“Atamai i Aoaoga Faavae: Mosaea 2:41—‘O Le Tulaga Manuia ma Fiafia o i Latou o E e Tausi i Poloaiga a le Atua,’” Tusi Lesona a le Faiaoga o le Tusi a Mamona (2024)
“Mosaea 2:19–41,” Tusi Lesona a le Faiaoga o le Tusi a Mamona
Atamai i Aoaoga Faavae: Mosaea 2:41
“O Le Tulaga Manuia ma Fiafia o i Latou o E e Tausi i Poloaiga a le Atua”
I se lesona talu ai, sa e aoaoina ai afai tatou te tausia poloaiga a le Atua, o le a Ia faamanuiaina i tatou i le faaletino ma le faaleagaga. O lenei lesona e mafai ona fesoasoani ia oe e tauloto ai le mau faasino o le atamai i aoaoga faavae ma le fasifuaitau autu o le mau mo le Mosaea 2:41, faamatala le aoaoga faavae o loo aoao mai i lenei fuaitau, ma faaaoga mataupu faavae o le mauaina o le malamalama faaleagaga i tulaga moni o le olaga.
O le aoaoina atu o tusitusiga paia ma upu a perofeta faatasi ma le talitonuga maumaututu ma le faamoemoe. Na aoao mai Elder Jeffrey R. Holland, “Sei vagana ua e lagonaina le faananau e uiga i se mea, e lē mafai ona e faamoemoe ia lagona e au tagata aoga le fiafia e uiga i ai” (“Angels and Astonishment” [lauga na tuuina atu i le Church Educational System annual training broadcast, 12 Iuni, 2019]). Aoao atu ma le talitonuga maumaututu ma le mana e faavae i lau lava molimau i le Faaola ma upumoni e faavavau o Lana talalelei toefuataiina.
Sauniuniga a le tagata aoga: E mafai ona talosagaina tagata aoga e filifili se poloaiga o loo latou taumafai e usitaia. Ona saunia lea e faasoa atu pe na faapefea ona faamanuiaina i latou e ala i le tausia o le poloaiga.
Gaoioiga e Mafai Ona Aoao Ai
O lenei lesona o le fuaitau o le atamai i aoaoga faavae ua mamanuina e aoao atu pe a uma le lesona o le “Mosaea 2:19–41,” o le lesona faatatau lea mo le fuaitau o le atamai i aoaoga faavae Mosaea 2:41. Afai e manaomia le tuu o le lesona lenei o le fuaitau o le atamai i aoaoga faavae i se isi vaiaso, ia mautinoa e aoao atu ai foi le lesona faatatau e o faatasi ai i le vaiaso foi lena.
Tauloto ma faamatala
Tusi le Mosaea 2:41 ma le fasifuaitau autu o le mau “O i latou o e e tausi i poloaiga a le Atua … e faamanuiaina i latou i mea uma” i luga o le laupapa. E mafai ona e valaaulia tagata aoga e tusi se ata pe fatu se ata e faatusa i le aoaoga faavae o loo aoaoina i lenei fuaitau.
Valaaulia tagata aoga e faasoa mai mea na latou fatuina i ni paga po o ni vaega toalaiti. Faatonu i latou e talanoaina po o a upu po o fasifuaitau na latou faamamafaina i a latou tusiga ata ma pe aisea latou te lagona ai e tāua.
Valaaulia tagata aoga e faaaoga ata na latou fatuina e tauloto ai le mau faasino ma le fasifuaitau autu.
Faataitai le faaaogaina
Faaali atu le vaaiga faataitai pe tuu atu i tagata aoga se kopi a o latou faamaeaina le gaoioiga lenei. O lenei vaaiga faataitai na fuafuaina e fesoasoani ai i tagata aoga e faaaoga mataupu faavae o le mauaina o le malamalama faaleagaga ia malamalama ai o faamanuiaga ma le fiafia e sau mai le usiusitai. E mafai foi ona fesoasoani ia i latou e tumau faamaoni ai e tusa lava pe faigata ia i latou ona iloa faamanuiaga ua tuuina atu e le Alii ia i latou. Mafaufau e fetuunai lenei vaaiga faataitai i manaoga po o tulaga o au tagata aoga.
Sa i ai ia Jenna se lesona o le atamai i aoaoga faavae i le seminare lea na faamamafa ai o le usiusitai i poloaiga a le Atua e aumaia ai le fiafia sili atu ma faamanuiaga i o tatou olaga. Mulimuli ane, sa lagona e Jenna le lē mautonu e uiga i lona lava tulaga. E taumafai o ia e tausi poloaiga ae na te lē lagonaina ai e faigofie, fiafia, pe sili atu ona lelei lona olaga. O loo tauivi pea o ia i le aoga ma e i ai foi ni faafitauli i lona aiga ma uo. Afai o lona usiusitai i poloaiga e tatau ona aumaia ai le fiafia, aisea e faapea ai ona lagona?
O se tasi o auala e fesoasoani ai i tagata aoga e faaaoga mataupu faavae o le mauaina o le malamalama faaleagaga i lenei tulaga o le tusi lea o mataupu faavae e tolu o ni ulutala i luga o le laupapa (tagai i Pepa Autu o le Atamai i Aoaoga Faavae [2022], 3–4). Valaaulia tagata aoga e tusi i luga o le laupapa i lalo o le ulutala talafeagai ia faamatalaga latou te lagona o le a fesoasoani ia Jenna. E mafai ona e valaaulia le auai e ala i le tuuina atu o se sioka po o se maka i se tagata aoga ona valaaulia lea o lena tagata aoga e pasi le sioka po o le maka i se isi tagata aoga pe a uma ona latou tusitusi i le laupapa. Talanoaina mea ua tusia e tagata aoga i luga o le laupapa.
Faatino i le faatuatua
Faitau parakalafa 5–6 i le vaega o le “Mauaina o le Malamalama Faaleagaga” o le Pepa Autu o le Atamai i Aoaoga Faavae (2022). Vaavaai mo fasifuaitau e mafai ona fesoasoani ia Jenna.
-
O le a se mea e mafai ona e faasoa atu mai nei parakalafa e fesoasoani ai ia Jenna e faatino i le faatuatua?
-
O le a sou manatu e mafai faapefea ona fesoasoani lenei mea ia Jenna?
Atonu e te manao e faailoa se sootaga i le va o le saunoaga a Elder Jeffrey R. Holland i le parakalafa 6 ia “tumau mautu” ma le folafolaga a le Tupu o Peniamina i le Mosaea 2:41 ia i latou o e “tutumau i le faamaoni e oo i le iuga.” Fesoasoani i tagata ia malamalama e ui o nisi o faamanuiaga e lē vave ona iloaina, e mafai ona tatou agai i luma ma le faatuatua faamaoni o le a faataunuuina e le Atua Ana folafolaga (tagai Mosaea 2:22).
Iloilo manatu faavae ma fesili ma se vaaiga e faavavau.
Faitau le parakalafa 8 i le vaega o le “Mauaina o le Malamalama Faaleagaga” o le Pepa Autu o le Atamai i Aoaoga Faavae (2022). Vaavaai mo fasifuaitau e mafai ona fesoasoani ia Jenna.
-
O le a se mea e te faasoa atu ia Jenna?
-
Aisea o le a e faasoa atu ai lenei mea ia te ia?
Saili le malamalama atili e ala i punaoa mamana ua filifilia
Faitau le parakalafa 11 i le vaega o le “Mauaina o le Malamalama Faaleagaga” o le Pepa Autu o le Atamai i Aoaoga Faavae (2022). Vaavaai mo fasifuaitau e mafai ona fesoasoani ia Jenna.
-
O a nisi o punaoa paia e mafai ona e fautuaina e liliu atu i ai Jenna?
-
O le a sou manatu e faapefea ona fesoasoani lenei mea ia te ia?
Mafaufau e valaaulia tagata aoga e faasoa mai faamanuiaga na latou maua a o latou taumafai e usitai i poloaiga a le Atua. Fai atu i tagata aoga e faasoa mai faamanuiaga na vave ona maua ma isi na mauaina i le alugaa o taimi. Molimau atu i le atamai e lē iu o le Atua, Na te fuafuaina e lē gata po o a faamanuiaga e tuuina mai ae faapea foi le taimi sili mo i tatou e maua ai.
Iloiloga o le atamai i aoaoga faavae
I le taimi o lesona o le a sosoo ai, fesoasoani i tagata aoga e toe iloilo faapuupuu le mau faasino ma le fasifuaitau autu mo le Mosaea 2:41. Tusi le fasifuaitau autu i luga o le laupapa ma valaaulia tagata aoga e faatumu avanoa. E mafai ona e fetuunaia le faataitaiga o loo i lalo e faamamafa ai soo se upu e ono manaomia e au tagata aoga le fesoasoani e manatua ai:
Mosaea : – “O i latou o e e i a le Atua … e i .”
Valaaulia tagata aoga e toe fai le mau faasino ma le fasifuaitau autu mo ni nai taimi seia oo ina latou taulotoina. E mafai foi ona e iloiloina atatusi mo lenei fuaitau na latou fatuina muamua.