“Mosiah 2:19–41: ‘Bulahan sa Tanan nga mga Butang,’” Manwal sa Magtutudlo sa Basahon ni Mormon (2024)
“Mosiah 2:19–41,” Manwal sa Magtutudlo sa Basahon ni Mormon
Mosiah 2:19–41
“Bulahan sa Tanan nga mga Butang”
Unsa ang imong andam nga buhaton aron makadawat sa walay kataposan nga kalipay? Si Hari Benjamin midapit sa iyang katawhan sa pagtinguha niini nga kalipay pinaagi sa matarong nga pagpuyo ug debosyon ngadto sa Dios. Kini nga leksiyon makatabang kanimo sa pagtinguha “sa bulahan ug sa malipayon nga kahimtang niadto nga naghupot sa mga sugo sa Dios” (Mosiah 2:41).
Paghimo og usa ka aktibo nga palibot sa pagkat-on.Ang pagtabang sa mga estudyante nga mahimong aktibong partisipante sa proseso sa pagkat-on makatabang kanila nga makakat-on og mas lawom. Ikonsiderar ang paggamit og mga estasyon sa pagkat-on aron mabahin ang dako nga mga content ug tugotan ang mga estudyante nga mahimong responsable sa ilang pagkat-on. Samtang ang mga estudyante mopili ug molibot tali sa mga estasyon, tan-awa kadtong nagkinahanglan og indibidwal nga tabang. Seguroha nga ang oras sa klase epektibo nga magamit.
Pagpangandam sa estudyante: Ang mga estudyante mahimong dapiton sa paghuman sa mosunod nga pamahayag ug mangandam sa paghisgot sa ilang tubag: “Ang tinuod ug malungtarong kalipay makit-an pinaagi sa …”
Posibleng Kalihokan sa Pagkat-on
Ipha ang inyong mga panalangin
Kantaha o basaha ang mga pulong sa “Ipha ang Inyong Panalangin” (Mga Himno, nu. 148), o tan-awa ang mosunod nga bidyo. Hunahunaa ang mga pulong ug kon sa unsang paagi kini may kalabotan sa imong kinabuhi.
Ang mga estudyante mahimong maghimo og lista sa ilang mga panalangin diha sa ilang mga journal sa pagtuon nga magtinagsa o diha sa pisara isip usa ka klase. Dapita sila sa pagpaambit unsay ilang namatikdan o nakat-onan gikan sa paglista sa ilang mga panalangin.
Human sa pagtudlo mahitungod sa pag-alagad, si Hari Benjamin midapit sa mga Nephite sa paghunahuna kon sa unsang paagi sila mangita ug makadawat sa mga panalangin sa Langitnong Amahan. Diha sa imong pagtuon karon, pamalandong kon sa unsang paagi ka napanalanginan na sa Ginoo samtang naningkamot ka sa pagtuman sa Iyang mga sugo.
Ikonsiderar ang pagbutang sa mga estudyante ngadto sa tinagutlo matag grupo. I-assign ang matag sakop sa grupo og usa sa mosunod nga mga pangutana nga pamalandongan samtang magbasa sila sa mosunod nga mga bersikulo uban sa ilang grupo. Dayon hangyoa sila sa paghisgot uban sa ilang kagrupo kon unsay ilang nakaplagan.
Basaha ang Mosiah 2:19–25, mangita og tubag sa bisan hain sa mosunod nga mga pangutana:
-
Sa unsang mga paagi gipanalanginan sa Dios ang mga Nephite? Ikonsiderar ang pagmarka sa bisan unsang mga panalangin nga aduna ka nga sama sa ilaha.
-
Unsa ang buhaton sa Dios kon kita nagtuman sa Iyang mga sugo? Unsa ka dali Niya kini buhaton?
-
Unsa ang gitudlo niini nga mga bersikulo kanimo mahitungod sa Dios?
Human sa pagtabang sa mga Nephite nga makaila sa ilang mga panalangin, si Hari Benjamin mipahibalo nga ang iyang anak nga lalaki nga si Mosiah mao ang ilang bag-ong hari. Gipahinumdoman niya sila sa daghang mga paagi nga ang mga tawo mahimong kawad-an sa ilang mga panalangin pinaagi sa panagbingkil, kalapasan, pagrebelde, ug paglapas sa mga sugo sa Dios. Gitudlo usab niya ang mahangtorong mga sangpotanan niadto nga mga binuhatan ug mihatag og saad niadtong kinsa naghupot sa mga sugo. (Tan-awa sa Mosiah 2:29–40.)
Bulahan ug malipayon
Basaha ang Mosiah 2:41, mangita sa saad nga gihatag ni Hari Benjamin.
Ang Mosiah 2:41 usa ka tudling sa doktrinal nga kahanas. Ikonsiderar ang pagmarka sa mga tudling sa doktrinal nga kahanas sa lahi nga paagi aron mas dali ra nimo kining makit-an. Mahatagan ka og kahigayonan sa sunod nga leksiyon sa pagpraktis sa paggamit sa doktrina nga gitudlo niini nga tudling ngadto sa usa ka pangutana o sitwasyon.
-
Unsaon nimo pag-summarize ang bersikulo 41 ngadto sa usa ka baroganan sa kamatuoran?
Usa sa mga saad nga gihimo diha sa Mosiah 2:41 mao nga kon kita naghupot sa mga sugo sa Dios, ang Dios mopanalangin kanato sa temporal ug sa espirituhanon nga paagi. Apan, adunay daghan pa nga atong makat-onan gikan niini nga bersikulo pinaagi sa pagtuon sa matag hugpong sa mga pulong nga gilain.
Ang temporal nga mga panalangin mahimong maglakip sa mga butang sama sa pisikal nga kahimsog, kauswagan, o ubang mga panalangin nga may kalabotan sa mortal nga kinabuhi. Ang espirituhanon nga mga panalangin mao ang mga butang nga walay kataposan. Kini naglakip sa atong pagpamatuod, atong relasyon sa Dios ug sa atong mga pamilya, kapasayloan sa mga sala, giya pinaagi sa Espiritu Santo, ug uban pa.
Ang mosunod nga mga kalihokan mahimong bahinon ngadto sa mga estasyon sa pagkat-on. Mahimong gamiton sa mga estudyante ang gihatag nga mga handout aron sa pagtuyok sa mga kalihokan nga sila ra o diha sa gagmay nga mga grupo. Ikonsiderar ang pagkompleto sa kalihokan A isip usa ka klase aron mapakita isip pananglitan kon unsay gilaoman gikan sa mga estudyante.
[Ang] Bulahan ug [ang] Malipayon nga Kahimtang Niadto nga Nagtuman sa mga Sugo
Manwal sa Magtutudlo sa Basahon ni Mormon (2024)––“Mosiah 2:19–41: ‘Bulahan sa Tanan nga mga Butang’”
Kalihokan A
“maghunahuna sa bulahan ug sa malipayon nga kahimtang niadto nga nagtuman sa mga sugo sa Dios. … Sila bulahan sa tanan nga mga butang, sa temporal ug sa espirituhanon.”
Tan-awa ang lista sa mga panalangin nga imong gibuhat sa sinugdanan niini nga leksiyon. Idugang ang bisan unsang dugang nga mga panalangin nga tingali nahunahunaan. Badlisi ang mga panalangin nga mas temporal ug lingini ang mga panalangin nga mas espirituhanon. Mahimo nimong maamgohan nga ang uban mohaum sa duha ka kategoriya.
-
Unsa nga ebidensiya ang imong nakita sa imong kinabuhi nga kini nga pamahayag nga gikan sa Mosiah 2:41 tinuod?
-
Basaha ang Doktrina ug mga Pakigsaad 130:20–21. Unsa ang imong nakat-onan mahitungod sa relasyon tali sa paghupot sa mga sugo ug sa pagdawat sa mga panalangin sa Dios? Mahimo nimong i-cross-reference o i-link kini nga mga bersikulo ngadto sa Mosiah 2:41.
-
Ngano sa imong hunahuna nga ang Langitnong Amahan nagpanalangin kanato og temporal ug espirituhanon nga mga panalangin? Unsa ang gitudlo niini mahitungod Kaniya?
Kalihokan B
“Kon sila magpabilin nga matinud-anon hangtod sa kataposan sila pagadawaton ngadto sa langit, nga pinaagi niana sila mahimo nga mopuyo uban sa Dios diha sa usa ka kahimtang nga walay kataposan ang kalipay.”
Isulat kini nga pamahayag sa tunga sa blangko nga pahina sa imong journal sa pagtuon, nga magbilin og luna sa palibot niini aron makahimo og mga mubo nga sulat. Lingini ang mga pulong o hugpong sa mga pulong sa pamahayag nga mahinungdanon alang kanimo. Idapat ang usa ka bula sa pulong [word bubble] sa matag gilinginan nga pulong o hugpong sa mga pulong, ug pagsulat og pasabot, may kalabotan nga mga tudling sa kasulatan, o bisan unsa pa nga mga panabot nga tingali aduna ka.
Sama pananglit, kon imong gilinginan ang hugpong sa mga pulong nga “pagadawaton ngadto sa langit,” ang konektado nga bula sa pulong mahimong maglakip sama sa “Ang pagadawaton nagsugyot nga adunay naghulat o nagpaabot kanako. Si Jesus mitudlo nga Siya mangandam og usa ka dapit alang kanato sa langit ug dayon modawat kanato didto (tan-awa sa Juan 14:2–3). Ang akong mahigugmaong langitnong mga ginikanan ug si Jesukristo anaa didto ug modawat kanako kon ako magpabiling matinud-anon.”
Kompletoha ang bula sa pulong alang sa matag pulong o hugpong sa mga pulong nga imong gilinginan. Hatagi og pagtagad ang mga pangutana o mga impresyon nga moabot sa imong hunahuna.
-
Unsa nga mga panabot ang imong nabatonan samtang nagbuhat niini nga kalihokan?
-
Sa unsang paagi kini nga mga panabot makatabang kanimo sa imong kinabuhi karon?
Kalihokan C
“Hinumdumi, hinumdumi nga kini nga mga butang tinuod; kay ang Ginoong Dios namulong niini.”
-
Unsa ang pipila ka mga butang nga dali hinumdoman? Unsang mga butanga ang mas lisod hinumdoman?
Hinumdomi ang imong nakat-onan bahin sa Dios sa imong pagtuon sa Mosiah 2. Basaha ang Mosiah 2:22, mangita sa walay kataposan nga mga kamatuoran mahitungod sa Dios.
-
Unsa ang imong nahibaloan mahitungod sa Dios nga makatabang kanimo sa pagsalig sa Iyang mga saad ug sa paghupot sa Iyang mga sugo?
-
Unsa ang imong mahimo aron mahinumdoman kini mahitungod Kaniya?
© 2024 by Intellectual Reserve, Inc. All rights reserved.
Taposa ang klase pinaagi sa pagdapit sa mga estudyante sa paghisgot kon unsay ilang gibati ug nakat-onan samtang sila nagtuon. Dasiga sila sa pagtinguha sa mga panalangin sa Ginoo pinaagi sa matinud-anong pagkamasulundon ug paghinulsol.