ona tamalii—atonu e mafai ona ou fai atu, o Lana ‘au aupito lelei—mo le toe laasaga lenei. O na agaga tamalii—na tagata taaalo silisili ona lelei, na toamanumanu—o outou! (Russell M. Nelson ma Wendy Nelson, “Faamoemoe o Isaraelu” [faigalotu a le autalavou i le lalolagi atoa, 3 Iuni, 2018], faaopoopoga i le New Era ma le Ensign, 8, ChurchofJesusChrist.org)
-
O le a se mea na fesoasoani le saunoaga a Peresitene Nelson ia te oe e aoao pe lagonaina e uiga i le Atua?
-
O le a se mea na aoaoina ai oe e uiga ia te oe lava ma le matafaioi e tatau ona e faia i le faapotopotoina o Isaraelu?
-
O le a sou manatu o a nisi o mafuaaga ua valaaulia ai i tatou e le Alii e fesoasoani e faapotopoto tagata ia te Ia?
O lau vaega o le tovine a le Alii
Mafaufau e faamaeaina e oe lava ia le gaoioiga lenei a o lei amataina le vasega ma faaali atu i tagata aoga lau ata o se faataitaiga.
I lau api talaaga mo suesuega po o se isi fasipepa, tusi se ata o se tovine po o se fanua e faatusa i le tovine a le Alii. Ona tusi lea o se ata poo sina faamatalaga e faatusa i ai mea nei:
-
O avanoa e te maua e galue ai i le tovine a le Alii ma fesoasoani e faapotopoto Isaraelu. O faataitaiga e mafai ona aofia ai ata po o upu e faatusa i tagata e mafai ona e fesoasoani ia faalatalata atili atu i le Faaola, o faatinoga e mafai ona e faia e faasoa atu ai le talalelei faafesagai pe i luga o le initoneti, po o taumafaiga e faamanuia ai tagata i le isi itu o le veli e ala i galuega o malumalu ma talafaasolopito o aiga.
-
O mea faalavefau e feagai ma oe i au taumafaiga e galue i le tovine o le Alii. O faataitaiga e mafai ona aofia ai ata po o upu e faatusa i faalavefau e pei o le fefe, le mautinoa po o le a le mea e fai, po o le lagonaina o le pisi tele i isi mea.
Suesue fuaiupu nei, ma vaavaai mo aoaoga e mafai ona fesoasoani ia te oe e faatoilalo ai faalavefau na e faailoaina mai. Mafaufau e faaopoopo ni ata po o upu i lau ata o le tovine e faatatau i mea ua e aoaoina.
-
Iakopo 6:2–8 (aoaoga na faasoa mai e Iakopo ina ua uma ona sii mai le talafaatusa)
-
O a ni mea na e aoaoina e uiga i le Alii mai nei fuaiupu?
-
O a upu po o fasifuaitau mai nei fuaiupu e mafai ona fesoasoani i se tasi o loo musu e auai i le faapotopotoina o Isaraelu?
Mafaufau e faasoa atu se faataitaiga patino o se vaega o le talanoaga mo le fesili e sosoo ai.
-
O a faamanuiaga ua e vaaia pe na oo i ai i le auai faatasi ma le Alii i le galulue e aumai agaga ia te Ia?
Faaalu sina taimi e mafaufau ai e uiga i isi au laasaga e sosoo ai mo le auai faatasi ma le Alii i le faapotopotoina o Isaraelu. Tusi se sini e faatatau i lenei mea i lau api talaaga mo suesuega pe fausia i luga o se sini ua uma ona e setiina mo oe lava ia. E mafai foi ona e faaaofia ai upu po o ata e faatusa i lau sini i lau atatusi o le tovine. Mafaufau e matamata le “Pese o le Autu a le Autalavou 2021: ‘O Se Galuega Tele’” (4:06), lea o loo maua i le ChurchofJesusChrist.org, a o e mafaufau loloto i mea e te manao ia avea ma au sini.
2021 Youth Theme Song: “A Great Work”
This is the lyric video of the 2021 Youth Theme, “A Great Work,” sung by Nik Day. The inspirational video details the work and the promises of the Lord in the latter days.
Mafaufau e valaaulia ni nai volenitia e faasoa mai a latou ata ua maea, faatasi ai ma a latou sini, i le vasega. Molimau atu i upumoni na talanoaina i le asō ma valaaulia tagata aoga e faatino ia sini ua latou fatuina mo i latou lava. O le a maua e tagata aoga se avanoa e toe iloilo ai lenei sini i se lesona o le Iloilo Lou Aoaoina i le lumanai.