“Mosiah 2:1–18: ‘Anaa sa Pag-alagad sa Inyong mga Isigkatawo,’” Manwal sa Magtutudlo sa Basahon ni Mormon (2024)
“Mosiah 2:1–18,” Manwal sa Magtutudlo sa Basahon ni Mormon
Mosiah 2:1–18
“Anaa sa Pag-alagad sa Inyong mga Isigkatawo”
Unsay makapahimo nga usa ka bantogan nga lider? Sa pakigpulong ni Hari Benjamin, atong makita ang iyang klase sa pagkalider ug pagkaehemplo ngadto sa iyang katawhan. Si Hari Benjamin usa ka tawo nga nag-alagad sa Dios pinaagi sa pag-alagad sa iyang katawhan ug pagtudlo kanila sa pag-alagad sa usag usa. Kini nga leksiyon gituyo aron sa pagtabang kanimo nga mas makaalagad sa Dios pinaagi sa mas maayong pag-alagad sa uban.
Pagpalapad sa kasinatian sa pagkat-on.Kon imong dapiton ang mga estudyante sa pagpuyo sa tinuod nga doktrina, gitabangan nimo sila nga mapadayon ang kasinatian sa pagkat-on ngadto sa ilang mga panimalay ug inadlaw nga kinabuhi. Samtang buhaton nila kini, mahimo silang mas madasig sa pagkat-on ug paggamit sa mga pagtulon-an sa ebanghelyo.
Pagpangandam sa estudyante: Dapita ang mga estudyante sa pagpangita og ginagmay nga paagi sa pag-alagad sa laing tawo sa dili pa ang sunod nga leksiyon.
Posibleng Kalihokan sa Pagkat-on
Unsay imong pagsabot sa pag-alagad?
Ang mga estudyante mahimong mobuhat sa mosunod nga kalihokan nga magtinagsa, diha sa gagmay nga mga grupo, o isip usa ka klase. Mahimong makatabang ang paghimo og master list diha sa pisara.
Paggahin og 60 ka segundo sa pagsulat og daghang nagkalain-laing mga paagi nga imong mahunahunaan nga makaalagad ka sa usa ka tawo karong semanaha.
-
Unsa kaha ang makapadasig sa usa ka tawo sa pagbuhat niining mga butanga?
-
Ngano kaha nga ang usa ka tawo magpanuko sa pagbuhat niini nga mga butang?
Ang mosunod nga pagsukod sa kaugalingon makatabang sa mga estudyante nga makaila unsay ilang gibati mahitungod sa pag-alagad ug makadapit sa Espiritu Santo sa pagtudlo kanila. Ikonsiderar ang pagpakita sa pagsukod ug pagdapit sa mga estudyante sa pagpamalandong sa ilang mga tubag. Sa laing paagi, mahimo nimong hatagan ang matag estudyante og kopya sa lista ug dapita sila sa pagranggo sa ilang mga kaugalingon sa sukdanan gikan sa 1 hangtod sa 5 alang sa matag aytem.
Hain kaha sa mosunod ang labing naghulagway sa imong gibati karon mahitungod sa mga kahigayonan sa pag-alagad?
-
Nangita ko og mga kahigayonan sa pag-alagad.
-
Andam ko nga mosanong kon ako hangyoon sa pagtabang.
-
Gusto ko nga moalagad apan maglisod ko nga unahon ang pag-alagad sa akong kinabuhi.
-
Kanunay ko nga maghunahuna nga adunay lain pa nga mobuhat sa pag-alagad.
-
Ganahan ko nga moalagad apan nabalaka kon unsa kahay pagtan-aw sa uban kanako.
-
Ganahan ko nga moalagad apan naglisod sa tinguha nga mamatikdan o mailhan sa uban.
-
Uban pa:
Kon imong gibati nga kini makatabang ug angay, ikonsiderar ang pagdapit sa mga estudyante sa pagpaambit sa ilang gihunahuna o gibati samtang sila mipaubos niini nga pagsukod.
Samtang magtuon ka niini nga leksiyon, hunahunaa kon sa unsang paagi ug ngano kaha nga mas maayo nga moalagad ka niadtong anaa sa imong palibot, sugod karon.
Ehemplo ni Hari Benjamin sa pag-alagad
Sa dihang si Hari Benjamin hapit na mamatay, siya mihangyo sa iyang anak nga lalaki nga si Mosiah sa pagtawag sa mga katawhang Nephite aron siya mamulong ngadto kanila. Nagkapundok sila sa mga pamilya diha sa templo aron maminaw kang Hari Benjamin (tan-awa sa Mosiah 2:1–9).
Basaha ang Mosiah 2:10–14, mangita kon giunsa pag-alagad ni Hari Benjamin ang iyang katawhan.
-
Unsa ang mipatigbabaw kanimo mahitungod ni Hari Benjamin?
Ikonsiderar ang paghimo og lista sa mga tubag sa mga estudyante diha sa pisara.
-
Sa unsang paagi nga ang imong pamilya, eskwelahan, o komunidad mahimong lahi kon ang mga tawo mipuyo sama sa gibuhat ni Hari Benjamin?
Nganong moalagad kita
Basaha ang Mosiah 2:15–18, mangita sa unsay gitudlo ni Hari Benjamin mahitungod sa pag-alagad.
-
Unsa nga mga kamatuoran ang imong maila?
Ang Mosiah 2:17 usa ka tudling sa doktrinal nga kahanas. Ikonsiderar ang pagmarka sa mga tudling sa doktrinal nga kahanas sa lahi nga paagi aron mas dali ra nimo kining makit-an. Mahatagan ka og kahigayonan sa sunod nga leksiyon sa pagpraktis sa paggamit sa doktrina nga gitudlo niini nga tudling ngadto sa usa ka pangutana o sitwasyon.
Usa ka kamatuoran nga atong makat-onan gikan ni Hari Benjamin mao nga “kon kamo anaa sa pag-alagad sa inyong mga isigkatawo kamo anaa lamang sa pag-alagad sa inyong Dios.”
Kini nga bahin sa leksiyon gituyo aron matabangan ang mga estudyante nga makatutok ngadto sa Langitnong Amahan ug ni Jesukristo samtang sila nag-alagad. Ikonsiderar ang mga panginahanglan sa imong mga estudyante ug gamita ang mosunod nga mga materyal o ang uban nga gibati nimo nga nadasig ka nga ipaambit.
Laing kapilian sa pagtabang sa mga estudyante sa pagpamalandong sa Manluluwas mao ang pagdapit kanila sa pagpangita sa koneksiyon tali sa Mosiah 2:18 ug Mateo 20:27–28.
-
Sa unsang paagi kita nag-alagad sa Dios kon kita nag-alagad sa uban?
-
Unsa ang imong nakita niini nga mga bersikulo nga nagpahinumdom kanimo ni Jesukristo?
Basaha ang mosunod nga pamahayag ni Presidente Thomas S. Monson (1927–2018), ug pangitaa unsay iyang gitudlo mahitungod sa relasyon tali sa atong pag-alagad sa uban ug sa atong relasyon sa Dios:
Samtang kita mohangad sa langit, dili kalikayan nga atong makat-onan ang atong responsibilidad sa pagtabang sa gawas. Aron makit-an ang tinuod nga kalipay, kinahanglan nato nga tinguhaon kini sa usa ka pagpunting sa gawas sa atong kaugalingon. Walay nakakat-on sa kahulogan sa pagkinabuhi hangtod nga iyang gitugyan ang iyang kaakuhan sa pag-alagad sa iyang isigkatawo. … Ang Bag-ong Tugon nagtudlo nga imposible ang pagbaton sa husto nga kinaiya ngadto kang Kristo nga dili magbaton ug dili hakog nga kinaiya ngadto sa mga tawo. …
Atong gilantaw ang Manluluwas isip atong ehemplo sa pag-alagad. Bisan kon mianhi Siya dinhi sa yuta isip Anak sa Dios, mapaubsanon Siya nga miserbisyo niadtong naglibot Kaniya. Mianhi Siya gikan sa langit aron mopuyo dinhi sa yuta isip mortal nga tawo ug motukod sa gingharian sa Dios. Ang Iyang mahimayaon nga ebanghelyo miusab sa panghunahuna sa kalibotan. Gipanalanginan Niya ang mga masakiton; gihimo Niya nga ang bakol makalakaw, ang buta makakita, ang bungol makadungog. Gani Iyang gibuhi ang patay. (Thomas S. Monson, “The Joy of Service,” New Era, Okt. 2009, 4, 6)
Mahimo nimong dapiton ang mga estudyante sa hilom nga pagpamalandong ug pagtubag sa mosunod nga pangutana diha sa ilang mga journal.
-
Sa unsang paagi nga ang paghunahuna mahitungod sa ehemplo sa Manluluwas makapadasig kanimo sa pag-alagad sa uban?
Mahimong maayo kini nga kahigayonan nga maghisgot ug dapiton ang mga estudyante sa pagpaambit og personal nga mga kasinatian kabahin sa higayon nga sila nag-alagad o gialagaran. Ikonsiderar ang pagpaambit og personal nga kasinatian.
Dugang nga mga ehemplo makita ubos sa ulohan nga “Unsa ang pipila ka mga ehemplo sa Kristohanong pag-alagad?” diha sa seksiyon nga “Komentaryo ug Background nga Impormasyon”.
-
Sa unsang paagi nga ikaw napanalanginan pinaagi sa pag-alagad sa uban?
-
Sa unsang paagi nga ikaw napanalanginan pinaagi sa pag-alagad sa uban?
Paghimo og plano
Si Sister Sharon Eubank, Unang Magtatambag sa Kinatibuk-ang Kapangulohan sa Relief Society, mipaambit niining importante nga panabot mahitungod sa pag-alagad. Ikonsiderar unsay iyang gitudlo samtang nangandam ka sa paghimo og plano sa pag-alagad sa uban. ChurchofJesusChrist.orgBasaha ang mosunod nga pamahayag.
Kon atong usbon ang atong panglantaw nga aron ang pag-amuma alang sa kabos ug sa timawa maminos mahitungod sa paghatag og mga butang ug mas daghan ang mahitungod sa pagpawala sa kagutom alang sa tawhanong kontak, maghatag og makahuloganong pakigsultihanay, ug magmugna og buhong ug maayong mga relasyon, niana ang Ginoo makapadala kanato sa usa ka dapit. …
… Ug hinumdomi kana, sa samang paagi ingon sa Manluluwas, kamo sa inyong mga kaugalingon mao ang labing maayo nga mga gasa nga inyong ikahatag ngadto sa ubang mga tawo nga nanginahanglan. (Sharon Eubank, “Turning Enemies into Friends” [Brigham Young University forum, Ene. 23, 2018], 6–7, speeches.byu.edu)
-
Unsa ang mipatigbabaw kanimo gikan sa unsay gitudlo ni Sister Eubank mahitungod sa pag-alagad?
Unsa ang pipila ka mga paagi nga mahimo nimo ang iyang gitudlo? Hunahunaa ang imong pamilya, mga higala, o komunidad. Pag-ampo aron sa pagpangayo sa Langitnong Amahan sa pagdasig kanimo mahitungod sa mga paagi nga ikaw mahimong moalagad. Sa imong journal sa pagtuon, pagsulat og mga ngalan sa mga tawo nga mosantop sa hunahuna ug mga ideya kon unsaon nimo sila pagtabang. Pagdesisyon kon kanus-a nimo buhaton ang imong mga impresyon. Tingali adunay usa ka butang nga mahimo nimo karon.