Mosaea 1–3

Vaaiga Aoao

O le Tupu o Peniamina o se taitai sa auauna atu i le Atua e ala i le auauna atu i lona nuu ma aoao i latou e auauna atu le tasi i le isi. Sa ia aoao mai e faapea, “pe a outou auauna atu i o outou uso-a-tagata, ua nao lo outou auauna atu lava lea i lo outou Atua” (Mosaea 2:17). Sa ia valaaulia lona nuu e saili le fiafia e ala i le ola amiotonu ma le tuuto atu i le Atua. Sa asia o ia e se agelu, ma sa ia faasoa atu i lona nuu le molimau a le agelu ia Iesu Keriso, o mea o le a oo i ai le Faaola, ma le upumoni e faapea o le faaolataga e na o le suafa lava o Keriso e oo mai ai.

Saunia e Aoao Atu

O nei faamatalaga e tuuina atu ai i faiaoga ni manatu o mea atonu e manaomia ona muai saunia mo lesona taitasi.

Mosaea 2:1–18

Faamoemoega o le lesona: O lenei lesona ua faamoemoe e fesoasoani ai i tagata aoga ia auauna atili atu i le Atua e ala i le auauna atili atu i isi.

Sauniuniga a le tagata aoga: Valaaulia tagata aoga e sue se auala itiiti e auauna atu ai i se isi tagata a o lei oo i le lesona e sosoo ai.
Anotusi e faaali atu: O le iloiloga a le tagata lava ia mai le amataga o le lesona o lo o i luga o le laupapa
Vitio: “Auauna Atu e ala i le Pese” (3:19); “O Oe o le Meaalofa” (0:54)
Fautuaga faafaiaoga faavitio: Mo le iloiloga faaletagata lava ia lea e faamatala ai e tagata aoga o latou lagona e uiga i avanoa e auauna atu ai, e mafai ona e faaali atu manatu ma fai atu i tagata aoga e faatulaga i latou lava i luga o se fasipepa.

Atamai i Aoaoga Faavae: Mosaea 2:17

Faamoemoega o le lesona: O lenei lesona o le a fesoasoani i tagata aoga e tauloto le fuaitau o le atamai i aoaoga faavae ma fasifuaitau autu o mau mo le Mosaea 2:17, faamatala le aoaoga faavae, ma faataitai le faaaogaina o mataupu faavae o le mauaina o le malamalama faaleagaga i tulaga faataitai moni o le olaga.

Sauniuniga a le tagata aoga: Valaaulia tagata aoga e o mai i le vasega ma mafaufau i se taimi na latou maua ai se aafiaga faigata o le auaunaga po o se avanoa e auauna atu ai ae sa lei manao ai.
Fautuaga faafaiaoga faavitio: Mo le vaega o le lesona lea e tusi ai e tagata aoga a latou lava tulaga faataitai, mafaufau e valaaulia i latou e faasoa mai o latou tulaga faataitai i le talanoaga. Afai o le a manuia tagata aoga mai le galulue faatasi ma se paga, faatulaga i latou i potu e talanoa ai.

Mosaea 2:19–41

Faamoemoega o le lesona: O lenei lesona e mafai ona fesoasoani i tagata aoga e saili mo “le tulaga manuia ma le fiafia o i latou o e e tausi i poloaiga a le Atua” (Mosaea 2:41).

Sauniuniga a le tagata aoga: E mafai ona valaaulia tagata aoga e faauma le faamatalaga lenei ma ia saunia e talanoaina a latou tali: “O le fiafia moni ma le tumau e maua e ala i le …”
Vitio: “Faitau Ou Manuia” (4:59)
Pepa e tufa atu:“O Le Tulaga Manuia ma Le Fiafia o i Latou o E e Tausia Poloaiga”
Fautuaga faafaiaoga faavitio: I le amataga o le lesona, e mafai e tagata aoga ona tuu i le vaega o talanoaga ia faamanuiaga eseese ua tuuina atu e le Atua ia i latou. E mafai ona fesoasoani lenei mea i tagata aoga e iloa ai faamanuiaga atonu latou te lei mafaufau muamua i ai.

Atamai i Aoaoga Faavae: Mosaea 2:41

Faamoemoega o le lesona O lenei lesona e mafai ona fesoasoani i tagata aoga e tauloto ai le mau faasino o le atamai i aoaoga faavae ma fasifuaitau autu o le mau mo le Mosaea 2:41, faamatala le aoaoga faavae o lo o aoao i lenei fuaitau, ma faaaoga mataupu faavae o le mauaina o le malamalama faaleagaga i tulaga masani o le olaga.

Sauniuniga a le tagata aoga: E mafai ona talosagaina tagata aoga e filifili se poloaiga latou te taumafai e usitaia, ona saunia lea e faasoa mai pe na faapefea ona faamanuiaina i latou e ala i le tausia o le poloaiga.
Anotusi e faaali atu: O le mau faasino ma le fasifuaitau autu o le mau o le Mosaea 2:41 i luga o le laupapa; o le vaaiga faataitai mai le vaega o le “Faataitai le faaaogaina”
Anomea mo tagata aoga: Pepa ma se mea e tusi ai (I se isi itu, e mafai e tagata aoga ona faamaea le gaoioiga i a latou api talaaga mo suesuega.)
Fautuaga faafaiaoga faavitio: Mo le tulaga faataitai i le vaega o le “Faataitai le faaaogaina”, mafaufau e faavasega tagata aoga i potu vaevae e tolu, e tasi mo mataupu faavae taitasi o le mauaina o le malamalama faaleagaga. O se sooupu mai vaega taitasi e mafai ona faamatalaina le vaega o le Pepa Autu o le Atamai i Aoaoga Faavae (2022) o le a latou faasoa atu i le tagata o lo o i le vaaiga faataitai.

Mosaea 3:1–17

Faamoemoega o le lesona: O lenei lesona e mafai ona fesoasoani i tagata aoga ia malamalama i le taua o le mea na faia e Iesu Keriso ina ia mafai ai ona faaolaina i latou.

Sauniuniga a le tagata aoga: E mafai ona e valaaulia tagata aoga e talanoaina ma se tagata o le aiga, uo, po o se taitai o le Ekalesia ni faamanuiaga e na o Iesu Keriso e mafai ai.
Vitio: “Ua Iloa e Leoleo Mamoe le Soifua Mai o Keriso” (2:50; matamata mai le faailotaimi 0:00 i le 1:47); “Na Puapuagatia Iesu Keriso mo i Tatou” (2:21)
Fautuaga faafaiaoga faavitio: A uma ona suesue ma mafaufau loloto tagata aoga i le Mosaea 3:5–10, mafaufau e valaaulia i latou e tuu i luga o le talanoaga ni fasifuaitau o mau e faafiafiaina ai i latou po o ni a latou fesili o i ai e uiga i fuaiupu. E mafai foi ona e valaaulia tagata aoga e toe iloilo manatu faaalia i le talanoaga ma filifili fuaitau po o fesili e talanoaina o se vasega.