Iaroma–Ominae

Tuu Atu Lou Agaga Atoa ia Iesu Keriso

O fea e te liliu i ai mo le taitaiga pe a faia filifiliga taua o le olaga? Ua saunia e le Tama Faalelagi ma Iesu Keriso ia tusitusiga paia o se punavai autu o le taitaiga ma le fesoasoani mo tagata uma. O tusi a Iaroma ma Ominae o lo o i ai aoaoga eseese e mafai ona faamanuiaina ai lou olaga. O lenei lesona ua faamoemoe e fesoasoani ia te oe e faataitai ai le faailoaina ma le faaaogaina o mataupu faavae mai tusitusiga paia ia e mafai ona faamanuiaina ma taiala ai lou olaga.

Fesoasoani i tagata aoao ia iloa aoaoga faavae ma mataupu faavae o le talalelei. O se aoaoga faavae o se vaega autu taua, o se upumoni e le masuia o le talalelei a Iesu Keriso. O se mataupu faavae o se upumoni tumau lea e taialaina tagata taitoatasi i le faia o faaiuga. O mataupu faavae o le talalelei e lautele ma e fesoasoani i tagata e faaaoga le aoaoga faavae o le talalelei i o latou olaga.

Sauniuniga a le tagata aoga: Valaaulia tagata aoga e faataitai le faailoaina o mataupu faavae o le a manuia ai o latou olaga a o suesue i tusitusiga paia i aso taitasi. Uunaia i latou e o mai saunia e faasoa mai ia le itiiti ifo ma le tasi se mataupu faavae na latou mauaina.

Gaoioiga e Ono Mafai Ona Aoao Ai

Uliina o le vaa

Ina ia amata le vasega, mafaufau e faaali atu se ata o se vaa pe tusi se ata i luga o le laupapa. I se isi itu, e mafai ona e tuu atu i se tagata aoga e tusi se vaa i luga o le laupapa. E mafai ona e fesili atu ia i latou po o a vaega o le vaa e manaomia e fesoasoani ai i se auvaa e folau atu i se taunuuga.

Vaai faalemafaufau i lau malaga i le olaga e pei o se vaa o loo folau i luga o le vasa. O a nisi o mea e mafai ona e faatusatusa i le foeuli po o le uili lea e taiala ai le vaa i le faigamalaga?

Mafaufau e lisi i luga o le laupapa ia tali a tagata aoga.

Na tuuina mai e Elder David A. Bednar o le Korama a Aposetolo e Toasefululua se tali talafeagai:

O mataupu faavae o le talalelei e mo a’u ma oe e faapei o se foeuli i se vaa. O mataupu faavae tonu e mafai ai e i tatou ona maua lo tatou ala ma tutumau ai, mausali, ma le lē gaoia ina ia tatou lē sagatonu ma pauu ai i afa matamataita o aso e gata ai o le pogisa ma le fememea’i. (David A. Bednar, “O Mataupu Faavae o La’u Talalelei,” Liahona, Me 2021, 126)

• E mafai faapefea ona pei se mataupu faavae o le talalelei o se foeuli po o se uili o se vaa?

• I se fua faatatau o le 1 i le 10, o faapefea lou mautinoa i le faailoaina mai o mataupu faavae moni mai tusitusiga paia ma faaaoga e taiala ai lou olaga? Aisea?

• O le a se mea na e faia i le taimi ua tuanai na fesoasoani ia te oe e maua ai mataupu faavae i tusitusiga paia?

Faalogologo ma le toto’a i tali a tagata aoga. Mafaufau e tusi mea latou te fai atu ai i luga o le laupapa e fesoasoani ai i tagata o le vasega.

Afai e te manao e iloilo pe faapefea ona faailoa ia mataupu faavae, mafaufau e toe asiasi i lesona nei: “2 Nifae 1” ma le “Iakopo 4.”

Faaalu sina taimi e toe manatunatu ai i se mataupu faavae na e faailoaina talu ai nei i le taimi o le seminare pe i au suesuega patino o tusitusiga paia.

• O a ni mataupu faavae na e mauaina? Ua faapefea ona faamanuiaina lou olaga e lena mataupu faavae?

Mafaufau e valaaulia ni nai tagata aoga e faasoa mai. Faalogo ma le toto’a e iloilo ai le lelei o lo latou faailoaina o mataupu faavae ma pe faapefea ona e fesoasoani ia i latou e faateleina lo latou tomai i le taimi o lenei lesona. Ia vaavaai foi e faamalo atu ia i latou mo a latou suesuega ma uunaia i latou e faaauau pea.

Faailoaina o mataupu faavae o le talalelei

O tusi a Iaroma ma Ominae o loo i ai tusitusiga faaiu i papatusi laiti a Nifae ma e aofia ai le tele o mataupu faavae e mafai ona faamanuiaina ai o tatou olaga. Na maua e Iaroma ia papatusi mai lona tama, o Enosa, ma tusia ai tauiviga ma faamanuiaga a sa Nifae mo se vaitaimi pe tusa ma le 40 tausaga. Ona ia tuuina atu lea o papatusi i lona atalii o Ominae. O le tusi a Ominae o loo i ai tusitusiga a tagata tausi talafaamaumau eseese e toalima sa Nifae ma e aofia ai le tusa ma le 190 tausaga.

Fuafua po o le a le mea e sili ona lelei mo au tagata aoga e maua ai se aafiaga anoa e faailoa ai mataupu faavae o le talalelei. E mafai e tagata aoga ona galulue taitoatasi pe vaevaeina i ni vaega toalaiti ma galulue faatasi e faailoa mataupu faavae i se mau faasino se tasi pe sili atu foi.

Faitau ia fuaitau o mau nei ma faataitai le faailoaina o mataupu faavae o le talalelei e mafai ona e faaaogaina i lou olaga. Atonu e tele mataupu faavae o loo i ai i seti taitasi o fuaiupu. Faailoa ia le itiiti ifo ma le tasi mai fuaitau o mau taitasi.

1. Iaroma 1:3–4

2. Iaroma 1:5–9

3. Iaroma 1:10–12

4. Ominae 1:12–16

5. Ominae 1:25–26

Mafaufau e valaaulia tagata aoga e tusi ni mataupu faavae sa latou faailoaina i luga o le laupapa.

Tuuina atu o oe lava i le Faaola ma Lana galuega

A uma ona faailoa mai se mataupu faavae, e taua le faaalu o se taimi e mafaufau loloto ai i lona uiga ma pe faapefea ona faaaoga i lou olaga. Mo se faataitaiga, i le Ominae 1:26 atonu na e faailoaina ai le mataupu faavae lenei: Afai tatou te o mai ia Keriso ma tuu atu o tatou agaga atoa ia te Ia, o le a faaolaina i tatou.

• O a nisi o auala e mafai ona e saili ai ia malamalama atili ma faaaoga lenei mataupu faavae?

O se tasi lenei o manatu:

E mafai ona fesoasoani le faatusatusa o lenei mataupu faavae i se mea e mafai ona e ofoina atu i isi i le olaga i aso uma.

• O le a se mea e mafai ona e ofoina atu i se isi tagata?

• E i ai ni auala e te ofoina atu ai na o se vaega o mea e mafai ona e tuuina atu? Aisea?

• O le a se taimi e mafai ona e ofoina atu ai mea uma e mafai ona e tuuina atu? Aisea?

• E mafai faapefea ona faatatau lenei mea i le tuuina atu o o tatou agaga atoa ia Iesu Keriso?

A o e faalogologo i tali a tagata aoga, atonu o le a fesoasoani fesili nei: O le a sou manatu i le uiga o le tuuina atu o lou agaga atoa ia Iesu Keriso? O le a se mea e ono taofia ai se tagata mai le tuuto atoa atu o i latou lava ia Iesu Keriso?

• O le a sou manatu i le uiga o le tuu atu o lou agaga atoa ia Iesu Keriso?

• Aisea e te manatu ai ua fetalai mai le Alii ia i tatou e tuu atu ia te Ia o tatou agaga atoa?

• O ai e te iloa o se faataitaiga lelei o se tasi o loo taumafai e tuuina atu o latou agaga atoa ia Iesu Keriso? Na faapefea ona faamanuiaina i latou i le faia o lea mea?

Atonu e te manao e matamata le vitio “Ma Lou Loto Atoa” (3:26), o loo maua i le ChurchofJesusChrist.org, ia vaai ai i se faataitaiga o se alii talavou o loo taumafai e tuuto atoa atu o ia lava i le Alii.

Mafaufau e tusi se li’o e faatusa i lou olaga. Valivali le vaega o le li’o e te lagona e sili ona faailoa ai le tele o oe lava o loo e tuuina atu i le Alii i le taimi nei. Faaalu sina taimi e mafaufau loloto ai pe mafai faapefea ona e tuuina atu atoa lou agaga ia Iesu Keriso. Tusi i lalo se auala se tasi pe lua o le a e saili ai e faia ai o lea ma pe faapefea e le faia o nei mea ona manuia ai lou olaga.

Malamalama ma le Faaaogaina o Mataupu Faavae

Toe mafaufau i mataupu faavae na e faailoaina muamua mai i le Iaroma ma Ominae.

• O le fea o mataupu faavae na e faailoaina e sili ona anoa ia te oe? Aisea?

• E mafai faapefea ona e malamalama atili ma faaaoga lenei mataupu faavae?

• E mafai faapefea e le ola ai i lenei mataupu faavae ona fesoasoani e faaleleia ona taitai atu lou olaga ia Iesu Keriso?

Manatu ma Talaaga o Faamatalaga

Ominae 1:12–22. O ai vaega eseese o tagata o loo ta’ua i le tusi a Ominae?

I le tusi a Ominae, tatou te aoao ai e uiga i ni vaega se tolu o tagata na aumaia e le Alii i le laueleele o le folafolaga. O le vaega muamua na ta’ua o le aiga o Liae ma e tupuga mai ia i latou. O se vaega lona lua, sa ta’ua o tagata o Saraemila, po o sa Molekā, na tuua Ierusalema ma malaga atu i Amerika i le taimi lava e tasi ma le aiga o Liae. Sa latou aufaatasi ma sa Nifae i lalo o le tulafono a le Tupu o Mosaea (tagai i le Ominae 1:19). O le vaega lona tolu o sa Iareto, o e na o mai i le nuu o le folafolaga a o lei taitai oo i vaega muamua e lua. Sa latou faaumatia i latou lava i taua faalemalo i se taimi i le va o le 600 ma le 300 TLM. O le tupu mulimuli o sa Iareto, o se tagata e igoa ia Korianetuma, na sao mai le faatafunaga ma e foliga mai na sē seia oo ina ia mauaina le nuu o Saraemila a o lei oti. (tagai i le Ominae 1:21). O le tusi a Eteru o loo i ai le otootoga a Moronae o se talafaamaumau o sa Iareto.

Ominae 1:26. E mafai faapefea ona ou tuu atu lo’u agaga atoa ia Iesu Keriso?

Na aoao mai Elder Jeffrey R. Holland o le Korama a Aposetolo e Toasefululua:

E taitasi i tatou ma o mai ia Keriso ma le tautinoga … e lē fetuuna’ia i Lana talalelei. … I le gagana masani a le autalavou i aso nei, e tatau ona tatou tautino atu i tatou lava ua tatou i ai “uma i totonu.” (Jeffrey R. Holland, “O Le Oa Silisili,” Liahona, Nov. 2021, 8)

Na aoao mai e Elder Neal A. Maxwell (1926–2004) o le Korama a Aposetolo e Toasefululua le uiga o le ofoina atu o i tatou lava i le Alii:

O le ositaulaga moni faaletagata lava ia, sa lē o le tuuina o se manu i luga o le fatafaitaulaga. Nai lo lena, o se naunautaiga e tuu le manu o loo i totonu o i tatou i luga o le fatafaitaulaga ina ia faaumatia! (Neal A. Maxwell, “Deny Yourselves of All Ungodliness,” Ensign, Me 1995, 68)

I le autu lava lea e tasi, na aoao mulimuli mai ai Elder Maxwell:

A gauai atu o outou loto i le Atua, ua outou tuuina atu ia te Ia le mea e tasi e mafai ona e tuuina atu ia te Ia o lau lava lea e tuuina atu. (Neal A. Maxwell, “Ia Outou Manatua Le Finagalo Alofa o le Alii,” Ensign, Me 2004, 46)

Na faaopoopo mai Brother Russell T. Osguthorpe, o le sa avea muamua ma Peresitene Aoao o le Aoga Sa:

O le tuuina atu o o tatou loto i le Alii o se mea tatou te faia i aso uma. E le o se faatinoga soonafai. E le o le faaiuga, ae ua na o le amataga. E mafai ona tatou tau atu mea ua Ia finagalo e tau atu. E mafai ona tatou faia mea ua Ia finagalo e fai. E mafai ona avea i tatou ma se molimau i le lalolagi e uiga i le Alo Pele o le Atua—ona ua tatou mananao uma e fai ia mea. A tupu lenei suiga i o tatou loto, e matuai faateleina lo tatou agaga faafetai mo le Togiola ma faamalosia ai pea lava pea i tatou. (Russell T. Osguthorpe, “O le a Ou Tuuina Atu A’u Lava ia te Ia” [faigalotu a le Ofisa o Aoga a le Ekalesia mo le autalavou matutua, Nov. 3, 2013])

Gaoioiga Faaopoopo e Aoao Ai

Iaroma 1:9. “Ua faamaonia le afioga a le Alii”

Afai e mafai ona manuia tagata aoga mai le aoao atili e uiga i folafolaga a le Alii ua faataunuuina i o latou olaga, valaaulia i latou e faitau le Iaroma 1:5–9, ma vaavaai mo lesona e mafai ona latou aoaoina i le taimi o Iaroma. Fesoasoani i tagata aoga e faailoa se mataupu faavae mai le Iaroma 1:9, e pei o le, ona ua tatou faalagolago i le Alii ma tausi Ana poloaiga, o le a tatou maua Ana faamanuiaga folafolaina. Mafaufau i fesili nei:

• Aisea e taua ai le manatua e le o taimi uma e vave faataunuuina ai folafolaga a le Atua?

• O le a se mea ua e aoaoina e uiga i le Alii ua tuuina atu ai ia te oe le talitonuga i Ana folafolaga?

• O a nisi o faataitaiga mai tusitusiga paia lea na iu ina faataunuuina ai afioga a le Atua?

• O anafea na faamanuiaina ai oe e le Alii, poo se tasi e te iloa, ona o le tausia o Ana poloaiga?

E avea o se faataitaiga o lenei mataupu faavae, mafaufau e faaali le vitio “Faaauau i le Onosai” (2:41) pe vaai i le lauga o le autu lava e tasi a Peresitene Dieter F. Uchtdorf, a o i ai i le Au Peresitene Sili, mai le konafesi aoao ia Aperila 2010.

Ominae 1:14–19. O le taua o tusitusiga paia

Mafaufau e valaaulia tagata aoga e mafaufau i mea aogā ma faamanuiaga ua latou matauina mai le suesueina e le aunoa o tusitusiga paia. E mafai e tagata aoga ona suesue le Ominae 1:14–19, ma vaavaai mo le mea na tupu i sa Molekā ona sa latou “lē aumaia faatasi ma i latou ni talafaamaumau” mai Ierusalema (Ominae 1:17). Faamanatu i tagata aoga le mea na fetalai atu ai le Agaga ia Nifae—o le a faaitiitia se atunuu atoa i le le talitonu pe afai na te lei mauaina papatusi apamemea mai ia Lapana (tagai 1 Nifae 4:13). O tagata o Saraemila o ni molimau ola o lena lapataiga. Mafaufau e fai atu i tagata aoga e lisi nisi o mea e fesoasoani ai le suesueina o tusitusiga paia e le aunoa ia i latou e manatua pe mafaufau ai ma lisi nei mea i luga o le laupapa.