Mga Pulong ni Mormon

“Alang sa usa ka Maalamon nga Katuyoan”

Napanalanginan na ba ka sukad gumikan sa nag-unang pagpangandam sa uban? Sa unsang paagi ang ilang pagpangandam nakaapekto sa imong kasinatian? Nadiskobrehan ni Mormon ang gagmay nga mga palid ni Nephi human siya makahimo og minubo sa bahin sa mga talaan sa Nephite. Gigiyahan sa Espiritu sa Ginoo, gilakip ni Mormon ang gagmay nga mga palid “alang sa usa ka maalamon nga katuyoan,” sumala pa sa kabubut-on sa Ginoo (tan-awa sa Mga Pulong ni Mormon 1:3–7). Kini nga leksiyon makatabang kanimo nga mobati og kasegurohan nga ang Ginoo nasayod sa tanang mga butang ug nga ang Iyang buhat matuman.

Pangutana og mga pangutana nga nagdapit og partisipasyon. Ang epektibo nga mga pangutana makatabang sa mga estudyante sa pagsalmot sa leksiyon ug makigsulti sa usag usa. Ang mga pangutana makadasig usab sa mga estudyante sa pagdapit sa Espiritu Santo ngadto sa ilang kasinatian sa pagkat-on samtang ilang gipakita ang ilang kabubut-on ug pagtuman sa ilang tahas sa proseso sa pagkat-on. Pangutana og mga pangutana nga makaapil sa parehong hunahuna ug kasingkasing.

Pagpangandam sa estudyante: Ang mga estudyante mahimong mangutana sa usa ka ginikanan o lider sa Simbahan kon sa unsang paagi sila gigiyahan o napanalanginan pinaagi sa pagsanong sa usa ka espirituhanong impresyon o pag-aghat.

Posibleng Kalihokan sa Pagkat-on

Mga pagtuo kabahin sa Dios

Mahimo nimong ikonsiderar ang pagtugot sa mga estudyante sa pagtubag sa mosunod nga mga pangutana diha sa ilang mga journal sa pagtuon o paggamit og dili mailhan nga digital polling app aron matigom ang mga tubag sa mga estudyante.

Gamit ang sukdanan nga 0–5 (0 = Dili ako motuo, 5 = Aduna akoy lig-on nga pagtuo), paggahin sa makadiyot sa matinud-anong pag-grado sa imong lebel sa pagtuo alang sa matag usa sa mosunod nga mga pamahayag:

• Nagatuo ako sa Dios.

• Nagatuo ako nga Siya nasayod sa tanang mga butang ug aduna sa tanan nga gahom.

• Nagatuo ako nga Siya nag-andam og paagi aron ako molampos sa akong kinabuhi.

• Gibati nako nga makasalig ako sa tambag ug mga pag-aghat nga Iyang gihatag kanako pinaagi sa Espiritu Santo.

Mahimong makatabang ang pagpamalandong kon nganong nagatuo ka sa paagi nga imong gituohan.

Samtang magtuon ka karon, pangitaa ang mga kamatuoran nga mahimong modugang o mopasalig kanimo pag-usab sa imong pagtuo ug pagsalig sa Dios, sa Iyang gahom, ug sa unsang paagi Siya nagtuman sa Iyang buhat.

Pagminubo ni Mormon sa mga palid

Ikonsiderar ang pagpaambit sa mosunod nga impormasyon sa imong kaugalingong mga pulong:

Handurawa kon unsa kaha ang kahimtang nga mahimong si propeta Mormon, kinsa nabuhi dul-an sa 1,000 ka tuig human mibiya ang pamilya ni Lehi sa Jerusalem. Usa siya sa kataposang mga tigtipig sa mga talaan sa Nephite ug mibuhat sa pagpamubo sa usa ka milenyum nga kasaysayan sa Nephite ngadto sa usa ka hugpong sa mga palid. Unsaon nimo pagdesisyon kon unsa nga mga panghitabo ang ilakip ug unsa ang biyaan?

Sa dihang ang iyang paghimo sa minubo sa mga palid sa Nephite miabot sa panahon ni Hari Benjamin, si Mormon adunay importante nga nadiskobrehan. Iyang gisal-ot ang mubo nga pagpasabot sa iyang kasinatian sa basahon nga giulohan og Mga Pulong ni Mormon.

Basaha ang Mga Pulong ni Mormon 1:3–6, mangita sa unsay nakaplagan ni Mormon ug unsay iyang gibuhat tungod niini.

Mahimong makatabang ang pagkahibalo nga ang hugpong sa mga pulong nga “niini nga mga palid” (Mga Pulong ni Mormon 1:3–4) nagpasabot ngadto sa gagmay nga mga palid nga si Nephi gisugo sa paghimo (tan-awa sa 1 Nephi 9:2–4). Ang gagmay nga mga palid nag-asoy og daghan sa samang yugto sa panahon sa dagko nga mga palid ni Nephi nga gipamubo na ni Mormon, apan kini nagtutok sa espirituhanong mga panghitabo nga nahitabo. Kon gusto nimong masabtan pa ang mahitungod niini nga mga talaan, ikonsiderar ang pagbasa sa “Mubo nga Pagpasabot mahitungod sa Basahon ni Mormon,” nga makita diha sa sinugdanan sa Basahon ni Mormon.

Mahimo nimong ikonsiderar ang pagdapit sa mga estudyante sa pagbasa sa mosunod nga mga bersikulo sa kasulatan ug hisgotan ang kauban nga mga pangutana isip pares.

Silang duha si Mormon ug Nephi nakadawat og piho nga mga pag-aghat gikan sa Ginoo mahitungod sa gagmay nga mga palid. Basaha ang 1 Nephi 9:5–6 ug Mga Pulong ni Mormon 1:7–8, mangita og mga pagkaparehas tali sa unsay nasinati niining duha ka propeta.

• Hain nga mga pulong o mga hugpong sa mga pulong ang mipatigbabaw diha kanimo?

• Unsa ang gisulti niini nga mga bersikulo kanato mahitungod ni Nephi ug Mormon?

• Unsa nga mga kamatuoran ang ikatudlo kanato sa ilang mga pulong mahitungod sa Ginoo?

Mahimo nimong dasigon ang mga estudyante sa pagrekord sa mga kamatuoran nga ilang nailhan diha sa pisara.

Taliwala sa ubang mga kamatuoran, lagmit namatikdan nimo nga ang Ginoo nasayod sa tanan nga mga butang, aduna sa tanan nga gahom, ug nag-andam og paagi sa pagtuman sa Iyang mga buhat.

Ang mosunod nga mga pangutana gituyo aron sa pagtabang sa mga estudyante sa paghunahuna mahitungod niini nga mga kinaiya sa Ginoo. Mahimong makahuluganon alang sa mga estudyante nga irekord ang ilang mga hunahuna diha sa ilang mga journal sa pagtuon.

• Nganong importante alang kanimo nga masayod nga ang Ginoo nahibalo sa tanan nga mga butang ug aduna sa tanan nga gahom?

• Sa unsang paagi kaha kini nga kahibalo makatabang kanimo diha sa imong kinabuhi?

• Sa unsa nga paagi kaha nga ang pagsabot niini nga mga kamatuoran makaimpluwensiya sa imong kaandam sa pagsunod sa mga pag-aghat sa Ginoo?

Ikonsiderar ang pagdapit og usa o daghang mga estudyante sa pagpaambit sa ilang mga tubag sa usa sa miaging mga pangutana. Mahimo usab nimong ipaambit ang usa ka personal nga kasinatian.

Ang Ginoo nag-andam sa agianan

Ang ebidensiya sa daan nga kasayoran ug gahom sa Ginoo makita diha sa Iyang pagsugo kang Nephi sa pag-andam sa gagmay nga mga palid ug pag-aghat kang Mormon sa paglakip niadtong mga talaan diha sa iyang minubo.

Gatosan ka mga tuig ang milabay, sa dihang gihubad ni Joseph Smith ang mga palid sa Basahon ni Mormon, nagsugod siya sa minubo ni Mormon sa dagko nga mga palid ni Nephi. Si Martin Harris, kinsa mitabang isip tigsulat ni Joseph, nagbalik-balik og hangyo nga ipakita ang nahubad nga mga pahina ngadto sa iyang asawa ug ubang mga sakop sa pamilya. Bisan og gibalibaran sa Ginoo ang hangyo ni Martin, si Joseph nagpadayon sa pagpangayo og pagtugot sa Ginoo. Sa kataposan, uban sa higpit nga mga instruksiyon ug mga pasidaan, si Martin gitugotan sa pagdala sa 116 ka manuskrito nga mga pahina balik sa iyang panimalay sa Palmyra, New York. Mipasalig siya nga iuli ang manuskrito ngadto ni Joseph sa Harmony, Pennsylvania, sulod sa duha ka semana.

Mahimo nimong dapiton ang usa ka andam nga estudyante sa pagsaysay og usab sa mga panghitabo nga naglibot sa pagkawala sa 116 nga mga pahina sa manuskrito sa Basahon ni Mormon. Ang makasaysayanong mga punto sa ubos mahimong makatabang sa mga estudyante nga makasabot sa konteksto niini nga mga panghitabo.

ChurchofJesusChrist.org O mahimo nimong basahon ang mosunod nga mga punto nga naghulagway sa unsay nasinati ni Joseph ug Martin. (Tan-awa usab sa Mga Santos: Ang Istorya sa Simbahan ni Jesukristo sa Ulahing mga Adlaw, vol. 1, Ang Sumbanan sa Kamatuoran, 1815–1846 [2018], 54–59.)

1. Ang asawa ni Joseph nga si Emma nanganak sa ilang unang anak, kinsa namatay human lamang sa pipila ka oras. Si Joseph migahin og duha ka semana sa pag-atiman ni Emma, dayon mibiyahe ngadto sa Palmyra sa dihang si Martin wala na mobalik sa Harmony.

2. Si Martin mikompisal nga nawala niya ang manuskrito sa Basahon ni Mormon. Si Joseph gipanton sa Ginoo ug wala na tugoti sa pagpadayon sa paghubad.

3. Human makompleto ni Joseph ang usa ka yugto sa sinsero nga paghinulsol ug nangamuyo alang sa kapasayloan, ang Ginoo mitugot ni Joseph nga ipadayon ang paghubad sa mga palid. Apan, gimandoan siya nga dili na hubaron pag-usab ang bahin nga nawala.

4. Ang Ginoo mipadayag nga, ubos sa impluwensiya ni Satanas, ang dautang mga tawo mikawat sa manuskrito. Ilang tuyo nga usbon ang mga pulong ug ipagawas nga si Joseph nagpakaaron-ingnon lamang nga naghubad, sa ingon molaglag sa buhat sa Ginoo (tan-awa sa Doktrina ug mga Pakigsaad 10:10–19, 29–33).

5. Ang Ginoo misugo ni Joseph sa paghubad sa rekord ni Nephi diha sa gagmay nga mga palid, nga gilakip ni Mormon sa iyang minubo ug miasoy og daghan sa samang yugto sa panahon ug mga panghitabo sa nawala nga bahin. Ang Ginoo mipamatuod, “Ang akong kaalam labaw pa ka gamhanan kay sa kaigmat sa yawa” (Doktrina ug mga Pakigsaad 10:43).

Hisgoti ang mga pangutana sama sa mosunod o uban nga imong gihunahuna aron matabangan ang mga estudyante sa pagtimbang-timbang kon sa unsang paagi magamit sa Ginoo ang Iyang kahibalo ug gahom sa pagpanalangin kanato ug sa pagtuman sa Iyang buhat.

• Sa unsang mga paagi nga kini nga ehemplo gikan sa kasaysayan sa Simbahan nagpakita sa kahibalo ug gahom sa Ginoo?

• Sa unsang paagi kini nga panghitabo makapasalig kanimo nga ang Ginoo makaandam sa agianan sa imong kinabuhi?

• Kanus-a man nga ang pagsanong sa usa ka espirituhanong pag-aghat nakatabang kanimo o sa usa ka tawo nga imong nailhan sa pagtuman sa buhat sa Ginoo?

• Sa unsang paagi nga ang mga kamatuoran nga imong nakat-onan karon makaimpluwensiya sa imong relasyon sa Langitnong Amahan ug ni Jesukristo?

Pagsunod sa mga pag-aghat

Ang tanang mga sinulat kutob sa imong natun-an karong tuiga diha sa Basahon ni Mormon (1 Nephi–Omni) anaa kanimo tungod kay si Mormon mituo nga ang Ginoo nasayod sa tanang mga butang ug siya misunod sa espirituhanong impresyon sa paglakip sa gagmay nga mga palid.

Sama ni Nephi, mahimo kang maghimo og seksiyon sa “gagmay nga mga palid” sa imong journal sa pagtuon aron irekord ang mga kasinatian nga sagrado alang kanimo. Mahimo nimong pamalandongan ug irekord unsa ang imong nahibaloan ug gituohan kabahin sa Dios ug sa unsang paagi Siya makatabang kanimo sa paglihok nga may hugot nga pagtuo aron matuman ang Iyang buhat.

Kon itugot sa panahon, ikonsiderar ang pagdapit sa mga estudyante sa pagpaambit og makahuluganon nga mga tudling o mga istorya nga ilang nahinumduman gikan sa 1 Nephi–Omni. Mahimo nimong ipaambit ang imong pagpamatuod aron sa pagtapos sa leksiyon.

Komentaryo ug Background nga Impormasyon

Unsaon nako nga madugangan ang akong tinguha sa pagsanong sa espirituhanong mga pag-aghat?

Si Elder Ronald A. Rasband sa Korum sa Napulog Duha ka Apostoles mitudlo:

Kinahanglan gayod nga masaligon kita sa atong unang mga pag-aghat. Usahay mangatarungan kita; maghunahuna kita kon mibati ba kita og espirituhanong impresyon o ato lang ba kining mga hunahuna. Kon magsugod na kita sa pagpangagpas sa ikaduhang higayon, gani sa pagpangagpas sa ikatulong higayon, sa atong mga gibati—ug nakahimo kitang tanan niini—atong gibaliwala ang Espiritu; atong gikwestiyon ang balaanong tambag. …

Kon hatagan nato og pagtagad ang mga pag-aghat nga moabot kanato, molambo kita diha sa diwa sa pagpadayag ug makadawat ug mas daghan pa nga panabot ug direksiyon nga dinasig sa Espiritu. Ang Ginoo miingon, “Itugyan ang imong pagsalig diha niana nga Espiritu nga nagtultol sa pagbuhat og maayo” [Doktrina ug mga Pakigsaad 11:12]. (Ronald A. Rasband, “Tugoti ang Balaang Espiritu nga mao ang Mogiya,” Liahona, Mayo 2017, 95–96)

Dugang nga mga Kalihokan sa Pagkat-on

Ang dagko nga mga palid ug ang gagmay nga mga palid (1 Nephi 9)

Ikonsiderar ang pagpakita sa mga estudyante og duha ka journal, ang usa adunay mas daghang pahina kay sa lain. Dapita sila sa pagtandi sa gidaghanon sa luna sa panulat nga gikinahanglan sa pagdetalye sa tibuok adlaw nga mga panghitabo ngadto sa luna nga gikinahanglan sa pagrekord lamang sa espesyal o sagrado nga mga kasinatian. Sa samang paagi, ang dagko nga mga palid ni Nephi naghatag og mas kompleto nga rekord sa sekular, kada adlaw nga kasaysayan sa katawhan. Ang mga asoy nga narekord sa gagmay nga mga palid ni Nephi mas mabinantayon nga gipili, nagtutok sa espirituhanon nga mga butang ug sa mga pagtulun-an sa mga propeta.

Sa dihang magbasa ang mga estudyante sa Mga Pulong ni Mormon 1:3–6, mahimo nimong ikonsiderar ang pagdapit og usa ka estudyante sa pagbasa sa sugo sa Ginoo ngadto ni Nephi aron sa paghimo sa gagmay nga mga palid 1 Nephi 9:2–4. Pangutan-a ang mga estudyante nganong mahimong bililhon ang paghimo og linahi nga rekord sa espirituhanong mga panghitabo sa kinabuhi sa usa ka tawo. Dasiga ang mga estudyante sa paghimo og ilang kaugalingong “gagmay nga mga palid” ug irekord ang ilang personal nga sagradong mga kasinatian.

Alternatibo nga pagsugod sa leksiyon

Ikonsiderar ang paghangyo sa mga estudyante sa paglista sa mga sugo o mga sumbanan sa Ginoo nga ang ubang mga batan-on tingali wala pa makasabot sa rason niini. Hisgoti nganong ang Ginoo tingali mohangyo kanato sa pagtuman sa mga sugo nga wala pa nato masabti.