Mosiah 1

“Kon Dili Pa tungod Niini nga mga Palid”

Unsa ang epekto nga mahimo sa mga kasulatan sa pagpadayon sa hugot nga pagtuo diha kang Jesukristo sa tibuok nimong kinabuhi? Si Hari Benjamin mitudlo sa iyang mga anak nga lalaki sa importante nga tahas sa mga kasulatan sa ilang hugot nga pagtuo. Kini nga leksiyon makatabang kanimo nga madugangan ang imong tinguha sa pagtuon sa mga kasulatan.

Pagdasig og kinaiya sa inadlaw nga pagtuon sa kasulatan. Pipila ka mga butang adunay mas gamhanan ug malungtarong impluwensiya sa kahangtoran diha sa mga kinabuhi sa mga estudyante kaysa pagtabang kanila sa pagkat-on sa paghigugma sa mga kasulatan ug sa pagtuon niini kada adlaw. Usa ka paagi sa pagbuhat niini mao ang pagdapit sa mga estudyante sa paghimo og tumong sa pagbasa ug paghimo og personal nga plano sa pagtuon kada adlaw.

Pagpangandam sa estudyante: Dapita ang mga estudyante sa paghimo sa ilang personal nga pagtuon sa kasulatan ug sa pagpamalandong kon sa unsang paagi kini makaapekto kanila, ilabi na sa ilang mga pagbati ug pagsalig diha kang Jesukristo.

Posibleng Kalihokan sa Pagkat-on

Unsa ang mahinungdanon sa atong hugot nga pagtuo diha kang Jesukristo?

Ikonsiderar ang pagpataas sa kopya sa Basahon ni Mormon ug sa ubang mga kasulatan ug dayon kuhaa kini samtang imong ipangutana ang mosunod:

• Unsa kaha ang atong kinabuhi kon wala ang Basahon ni Mormon o ang ubang mga kasulatan?

ChurchofJesusChrist.org

Dapita ang mga estudyante sa pagpaambit sa ilang mga hunahuna. Ikonsiderar ang pagsubli sa pangutana gikan sa bidyo,nagpasabot niadtong misakripisyo alang sa mga kasulatan: “Unsa ang ilang nahibaloan mahitungod sa kamahinungdanon sa mga kasulatan nga kinahanglan usab natong mahibaloan?”

Pamalandongi ang mosunod nga mga pangutana o tubaga kini diha sa imong journal sa pagtuon:

Kon isulat sa mga estudyante ang ilang mga tubag diha sa ilang journal sa pagtuon, mahimong makatabang kanila ang pagtan-aw og balik sa ilang mga tubag sa ulahi sa leksiyon o sa ulahing bahin sa tuig.

• Unsay imong gibati mahitungod sa mga kasulatan? Ngano man?

• Kon magpadayon ka sa imong kasamtangan nga mga kinaiya [habits] sa pagtuon sa kasulatan sa mosunod nga pipila ka tuig, sa imong hunahuna sa unsang paagi kini makaapekto kanimo?

• Kon ikaw sa pagkakaron walay kinaiya sa pagtuon sa mga kasulatan, unsa ang imong kinahanglan nga masabtan o bation aron sa pagsugod sa pagtuon niini?

Padayon sa paghunahuna mahitungod niini nga mga pangutana samtang ikaw magtuon niini nga leksiyon. Imong mabasa ang tambag gikan ni Hari Benjamin ngadto sa iyang mga anak nga lalaki mahitungod sa mga kasulatan. Tinguhaa nga makat-on pinaagi sa Espiritu Santo kon sa unsang paagi ang mga kasulatan makapanalangin sa imong kinabuhi.

Tambag gikan ni Hari Benjamin

Ang amahan ni Hari Benjamin, nga si Mosiah, gipasidan-an sa Ginoo nga ang iyang mga katawhan kinahanglang mobiya sa ilang yutang natawhan. Sa dihang sila misunod, ilang nadiskobrehan ang mga katawhan sa Zarahemla (tan-awa sa Omni 1:12–19). Kining duha ka grupo sa mga katawhan naghiusa ubos ni Mosiah, kinsa gitudlo nga hari, ug sa kadugayan si Benjamin nahimong hari sunod sa iyang amahan. Mahimong makatabang nga makahibalo og dugang pa mahitungod ni Hari Benjamin sa dili pa nimo tun-an unsay iyang gitudlo sa iyang mga anak nga lalaki.

Basaha ang Mga Pulong ni Mormon 1:12–18 ug Mosiah 1:1, mangita sa mga kalisdanan nga giatubang ni Hari Benjamin ug mga paagi nga siya nakadani kanimo.

• Unsa man ang imong napalgan?

  Tugoti ang mga estudyante sa pagpaambit og lain-laing mga hunahuna ug mga ideya.

• Ngano kaha nga gusto nimo nga maminaw sa tambag gikan ni Hari Benjamin?

Basaha ang Mosiah 1:2–7, mangita sa unsay gitudlo ni Hari Benjamin sa iyang mga anak nga lalaki mahitungod sa mga kasulatan. Mahimong makatabang ang pagkahibalo nga ang “mga misteryo sa Dios mao ang mga espirituhanon nga mga kamatuoran nga mahibaloan lamang pinaagi sa pagpadayag” (Giya ngadto sa mga Kasulatan, “Mga Misteryo sa Dios,” scriptures.ChurchofJesusChrist.org). ChurchofJesusChrist.org

• Unsa ang imong nakat-onan gikan ni Hari Benjamin mahitungod sa mga kasulatan?

Isulat diha sa pisara kon unsay gipaambit sa mga estudyante. Kon dili sila mopaambit sa mga baroganan sama sa mosunod, ikonsiderar ang pagdugang niini.

Kini maoy pipila sa mga baroganan nga atong makat-onan gikan ni Hari Benjamin:

• Kon dili kita magtuon sa mga kasulatan sa makanunayon ug makugihon nga paagi, kita mahimong anam-anam nga mawad-an sa atong hugot nga pagtuo.

• Makabenepisyo kita pinaagi sa makugihong pagsiksik sa mga kasulatan.

• Ngano sa imong hunahuna nga kita mahimong anam-anam nga mawad-an sa atong hugot nga pagtuo kon kita dili magtuon sa mga kasulatan?

Ang Ginoo misaad sa pagpanalangin kanato sa daghang mga paagi samtang kita magbasa sa mga kasulatan. Tun-i ang pipila sa mosunod nga mga tudling ug pangitaa ang pipila niini nga mga panalangin:

• Josue 1:8

• Salmo 119:105

• Lucas 24:27–32

• 1 Nephi 1:12

• 1 Nephi 15:24

• 2 Nephi 32:3

• Jacob 2:8

• Alma 17:2

• Helaman 15:7–8

• Doktrina ug mga Pakigsaad 11:21–22

Dapita ang mga estudyante sa pagpaambit sa unsay ilang nakaplagan.

• Hain niini nga mga panalangin ang imong labing gitinguha sa imong kinabuhi?

• Sa unsang paagi kini nga mga panalangin makadugang sa atong hugot nga pagtuo sa Ginoo ug sa Iyang ebanghelyo?

Ang mga kasulatan ug ang atong hugot nga pagtuo

Si Elder D. Todd Christofferson sa Korum sa Napulog Duha ka Apostoles mitudlo:

Ang sentrong katuyoan sa tanang kasulatan mao ang pagbusog sa atong mga kalag uban sa hugot nga pagtuo diha sa Dios nga Amahan ug sa Iyang Anak, si Jesukristo—hugot nga pagtuo nga Sila anaa; hugot nga pagtuo nga ang plano sa Amahan alang sa atong pagka-imortal ug kinabuhi nga dayon, hugot nga pagtuo sa Pag-ula ug Pagkabanhaw ni Jesukristo, nga mipalihok niining plano sa kalipay; hugot nga pagtuo sa paghimo sa ebanghelyo ni Jesukristo nga atong pamaagi sa kinabuhi; ug hugot nga pagtuo nga makaila “sa bugtong tinuod nga Dios, ug kang Jesukristo, nga [Iyang] pinadala” (Juan 17:3). (D. Todd Christofferson, “Ang Panalangin sa Kasulatan,” Liahona, Mayo 2010, 34)

1. Isulat ang mga pakisayran sa kasulatan sa duha o tulo ka bersikulo nga adunay lig-on nga epekto diha kanimo ug sa imong pagpamatuod, ilabi na kang Jesukristo o sa Langitnong Amahan. Sa unsang paagi kini nga mga kasulatan nakatabang kanimo? Unsa kaha ang kalahian sa imong kinabuhi kon wala ka pa makabasa niadto nga mga bersikulo?

2. Tun-i ang imong mga kasulatan sulod sa lima ka minuto. Pangitaa ang bisan unsang mga kamatuoran nga makatabang kanimo nga magpabiling matinud-anon ngadto sa Ginoo ug sa Iyang ebanghelyo. Hatagi’g pagtagad ang bisan unsang mga pagbati nga mahimong makatabang usab. Pagsulat mahitungod sa imong kasinatian.

3. I-text o pakig-istorya sa usa ka tawo nga sa imong hunahuna hilabihan ka matinud-anon ngadto ni Ginoong Jesukristo. Pangutan-a kana nga tawo unsa nga tahas ang gihimo sa mga kasulatan sa pagtabang kaniya nga magpabiling matinud-anon.

4. Tan-awa ang usa sa mosunod nga mga bidyo, mangita og mga ehemplo kon sa unsang paagi ang pagtuon sa kasulatan makapanalangin sa atong mga kinabuhi ug makadugang sa atong hugot nga pagtuo sa Langitnong Amahan ug ni Jesukristo. ChurchofJesusChrist.org

Dapita ang pipila ka mga estudyante sa pagpaambit sa ilang mga hunahuna o mga kasinatian. Ang pagpamati sa mga panabot ug mga pagpamatuod gikan sa mga kaedad mahimong usa ka gamhanan nga kasinatian. Ikonsiderar usab ang pagpaambit sa imong kaugalingong mga hunahuna ug pagpamatuod.

Ang imong personal nga pagtuon sa kasulatan

Pamalandongi ang imong pagtuon sa kasulatan. Sa unsang mga paagi nga ang imong hugot nga pagtuo sa Langitnong Amahan ug ni Jesukristo motubo samtang ikaw makugihong magtuon sa pulong sa Dios? Aduna bay bisan unsa nga imong gibati nga gusto sa Ginoo nga imong buhaton aron molambo ang imong pagtuon? Ikonsiderar ang pagsulat og bisan unsa nga mga tumong nga aduna ka diha sa imong journal sa pagtuon.

Mahimong epektibo ang pagpangutana kon adunay mga estudyante nga andam nga mopaambit sa ilang mga tumong sa pagtuon.

Komentaryo ug Background nga Impormasyon

Sa unsang paagi ang mga kasulatan makapalig-on ug makapadayon sa atong hugot nga pagtuo?

Si Elder D. Todd Christofferson sa Korum sa Napulog Duha ka Apostoles mitudlo:

Ang hugot nga pagtuo moabot pinaagi sa pagsaksi sa Balaang Espiritu sa atong mga kalag, Espiritu ngadto sa espiritu, samtang kita maminaw o magbasa sa pulong sa Dios. Ug ang hugot nga pagtuo mohingkod samtang magpadayon kita sa pagbusog sa pulong.

Ang mga asoy sa kasulatan mahitungod sa hugot nga pagtuo sa uban naghatag og kalig-on sa atong kaugalingon. …

Tungod kay kini nagpasabot sa doktrina ni Kristo, ang mga kasulatan giubanan pinaagi sa Balaang Espiritu, kansang tahas mao ang paghatag og saksi sa Amahan ug sa Anak (tan-awa sa 3 Nephi 11:32). Busa, ang pagbasa sa mga kasulatan maoy usa ka paagi nga kita makadawat sa Espiritu Santo. Dayag lang, ang kasulatan gihatag pinaagi sa Espiritu Santo gikan pa sa sinugdanan (tan-awa sa 2 Pedro 1:21; D&C 20:26–27; 68:4), ug ang samang Espiritu makapamatuod sa iyang kamatuoran kanimo ug kanako. Tun-i ang mga kasulatan sa mabinantayon nga paagi, nga may katuyoan. Hinuktuki ug pag-ampo niini. Ang mga kasulatan mga pagpadayag, ug kini modala og dugang pagpadayag. (D. Todd Christofferson, “Ang Panalangin sa Kasulatan,” Liahona, Mayo 2010, 35)

Unsa kaha kon ako nanlimbasog sa pagtuon sa mga kasulatan?

Sa usa ka magasin sa Simbahan, usa ka batan-on misulat, “Nanlimbasog ko sa pagtuon sa mga kasulatan. Nganong importante kaayo ang pagtuon niini?” Aron makakita og propetikanhong mga kinutlo ug mga tubag gikan sa ubang kabatan-onan nga mahimong makatabang, basaha ang “Questions and Answers” nga seksiyon sa New Era, Disyembre 2016, mga pahina 42–43.

Dugang nga mga Kalihokan sa Pagkat-on

Alternatibo nga pagsugod sa leksiyon

Ikonsiderar ang pagdapit sa mga estudyante sa paghanduraw nga sila paingon sa usa ka taas nga biyahe sa lasang. Ipasulti kanila ang pangalan sa tulo ka butang nga ilang gibati nga ilang gikinahanglan aron mabuhi ug ngano. Dayon itandi ang atong kinabuhi ngadto sa usa ka panaw sa espirituhanong pagpakabuhi [survival] ug dapita ang mga estudyante sa pagpaambit og tulo ka butang nga ilang gibati nga makatabang kanato nga makaangkon ug makapadayon sa hugot nga pagtuo kang Jesukristo ug ngano. Ipasabot nga usa sa talagsaong mga himan nga gihatag sa Ginoo kanato aron espirituhanong mabuhi mao ang mga kasulatan, ug dapita ang mga estudyante sa pagpamalandong sa mga pangutana sa pagtimbang-timbang sa kaugalingon nga anaa sa sinugdanan sa leksiyon sa ibabaw.

Ang ehemplo sa mga katawhan sa Zarahemla

Aron mahulagway ang mga pagtulun-an ni Hari Benjamin, dapita ang mga estudyante sa pagkonsiderar sa ehemplo sa katawhan sa Zarahemla. Si Hari Mosiah (amahan ni Hari Benjamin) misunod sa pagdasig sa Ginoo ug nangulo sa iyang mga katawhan pagawas sa ilang yutang natawhan hangtod sila nakakaplag sa mga katawhan sa Zarahemla. Ang duha ka grupo adunay daghan nga mga pagkapareha: gikan sila sa mga tawo nga mibiya sa Jerusalem sa samang panahon ug mibiyahe ngadto sa Amerika. Apan, si Lehi ug ang iyang pamilya nagdala og mga kasulatan uban kanila, samtang ang mga katigulangan sa mga katawhan sa Zarahemla wala. Dapita ang mga estudyante sa pagbasa sa Omni 1:14–17 aron makakita kon sa unsang paagi ang kakulang sa mga kasulatan nakaapekto sa katawhan sa Zarahemla.

Usa ka listahan sa klase sa gamhanan nga mga kasulatan

Human sa pag-ila sa mga baroganan sa leksiyon sa ibabaw, mahimong mohimo ang mga estudyante og listahan sa mga kasulatan nga makatabang sa paglig-on sa ilang hugot nga pagtuo. Ang matag estudyante mahimong mosulat og usa o duha ka bersikulo sa usa ka piraso nga papel, nga mahimong ipapilit sa bongbong o diha sa pisara. O ang magtutudlo mahimong mohiusa sa tanang tubag sa mga estudyante sa usa ka taas nga listahan. Mahimo dayon nga makapangita ang mga estudyante sa pipila ka paborito nga mga bersikulo sa ilang mga klasmeyt ug basahon kini.

Makapadasig nga mga mubo nga sulat

Sa kataposan sa leksiyon, ang matag estudyante mahimong magsulat og mubo nga sulat aron sa pagdasig sa ubang mga estudyante sa pagbasa sa ilang mga kasulatan. Ang mga mubo nga sulat mahimong maglakip sa mga baroganan nga nakat-onan sa mga estudyante gikan niini nga leksiyon ug mga panalangin nga ilang nasinati sa ilang kaugalingong mga kinabuhi.