Atamai i Aoaoga Faavae Iloiloga 6

Malamalama ma Faamatala

O se tasi o faamoemoega o le atamai i aoaoga faavae o le fesoasoani lea ia te oe ia malamalama i aoaoga a le Tama Faalelagi ma Iesu Keriso o loo i ai i fuaitau o le atamai i aoaoga faavae ma mafai ona faamatala i au lava upu. O lenei lesona e mafai ona fesoasoani e faalolotoina ai lou malamalama ma faamatala ai upumoni mai se tasi pe sili atu o fuaitau o le atamai i aoaoga faavae mai le Tusi a Mamona.

Faaalia o le alofa ma faamoemoega maualuluga. Pe a alolofa moni faiaoga i a latou tagata aoga, o le a latou popole tele i lo latou alualu i luma ma le manuia e faamalieina ai i sina taumafaiga itiiti a le tagata aoga. Ia fautuaina ma le alofa au tagata aoga ia ausia o latou gafatia o ni tagata aoao ma ni soo o Iesu Keriso.

Sauniuniga a le tagata aoga: Valaaulia tagata aoga e iloilo fuaitau mai le siata i lenei lesona ma filifili se tasi latou te mananao ia malamalama atili i ai. Fai atu ia i latou e faitau le fuaitau na latou filifilia ma taumafai ia malamalama atili i ai. Atonu e aofia ai le sailia o isi mau lagolago, ma tusi o latou manatu e uiga i ai i a latou api talaaga, pe fesili atu i se isi po o le a se mea ua latou malamalama i ai mai le fuaitau. Valaaulia i latou e o mai saunia e faasoa mai mea na latou faia ma mea sa latou aoaoina.

Gaoioiga e Ono Mafai Ona Aoao Ai

Atonu e manaomia lou aoaoina atu o se lesona o le fuaitau o le atamai i aoaoga faavae e sui ai lenei lesona. Tagai i le faasologa faatulagaina ua saunia e le faatonu po o le taitai faamaopoopo o la outou eria po o le itulagi ina ia mautinoa o lesona taitasi o fuaitau o le atamai i aoaoga faavae o le a aoaoina a o faia vasega seminare.

Metotia

Faaali atu ata nei po o nisi e pei o i latou. Tuu tagata aoga i ni paga po o ni vaega toalaiti ma valaaulia i latou e talanoaina a latou taaloga e fiafia i ai ma pe aisea latou te fiafia i ai. Ona mafai lea ona latou talanoaina fesili nei i le tasi ma le isi.

• O a ni metotia e fesoasoani e manumalo ai i au taaloga e sili ona e fiafia i ai? Aisea?

• Aisea e taua ai le i ai o se metotia po o se fuafuaga i se taaloga?

Ina ia vaai i se faataitaiga o ni alii talavou se toalua o faaaogaina metotia ina ia manuia ai i a latou taaloga ma i la latou sootaga ma le Tama Faalelagi ma Iesu Keriso, matamata i le “Tumau i le Malosi Faaleagaga” (3:31), o loo maua i le ChurchofJesusChrist.org.

• E faaopoopo atu i le faitauina o tusitusiga paia, e mafai faapefea ona fesoasoani ia te oe le i ai o ni metotia e malamalama atili ai i afioga a le Atua i tusitusiga paia?

• O a ni metotia ua e faaaogaina ua fesoasoani e te malamalama ai i tusitusiga paia?

E tele metotia e fesoasoani ia te oe e malamalama loloto atili ai i tusitusiga paia. I lenei lesona o le a e maua ai se avanoa e faataitai ai se metotia ina ia malamalama atili ai i se tasi pe sili atu foi o fuaitau o le atamai i aoaoga faavae o le Tusi a Mamona.

O le lisi lenei o fuaitau o aoaoga faavae mai le afa muamua o le Tusi a Mamona. Filifili se tasi pe sili atu lea e te manao e malamalama atili i ai.

Faaali atu le siata lenei ina ia mafai ona faasino i ai tagata aoga i le taualumaga o le lesona. Valaaulia tagata aoga naunautai e faasoa mai mea na latou aoaoina a o latou faia le gaoioiga e saunia ai mo le vasega.

Fuaitau ma Fasifuaitau Autu Muamua e 12 o le Atamai i Aoaoga Faavae

Tusi Lesona a le Faiaoga o le Tusi a Mamona (2024)

Mau Faasino	Fasifuaitau Autu o Mau
Mau Faasino 1 Nifae 3:7	Fasifuaitau Autu o Mau “O le a ou alu ma fai mea ua poloaiina e le Alii.”
Mau Faasino 2 Nifae 2:25	Fasifuaitau Autu o Mau “Na pa’ū Atamu ina ia i ai tagata; ma ua i ai tagata, ina ia latou maua le olioli.”
Mau Faasino 2 Nifae 2:27	Fasifuaitau Autu o Mau “Ua latou saoloto e filifili le saolotoga ma le ola e faavavau … pe … [o] le faatagataotauaina ma le oti.”
Mau Faasino 2 Nifae 26:33	Fasifuaitau Autu o Mau “Ua tutusa tagata uma i le Atua.”
Mau Faasino 2 Nifae 28:30	Fasifuaitau Autu o Mau O le Atua e “tuu atu i le fanauga a tagata lea fuaitau i luga o lea fuaitau, ma lea mataupu i luga o lea mataupu.”
Mau Faasino 2 Nifae 32:3	Fasifuaitau Autu o Mau “Ia taumamafa fiafia i afioga a Keriso; aua faauta, o afioga a Keriso o le a taʼu mai ai ia te outou mea uma e tatau ona outou faia.”
Mau Faasino 2 Nifae 32:8–9	Fasifuaitau Autu o Mau “E ao ina outou tatalo e le aunoa.”
Mau Faasino Mosaea 2:17	Fasifuaitau Autu o Mau “Pe a outou auauna atu i o outou uso a tagata, ua nao lo outou auauna atu lava lea i lo outou Atua.”
Mau Faasino Mosaea 2:41	Fasifuaitau Autu o Mau “O i latou o e e tausi i poloaiga a le Atua … e faamanuiaina i latou i mea uma.”
Mau Faasino Mosaea 3:19	Fasifuaitau Autu o Mau “[Tuu] ese le tagata natura ma [avea] ma tagata paia e ala i le togiola a Keriso le Alii.”
Mau Faasino Mosaea 4:9	Fasifuaitau Autu o Mau “Ia talitonu i le Atua; … ia talitonu ua ia te ia le poto uma.”
Mau Faasino Mosaea 18:8–10	Fasifuaitau Autu o Mau Ia “papatisoina i le suafa o le Alii, o se molimau … ua outou ulu atu i se feagaiga faatasi ma ia.”

© 2023 by Intellectual Reserve, Inc. Ua taofia aiā tatau uma.

Faaloloto lou malamalama

Faitau le fuaitau po o fuaitau na e filifilia.

• O a ni mea mai nei fuaitau e te manao e malamalama atili i ai? O a ni metotia e mafai ona e faaaogaina e faia ai?

Faaaoga le metotia lenei, po o se isi e te iloa, e faaloloto ai lou malamalama i le fuaitau po o fuaitau na e filifilia. O le a e maua se avanoa e faamalamalama atu ai mea na e aoaoina i se taimi mulimuli ane o le lesona.

Afai ua i ai i tagata aoga se metotia latou te mananao e faaaoga mo lenei gaoioiga, valaaulia i latou e faaaoga. A leai, tuu atu ia i latou faatonuga nei o se tasi o metotia e mafai ona latou faaaogaina e malamalama atili ai i fuaitau na latou filifilia.

O le mekasini o le Mo Le Malosi o le Talavou e masani ona aofia ai se goigoiga mo le suesueina o tusitusiga paia e ta’ua o le “Lea Fuaitau i luga o lea Fuaitau,” lea e faamatalaina pe faauigaina ai ni nai upu autu po o fasifuaitau mai se fuaitau o mau. Ina ia vaai i se faataitaiga o se gaoioiga o le “Lea Fuaitau i luga o lea Fuaitau”, tagai “Aua le Fefefe,” Mo le Malosi o le Autalavou, Fep. 2021, 32 po o le “Faataatia le Faavae,” Mo le Malosi o le Autalavou, Ian. 2021, 19.

Fatu sau oe lava “Lea Fuaitau i luga o lea Fuaitau” mo se tasi o fuaitau o le atamai i aoaoga faavae o loo lisi atu i luga. Afai e te fiafia i faatufugaga, mafaufau e faaopoopo ni atatusi po o ni atavali i lau itulau o le “Lea Fuaitau i luga o lea Fuaitau”. Faaaoga faatonuga nei e fesoasoani ia te oe e fatu ai lau itulau:

Fesoasoani ma faamalosiau i tagata aoga pe a manaomia po o le musuia ai e le Agaga Paia. Mafaufau e fai atu fesili e uiga i le galuega a le tagata aoga e fesoasoani ia te oe e malamalama atili i ai.

1. I le pito i luga o le itulau, tusi ai upu uma o le fuaitau o le mau na e filifilia.

2. Filifili ia le itiiti ifo ma le lima ni upu po o fasifuaitau mai lena fuaitau o mau ma lisi i lalo i le itu agavale o le itulau. Tuu ia lava se avanoa e tusi ai faamatalaga i tafatafa o upu po o fasifuaitau taitasi.

3. Saili ma lisi faauigaga, faamalamalamaga, faataitaiga, mau fesootai, po o faamatalaga mai taitai o le Ekalesia e mafai ona fesoasoani e faaloloto ai lou malamalama i nei upu autu po o fasifuaitau mai le fuaitau o mau. Lisi i tafatafa o le upu e faatatau i ai. E mafai ona e faaaogaina meafaigaluega e pei o le Taiala i Tusitusiga Paia, Taiala mo Autu, lauga o konafesi, po o mekasini a le Ekalesia.

4. I se vaega o lau pepa o faamatalaga, faaopoopo i ai se parakalafa e uiga i mea sa e aoaoina pe manao e manatua mai lenei fuaitau. Ia aofia ai mea o loo aoaoina ai oe e uiga i le Faaola, Lana Ekalesia, po o Lana misiona e laveai i tatou.

Afai e manao ai, toe fai le gaoioiga lenei ma se isi fuaitau o le atamai i aoaoga faavae mai le lisi.

Mafaufau e tuu tagata aoga i ni vaega taitoatolu pe taitoafa, ma ia tofu tagata taitasi ma fuaitau eseese ina ia mafai ai e tagata aoga uma ona aoao e uiga i ni fuaitau se tele. Valaaulia tagata aoga taitasi e faasoa atu lana itulau o le “Lea Fuaitau i luga o lea Fuaitau” i lana vaega ma faamatala mai mea na ia aoaoina e uiga i le fuaitau. E mafai foi ona e valaaulia tagata aoga e faasoa mai a latou itulau i le vasega. Mafaufau e valaaulia tagata aoga e tautau a latou itulau faataamilo i le potu, pe fai ni kopi pe pue ni ata o a latou itulau e faaali atu.