Atamai i Aoaoga Faavae Iloiloga 5

Tauloto Mau Faasino ma Fasifuaitau Autu

O le manatuaina o fuaitau o tusitusiga paia ma mea o loo aoaoina mai ai e mafai ona faamanuiaina oe i le tele o auala. E mafai ona fesoasoani lenei lesona ia te oe e tauloto ai mau faasino ma fasifuaitau autu o mau mo fuaitau o le atamai i aoaoga faavae i le Tusi a Mamona.

Faaaogaina o gaoioiga o le iloiloina o le atamai i aoaoga faavae. O se tasi o faamoemoega o gaoioiga o le iloiloina o le atamai i aoaoga faavae o le fesoasoani lea i tagata aoga e tauloto ia fasifuaitau autu o mau. O le faia soo o nei gaoioiga e mafai ona fesoasoani i tagata aoga e tauloto ia fasifuaitau taitasi. Atonu e te manao e uunaia au tagata aoga e faaauau pea le suesueina o fuaitau o le atamai i aoaoga faavae i fafo atu o le vasega.

Sauniuniga a le tagata aoga: Valaaulia tagata aoga e o mai saunia e faasoa mai ni auala latou te manatua ai Iesu Keriso i aso taitasi.

Gaoioiga e Ono Mafai Ona Aoao Ai

Atonu e manaomia ona aoao atu se lesona o fuaitau o le atamai i aoaoga faavae e suitulaga i lenei lesona toe faamanatu. Tagai i le faasologa faatulagaina o lesona ua saunia e le faatonu o le eria po o le itulagi po o le taitai faamaopoopo ina ia mautinoa o lesona taitasi o fuaitau o le atamai i aoaoga faavae o le a aoaoina a o faia vasega seminare.

Manatuaina

Mafaufau e valaaulia tagata aoga e talanoaina i paga po o ni vaega toalaiti le fesili lenei a o lei faasoaina atu le saunoaga mai ia Elder Gong.

• O le a se mea e te lagona e faapea o le a e manatua pea? Aisea?

Na aoao mai Elder Gerrit W. Gong o le Korama a Aposetolo e Toasefululua e faapea “ua valaaulia i tatou e lo tatou Faaola ia manatua pea o Ia e pei ona Ia manatua pea i tatou” (“Ia Manatua Pea o Ia,” Ensign po o le Liahona, Me 2016, 110).

I le taimi o lenei vaega o le lesona, valaaulia tagata aoga e faasoa mai ni malamalamaaga mai a latou gaoioiga sauniuni a le tagata aoga.

• Aisea e te manatu ai e finagalo le Tama Faalelagi ia tatou manatua pea Lona Alo?

• O a nisi o auala na mafai ai ona e manatua Iesu Keriso i aso taitasi?

• Na faapefea ona avea le manatuaina o le Faaola ma mea uma ua Ia faia o se faamanuiaga i lou olaga?

O se tasi o auala taua e mafai ona e manatua ai Iesu Keriso o le taulotoina lea o Ana aoaoga i tusitusiga paia. I lenei lesona, o le a e maua ai se avanoa e tauloto ai nisi o mau faasino o le atamai i aoaoga faavae ma fasifuaitau autu o mau o loo i ai i le siata lenei. A o e taulotoina, mafaufau loloto pe mafai faapefea e le manatuaina o nei mau ma fasifuaitau autu ona fesoasoani e te manatua atili ai Iesu Keriso i aso taitasi.

Mafaufau e faailoga nei fuaitau faatasi ai ma o latou fasifuaitau autu pe afai e te lei faia muamua.

Faafefiloi ma faafetaui

Faaali atu le siata lenei a o tusi e tagata aoga mau faasino ma fasifuaitau autu i luga o a latou pepa e tusa ai ma le laasaga numera 1 i faatonuga o loo i lalo.

Mau Faasino	Fasifuaitau Autu o Mau
Mau Faasino 1 Nifae 3:7	Fasifuaitau Autu o Mau “O le a ou alu ma fai mea ua poloaiina e le Alii.”
Mau Faasino 2 Nifae 2:25	Fasifuaitau Autu o Mau “Na pa’ū Atamu ina ia i ai tagata; ma ua i ai tagata, ina ia latou maua le olioli.”
Mau Faasino 2 Nifae 2:27	Fasifuaitau Autu o Mau “Ua latou saoloto e filifili le saolotoga ma le ola e faavavau … pe … [o] le faatagataotauaina ma le oti.”
Mau Faasino 2 Nifae 26:33	Fasifuaitau Autu o Mau “Ua tutusa tagata uma i le Atua.”
Mau Faasino 2 Nifae 28:30	Fasifuaitau Autu o Mau O le Atua e “tuu atu i le fanauga a tagata lea fuaitau i luga o lea fuaitau, ma lea mataupu i luga o lea mataupu.”
Mau Faasino 2 Nifae 32:3	Fasifuaitau Autu o Mau “Ia taumamafa fiafia i afioga a Keriso; aua faauta, o afioga a Keriso o le a ta’u mai ai ia te outou mea uma e tatau ona outou faia.”
Mau Faasino 2 Nifae 32:8–9	Fasifuaitau Autu o Mau “E ao ina outou tatalo e le aunoa.”
Mau Faasino Mosaea 2:17	Fasifuaitau Autu o Mau “Pe a outou auauna atu i o outou uso a tagata, ua nao lo outou auauna atu lava lea i lo outou Atua.”
Mau Faasino Mosaea 2:41	Fasifuaitau Autu o Mau “O i latou o e e tausi i poloaiga a le Atua … e faamanuiaina i latou i mea uma.”
Mau Faasino Mosaea 3:19	Fasifuaitau Autu o Mau “[Tuu] ese le tagata natura ma [avea] ma tagata paia e ala i le togiola a Keriso le Alii.”
Mau Faasino Mosaea 4:9	Fasifuaitau Autu o Mau “Ia talitonu i le Atua; … ia talitonu ua ia te ia le poto uma.”
Mau Faasino Mosaea 18:8–10	Fasifuaitau Autu o Mau Ia “papatisoina i le suafa o le Alii, o se molimau … ua outou ulu atu i se feagaiga faatasi ma ia.”

Mafaufau i le taimi o loo avanoa i le vasega e fuafua ai pe fia mau faasino i aoaoga faavae ma fasifuaitau autu o mau e valaaulia ai tagata aoga e tauloto i lenei lesona. O loo i lalo se tasi o auala e tauloto ai. Faaaoga isi metotia e tauloto ai pe a manaomia. Afai e le faia faatasi lenei gaoioiga o se vasega, faaali pe tuu atu i tagata aoga ia faatonuga nei.

Faailoa mai ni fuaitau se fa e te lagona o le a sili ona fesoasoani e te manatua ai Iesu Keriso i le taimi nei i lou olaga, ma mafaufau pe aisea e te lagona ai faapena. Ona fai lea o le gaoioiga lenei. E mafai ona e faia se gaoioiga talitutusa e faaaoga ai le polokalama feaveai o le Atamai i Aoaoga Faavae.

1. Oti se pepa i ni fasipepa se fa e tutusa le tetelē. Mo fuaitau taitasi o le atamai i aoaoga faavae na e filifilia, ia fai mea nei:

   1. Tusi le mau faasino se tasi ma ona fasifuaitau autu o loo aumai faatasi ai i luga o se fasi pepa.

   2. Oti ese le fasifuaitau autu, vavae mai le mau, e pei ona i ai i le faataitaiga o loo i lalo (otiotiina i le faatusa o le “/”):

      2 Nifae 26:33 / “Ua tutusa tagata uma i le Atua.”

   Taofi le faaali atu o le siata o mau faasino o le atamai i aoaoga faavae ma fasifuaitau autu a o lei mulimuli tagata aoga i faatonuga o loo totoe.

2. A ua i ai loa sau seti o mau faasino e fa ma fasifuaitau autu o mau, tuu pepa i se faaputuga ma faafefiloi faatasi.

3. Taumafai e faafetaui mau faasino taitasi i lona fasifuaitau autu o mau e aunoa ma le tilotilo i soo se mea e fesoasoani ia te oe. Mafaufau e fai faalua pe faatolu. E mafai ona e faitauina le taimi mo oe lava ma taumafai e faaleleia lou saoasaoa i taimi taitasi.

4. Faateleina le faigata e ala i le otiotiina ese o fasifuaitau e pei ona i ai i faataitaiga o loo i lalo:

   2 Nifae 28:30 / O le Atua e “tuu atu i le fanauga a tagata / lea fuaitau i luga o lea fuaitau, / ma lea mataupu i luga o lea mataupu.”

   2 Nifae 32:3 / “Ia taumamafa fiafia i / afioga a Keriso; / aua faauta, / o afioga a Keriso / o le a ta’u mai ai ia te outou / mea uma / e tatau ona outou faia.”

5. Faafefiloi fasipepa ma taumafai e faatulaga sao. E mafai ona e filifili e faafefiloi faatasi mau faasino uma ma fasifuaitau i le taimi e tasi, pe e mafai ona e galue i le fuaitau e tasi i le taimi. Mafaufau e fai faalua pe faatolu. E mafai ona e faitauina le taimi mo oe lava ma taumafai e faaleleia lou saoasaoa i taimi taitasi.

6. Afai e lava sou taimi, filifili nisi fuaitau o le atamai i aoaoga faavae ma toe fai le faagasologa.

A uma ua lava se taimi, valaaulia tagata aoga e tali i fesili nei ia latou api talaaga mo suesuega ae latou te lei faasoa maia a latou tali i ni paga, i ni vaega toalaiti, po o le vasega.

• O a mau faasino o le atamai i aoaoga faavae ma fasifuaitau autu o mau na e taulotoina?

• O le fea fuaitau e te lagona e sili ona aoga ia te oe i le taimi nei o lou olaga? Aisea ua faapena ai ou lagona?

• O a ni auala e mafai ai e fuaitau na e taulai atu i ai i le asō ona fesoasoani ia te oe e manatua ai Iesu Keriso?