Mosaea 3:1–17

Faaolataga e ala ia Iesu Keriso

I le talafaasolopito atoa, na asiasi mai ai agelu i le lalolagi e molimau ia Iesu Keriso ma folafola mai “tala fiafia o le olioli tele” (Mosaea 3:3; Alema 13:22; Helamana 16:14). Sa maua e le Tupu o Peniamina se asiasiga faapena. Sa ia faasoa atu i lona nuu le molimau a le agelu ia Iesu Keriso, o mea o le a oo i ai le Faaola, ma le upumoni e faapea o le faaolataga e na o le suafa lava o Keriso e oo mai ai. O lenei lesona e mafai ona fesoasoani e te malamalama ai i le taua o le mea na faia e Iesu Keriso ina ia mafai ai ona faaolaina oe.

Fesoasoani i tagata aoga e aoao e mafaufau loloto. “O le mafaufau loloto” o lona uiga o le manatunatu loloto pe mafaufau loloto i se mea, ma e masani ona aofia ai le tatalo. A o aoao tagata aoga e mafaufau loloto i le taimi o a latou suesuega faaletagata lava ia o tusitusiga paia, o le a faaali mai e le Agaga upumoni ia i latou ma fesoasoani ia latou iloa le ala e mafai ai ona latou avea atili e faapei o Iesu Keriso.

Sauniuniga a le tagata aoga: E mafai ona e valaaulia tagata aoga e talanoaina ma se tagata o le aiga, uo, po o se taitai o le Ekalesia ni faamanuiaga e na o Iesu Keriso e mafai ai.

Gaoioiga e Mafai Ona Aoao Ai

Tala fiafia o le olioli tele

Mafaufau e faaali atu se ata o agelu o loo faasilasilaina mai le soifua mai o le Faaola.

• E mafai ona e mafaufau i taimi na o mai ai agelu i le lalolagi e molimau ia Iesu Keriso?

O se tasi o faataitaiga o loo i le Luka 2:10–12. Faitau fuaiupu nei pe matamata le vitio “Ua Iloa e Leoleo Mamoe le Fanau mai o Keriso” mai le faailotaimi 0:00 i le 1:47, ma vaavaai mo mea na fetalai ai le agelu e faailoa mai le soifua mai o le Faaola. O loo maua lenei vitio i le ChurchofJesusChrist.org.

Sa faaali atu foi se agelu i le Tupu o Peniamina. Faitau le Mosaea 3:3–4, vaavaai mo mea e tutusa ai mea na ta’u atu e le agelu i leoleo mamoe ma le mea na ta’u atu e le agelu i le Tupu o Peniamina.

• O le a se mea ua e iloa e uiga ia Iesu Keriso lea o le a ta’ua o “tala fiafia o le olioli tele”?

I lana lauga i lona nuu o loo aofia i le Mosaea 3:1–17, sa faasoa atu ai e le Tupu o Peniamina nisi o savali a le agelu. O lenei savali na talanoaina ai le soifuaga ma le misiona a Iesu Keriso, le auala e mafai ai ona latou maua le olioli, ma le mea ua ofo mai e Iesu e le mafai e se tasi ona faia.

Na o le pau lea o le igoa e oo mai ai le faaolataga

Faitau le Mosaea 3:17, vaavaai mo mea ua ofoina mai e Iesu Keriso.

• O le a se upumoni e mafai ona e faailoaina mai le fuaiupu 17?

Atonu e faailoa mai e tagata aoga ni upumoni eseese—mo se faataitaiga, o le faaolataga e na o Iesu Keriso lava e oo mai ai. Faafetai atu i tagata aoga mo le faasoaina mai o upumoni na latou maua, ma mafaufau e tusi se upumoni se tasi pe sili atu i luga o le laupapa.

Faitau le saunoaga lenei mai ia Elder Neil L. Andersen o le Korama a Aposetolo e Toasefululua ma vaavaai mo mea ua laveaiina mai ai i tatou e Iesu Keriso:

O lo tatou Faaola ma le Alii, o Iesu Keriso, e ala i le meaalofa e lēmafaamatalaina o Lana Togiola, e le gata ina laveai ai i tatou mai le oti ma ofo mai ai ia i tatou, e ala i le salamo, faamagaloga mo a tatou agasala, ae ua tu saunia foi o Ia e laveai i tatou mai faanoanoaga ma tiga o ō tatou agaga ua faamanu’alia. (Neil L. Andersen, “Faamanu’alia,” Liahona, Nov. 2018, 85)

O fesili nei ua faamoemoe e fesoasoani i tagata aoga ia lagona ai lo latou manaomia o le Faaola. Valaaulia tagata aoga e mafaufau loloto ma le filemu i a latou tali. Saili le taitaiga mai le Agaga ia iloa ai isi auala e mafai ona e fesoasoani ai i tagata aoga ia lagona o latou manaoga taitoatasi mo Iesu Keriso.

Mafaufau i mea e tatau ona laveaiina mai ai oe. O i ai ni agasala o loo e taumafai e faatoilalo? O i ai ni faanoanoaga po o ni tiga o loo feagai ma oe? A o e suesueina le Mosaea 3, saili musumusuga e ala i le Agaga Paia e fesoasoani e te iloa ai pe mafai faapefea ona e maua le faaolataga ua ofoina mai e Iesu Keriso.

Faitau le Mosaea 3:5–10, vaavaai mo mea na faia e Iesu Keriso ina ia mafai ai ona faasaoina oe. Faaaalu se taimi e faitau lemu ma mafaufau loloto ai. O le mafaufau loloto o se tasi lea o auala e valaaulia ai le Agaga Paia e aoao oe. Atonu e te manao e tusi i lalo manatu ma mafaufauga i au tusitusiga paia po o lau api talaaga mo suesuega.

Ia mautinoa ua lava se taimi o tagata aoga e faitau ma mafaufau loloto ai i tusitusiga paia. A o faauma e nisi tagata aoga le faitau a o lei uma isi, mafaufau e valaaulia i latou e toe faitau nisi o fuaiupu, sue vaefaamatalaga, pe faaaalu se isi taimi e mafaufau loloto ai.

A uma ua lava se taimi, uunaia tagata aoga e faasoa mai mea na faagaeetia ai i latou mai a latou suesuega. Mafaufau e faaaoga ni nai fesili po o fesili uma nei. E mafai foi ona e valaaulia tagata aoga e fai mai ni fesili e uiga i fuaiupu.

• O a ni uunaiga na e maua a o e suesueina nei fuaiupu?

• O a ni fasifuaitau i nei fuaiupu e tumatila ia te oe?

• O a ni mea na e mauaina na mafua ai lou fiafia?

Atonu e te manao e matamata le vitio “Na puapuagatia Iesu Keriso mo i Tatou,” o loo maua i le ChurchofJesusChrist.org, ma vaavaai pe na faapefea ona faamanuiaina tagata eseese e ala i le Togiola a le Faaola.

Valaaulia tagata aoga e faasoa mai soo se manatu po o ni lagona na latou maua pe afai na latou matamata i le vitio. Mafaufau e faasoa atu se aafiaga patino po o se molimau i le Faaola ma le faaolataga ua Ia ofoina mai. Valaaulia tagata aoga naunautai e faasoa mai foi o latou aafiaga ma molimau.

Faitau le Mosaea 3:11–13, ma vaavaai mo mea e manaomia ona e faia e maua ai le olioli ma le faaolataga e ala ia Iesu Keriso. Faitau lemu ma mafaufau loloto i fuaiupu nei. E mafai ona fesoasoani fesili nei e te mafaufau loloto ai.

Faaaoga nisi o fesili nei, po o nisi fesili e te lagona le musuia e fai atu, e fesoasoani ai i tagata aoga e talanoaina le olioli lea e mafai ona oo mai e ala i le salamo. E mafai foi ona e faasoa atu le saunoaga a Elder Dale G. Renlund e uiga i le olioli ma le salamo i le vaega o “Manatu ma Talaaga o Faamatalaga”.

Atonu e manuia tagata aoga mai le faailoaina o le mataupu faavae lenei: Afai tatou te faatinoina le faatuatua ia Iesu Keriso ma salamo, e mafai ona faaolaina i tatou mai a tatou agasala ma fiafia i le olioli tele.

• O le a se mea ua e aoaoina pe lagonaina e uiga ia Iesu Keriso lea e uunaia ai oe e salamo?

• Aisea e te manatu ai o le faamagaloga o agasala e aumaia ai le olioli?

Toe mafaufau i mea e tatau ona faasaoina mai ai oe. Mafaufau i mea na e suesueina i le Mosaea 3 ma uunaiga na e maua mai le Agaga. Taumafai e faatino le faatuatua, ia salamo, ma talitonu ia Keriso ina ia mafai ona e maua le fesoasoani a le Faaola ma le olioli lea e oo mai i le faamagaloina.

Manatu ma Talaaga o Faamatalaga

Mosaea 3:7. O le a le telē o le puapuagatia o Iesu Keriso ina ia mafai ai ona faaolaina au?

Na aoao mai Elder James E. Talmage (1862–1933) o le Korama a Aposetolo e Toasefululua:

Na Ia tauivi ma ōi i lalo o se avega e le mafai e se isi tagata ola i luga o le fogaeleele ona mafaufauina e tupu. E le o se tiga faaletino, e le na o se tiga faalemafaufau foi, na afua ai ona Ia mafatia i nei puapuaga na oo ai ina tafe mai le toto i pu afu uma; ae o se mafatiaga faaleagaga o le agaga e na o le Atua lava e mafai ona oo i ai. … I lena itula o le puapuaga sa faafeagai ma manumalo ai Keriso i mea matautia uma na faia e Satani, “le alii o lenei lalolagi” [Ioane 14:30]. …

I se isi itu, o le mea moni ma e matua moni a’ia’i e ui ina le malamalama ai le tagata, na tauave e le Faaola i Ona luga le avega o agasala a tagata mai ia Atamu e oo i le iuga o le lalolagi. (James E. Talmage, Jesus the Christ, lomiga lona 3 [1916], 613)

Mosaea 3:8. Aisea na soifua mai ai Iesu i se tamā tino ola pea ma se tinā faaletino?

Na faasoa mai e Elder Robert D. Hales (1932–2017) o le Korama a Aposetolo e Toasefululua:

Aisea e mafai ai e Iesu Keriso, ma ua na o Ia lava, ona togiola mo agasala a le lalolagi?. …

Ua na o Iesu Keriso lava e mafai ona faia le taulaga togiola—na fanau mai i se tinā faaletino, o Maria, ma sa maua le mana o le ola mai Lona Tama (tagai i le Ioane 5:26 ). Ona o lenei mana o le ola, sa Ia manumalo ai i le oti, na faaleaogaina ai le mana o le tuugamau, ma avea ai o Ia ma o tatou Faaola ma le Puluvaga ma le Matai o le Toetu—o le auala lea e mafai ai ona tuuina mai ia i tatou uma lava le faaolataga ma le tino ola pea. O le a tatou toetutu mai ma avea ma tino ola pea ona o le taulaga togiola a Iesu Keriso. (Robert D. Hales, “O Le Togiola a le Faaola: Faavae o le Kerisiano Moni,” Ensign, Aperila 2017, 23)

O le a le matafaioi a le Faaola i le salamo, ma o le a la’u matafaioi?

Na aoao mai Elder Dieter F. Uchtdorf o le Korama a Aposetolo e Toasefululua:

Ua le na o le salamo e faaolaina ai le tagata. O le toto o Iesu Keriso e faaolaina ai i tatou. Ua le na o le suiga faamaoni ma le moni o amioga e faaolaina ai i tatou ae “o le alofa tunoa pe a uma ona faia mea uma tatou te mafaia” (2 Nifae 25:23). Peitai, o le salamo moni, o le tulaga lea e manaomia ina ia mafai ai ona oo mai le faamagaloga a le Atua i o tatou olaga. (Dieter F. Uchtdorf, “Vaega Tonu o le Toe Foi Saogalemu,” Liahona, Me 2007, 100)

E mafai faapefea ona ou maua le olioli e ala i le salamo?

Na aoao mai Elder Dale G. Renlund o le Korama a Aposetolo e Toasefululua:

Ou te valaaulia outou ia lagona atili le olioli i lou olaga: olioli i le iloaina o le Togiola a Iesu Keriso e moni; olioli i le gafatia o le Faaola, naunautaiga, ma Lona finagalo ia faamagalo mai; ma le olioli e filifili le salamo. Ia tatou mulimuli i le faatonuga ia “utu vai ma le olioli i vaipuna o le faaolataga” [Isaia 12:3]. Ia tatou filifili e salamo, ia lafoai a tatou agasala, ia toe liliu o tatou loto ma manatu ia mulimuli ai i lo tatou Faaola. (Dale G. Renlund, “Salamo: O Se Filifiliga Fiafia,” Liahona, Nov. 2016, 124)

Gaoioiga Faaopoopo e Aoao Ai

Vitio o le Tusi a Mamona

Mafaufau e faaali le vitio “Ua Lauga Atu e le Tupu o Peniamina le Valoaga a le Agelu ia Iesu Keriso” mai le faailotaimi 0:00 i le 3:28.

O puapuaga o Iesu Keriso

E mafai e tagata aoga ona faitau fuaitau nei o mau ina ia malamalama atili ai i puapuaga o Iesu Keriso: Mataio 26:38–39; Luka 22:42–44; Mataupu Faavae ma Feagaiga 19:16–19.

Fuafua e agasala i le taimi nei ma salamo mulimuli ane

Ina ia fesoasoani i tagata aoga ia iloa le matautia o le agasala ma le loto i ai ma se fuafuaga ia salamo mulimuli ane, mafaufau e faaaoga lenei gaoioiga.

Faitau le Mosaea 3:12 ma talanoaina le uiga o le fouvale i le Atua. E mafai ona e faasoa atu le mea lenei mai le Mo Le Malosi o le Autalavou:

“O nisi tagata e solia ma le iloa poloaiga a le Atua, ma fuafua e salamo mulimuli, e pei ao lei o atu i le malumalu pe auauna atu foi i se misiona. O na agasala fuafuaina ua ulagia ai le Togiola a le Faaola” (Mo le Malosi o le Autalavou [tamaitusi, 2011], 29).

Talanoaina pe faapefea e le agasala fuafuaina ona ulagia ai le Togiola a le Faaola ma pe faapefea e le salamo faamaoni ona faaalia ai lo tatou talisapaia o mea ua faia e le Faaola mo i tatou. E mafai ona e faasino atu i le Mosaea 3:7 i le taimi o lenei talanoaga.

O le faaolataga o fanau iti

Afai o le a manuia tagata aoga mai le malamalama pe faapefea ona faasaoina tamaiti laiti e ala i le Togiola a le Faaola, e mafai ona fesoasoani lenei gaoioiga.

Faitau le Mosaea 3:16–18, ma vaavaai mo mea na aoao mai e le Tupu o Peniamina e uiga i tamaiti laiti ma le Togiola a Iesu Keriso. E mafai foi e tagata aoga ona faitau ma talanoaina le Moronae 8:8–12 ma le Mataupu Faavae ma Feagaiga 137:10. Valaaulia tagata aoga e faasoa mai mea o loo aoao mai e le faaolataga o tamaiti laiti e uiga i le Tama Faalelagi ma Iesu Keriso.