Mosaea 1

“A Na Leai Nei Papatusi”

O le a se aafiaga e mafai ona i ai i le avea ai o tusitusiga paia e faatumauina le faatuatua ia Iesu Keriso i lou olaga atoa? Na aoao atu e le Tupu o Peniamina ona atalii i le taua o le matafaioi o tusitusiga paia i lo latou faatuatua. O lenei lesona e mafai ona fesoasoani ia te oe e faateleina ai lou naunautaiga e suesue i tusitusiga paia.

Faamalosia o se mausa o le suesue i tusitusiga paia i aso taitasi. E itiiti ni mea o le a i ai se aafiaga sili ona mamana ma tumau mo le manuia i olaga o tagata aoga nai lo o le fesoasoani ia i latou e aoao ia fiafia i tusitusiga paia ma suesue i ai i aso uma. O se tasi o auala e faia ai lenei mea o le valaaulia lea o tagata aoga e faatu se sini faitautusi ma fai se fuafuaga patino e suesue ai i aso taitasi.

Sauniuniga a le tagata aoga: Valaaulia tagata aoga e fai a latou suesuega faaletagata lava ia o tusitusiga paia ma mafaufau loloto pe faapefea ona aafia ai i latou, aemaise lava o latou lagona ma le faalagolago ia Iesu Keriso.

Gaoioiga e Ono Mafai Ona Aoao Ai

O le a le mea e taua i lo tatou faatuatua ia Iesu Keriso?

Mafaufau e uu i luga se kopi o le Tusi a Mamona ma isi tusitusiga paia ona aveese lea a o e fesili atu i mea nei:

• O le a faapei o tatou olaga e aunoa ma le Tusi a Mamona po o isi tusitusiga paia?

Ina ia fesoasoani ia te oe e mafaufau i lenei fesili, atonu e te manao e matamata le vitio “Talatuu o Tusitusiga Paia,” o loo maua i ChurchofJesusChrist.org, mai le faailotaimi 0:00 i le 5:36.

Valaaulia tagata aoga e faasoa mai o latou manatu. Mafaufau e toe fai le fesili mai le vitio, e faatatau ia i latou o e ositaulaga mo tusitusiga paia: “O le a se mea na latou iloa e uiga i le taua o tusitusiga paia e tatau foi ona tatou iloa?”

Mafaufau loloto i fesili nei pe tusi tali i lau api talaaga mo suesuega:

Afai e tusi e tagata aoga a latou tali i a latou api talaaga mo suesuega, atonu e aoga mo i latou le toe vaai i a latou tali i se taimi mulimuli ane o le lesona po o se taimi mulimuli ane i le tausaga.

• O le a sou lagona e uiga i tusitusiga paia? Aisea?

• Afai e te faaauauina au mausa o le suesueina o tusitusiga paia i le taimi nei mo nai tausaga e sosoo ai, o le a sou manatu o le a faapefea ona aafia ai oe?

• Afai e le o ia te oe se mausa o le suesueina o tusitusiga paia i le taimi nei, o le a se mea e tatau ona e malamalama pe lagona e amata ona suesue i ai?

Faaauau pea ona mafaufau e uiga i nei fesili a o e suesue i lenei lesona. O le a e faitauina le fautuaga mai le Tupu o Peniamina i ona atalii e uiga i tusitusiga paia. Saili e aoao e ala i le Agaga Paia i le auala e mafai ai e tusitusiga paia ona faamanuiaina lou olaga.

Fautuaga mai le Tupu o Peniamina

O le tamā o le Tupu o Peniamina, o Mosaea, na lapataia e le Alii e tatau ona tuua e lona nuu lo latou nuu moni. Ina ua latou usiusitai, sa latou mauaina le nuu o Saraemila (tagai Ominae 1:12–19). O nei vaega e lua o tagata na o mai faatasi i lalo o le taitaiga a Mosaea, o le sa tofia e avea ma tupu, ma mulimuli ane avea Peniamina ma tupu i le mavae ai o lona tamā. E mafai ona fesoasoani le iloa atili e uiga i le Tupu o Peniamina ae e te lei suesue i mea sa ia aoao atu i ona atalii.

Faitau Upu a Mamona 1:12–18 ma le Mosaea 1:1, ma vaavaai mo faigata na feagai ma le Tupu o Peniamina ma auala na ia faagaeetia ai oe.

• O le a se mea sa e mauaina?

  Valaaulia tagata aoga e faasoa mai o latou manatu ma malamalamaaga eseese.

• Aisea atonu e te manao ai e faalogo i fautuaga mai le Tupu o Peniamina?

Faitau le Mosaea 1:2–7, ma vaavaai mo mea na aoao atu e le Tupu o Peniamina i ona atalii e uiga i tusitusiga paia. Atonu e fesoasoani le iloa e faapea, “o mealilo a le Atua o upumoni faaleagaga ia e naʼo faaaliga e mafai ai ona malamalama i ai (Taiala i Tusitusig Paia, “Mealilo a le Atua,” scriptures.ChurchofJesusChrist.org). Afai e te manao e vaai i se vitio o loo faaalia ai nisi o upu a le Tupu o Peniamina, matamata i le “Talatuu o Tusitusiga Paia,” o loo maua i le ChurchofJesusChrist.org, mai le faailotaimi 5:40 i le 6:20.

• O le a se mea na e aoao mai le Tupu o Peniamina e uiga i tusitusiga paia?

Tusi i luga o le laupapa mea e faasoa mai e tagata aoga. Afai latou te le faasoa maia ni mataupu faavae e pei o nei, mafaufau e faaopoopo i ai.

O nisi nei o mataupu faavae e mafai ona tatou aoao mai i le Tupu o Peniamina:

• Afai tatou te le suesueina pea lava pea ma le filiga ia tusitusiga paia, e mafai ona mou malie atu lo tatou faatuatua.

• O le a tatou manuia e ala i le suesueina ma le filiga o tusitusiga paia.

• Aisea e te manatu ai e mafai ona mou malie atu lo tatou faatuatua pe afai tatou te le suesue i tusitusiga paia?

Ua folafola mai e le Alii e faamanuia i tatou i le tele o auala a o tatou faitau i tusitusiga paia. Suesue ni nai fuaitau nei ma sue nisi o faamanuiaga nei:

• Iosua 1:8

• Salamo 119:105

• Luka 24:27–32

• 1 Nifae 1:12

• 1 Nifae 15:24

• 2 Nifae 32:3

• Iakopo 2:8

• Alema 17:2

• Helamana 15:7–8

• Mataupu Faavae ma Feagaiga 11:21–22

Valaaulia tagata aoga e faasoa mai mea na latou maua.

• O le fea o nei faamanuiaga e sili ona e manao i ai i lou olaga?

• O le a faapefea ona faateleina lo tatou faatuatua i le Alii ma Lana talalelei ona o nei faamanuiaga?

Tusitusiga paia ma lo tatou faatuatua

Na aoao mai Elder D. Todd Christoffferson o le Korama a Aposetolo e Toasefululua:

O le faamoemoega tutotonu o tusitusiga paia uma o le faatumuina lea o o tatou agaga i le faatuatua i le Atua le Tama, ma Lona Alo o Iesu Keriso—faatuatua o loo soifua i La’ua; faatuatua i le fuafuaga a le Tama mo lo tatou tino ola pea ma le ola e faavavau, faatuatua i le Togiola ma le Toetu o Iesu Keriso lea e galueaiina lenei fuafuaga o le fiafia, faatuatua e avea le talalelei a Iesu Keriso ma o tatou olaga, ma le faatuatua e oo ina iloa “le Atua moni e toatasi, atoa ma Le ua [Ia] auina mai, o Iesu Keriso lea” (Ioane 17:3). (D. Todd Christofferson, “O Le Faamanuiaga o Tusitusiga Paia,” Liahona, Me 2010, 34)

1. Tusi mau faasino i ni fuaiupu se lua pe tolu na i ai se aafiaga malosi ia te oe ma lau molimau, aemaise lava ia Iesu Keriso po o le Tama Faalelagi. Na faapefea ona fesoasoani nei mau ia te oe? Mata e faapefea ona ese lou olaga pe ana faapea e te lei faitauina lava na fuaiupu?

2. Suesue au tusitusiga paia mo le lima minute. Vaavaai mo soo se upumoni e mafai ona fesoasoani ia te oe e tumau faamaoni ai i le Alii ma Lana talalelei. Ia gauai atu i soo se lagona e mafai foi ona fesoasoani. Tusi e uiga i lou aafiaga.

3. Tesi pe talanoa i se tasi e te manatu e matuai faamaoni lava i le Alii o Iesu Keriso. Fesili atu i lena tagata po o le a le matafaioi o loo faia e tusitusiga paia e fesoasoani ai ia te ia e tumau faamaoni ai.

4. Matamata i se tasi o vitio nei, ma vaavaai mo faataitaiga o auala e mafai ai e le suesueina o tusitusiga paia ona faamanuiaina o tatou olaga ma faateleina lo tatou faatuatua i le Tama Faalelagi ma Iesu Keriso. O loo maua vitio uma i le ChurchofJesusChrist.org.

   • “O Faamanuiaga o Tusitusiga Paia” (3:03)

   • “O Se Valaaulia e Suesue i le Tusi a Mamona” mai le faailotaimi 6:17 i le 9:00

   • “O Le Uiga o Tusitusiga Paia ia te Au” (5:03)

Valaaulia ni nai tagata aoga e faasoa mai o latou manatu ma aafiaga. O le faalogo i malamalamaaga ma molimau mai tupulaga e mafai ona avea ma se aafiaga mamana. Mafaufau e faasoa atu foi ou lava manatu ma lau molimau.

O au suesuega faaletagata lava ia o tusitusiga paia

Mafaufau loloto i au suesuega o tusitusiga paia. O a ni auala e tuputupu ae ai lou faatuatua i le Tama Faalelagi ma Iesu Keriso a o e suesue ma le filiga i le afioga a le Atua? E i ai se mea e te lagona e finagalo le Alii e te faia e faaleleia ai lau suesuega? Mafaufau e tusi soo se sini atonu o i ai i lau api talaaga mo suesuega.

Atonu e aoga le fesili atu pe i ai se tagata aoga e naunau e faasoa mai a latou sini o suesuega.

Manatu ma Talaaga o Faamatalaga

E mafai faapefea e tusitusiga paia ona faamalosia ma faatumauina lo tatou faatuatua?

Na aoao mai Elder D. Todd Christoffferson o le Korama a Aposetolo e Toasefululua:

O le faatuatua e oo mai mai le molimau a le Agaga Paia i o tatou agaga, Agaga i le agaga, a o tatou faalogo pe faitau i le afioga a le Atua. Ma e matua le faatuatua pe a faaauau pea ona tatou fiafia i le afioga a le Atua.

O tala faale-tusitusiga paia i le faatuatua o isi e fesoasoani e faamalosia ai lo tatou lava faatuatua. …

Aua o tusitusiga paia e faamalamalamaina mataupu faavae a Keriso, o lea ua taitoaluaina ai e le Agaga Paia, o Lana lava matafaioi o le molimau i le Tama ma le Alo (tagai i le 3 Nifae 11:32). O le mea lea, o le faitauina o tusitusiga paia o se tasi o auala tatou te maua ai le Agaga Paia. O le mea moni, o tusitusiga paia sa muai tuuina mai e ala mai i le Agaga Paia (tagai i le 2 Peteru 1:21; MF&F 20:26–27; 68:4), ma o le Agaga lava lea e tasi e mafai ona faamaonia lona moni ia te oe ma au. Suesue ma le faaeteete ma le faamoemoe i tusitusiga paia. Manatunatu loloto ma tatalo e uiga i ai. O tusitusiga paia o faaaliga ia ma o le a latou aumaia faaaliga faaopoopo. (D. Todd Christofferson, “O Le Faamanuiaga o Tusitusiga Paia,” Liahona, Me 2010, 35)

Ae faapefea pe afai o loo ou tauivi e suesue i tusitusiga paia?

I se mekasini a le Ekalesia, sa tusia ai e se talavou, “O loo ou tauivi e suesue i tusitusiga paia. Aisea e matuai taua ai le suesueina o i latou?” Ina ia vaai i upusii faaperofeta ma tali mai isi talavou e ono fesoasoani, faitau le vaega o “Fesili ma Tali” se vaega o le New Era, Tesema 2016, itulau 42–43.

Gaoioiga Faaopoopo e Aoao Ai

O se isi amataga o le lesona

Mafaufau e valaaulia tagata aoga e vaai faalemafaufau faapea o loo latou o i se malaga umi i le vao. Tuu atu ia i latou e ta’u mai ni mea se tolu latou te lagona e latou te manaomia e ola ai ma pe aisea foi. Ona faatusatusa lea o o tatou olaga i se faigamalaga o le ola faaleagaga ma valaaulia tagata aoga e faasoa mai ni mea se tolu latou te lagona e fesoasoani tatou te maua ai ma faatumauina le faatuatua ia Iesu Keriso ma pe aisea. Faamalamalama atu o se tasi o meafaigaluega sili ua tuuina mai e le Alii ia i tatou ia ola ai faaleagaga o tusitusiga paia, ma valaaulia tagata aoga e mafaufau loloto i fesili mo le iloiloga faaletagata lava ia i le amataga o le lesona o loo i luga.

O le faataitaiga a le nuu o Saraemila

Ina ia faapupula aoaoga a le Tupu o Peniamina, valaaulia tagata aoga e mafaufau i le faataitaiga a le nuu o Saraemila. Na mulimuli le Tupu o Mosaea (le tama o le Tupu o Peniamina) i musumusuga a le Alii ma taitai ese atu lona nuu mai lo latou nuu moni seia oo ina latou mauaina le nuu o Saraemila. O vaega uma e lua sa tele ni mea sa tutusa ai: sa latou tupuga mai tagata o e na tuua Ierusalema i se taimi talitutusa ma malaga atu ai i Amerika. Peitai, na aumai e Liae ma lona aiga tusitusiga paia faatasi ma i latou, ae sa lei aumaia e tuaa o le nuu o Saraemila. Valaaulia tagata aoga e faitau le Ominae 1:14–17 e vaai pe na faapefea ona aafia le nuu o Saraemila ona o le leai o ni tusitusiga paia.

O se lisi a se vasega o mau mamana

A uma ona faailoa mai mataupu faavae o i le lesona i luga, e mafai e tagata aoga ona fai se lisi o mau lea e fesoasoani e faamalosia ai lo latou faatuatua. E mafai e tagata aoga taitasi ona tusi se fuaiupu se tasi pe lua i luga o se fasipepa, lea e mafai ona faapipii i se puipui po o le laupapa. Pe e mafai e le faiaoga ona tuufaatasi tali uma a tagata aoga i se lisi umi. Ona mafai lea e tagata aoga ona sue nisi o fuaiupu e sili ona fiafia i ai tagata o le latou vasega ma faitau i ai.

Faamatalaga faaosofia

I le faaiuga o le lesona, e mafai e tagata aoga taitasi ona tusi se faamatalaga e uunaia ai isi tagata aoga e faitau a latou tusitusiga paia. O faamatalaga e mafai ona aofia ai mataupu faavae na aoaoina e tagata aoga mai lenei lesona ma faamanuiaga na latou oo i ai i o latou lava olaga.