Enosa–Upu a Mamona

Vaaiga Aoao

O tusi mai le Enosa i Upu a Mamona e aofia ai le faitau selau o tausaga ma o loo faailoa atu ai i tatou i le tele o perofeta eseese ma alii musuia. O Enosa, le atalii o Iakopo ma o le atalii o le atalii o Liae, sa tatalo atu i le Atua “i le tatalo malosi” mo ana agasala (Enosa 1:4). O tusi a Iaroma ma Ominae o loo i ai aoaoga eseese e mafai ona faamanuiaina ai o tatou olaga. Sa taialaina Mamona e le Agaga o le Alii e faaaofia ai papatusi laiti “mo se faamoemoega poto,” e tusa ai ma le finagalo o le Alii (tagai Upu a Mamona 1:3–7). Ma sa aoao atu e le Tupu o Peniamina ona atalii i le matafaioi taua a tusitusiga paia i lo latou faatuatua.

Saunia e Aoao Atu

O nei faamatalaga e tuuina atu ai i faiaoga ni manatu o mea atonu e manaomia ona muai saunia mo lesona taitasi.

Enosa

Faamoemoega mo le lesona: O lenei lesona ua faamoemoe e fesoasoani i tagata aoga e faatino lo latou faatuatua ia Iesu Keriso ma salamo ina ia maua le faamagaloga.

• Sauniuniga a le tagata aoga: Valaaulia tagata aoga e faitau le Enosa 1:1–8 a o lei amataina le vasega, ma manatunatu i lagona o Enosa ma mea sa ia aoaoina e uiga i le Alii ma le faamagaloina o ana agasala. Mafaufau e fai atu i tagata aoga e mafaufau loloto pe na faapefea ona suia e lenei aafiaga le olaga o Enosa.

• Fautuaga faafaiaoga i konafesi faavitio: A uma ona valaaulia tagata aoga e mafaufau loloto i fasifuaitau taua mai le Enosa 1:1–8, mafaufau e faataga i latou e faasoa mai nei mea e faaaoga ai le vaega o le laupapa paepae. E mafai e tagata aoga ona filifili se tasi o nei fasifuaitau latou te mananao ia malamalama atili i ai ma faaopoopo i ai faamatalaga mai a latou suesuega i tafatafa o le fasifuaitau. Ona mafai lea ona talosagaina i latou e faamalamalama mai a latou faamatalaga.

Iaroma–Ominae

Faamoemoega o le lesona: O lenei lesona ua faamoemoe e fesoasoani i tagata aoga e faataitai ai le faailoaina ma le faaaogaina o mataupu faavae mai tusitusiga paia ia e mafai ona faamanuiaina ma taialaina ai o latou olaga.

• Sauniuniga a le tagata aoga: A o faia e tagata aoga a latou suesuega o tusitusiga paia i aso taitasi, valaaulia i latou e faataitai le faailoaina o mataupu faavae e mafai ona fesoasoani ia i latou i o latou olaga. Uunaia i latou e o mai saunia e faasoa mai ia le itiiti ifo ma le tasi se mataupu faavae na latou mauaina.

• Ata: O se ata o se vaa o i ai se foeuli, a le o le faaali atu po o le tusia i luga o le laupapa

• Vitio: “Ma lou Loto Atoa” (3:26)

• Fautuaga faafaiaoga i konafesi faavitio: Mafaufau e amata le vasega i le fesili lenei: “Vaai faalemafaufau i lau malaga i le olaga e pei o se vaa o loo folau i le vasa. O a nisi o mea e mafai ona e faatusatusa i le foeuli po o le uili lea e taiala ai le vaa i le faigamalaga?” Valaaulia tagata aoga e tali le fesili e faaaoga ai le vaega o talanoaga. Faitau leotele nisi o a latou tali a o lei faaaliina atu le saunoaga mai ia Elder David A. Bednar.

O Upu a Mamona

Faamoemoega o le lesona: O lenei lesona e mafai ona fesoasoani i tagata aoga ia lagona le faamautinoaga e silafia e le Alii mea uma ma o le a faataunuuina Lana galuega.

• Sauniuniga a le tagata aoga: E mafai e tagata aoga ona fesili i se matua po o se taitai o le Ekalesia pe na faapefea ona taialaina pe faamanuiaina i latou e ala i le tali atu i se musumusuga po o se uunaiga faaleagaga. 

• Vitiō: “O Le Galuega a le Atua” (13:35; matamata mai le faailotaimi 6:52 e oo i le 11:30)

• Fautuaga faafaiaoga i konafesi faavitio: A faitau e tagata aoga le 1 Nifae 9:5–6 ma Upu a Mamona 1:7–8, mafaufau e vaevae le vasega i ni potu e talanoaina ai fesili ma faailoa mai mataupu faavae latou te maua. E faalagolago i le toatele o vaega taitasi, e mafai e se tagata aoga se toatasi mai vaega taitasi ona faasoa mai i le vasega mea na talanoaina e la latou vaega mo le 1 Nifae 9:5–6, ma se isi tagata aoga mai vaega taitasi e faasoa mai mea na talanoaina e le latou vaega mo Upu a Mamona 1:7–8.

Upu a Mamona 1:12–18; Mosaea 1

Faamoemoega o le lesona: O lenei lesona e mafai ona fesoasoani i tagata aoga e faateleina ai lo latou naunautaiga e suesue i tusitusiga paia.

• Sauniuniga a le tagata aoga: Valaaulia tagata aoga e fai a latou suesuega faaletagata lava ia o tusitusiga paia ma mafaufau loloto pe faapefea ona aafia ai i latou, aemaise lava o latou lagona ma le faalagolago ia Iesu Keriso.

• Vitio: “Talatuu o Tusitusiga Paia” (22:29; matamata mai le faailotaimi 0:00 i le 5:36 ma mai le 5:40 i le 6:20); “O Faamanuiaga o Tusitusiga Paia” (3:03); “O Se Valaaulia e Suesue i le Tusi a Mamona” (16:21; matamata mai le faailotaimi 6:17 i le 9:00); “O Le Uiga o Tusitusiga Paia ia te Au” (5:03)

• Fautuaga faafaiaoga i konafesi faavitio: I le tulalata ai i le faaiuga o le lesona, pe a mafai e tagata aoga ona filifili ni nai gaoioiga e fai e uiga i le suesueina o tusitusiga, mafaufau e fai faatasi o se vasega le gaoioiga faavitio. Ia sii mai se tasi o vitio ma valaaulia tagata aoga e matamata i ai ma vaavaai mo faataitaiga o auala e mafai ai e le suesue i tusitusiga paia ona faamanuiaina o tatou olaga ma faateleina lo tatou faatuatua i le Tama Faalelagi ma Iesu Keriso. Valaaulia i latou e faasoa mai o latou manatu a o lei filifilia ni gaoioiga se lua mai gaoioiga o loo totoe.

Atamai i Aoaoga Faavae Iloiloga 6

Faamoemoega o le lesona: O lenei lesona o le a fesoasoani i tagata aoga e faalautele ai lo latou malamalama ma faamatala atu upumoni e uiga i se tasi pe sili atu o fuaitau o le atamai i aoaoga faavae mai le Tusi a Mamona.

• Sauniuniga a le tagata aoga: Valaaulia tagata aoga e iloilo fuaitau mai le siata i lenei lesona ma filifili se tasi latou te mananao ia malamalama atili i ai. Fai atu ia i latou e faitau le fuaitau na latou filifilia ma taumafai ia malamalama atili i ai. E mafai ona aofia ai le sailia mo isi mau lagolago, tusia o o latou manatu e uiga i ai i a latou api talaaga, po o le fesili i se isi tagata po o le a se mea ua latou malamalama i ai mai le fuaiupu. Valaaulia i latou e o mai saunia e faasoa mai mea na latou faia ma mea sa latou aoaoina.

• Ata: Ata o taaloga eseese po o mea e tutupu e faatatau i taaloga

• Fautuaga faafaiaoga i konafesi faavitio: Mafaufau e tuu tagata aoga i ni potu malolo ma valaaulia vaega taitasi e galulue faatasi e fatu a latou lava gaoioiga o le “Fasifuaitau ma lea Fasifuaitau”. A uma ua lava se taimi, tuu atu ia i latou e toe o mai faatasi e faasoa mai a latou gaoioiga i le vasega.