Enos

Ang Hugot nga Pagtuo diha ni Jesukristo Makadala og Kapasayloan sa mga Sala

Nakahunahuna ka na ba kon unsaon pagdawat sa kapasayloan sa imong mga sala? Si Enos, ang anak nga lalaki ni Jacob ug apo ni Lehi, nag-ampo ngadto sa Dios “sa hilabihan nga pag-ampo” (Enos 1:4) alang sa kapasayloan sa iyang mga sala. Kini nga leksiyon gituyo aron sa pagtabang kanimo nga makapakita sa hugot nga pagtuo diha kang Jesukristo ug maghinulsol aron makadawat og kapasayloan.

Pag-ampo. Isip kabahin sa pagpangandam sa pagtudlo sa mga leksiyon, ikonsiderar ang pag-ampo ngadto sa Langitnong Amahan, panghangyo Kaniya sa pagtabang sa imong mga estudyante. Angayan kini nga mag-ampo nga sila makahibalo unsay buhaton aron sa paglig-on sa ilang hugot nga pagtuo diha kang Jesukristo ug pagtabang kanila sa pagpaminaw sa mga impresyon gikan sa Espiritu Santo.

Pagpangandam sa estudyante: Dapita ang mga estudyante sa pagbasa sa Enos 1:1–8 sa wala pa ang klase, mamalandong kon unsay gibati ni Enos ug unsay iyang nakat-onan kabahin sa Ginoo ug pagpasaylo sa iyang mga sala. Ikonsiderar ang paghangyo sa mga estudyante sa pagpamalandong kon sa unsang paagi kaha kini nga kasinatian nakapausab sa kinabuhi ni Enos.

Posibleng Kalihokan sa Pagkat-on

Paghunahuna kon unsa ang kahulugan sa pagpasaylo kanimo

Ikonsiderar ang pagbuhat sa mosunod nga kalihokan aron sa pagtabang sa mga estudyante nga maandam sa pagtuon kabahin kang Enos ug sa pagpasaylo.

Handurawa nga ikaw adunay usa ka higala nga nangutana kanimo mahitungod sa paghinulsol ug pagpasaylo. Ikonsiderar kon unsaon nimo pagtubag ang mosunod nga mga pangutana:

• Unsaon nimo pagkahibalo kon kinahanglan kang pasayloon sa usa ka butang?

• Unsaon nimo pagdawat og kapasayloan sa mga sala?

• Unsaon pagkahibalo sa usa ka tawo kon napasaylo na ba siya human siya misulay sa paghinulsol?

Pamalandongi kon unsay imong isulti sa imong higala. Hunahunaa kon unsa ang imong nahibaloan ug nasinati sa pagtinguha og kapasayloan, ingon man kon unsa ang gusto nimo nga mas mahibaloan.

Ikonsiderar ang pagdapit og pipila ka estudyante sa pagpaambit kon unsay ilang ikasulti.

Samtang magtuon ka sa asoy ni Enos niini nga leksiyon, pangitaa kon unsay iyang gibuhat aron makaangkon og kapasayloan sa iyang mga sala ug sa unsang paagi kini magamit sa imong kinabuhi.

Ang kapasayloan magsugod sa lawom nga komunikasyon tali kanimo ug sa Dios

Si Enos, ang anak nga lalaki ni Jacob ug apo ni Lehi, nag-ampo ngadto sa Dios “sa hilabihan nga pag-ampo” alang sa kapasayloan sa mga sala.

Basaha ang Enos 1:1–8 ug markahi ang mga pulong ug mga hugpong sa mga pulong nga makatabang kanimo nga mas makasabot unsaon sa pagtinguha ug pag-angkon sa kapasayloan.

Ikonsiderar ang pagdapit sa mga estudyante sa pagsulat diha sa pisara sa mga hugpong sa mga pulong nga mipatigbabaw kanila.

Ang paggahin og panahon sa pagpamalandong sa mahinungdanon nga mga hugpong sa mga pulong mahimong makatabang nga kahanas sa pagtuon sa kasulatan. Nagtugot kini sa Espiritu Santo sa pagdasig kanimo og mas dakong panabot. Sa pagpamalandong, mahimo nimong hunahunaon kon unsa ang gipasabot sa usa ka hugpong sa mga pulong ug pangitaon ang bisan unsang mga pulong nga gusto nimong mas masabtan diha sa Giya ngadto sa mga Kasulatan. Mahimo nimong pamalandongan kon nganong migamit si Enos og piho nga hugpong sa mga pulong ug kon nakasinati ka na ba sa susama.

Pagpili og pipila sa mosunod nga mga hugpong sa mga pulong o uban nga imong nailhan ug paggahin og panahon sa pagpamalandong kon unsay imong makat-onan gikan niana.

Ikonsiderar ang pagdugang og bisan unsa sa mosunod nga mga hugpong sa mga pulong diha sa pisara. Samtang ipaambit sa mga estudyante kini nga mga hugpong sa mga pulong, mahimo kang mangutana og follow-up nga mga pangutana sama sa “Unsa kaha ang gipasabot ni Enos sa hugpong sa mga pulong nga ‘ang akong kalag gigutom’?” “Sa unsang paagi nga ang pagpamalandong sa mga pagtulun-an mahitungod sa kinabuhing dayon ug sa hingpit nga kalipay sa mga Santos mahimong hinungdan sa kalag sa usa ka tawo nga gutomon?” “Ngano man nga ang sala makahatag kanato og pagbati sa espirituhanong kahaw-ang?” “Ngano nga ang pagpakigbisog usa ka maayo nga pulong sa paghulagway sa atong mga paningkamot sa paghinulsol?”

• “Akong pagpakigbisog sa atubangan sa Dios” (bersikulo 2)

• “Mituhop gayod pag-ayo sa akong kasingkasing” (bersikulo 3)

• “Ang akong kalag gigutom” (bersikulo 4)

• “Hilabihan nga pag-ampo ug nangaliya” (bersikulo 4)

• “Ang imong mga sala gipasaylo na” (bersikulo 5)

• “Ang akong kasaypanan nakuha sa hingpit” (bersikulo 6)

• “Ginoo, giunsa kini pagbuhat?” (bersikulo 7)

• “Tungod sa imong hugot nga pagtuo ni Kristo” (bersikulo 8)

Ikonsiderar ang pagpares sa mga estudyante ug pagdapit kanila sa pagpaambit sa unsay ilang nakat-onan. Mahimo nilang tubagon ang mosunod nga mga pangutana nga magkauban:

• Unsa nga mga pulong o mga hugpong sa mga pulong ang mipatigbabaw diha kanimo? Ngano man?

• Unsa ang imong nakat-onan samtang namalandong ka niini nga mga hugpong sa mga pulong?

• Unsa ang imong gibati nga gitudlo sa Dios diha kanimo gikan sa kasinatian ni Enos?

Kon ang mga estudyante mitubag niini nga mga pangutana diha sa ginagmay nga mga grupo, dapita ang pipila ka mga estudyante sa pagpaambit diha sa klase kon unsay ilang nakat-onan o unsay ilang naganahan nga ilang nadungog gikan sa ilang kapares. Samtang sila mopaambit og tinuod nga mga baroganan, ikonsiderar ang pagsulat niini diha sa pisara.

Kon ang mga estudyante naglisod sa pagpaambit og mga kamatuoran, ikonsiderar ang pagpangutana sama sa mosunod: “Unsa man ang rason nga gihatag ni Enos nga ang iyang kasaypanan nakuha sa hingpit?” “Unsa ang nakat-onan ni Enos gikan sa Ginoo kon nganong gipasaylo siya sa iyang mga sala?”

Usa ka importante nga baroganan nga atong makat-onan sa Enos mao nga samtang kita maghinulsol ug magpakita sa atong hugot nga pagtuo diha ni Jesukristo, kita mapasaylo sa atong mga sala, ug kita mamahimo nga hinlo. Mahimo nimong isulat kini nga baroganan diha sa imong journal sa pagtuon.

Basaha ang mosunod nga pamahayag gikan ni Elder Dieter F. Uchtdorf sa Korum sa Napulog Duha ka Apostoles.

Sa higayon nga nakahinulsol na kita sa tinuoray nga paagi, si Kristo mokuha sa kabug-at sa kahasol tungod sa atong mga sala. Masayod kita sa atong mga kaugalingon nga napasaylo na kita ug nahimo na nga limpyo. Ang Espiritu Santo mopanghimatuod niini ngari kanato; Siya mao ang Tigbalaan. Walay laing pagpamatuod sa pagpasaylo nga mas labaw pa. (Dieter F. Uchtdorf, “Punto sa Luwas nga Pagbalik,” Liahona, Mayo 2007, 101)

Kon gisulat sa mga estudyante ang baroganan diha sa ilang mga journal sa pagtuon, ikonsiderar ang pagdapit kanila sa paglingin sa bahin sa baroganan nga gusto nilang mas masabtan. Dayon hangyoa sila sa pagpaambit unsa ang ilang gilinginan. Hangyoa ang ubang mga estudyante sa pagpaambit sa unsay ilang nahibaloan nga makatabang sa ilang mga klasmeyt. Mahimong mogamit sila og mga kasulatan, mga kasinatian, o mga pamahayag gikan sa mga lider sa Simbahan aron sa pagtabang. Ang mosunod nga mga pangutana mahimo usab nga mapuslanon:

• Unsa sa imong hunahuna ang mahitabo kon ang usa ka tawo mosulay sa pagtinguha og kapasayloan nga dili maghinulsol ug magpakita og hugot nga pagtuo diha ni Jesukristo? Ngano man?

• Unsa ang pipila ka mga paagi nga gipaningkamotan ni Enos ang paghinulsol ug pagpakita og hugot nga pagtuo diha ni Jesukristo?

• Unsa sa imong hunahuna ang gipasabot sa himoon nga hinlo?

Mahimong mapuslanon ang pagtan-aw unsa nga mga pangutana gikan sa sitwasyon sa sinugdanan sa leksiyon ang imong matubag gamit ang asoy ni Enos.

Makabaton kita karon og mga kasinatian sama ni Enos

Kadaghanan sa mga tawo dili makadawat og kapasayloan sa ingon ka dali o talagsaon nga paagi sama ni Enos. Hinoon, samtang kita magtinguha sa pagpakita og hugot nga pagtuo diha ni Jesukristo ug maghinulsol sama sa gibuhat ni Enos, kita usab makadawat og kapasayloan ug mahimong hinlo.

Tabangi ang mga estudyante sa pagpamalandong kon sa unsang paagi sila makapakita og hugot nga pagtuo diha kang Jesukristo ug makahinulsol. Mahimo nimong ipakita kini nga mga ideya o ang uban nga imong mahunahunaan aron matabangan ang mga estudyante.

• Pamalandongi kon unsay imong nahibaloan kabahin ni Jesukristo ug sa Iyang tinguha sa pagpasaylo ug pagtabang kanimo. Unsay imong gibati nga Iyang gusto nga imong buhaton aron makapakita og hugot nga pagtuo diha Kaniya ug maghinulsol?

• Hunahunaa ang ulahing higayon nga imong gibati nga ikaw mipakita og hugot nga pagtuo diha kang Jesukristo ug mihinulsol. Bag-o lang ba kini nahitabo? Ngano o nganong dili?

• Ikonsiderar ang pagplano og panahon sa pag-ampo nga may mas dakong hugot nga pagtuo diha kang Jesukristo. Sa unsang paagi nimo mabuhat ang imong pag-ampo nga malahi kaysa sa imong naandan? Unsaon nimo pagpakita nga nagtinguha ka sa kapasayloan sa Ginoo sama ni Enos?

Ikonsiderar ang pagdapit sa mga estudyante sa pagpaambit og mga impresyon ug mga pagpamatuod sa Manluluwas nga si Jesukristo ug unsay ilang nakat-onan gikan kang Enos. Ikonsiderar usab ang pagpaambit sa imong mga hunahuna ug pagpamatuod.

Komentaryo ug Background nga Impormasyon

Unsa pa ang kinahanglan nakong masayran bahin sa hugot nga pagtuo diha kang Jesukristo?

Si Presidente Dallin H. Oaks sa Unang Kapangulohan mipaambit:

Ang hugot nga pagtuo sa Ginoo mao ang pagsalig sa Ginoo. Dili kita makaangkon og tinuod nga hugot nga pagtuo sa Ginoo kon wala usab ang hingpit nga pagsalig sa kabubut-on sa Ginoo ug sa panahon sa Ginoo. Isip resulta, bisan og unsa pa ka lig-on ang atong hugot nga pagtuo, dili kini mobunga og resulta nga supak sa kabubut-on Niya diin kita adunay hugot nga pagtuo. Hinumdomi kana kon ang imong mga pag-ampo ingon og dili tubagon sa paagi o sa oras nga imong gitinguha. Ang pagpakita og hugot nga pagtuo diha ni Ginoong Jesukristo kanunay nga nag-agad sa lagda sa langit, diha sa kaayo ug kabubut-on ug kaalam ug tayming sa Ginoo. Kon aduna kita niana nga matang sa hugot nga pagtuo ug pagsalig sa Ginoo, aduna kitay tinuod nga kasiguroan ug kalinaw sa atong kinabuhi. (Dallin H. Oaks, “The Atonement and Faith” [pakigpulong nga gihatag sa seminar para sa bag-ong mga presidente sa misyon, Hunyo 2001])

Unsay akong mahimo aron mapauswag ang paagi sa akong pag-ampo?

Si Elder David A. Bednar sa Korum sa Napulog Duha ka Apostoles miingon:

Ang tumong sa atong mga pag-ampo kinahanglang dili mopresentar og lista sa gusto o sunodsunod nga mga hangyo apan sa pagpangita alang sa atong mga kaugalingon ug alang sa uban sa mga panalangin nga gustong ihatag sa Dios, sumala sa Iyang kabubut-on ug timing. Ang matag sinsero nga pag-ampo dunggon ug tubagon sa atong Langitnong Amahan, apan ang mga tubag nga atong madawat dili tingali unsay atong gipaabut o moabut kanato kon sa atong gusto o sa paagi nga atong gipaabot. …

Ang pag-ampo usa ka pribilehiyo ug sinsero nga tinguha sa kalag. Kita makaampo og mas maayo pa kay sa naandan nga “binalikbalik” nga mga pulong ug mohimo og makahuluganon nga pag-ampo samtang kita sa angay mangayo pinaagi sa hugot nga pagtuo ug mobuhat, kon kita mapailubon nga mopadayon pinaagi sa pagsulay sa atong hugot nga pagtuo, ug kon kita mapainubsanong moila ug modawat sa “dili akong pagbuot, kondili ang Imo, maoy matuman.” (David A. Bednar, “Pangayo pinaagi sa Hugot nga Pagtuo,” Liahona, Mayo 2008, 97)

Dugang nga mga Kalihokan sa Pagkat-on

Unsaon nako pagkahibalo kon napasaylo na ba ko?

Kon gibati nimo nga mahimong makahatag og kaayohan sa imong mga estudyante ang mas maayong pagsabot sa pangutana sa ibabaw, ikonsiderar ang pagdapit kanila sa pagbasa sa Mosiah 4:1–3. Si Elder Neil L. Andersen sa Korum sa Napulog Duha ka Apostoles mipaambit sa kamahinungdanon sa makahuluganong pag-ampo samtang kita mopakita og hugot nga pagtuo sa tinguha sa Dios sa pagpasaylo kanato pinaagi sa sinsero nga paghinulsol ug tiunay nga katuyoan.

Unsa ang epekto sa kasinatian ni Enos diha kaniya?

Mahimong makatabang alang sa mga estudyante nga mahibaloan kon unsa ang gibuhat ni Enos human makadawat og kapasayloan gikan sa Ginoo. Basaha ang Enos 1:9–18, mangita kon kinsa ang sunod nga giampo ni Enos ug ngano. Pamalandongi kon unsay imong nakat-onan gikan sa iyang kasinatian. Ikonsiderar usab ang pagbasa sa 2 Nephi 26:33 ug mamalandong kon sa unsang paagi kini may kalabotan niini nga mga bersikulo. Hunahunaa kon kinsay imong iampo ug tinguhaon nga tabangan.

Unsa ang imong makat-onan gikan sa kasinatian ni Enos bahin sa pag-ampo?

Imbis nga tutokan ang pagpasaylo, dapita ang mga estudyante sa pagbasa sa basahon ni Enos, mangita og mga panabot bahin sa pag-ampo. Dapita sila sa pagpaambit kon sa unsang paagi ang pag-ampo ni Enos nakatabang kaniya, tingali sa pagpaambit kon sa unsang paagi nausab ang kasingkasing ni Enos tungod sa kasinatian. Dapita usab ang mga estudyante sa pagpaambit kon unsay ilang mahimo aron mahimong mas makahuluganon ang ilang mga pag-ampo.