Jarom–Omni

Ihalad ang Inyong Tibuok nga Kalag kang Jesukristo

Asa ka modangop alang sa giya sa paghimo og importante nga mga pagpili sa kinabuhi? Ang Langitnong Amahan ug si Jesukristo mihatag sa mga kasulatan isip nag-unang tinubdan sa giya ug tabang alang sa tanan. Ang mga basahon ni Jarom ug Omni naglangkob sa nagkalain-laing mga pagtulun-an nga makapanalangin sa imong kinabuhi. Kini nga leksiyon gituyo aron sa pagtabang kanimo sa pagpraktis sa pag-ila ug paggamit sa mga baroganan gikan sa mga kasulatan nga makapanalangin ug makagiya sa imong kinabuhi.

Tabangi ang mga tigkat-on nga makahibalo sa doktrina ug mga baroganan sa ebanghelyo. Ang doktrina usa ka sukaranan, dili mausab nga kamatuoran sa ebanghelyo ni Jesukristo. Ang baroganan usa ka malungtarong kamatuoran nga naggiya sa mga indibidwal sa paghimo og mga desisyon. Ang mga baroganan sa ebanghelyo kay malukpanon ug nagtabang sa mga tawo sa paggamit sa doktrina sa ebanghelyo diha sa ilang mga kinabuhi.

Pagpangandam sa estudyante: Dapita ang mga estudyante sa pagpraktis sa pag-ila sa mga baroganan nga makabenepisyo sa ilang mga kinabuhi samtang nagtuon sa mga kasulatan kada adlaw. Dasiga sila sa pagtambong nga andam sa pagpaambit og bisan usa ka baroganan nga ilang nakaplagan.

Posibleng Kalihokan sa Pagkat-on

Paggiya sa barko

Sa pagsugod sa klase, ikonsiderar ang pagpakita og hulagway sa usa ka barko o pagdrowing og usa diha sa pisara. Sa laing paagi, mahimo nimong ipa-drowing sa usa ka estudyante ang barko diha sa pisara. Mahimo nimo silang pangutan-on unsa nga mga bahin sa barko ang gikinahanglan aron matabangan ang usa ka tripulante sa paglawig paingon sa usa ka destinasyon.

Handurawa ang imong panaw sa kinabuhi nga sama sa usa ka barko nga naglawig sa kadagatan. Unsa ang pipila ka mga butang nga mahimo nimong itandi ngadto sa manobela o timon nga naggiya sa barko diha sa panaw?

Ikonsiderar ang paglista sa mga tubag sa estudyante diha sa pisara.

Si Elder David A. Bednar sa Korum sa Napulog Duha ka Apostoles mihatag og posible nga tubag:

Ang mga baroganan sa ebanghelyo gikinahanglan nako ug ninyo ingon nga ang timon gikinahanglan sa barko. Ang husto nga mga baroganan makapahimo nato sa pagkaplag sa atong dalan ug sa pagbarog nga lig-on, makanunayon, ug dili matarog aron dili mawala ang atong balanse ug mahulog sa naghaguros nga mga unos sa kangitngit ug kalibog sa ulahing mga adlaw. (David A. Bednar, “Ang mga Baroganan sa Akong Ebanghelyo,” Liahona, Mayo 2021, 126)

• Sa unsang paagi nga ang baroganan sa ebanghelyo mahisama sa manobela o timon sa barko?

• Sa sukdanan nga 1 ngadto sa 10, unsa ka kamasaligon nga imong mailhan ang tinuod nga mga baroganan gikan sa mga kasulatan ug magamit kini sa paggiya sa imong kinabuhi? Ngano man?

• Unsa ang imong nahimo sa nangagi nga nakatabang kanimo sa pagkaplag sa mga baroganan diha sa mga kasulatan?

Paminaw og maayo sa mga tubag sa mga estudyante. Ikonsiderar ang pagsulat sa ilang gisulti diha sa pisara aron matabangan ang ilang mga klasmeyt.

Kon gusto nimong rebyohon kon unsaon pag-ila sa mga baroganan, ikonsiderar ang pagbisita pag-usab sa mosunod nga mga leksiyon: “2 Nephi 1” ug “Jacob 4.”

Paggahin og kadiyot sa pagpamalandong sa bag-ohay lang nga baroganan nga imong nailhan atol sa seminary o sa imong personal nga pagtuon sa kasulatan.

• Unsa nga baroganan ang imong napalgan? Sa unsang paagi kana nga baroganan nakapanalangin sa imong kinabuhi?

Ikonsiderar ang pagdapit og pipila ka mga estudyante sa pagpaambit. Paminaw og maayo aron sa pagtimbang-timbang kon unsa ka maayo ang ilang pag-ila sa mga baroganan ug unsaon nimo sila pagtabang nga madugangan ang ilang abilidad atol niini nga leksiyon. Paghunahuna usab nga pahalipayan [congratulate] sila sa ilang pagtuon ug dasiga sila sa pagpadayon.

Pag-ila sa mga baroganan sa ebanghelyo

Ang mga basahon ni Jarom ug Omni naglangkob sa kataposang mga sinulat diha sa gagmay nga mga palid ni Nephi ug naglakip sa daghang mga baroganan nga makapanalangin sa atong mga kinabuhi. Gidawat ni Jarom ang mga palid gikan sa iyang amahan, si Enos, ug girekord ang mga panlimbasog ug mga panalangin sa mga Nephite kapin sa gibanabana mga 40 ka tuig. Dayon iyang gihatag ang mga palid ngadto sa iyang anak nga lalaki nga si Omni. Ang basahon ni Omni naglangkob sa mga sinulat sa lima ka nagkalain-lain nga mga tigtipig sa mga rekord sa Nephite ug gibanabana nga sulod kini sa 190 ka tuig.

Tinoa kon unsa ang labing maayo alang sa imong mga estudyante nga makabaton og makahuluganong kasinatian sa pag-ila sa mga baroganan sa ebanghelyo. Mahimong magtinagsa-tagsa o bahinon ang mga estudyante ngadto sa gagmay nga mga grupo ug magtinabangay sa pag-ila sa mga baroganan sa usa o daghan pa sa mga pakisayran sa kasulatan.

Basaha ang mosunod nga mga tudling sa kasulatan ug pagpraktis sa pag-ila sa mga baroganan sa ebanghelyo nga imong magamit sa imong kinabuhi. Mahimong adunay daghang mga baroganan nga anaa sa matag hugpong sa mga bersikulo. Pag-ila og labing minos usa gikan sa matag tudling sa kasulatan.

1. Jarom 1:3–4

2. Jarom 1:5–9

3. Jarom 1:10–12

4. Omni 1:12–16

5. Omni 1:25–26

Ikonsiderar ang pagdapit sa mga estudyante sa pagsulat sa pipila ka mga baroganan nga ilang nailhan diha sa pisara.

Pagtugyan sa imong kaugalingon ngadto sa Manluluwas ug sa Iyang buhat

Human mailhan ang usa ka baroganan, importante nga mogahin og panahon sa pagpamalandong kon unsa ang gipasabot niini ug sa unsang paagi kini magamit sa imong kinabuhi. Sama pananglit, sa Omni 1:26 tingali nailhan nimo ang mosunod nga baroganan: Kon kita moduol ngadto kang Kristo ug ihalad ang atong tibuok nga mga kalag ngadto Kaniya, kita maluwas.

• Unsa ang pipila ka mga paagi nga mahimo nimong tinguhaon aron mas masabtan ug magamit kini nga baroganan?

Ang mosunod usa ka ideya:

Mahimong makatabang ang pagtandi niini nga baroganan sa usa ka butang nga mahimo nimong ihalad sa uban sa kada-adlaw nga kinabuhi.

• Unsa ang mahimo nimong ihalad sa uban?

• Aduna bay mga paagi nga mahimo nimong ihalad ang bahin lamang sa imong mahatag? Ngano man?

• Kanus-a nimo ihalad ang tanan nimong mahatag? Ngano man?

• Sa unsang paagi kini magamit sa paghalad sa atong tibuok nga mga kalag ngadto kang Jesukristo?

Samtang maminaw ka sa mga tubag sa mga estudyante, ang mosunod nga mga pangutana mahimong makatabang: Unsa sa imong hunahuna ang kahulugan sa paghatag sa imong tibuok nga kalag ngadto kang Jesukristo? Unsa kaha ang makapugong sa usa ka tawo sa hingpit nga paghalad sa iyang kaugalingon ngadto kang Jesukristo?

• Unsa sa imong hunahuna ang gipasabot sa paghalad sa imong tibuok nga kalag ngadto kang Jesukristo?

• Ngano sa imong hunahuna nga ang Ginoo mihangyo kanato sa paghatag ngadto Kaniya sa atong tibuok nga kalag?

• Kinsa ang imong nailhan nga usa ka maayong ehemplo sa usa ka tawo kinsa naningkamot sa paghatag sa ilang tibuok nga kalag ngadto kang Jesukristo? Sa unsang paagi sila napanalanginan sa pagbuhat sa ingon?

ChurchofJesusChrist.org

Ikonsiderar ang pagdrowing og lingin nga nagrepresentar sa imong kinabuhi. I-shade ang bahin sa lingin nga imong gibati nga labing maayo nga nagrepresentar kon unsa ka dako sa imong kaugalingon ang imong gihatag karon ngadto sa Ginoo. Paggahin sa makadiyot sa pagpamalandong kon sa unsang paagi nimo mas hingpit nga mahatag ang imong tibuok nga kalag ngadto kang Jesukristo. Pagsulat og usa o duha ka mga paagi nga ikaw magtinguha sa pagbuhat sa ingon ug sa unsang paagi nga ang pagbuhat niini nga mga butang mahimong makaayo sa imong kinabuhi.

Pagsabot ug Paggamit sa mga Baroganan

Hinumdumi ang mga baroganan nga imong nailhan sa sayo pa gikan ni Jarom ug Omni.

• Hain sa mga baroganan nga imong nailhan ang labing makahuluganon diha kanimo? Ngano man?

• Sa unsang paagi nimo mas masabtan ug magamit kini nga baroganan?

• Sa unsang paagi nga ang pagsunod niini nga baroganan mas makatabang sa paggiya sa imong kinabuhi ngadto kang Jesukristo?

Komentaryo ug Background nga Impormasyon

Omni 1:12–22. Kinsa ang nagkalain-laing mga grupo sa mga tawo nga gihisgotan sa basahon ni Omni?

Diha sa basahon ni Omni, atong nahibaloan ang tulo ka grupo sa mga tawo nga gidala sa Ginoo ngadto sa gisaad nga yuta. Ang unang grupo nga gihisgotan mao ang pamilya ni Lehi ug ang ilang mga kaliwatan. Ang ikaduha nga grupo, gitawag og mga katawhan sa Zarahemla, o ang mga Mulekite, mibiya sa Jerusalem ug mibiyahe ngadto sa America sa gibanabana nga samang panahon sa pamilya ni Lehi. Miapil sila sa mga Nephite ubos sa pagmando ni Hari Mosiah (tan-awa sa Omni 1:19). Ang ikatulo nga grupo mao ang mga Jaredite, kinsa miabot sa gisaad nga yuta dugay na sa wala pa ang unang duha ka grupo. Gilaglag nila ang ilang mga kaugalingon sa mga gubat sibil tali sa 600 ug 300 BC. Ang kataposan nga hari sa mga Jaredite, usa ka tawo nga ginganlan og Coriantumr, naluwas sa kalaglagan ug dayag nga naglatagaw hangtod iyang nakaplagan ang mga katawhan sa Zarahemla sa wala pa mamatay (tan-awa sa Omni 1:21). Ang basahon ni Ether naglangkob sa pagminubo ni Moroni sa talaan sa mga Jaredite.

Omni 1:26. Unsaon nako paghalad ang akong tibuok nga kalag ngadto kang Jesukristo?

Si Elder Jeffrey R. Holland sa Korum sa Napulog Duha ka Apostoles mitudlo:

Matag usa kanato mosunod kang Kristo sa … walay pag-ilin-ilin nga pasalig sa Iyang ebanghelyo. … Sa sinultian sa kabatan-onan karon, kita mopahayag sa atong kaugalingon nga “mapasaligon.” (Jeffrey R. Holland, “Ang Labing Dako nga Katigayonan,” Liahona, Nob. 2021, 8)

Si Elder Neal A. Maxwell (1926–2004) sa Korum sa Napulog Duha ka Apostoles mitudlo sa kahulugan sa paghalad sa atong mga kaugalingon ngadto sa Ginoo:

Ang tinuod, personal nga sakripisyo dili gayod ang pagbutang og hayop sa altar. Hinoon, mao kini ang kaandam sa pagbutang sa hayop nga ania kanato diha sa ibabaw sa altar ug pasagdan kini nga maugdaw! (Neal A. Maxwell, “Deny Yourselves of All Ungodliness,” Ensign, Mayo 1995, 68)

Sa samang hilisgotan, si Elder Maxwell sa kaulahian mitudlo:

Kon itugyan ninyo ang inyong kabubut-on ngadto sa Dios, inyong gihatag Kaniya ang bugtong butang nga inyoha gayod nga mahatag Kaniya nga matawag og inyo gayod. (Neal A. Maxwell, “Remember How Merciful the Lord Hath Been,” Ensign, Mayo 2004, 46)

Si Brother Russell T. Osguthorpe, kanhi Kinatibuk-ang Presidente sa Sunday School, midugang:

Ang paghatag sa atong kabubut-on ngadto sa Ginoo usa ka butang nga gihimo nato kada adlaw. Dili kini panagsa nga buhat. Dili kini ang kataposan, apan ang sinugdanan. Makasulti kita unsay Iyang gusto nga isulti. Makahimo kita unsay Iyang gusto nga himoon. Mahimo kitang usa ka saksi ngadto sa kalibotan sa Hinigugma nga Anak sa Dios—ang tanan tungod kay kita gusto nga mohimo niining mga butanga. Kon kini nga kausaban mahitabo sa atong kasingkasing, ang atong pasalamat sa Pag-ula modako pag-ayo nga kita malig-on tungod niini sa kanunay. (Russell T. Osguthorpe, “I Will Give Myself to Him” [Church Educational System nga debosyonal alang sa mga young adult, Nob. 3, 2013])

Dugang nga mga Kalihokan sa Pagkat-on

Jarom 1:9. “Ang pulong sa Ginoo namatud-an”

Kon makaayo sa mga estudyante ang pagkat-on og dugang pa mahitungod sa mga saad sa Ginoo nga natuman sa ilang mga kinabuhi, dapita sila sa pagbasa sa Jarom 1:5–9, nga mangita sa mga leksiyon nga ilang makat-onan atol sa panahon ni Jarom. Tabangi ang mga estudyante nga makaila og baroganan gikan sa Jarom 1:9, sama sa kon kita mosalig sa Ginoo ug motuman sa Iyang mga sugo, atong maangkon ang Iyang gisaad nga mga panalangin. Ikonsiderar ang mosunod nga mga pangutana:

• Ngano nga importante nga hinumdoman nga ang mga saad sa Dios dili kanunay matuman diha-diha dayon?

• Unsa ang imong nakat-onan kabahin sa Ginoo nga nakahatag kanimo og pagsalig sa Iyang mga saad?

• Unsa ang pipila sa ubang mga ehemplo gikan sa mga kasulatan diin ang mga pulong sa Dios sa kadugayan natuman?

• Kanus-a nga ang Ginoo mipanalangin kanimo o sa usa ka tawo nga imong nailhan tungod sa pagsunod sa Iyang mga sugo?

Isip usa ka ehemplo niini nga baroganan, ikonsiderar ang pagpakita sa bidyo nga“Ipadayon ang Pagpailob” (2:41) o dangop ngadto sa pakigpulong nga may samang ulohan ni Presidente Dieter F. Uchtdorf, kanhi sa Unang Kapangulohan, gikan sa Abril 2010 nga kinatibuk-ang komperensiya.

Omni 1:14–19. Ang pagkabililhon sa kasulatan

Ikonsiderar ang pagdapit sa mga estudyante sa paghunahuna sa mga kaayohan ug mga panalangin nga ilang namatikdan gikan sa kanunay nga pagtuon sa mga kasulatan. Mahimong magtuon ang mga estudyante sa Omni 1:14–19, mangita sa unsay nahitabo sa mga Mulekite tungod kay sila “wala makadala og mga talaan uban kanila” gikan sa Jerusalem (Omni 1:17). Pahinumdomi ang mga estudyante kon unsay gisulti sa Espiritu ngadto ni Nephi—nga ang tibuok nasod mokunhod tungod sa pagkawalay pagtuo kon dili niya makuha ang mga palid nga tumbaga gikan kang Laban (tan-awa sa 1 Nephi 4:13). Ang mga katawhan sa Zarahemla buhi nga mga saksi niana nga pasidaan. Ikonsiderar ang paghangyo sa mga estudyante sa paglista sa pipila ka mga butang nga ang kanunay nga pagtuon sa kasulatan makatabang kanila sa paghinumdom o paghunahuna ug paglista niini diha sa pisara.