“Atamai i Aoaoga Faavae: Mosaea 2:17—‘Auauna Atu Lava Lea i Lo Outou Atua,’” Tusi Lesona a le Faiaoga o le Tusi a Mamona (2024)
“Atamai i Aoaoga Faavae: Mosaea 2:17,” Tusi Lesona a le Faiaoga o le Tusi a Mamona
Atamai i Aoaoga Faavae: Mosaea 2:17
“Auauna Atu Lava Lea i Lo Outou Atua”
I le lesona “Mosaea 2:1–18,” na e aoao ai e faapea “pe a outou auauna atu i o outou uso-a-tagata, ua nao lo outou auauna atu lava lea i lo outou Atua” (Mosaea 2:17). O lenei lesona e mafai ona fesoasoani ia te oe e tauloto ai mau faasino o le atamai i aoaoga faavae ma le fasifuaitau autu o le mau mo le Mosaea 2:17, faamatala le aoaoga faavae, ma faaaoga mataupu faavae o le mauaina o le malamalama faaleagaga i tulaga faataitai moni o le olaga.
Faaaogaina o tulaga faataitai. O le talanoaina o tulaga moni o le olaga po o tulaga faataitai e mafai ona fesoasoani i tagata aoga e malamalama atili ai i auala e faatatau ai upumoni o le talalelei i le olaga i aso uma. Fautuaina tagata aoga e mafaufau i tulaga mai o latou lava olaga, ona valaaulia lea o i latou e faaaoga mataupu faavae o le mauaina o le malamalama faaleagaga e iloa ai ni fofo talafeagai i a latou fesili.
Sauniuniga a le tagata aoga: Valaaulia tagata aoga e o mai i le vasega ma mafaufau i se taimi na latou maua ai se aafiaga faigata o le auaunaga po o se avanoa e auauna atu ai ae sa le’i manao ai.
Gaoioiga e Mafai Ona Aoao Ai
O lenei lesona o le fuaitau o le atamai i aoaoga faavae ua mamanuina e aoao atu pe a uma le lesona o le “Mosaea 2:1–18,” o le lesona faatatau lea mo le fuaitau o le atamai i aoaoga faavae Mosaea 2:17. Afai e manaomia le tuu o le lesona lenei o fuaitau o le atamai i aoaoga faavae i se isi vaiaso, ia mautinoa e aoao atu ai foi le lesona faatatau e o faatasi ai i le vaiaso foi lena.
Faamatala ma tauloto
Faitau le Mosaea 2:17 ma le fuaitau o le atamai i aoaoga faavae o le Feagaiga Fou Mataio 22:36–39, ma vaavaai mo mea e tutusa ai.
Mo se mea e ese mai, mafaufau e vaevae tagata aoga i ni paga ma ia taitasi ona faitau se tasi o fuaitau o mau. Ona valaaulia lea o i latou e talanoa i fesili nei.
-
O a ni mea e tutusa ai o e vaaia i le Mataio 22:36–39 ma le Mosaea 2:17?
-
E faapefea ona e faamatalaina le aoaoga faavae o le auauna atu e faaaoga ai nei fuaitau?
Ina ia fesoasoani i tagata aoga e tauloto lenei fasifuaitau autu o le mau, e mafai ona e vaevaeina le vasega i ni afa se lua. Tofi le afa o le vasega i le vaega muamua o le fasifuaitau: “Pe a outou auauna atu i o outou uso-a-tagata.” Tofi le vaega o totoe o le vasega i le vaega lona lua o le fasifuaitau: “Ua nao lo outou auauna atu lava lea i lo outou Atua.” Faasino i le vaega muamua ma fai atu ia i latou e toe fai mai la latou fasifuaitau na tofi atu i ai. Ia faapea foi ona toe fai ma le vaega lona lua. A uma ona toe ta’ua ia fasifuaitau e lua, fai faatasi o se vasega le “Mosaea 2:17”. E mafai ona e toe fai le gaoioiga ae tuu atu i afa e lua o le vasega e fesuiai fasifuaitau latou te toe faia. Faamanatu i tagata aoga ia migao pe a talanoa e uiga i le Atua.
Faataitai le faaaogaina
Manatua o le faamoemoega o le iloiloina o mataupu faavae o le mauaina o le malamalama faaleagaga o le fesoasoani lea i tagata aoga ia iloa lelei lo latou faaaogaina masani i o latou olaga pe a latou fetaiai ma fesili faaleagaga. Faaaoga gaoioiga toeiloilo nei e fua ai le malamalama o tagata aoga i mataupu faavae. Fetuunai pe toe fai pe a manaomia.
Vaevae le vasega i ni vaega taitoatolu, ma tofi ia tofu tagata aoga taitasi ma se tasi o mataupu faavae mai le Pepa Autu o le Atamai i Aoaoga Faavae (2022): faatino i le faatuatua, iloilo manatu ma fesili faatasi ma se vaaiga e faavavau, ma saili le malamalama atili e ala i punaoa paia ua filifilia. Valaaulia tagata aoga taitasi e faailoa mai ni fuaiupu se lua mai la latou vaega atofaina latou te manatu e taua ona malamalama i ai. Fai atu ia i latou e faasoa nei fuaiupu i le latou vaega ma ia aofia ai le pogai na latou filifilia ai.
O lenei gaoioiga e mafai ona faia taitoatasi, taitoalua, pe i ni vaega toalaiti. Afai e filifili tagata aoga e tusi se vaaiga faataitai, o le vaaiga faataitai e tatau ona aofia ai se luitau po o se feteenaiga e mafai ona vaai i ai e ala i mataupu faavae o le mauaina o le malamalama faaleagaga. Ia fesuiai e tagata aoga a latou vaaiga faataitai ma le tasi ma le isi. Ona valaaulia lea o i latou e galulue e ala i mataupu faavae o le mauaina o le malamalama faaleagaga e tali atu ai i le tulaga faataitai na latou mauaina. Afai e manaomia, tuu atu i tagata aoga fesili o loo lisi i vaega taitasi.
O le auauna atu e masani lava o se aafiaga lelei mo i latou o e auai ma i latou o loo auauna atu i ai. Peitai, e i ai foi luitau e mafai ona avea o se vaega o le auauna atu. Toe manatunatu i avanoa e auauna atu ai na e mauaina talu ai nei. O a nisi o luitau na oo faatasi mai ma le auauna atu? O a nisi mafuaaga atonu e filifili ai tagata ia lē auauna atu?
Tusi lau lava tulaga faataitai e faamatala ai se luitau i le auauna atu. O se faataitaiga lenei: Sa talosagaina Sofia e ona taitai o le Ekalesia e ave se meaai o le aso fanau i se teineitiiti e le toaga i lana vasega a Tamaitai Talavou. Ina ua sau le teineitiiti i le faitotoa, sa lei faauo tele o ia ia Sofia. I le lagonaina o le tiga, sa savali ese ai Sofia ma le faanoanoa ona sa ia faia le auaunaga.
Faatino i le faatuatua
-
E faapefea ona avea o se faatinoga o le faatuatua le auauna atu e ui lava i luitau?
-
E mafai faapefea e le aoaoga faavae o loo aoao mai i le Mosaea 2:17 ona fesoasoani i le tagata i lenei tulaga e faatino i le faatuatua?
Iloilo manatu faavae ma fesili ma se vaaiga e faavavau
-
O le a se suiga pe a e vaai i le tulaga faataitai mai se vaaiga e faavavau?
-
E mafai faapefea e le aoaoga faavae o loo aoao mai i le Mosaea 2:17 ona fesoasoani i lenei tagata e vaai ai i mea mai se vaaiga e faavavau?
-
O le a sou manatu o le a faapefea ona galue le Faaola i lenei tulaga?
Saili le malamalama atili e ala i punaoa mamana ua filifilia
Ina ia fesoasoani i tagata aoga e sue se faamatalaga, e mafai ona e faaali atu upusii mai le vaega o “Manatu ma Talaaga o Faamatalaga” o le lesona “Mosaea 2:1–18.”
Saili se mau faaopoopo po o se faamatalaga mai le konafesi aoao e mafai ona e faasoa atu e fesoasoani ai i se tagata e auauna atu ma se uiga naunautai. Ina ia faia lenei mea, taumafai e saili mo le “auaunaga” i le polokalama o le Gospel Library, ona vaai lea i tusitusiga paia po o lauga o konafesi o faaali mai. E mafai foi ona e sueina le “Auaunaga” i le Taiala o Autu po o le Taiala i Tusitusiga Paia.
Valaaulia tagata aoga e faasoa mai mea na latou maua. E mafai ona e faaiu i le fautuaina o tagata aoga e taumafai e faatoilalo ni faafitauli e taofia ai i latou mai le auauna atu. Faamanatu atu ia i latou le fuafuaga o le auaunaga na latou faia a o suesueina le Mosaea 2:1–18 ma avanoa o loo siomia ai i latou i aso taitasi e auauna atu ai i isi.
Iloiloga o le atamai i aoaoga faavae
Tusi le mau faasino ma le fasifuaitau autu o le mau i luga o le laupapa, ma valaaulia tagata aoga e toe fai leotele mai o se vasega. Tapē ni nai upu ma valaaulia tagata aoga e toe fai atoa le mau faasino ma le fasifuaitau. Toe fai lenei faagasologa seia tapē ese mea uma ma mafai e tagata aoga ona toe fai atoa le mau faasino ma le fasifuaitau mai le manatuaga.